ISOMO LYA 14
Gurhi Rhwakajira ly’Enterekêro Yirhu Eshagalusa Nnâmahanga?
Nk’oku rhwabonaga omw’isomo lya 13, arhali amadîni goshi gashagalusa Nnâmahanga. Cikone ciru akaba ntyo, rhwanaharamya Omulemi wirhu omu njira yakamushagalusa. “Idîni [erhi njira ehi y’okumuharamya]” emushagalusa? (Yakobo 1:27) Ololage ebi Ebibliya eyigirizize.
1. Bici byakarhubwira enjira nyinja y’okuharamya Nnâmahanga?
Bibliya yone yakarhubwira. Yezu abwira Nnâmahanga erhi: “Akanwa kawe kwo okuli.” (Yowane 17:17) Madîni maguma maguma garhayigiriza okuli kuba omu Kanwa ka Nnâmahanga, Bibliya. Ganakayigiriza enyigirizo n’enkomêdu z’abantu. Cikone, Yehova arhasima bala ‘bakavuna irhegeko’ lyage. (Osome Marko 7:9.) Yehova anashagaluke erhi rhumuharhamya omu njira Ebibliya eyerekine n’erhi rhukulikira amahano Ebibliya erhuhîre.
2. Bulya gurhi rhushinganine rhukaharamya Yehova?
Rhushinganine rhucishwekereko Yehova yene bulya ye warhulemaga. (Amafulûlo 4:11) K’okuderha oku rhushinganine rhumuzigire n’okumuharamya yene buzira kukolesa enshushano erhi nsanamu erhi kandi kantu koshi-koshi.—Osome Izaya 42:8.
Enterekêro yirhu eshinganine ebe “ntagatifu n’ey’okusimisa” Yehova. (Abaroma 12:1) K’okuderha oku rhushinganine rhulame nk’oku amakanuni gage g’olugenzi lwinja gadesire. Kwa lwiganyo, balya baba bazigire Yehova, banazigire n’okukenga amakanuni ahizireho okubiyerekire obuhya. Banayake ebijiro bibi, kwa lwiganyo, nk’okunywa ecimoge erhi irhabi, endalwe erhi bindi bintu by’okucilalusa.a
3. Bulya gurhi rhushinganine rhukaharamya Yehova haguma n’abirhu bemezi?
Entimanano zirhu za ngasi mugobe zinarhuhe obulyo bw’ ‘okukuza Nyakasane [Yehova, NWT] . . . omu ndêko.’ (Ennanga 111:1, 2) Njira nguma y’omu njira rhujiramwo ntyo kuba kuyimbira Nnâmahanga irenge. (Osome Ennanga 104:33.) Yehova aba arhubwizire oku rhukaja omu ntimanano bulya aba arhuzigire na kandi bulya aba amanyire oku entimanano zanarhurhabala rhuyish’ishagalukira akalamo ensiku n’amango. Rhunabe na bunguke bunji erhi rhurhimanana haguma lyo rhuhânana omurhima.
HUMBIRIRA LY’OHUGÛKWA
Oyige kwa bulîri ly’ohugûkwa bulya gurhi Yehova arhasima rhukolese ensanamu amango rhuli rhwamuharamya. Obone na gurhi wakaharamyamwo Nnâmahanga.
4. Rhurhashinganini rhukakolesa ensanamu omu nterekêro yirhu
Gurhi rhumanyiremwo oku okujira ntyo kurhakashagalusa Nnâmahanga? Olole EVIDEO, na buzinda oganirire idoso likulikire.
Gurhi byabire kuli bakozi ba Nnâmahanga baguma na baguma ba mîra erhi balonza okumuharamya omu kukolesa ensanamu?
Bantu baguma baguma banakabona nk’okukolesa ensanamu kunarhume bayegera Nnâmahanga. Cikone k’orhabwini oku okujira ntyo kwanarhuma baja kuli naye? Osome Olubungo 20:4-6 n’Ennanga 106:35, 36, na buzinda oganirire aga madoso:
Bintu bihi erhi nsanamu zihi olugibona abantu bali bakolesa omu nterekêro yabo?
Gurhi Yehova aciyumva okubiyerekire okukolesa ensanamu?
Gurhi ociyumvirhe okubiyerekire okukolesa ensanamu?
5. Okuharamya Yehova yene kunarhurhenze omu bujà bw’entanya z’obunywesi
Olole gurhi okuharamya Yehova nk’oku aba ayemire kurhurhenza omu bujà bw’entanya z’obunywesi. Olole EVIDEO.
Osome Ennanga 91:14, na buzinda oganirire er’idoso:
Bici Yehova arhulaganyize arhujirira erhi rhwakayerekana oku rhumuzigire omu kumuharamya yenene?
6. Rhunaharamize Yehova oku ntimanano z’ecigamba
Rhunakuze Yehova n’okuhânana omurhima erhi rhuyimba n’okuhâna amashuzo omu ntimanano. Osome Ennanga 22:22, na buzinda oganirire amadoso gakulikire:
K’onashagalukire okuyumva amashuzo gahânwa oku ntimanano?
K’orhabwini oku kuli kwinja nawe ocirheganye ly’oyishihâna amashuzo oku ntimanano?
7. Yehova anashagaluke bwenene erhi rhubwira abandi kw’ebi rhuli rhwayiga
Hali njira nyinji rhwakabwiramw’abandi kw’ebi rhuli rhwayiga omu Bibliya. Osome Ennanga 9:1 na 34:1, na buzinda oganirire er’idoso:
Kantu kahi wayizire omu Bibliya wakashagalukira okubwira owundi muntu?
HALI ABANTU BADERHA NTYA: “Birhakahashikana okushagalusa Nnâmahanga.”
Gurhi nawe orhanya?
KWA BOFOFI
Rhunashagaluse Omulemi wirhu erhi rhumuharamya yenene, erhi rhumuha obukuze oku ntimanano zirhu z’ecigamba, n’erhi rhubwira abandi kw’ebi rhuli rhwayiga.
Okucikengeza
Bici byakarhurhabala lyo rhumanya enjira nyinja y’okuharamya Nnâmahanga?
Bulya gurhi Yehova yene rhushinganine rhukaharamya?
Bulya gurhi rhushinganine rhukaharamya Yehova haguma n’abandi baba balonzize nabo okumushagalusa?
OCIYIGIRIZE KWA BULÎRI
Omu mwanzi gudesire “Nilishakaacha Kuabudu Sanamu,” olole bulya gurhi mukazi muguma arhengaga omu bujà bw’okuharamya ensanamu.
“Biblia Inabadilisha Maisha ya Watu” (Ilabiro ly’Akalalizi, ly’omu lusiku 1/7/2011)
Ociyigirize ebyakakurhabala ly’okahâna amashuzo oku ntimanano z’ecigamba.
“Umusifu Yehova Katika Kutaniko” (Ilabiro ly’Akalalizi, ly’Omwezi gwa 1, 2019)
Olole obunguke musole muguma gwabire nabo erhi guja oku ntimanano z’ecigamba ciru akaba birhali bilembu kuliye okuhikako.
Bantu banji banakarhanya oku omusalaba ciba cimanyiso c’Obukristu. Cikone, ka rhuba rhushinganine rhukagukolesa omu nterekêro yirhu?
a Eyi myanzi yaganirirwa omu gandi masomo.