Amadoso G’abantu Basoma Ebitabu Birhu

Erhi omuzihi w’ennanga Daudi ayandika enderho ziri omu Ennanga 61:8, NWT, zidesire oku akuza izino lya Nnâmahanga “ensiku n’amango,” k’arhalusize olugerho erhi kuderha ebi arhakahash’ihikiriza?

Nanga. Ebi Daudi ayandikaga byali by’okunali.

Rhuganirire ebi ayandisire mw’ogo mulongo n’omu milongo eri nk’ogo. Aderha ntya: “Nayimbira izino lyawe irenge ensiku n’amango amango naba ndi nahikiriza ebiragane byani lusiku oku lundi.” “Yagirwa Nyamuzinda, nacîkwitakîra n’omurhima gwani gwoshi, nnamanyise izîno lyawe emyaka n’emyaka.” “Nacîtakîrira izino lyawe ensiku zoshi.”​—Enna. 61:8, NWT; 86:12; 145:1, 2.

Daudi arharhalusagya olugero erhi kurhanya oku arhakafâ ciru n’ehitya. Al’imanyire oku Yehova adesire oku ecaha ca bene bantu cakabadwirhire olufû, anal’iyemire oku aba munya-byaha. (Murh. 3:3, 17-19; Enna. 51:4, 5) Anal’imanyire oku ciru n’abalume Nnâmahanga al’iyemire, nka Abrahamu, Izaki, na Yakobo bali erhi bafîre. Kandi Daudi al’imanyire oku naye akahikire aha afâ. (Enna. 37:25; 39:4) Cikone enderho zage ziri omu lwandiko lw’Ennanga 61:8 ziyerekine oku al’igwerhe irala n’omuhigo gw’okukuza Nnâmahanga ensiku n’amango, k’okuderha ensiku zoshi z’akalamo kage.​—2 Sam. 7:12.

Hali amango Daudi ayandisire lugenda ebyamuhikiraga omu kalamo, nk’oku rhwakabona omu nderho z’enshokolezi z’ecitabu c’Ennanga 18, 51, na 52. Omu Ennanga 23, Daudi aganirire Yehova nka lungere ohâna obulongozi, obulanzi, n’oburhulirize. Daudi naye ali lungere wa ntyo. Na kandi al’ilonzize akolere Nnâmahanga ‘ngasi lusiku lw’obuzine bwage.’​—Enna. 23:6.

Kandi, okengere oku Yehova ye walongozagya Daudi n’iroho lyage litagatifu ly’ayandika ntyo. Ebi ayandikaga bihiziremwo bulebi bunji lugenda ebyakajirikine kasanzi kanji enyuma z’aho. Kwa lwiganyo, omu citabu c’Ennanga 110, Daudi aganirire amango Nnawabo ‘akabwarhire ekulyo [kwa Nnâmahanga],’ omu mpingu n’okuhabwa obuhashe bunji. Ly’ajira bici? Ly’ayandaza abashombanyi ba Nnâmahanga na kandi ly’“ahana amashanja” okw’igulu. Daudi ali shakuluza wa Masiya, wakayishir’irhegeka omu mpingu n’okuba “kuhani ensiku n’amango.” (Enna. 110:1-6, NWT) Yezu ayerekine n’obwalagale oku obulebi buli omu citabu c’Ennanga 110 bwali bumuyerekire n’oku bwakahikirizibwe omu mango gayisha.​—Mt. 22:41-45.

Kobinali, Daudi alongozibwe n’iroho litagatifu ly’ayandika lugenda akasanzi kage n’akasanzi kayisha amango afûlwa n’okushagalukira okukuza Yehova ensiku n’amango. Oku kurhurhabire rhubone oku olwandiko lw’Ennanga 37:10, 11, 29 luganirire ehali zali omu Israheli ya mira n’ehali zayish’iba omw’igulu lyoshi amango gayisha hano Nnâmahanga ahikiriza ebiragane byage.​—Olole ecifungo ca 8 c’ecigabi cidesire, “Wayish’iba Haguma na Nani omu Paradizo” ciri mw’eyi gazeti.

Co cirhumire olwandiko lw’Ennanga 61:8 n’eyindi milongo eri nk’ogo biyerekine oku Daudi al’ilonzize okukuza Yehova omu cihugo ca mira c’e Israheli kuhika oku buzinda bw’akalamo kage. Kandi biyerekine ebi Daudi ayish’iba n’obuhashe bw’okujira hano Yehova amugalulira obuzine.