ISOMO LYA 04
Nnâmahanga Ye ndi?
Eyi myaka yoshi bene bantu bali okw’igulu, bahikire aha baharamya rhunnâmahanga rhukazi erhi rhulume. N’obu Ebibliya eganirire Nnâmahanga oba ‘mukulu kulusha orhundi rhunnâmahanga rhoshi.’ (2 Enganîro 2:5, NWT) Oyo Nnâmahanga ye ndi? Na bici bimujira abe mukulu kulusha orhundi rhunnâmahanga abantu bakaharamya? Mw’er’isomo, waciyigiriza gurhi Nnâmahanga acimanyisize kuli we.
1. Izino lya Nnâmahanga ye ndi, na bici byakarhuyemeza oku aba alonzize rhulimanye?
Nnâmahanga akolesize Ebibliya ly’acimanyisa kuli rhwe. Adesire ntya: “Nie Yehova. Elyo ly’izino lyani.” (Osome Izaya 42:5, 8, NWT.) Omu Cihabraniya, izino “Yehova” kw’okuderha “Ojira Kube.” Yehova alonzize rhumanye izino lyage. (Olubungo 3:15) Bici byakarhuyemeza ntyo? Ahizire izino lyage kali 7 000 na kulusha omu Bibliya!a Izino Yehova liba lya ‘Nyamuzinda [w’okuli] oba oku nkuba enyanya na hano nshi [erhi hano idako] oku igulu.’—Olushika 4:39.
2. Bici Ebibliya eyerekine lugenda Yehova?
Ebibliya eyerekine oku egarhi ka rhunnâmahanga rhoshi bene bantu baharamya, Yehova yene oba Nnâmahanga w’okuli. Bulya gurhi? Hali birhumire binji. Yehova ajira obukulu boshi, na yene oba “Enyanya Bwenene ly’igulu lyoshi.” (Osome Ennanga 83:18, Bible Mashi.) Aba “Ogala Byoshi,” kw’okuderha oku agwerhe obuhashe bw’okujira ngasi byoshi analonzize okujira. Ye “walemâga ebintu byoshi”—amalunga na ngasi ciremwa cibamw’obuzine ciba hanw’igulu. (Amafulûlo 4:8, 11) Lubero n’ebindi biremwa byoshi, Yehova ayorha ahaba ensiku zoshi, ananagendekera ahaba ensiku n’amango.—Ennanga 90:2.
HUMBIRIRA LY’OHUGÛKWA
Olole olubero luli egarhi k’amazino gw’obukulu ga Nnâmahanga n’izino lyage yenene. Na buzinda oyige omu njira nci na bulya gurhi akufulûlire izino lyage.
3. Nnâmahanga ajira mazino manji ga bukulu, cikone ajira izino liguma lyone
Ly’obona olubero luli egarhi k’izino ly’obukulu ly’omuntu n’izino lyage olole EVIDEO, na buzinda oganirire idoso likulikire.
Lubero luli luhi egarhi k’izino ly’obukulu nka “Nnawirhu” n’izino ly’okuli?
Ebibliya eyerekine oku abantu banakaharamya ba nnâmahanga na ba nnawirhu banji. Osome Ennanga 136:1-3, na buzinda oganirire er’idoso:
“Nyamuzinda okulire banyamuzinda boshi” na “mwâmi w’abâmi” ye ndi?
4. Yehova alonzize omanye izino lyage onakalikolesa
Bici biyerekine oku Yehova alonzize omanye izino lyage? Olole EVIDEO, na buzinda oganirire amadoso gakulikire.
K’orhanyize oku Nnâmahanga alonzize rhumanye izino lyage? Bulya gurhi orhanyize ntyo?
Yehova alonzize abantu bakolese izino lyage. Osome Abaroma 10:13, na buzinda oganirire aga madoso:
K’okukolesa izino lya Nnâmahanga Yehova kuli kwa bulagirire?
Gurhi ociyumva erhi muntu mulebe akengera izino lyawe n’okukuhamagala kuliryo?
Gurhi orhanyize Yehova aciyumva erhi okolesa izino lyage?
5. Yehova alonzize omuyegere
Mukazi muguma w’e Cambogde ohamagalwa Soten adesire oku okuciyigiriza izino lya Nnâmahanga kwamurhabire abe “n’omwishingo munji omu kalamo.” Olole EVIDEO, na buzinda oganirire idoso likulikire.
Nk’oku eyi video eyerekine, gurhi okumanya izino lya Nnâmahanga kwahumirekwo Soten?
Embere mujire obwîra na lebe kuba kwinja okumanya izino lyage. Osome Yakobo 4:8a, na buzinda oganirire aga madoso:
Bici Yehova akulalisire oku ojire?
Gurhi okumanya n’okukolesa izino lya Nnâmahanga kwakakurhabala omuyegere?
HALI ABANTU BADERHA NTYA: “Haba Nnâmahanga muguma yene ciru wakamuhamagala okw’izino onalonzize.”
K’oba oyemire okw’izino lya Nnâmahanga ye Yehova?
Gurhi wakahugûla n’obwalagale oku Nnâmahanga alonzize rhukolese izino lyage?
KWA BOFOFI
Izino lya Nnâmahanga w’okuli ye Yehova. Alonzize rhulimanye rhunalikolese na ntyo rhwanamuyegera.
Okucikengeza
Omu njira nci Yehova ali lubero n’abandi ba nnâmahanga abantu bakaharamya?
Bulya gurhi rhukwanine okukolesa izino lya Nnâmahanga?
Bici biyerekine oku Yehova alonzize omuyegere?
OCIYIGIRIZE KWA BULÎRI
Oyige birhumire birhanu biyerekine oku ho Nnâmahanga aba.
Olole bulya gurhi okuyemera oku ho Nnâmahanga ayorha aba kuli kwa bulagirire.
“Ni Nani Aliyemuumba Mungu?” (Ilabiro ly’Akalalizi, ly’omu lusiku 1/8/2014)
Omanye bulya gurhi rhwanakakolesa izino lya Nnâmahanga, ciru ankaba rhurhamanyiri oku lyakagiderhwa mango mîra.
K’okurhuhamagala Nnâmahanga kuba kwa bulagirire? Olole bulya gurhi rhwanaderha oku ajira izino liguma lyone.
a Erhi wakalonza omanye binji okubiyerekire izino lya Yehova n’okumanya bulya gurhi batafsiri baguma na baguma balikuzire omu Bibliya, olole e Nyongeza A4 omu Biblia—Tafsiri ya Ulimwengu Mupya.