ISOMO LYA 10

Okushanja Izu

Emigani 8:4, 7

OBOFOFI: Oderhe ebintu n’obwalagale onayerekane oku oli waciyumva omu kuyushûla erhi kunyihya izu, omu kushanja izu, n’omu kuderha duba-duba erhi bunyi-bunyi.

OKU WAKAJIRAMWO NTYO:

Onyihye erhi kuyushûla izu. Oyushûle izu ly’osegeza ebintu by’obulagirire na kandi ly’oshumya abumvirhiza bawe. Ojire ntyo amango oli wasoma enderho z’okutwa olubanja ziri omu Lwandiko. Onyihye izu ly’oshumya abumvirhiza bawe babe n’irala ly’okulonza okumanya ebi okola waderha erhi ly’oyerekana ehy’oboba.

Orhayushûlaga izu lyawe bwenene kanji-kanji kuhika abumvirhiza bawe barhanye oku oli wabakalihira. Oyake okurhuma abumvirhiza bawe bakusegezako obwenge enyanya z’okuba nk’oli washarha eteyatre.
Oshanje izu lyawe. Erhi akaba kurhaba kubi okujira ntyo omu lulimi lwinyu, osose izu ly’oyerekana obushagaluke erhi ly’oyerekana obunene erhi obuliri. Onyihye izu lyawe ly’oyerekana okubabala erhi oboba.
Oderhe duba-duba erhi bunyi-bunyi. Oderhe duba-duba ly’oyerekana oku oshagalukire kantu kalebe. Oderhe bunyi-bunyi amango oli waganirira ebintu by’obulagirire.

Orhashanjaga oku liguma oku wakag’iderha ly’orhag’ikanga abumvirhiza bawe. Orhaderhaga duba-duba kuhika abantu bayabirwe okuyumva ebi oli waderha bulya orhali waderha bwinja.