“Wayish’iba Haguma na Nani omu Paradizo”

1. Kasanzi kasungunu embere Yezu afê, bici abwizire cishumusi ciguma cali eburhambi bwage? (Luka 23:39-43)

YEZU n’ebishumusi bibirhi byali eburhambi bwage bagwerhe malumwa manji bwenene omu mango bakag’iyumva oku olufû lwabo luyegerire. (Lk. 23:32, 33) Ebyo bishumusi byombi byakag’ishekera Yezu, n’oko kuyerekine n’obwalagale oku barhali banafunzi bage. (Mt. 27:44; Mk. 15:32) Cikone muguma mulibo ashanja entanya zage. Aderha ntya: “Yezu, oyish’inkengera han’oja omu Bwami bwawe.” Yezu amushuza erhi: “Kobinali nkubwizire ene, wayish’iba haguma na nani omu Paradizo.” (Osome Luka 23:39-43, NWT.) Nta kantu kayerekine oku eco cishumusi cayemire omwanzi lugenda ‘Obwami bw’empingu’ Yezu akag’ihubiri omu mango g’omukolo gwage hanw’igulu. Na Yezu arhaderhaga ciru n’ehitya oku oyo mulume akajire omu Bwami. (Mt. 4:17) Yezu akag’iganirira Eparadizo yaba hanw’igulu omu mango gayisha. Bulya gurhi rhwakaderha ntyo?

2. Bici biyerekine oku omulume w’ecishumusi waciyunjuzagya ali Muyahudi?

² Nkaba oyo mulume w’ecishumusi waciyunjuzagya ali Muyahudi. Abwira owabo ntya: “K’orhayobohiri Nnâmahanga, weri wahanwa buhane buguma mwe [ na Yezu]?” (Lk. 23:40) Abayahudi bakag’iharamya Nnâmahanga muguma yene, cikone abantu b’amashanja bal’iyemire bannâmahanga banji. (Lub. 20:2, 3; 1 Kr. 8:5, 6) Nk’abo balume b’ebishumusi barhali Bayahudi, nkaba akadosize owabo ntya, “K’orhayobohiri bannâmahanga ciru n’ehitya?” Kandi, Yezu arharhumagwa oku bantu b’amashanja, cikone arhumirwe oku “banabuzi bahezire b’Israheli.” (Mt. 15:24) Nnâmahanga ayeresire Abaisraheli oku ayish’ifûla abantu bafîre. Nkaba oyo mulume w’ecishumusi waciyunjuzagya al’imanyire ntyo, na nk’oku enderho zage ziyerekine, al’ilangalire oku Yehova akafûzire Yezu ly’arhegeka omu Bwami bwa Nnâmahanga. Bibonekine oku oyo mulume al’ilangalire oku Nnâmahanga akamufûzire naye.

3. Erhi Yezu aganirira Eparadizo, nkaba bici eco cishumusi carhanyizeko? Ohugûle. (Omurhondêro 2:15)

³ Nka Muyahudi, eco cishumusi canaba cal’imanyire lugenda Adamu na Eva n’Eparadizo Yehova abahebagamwo. Co cirhumire, canaba cal’ihugûsirwe oku eyo Paradizo Yezu aganiriraga bwayish’iba bustani bwinja bwenene hanw’igulu.​—Osome Omurhondêro 2:15.

4. Bici enderho Yezu abwiraga cishumusi ciguma zishinganine zirhushumye rhurhanyeko?

⁴ Enderho Yezu abwiraga eco cishumusi zishinganine zirhushumye rhurhanye lugenda gurhi akalamo kayish’iyorha omu Paradizo. Oburhegesi bw’omurhûla bwa Mwami Salomoni bwanarhuyigiriza kantu kalebe lugenda Eparadizo. Ebibliya edesire oku Yezu ali mukulu bwenene kulusha Salomoni. Rhwanalangalira oku ayish’ikola haguma n’abantu barhambula haguma naye ly’ajira igulu libe paradizo nyinja bwenene. (Mt. 12:42) Bibonekine n’obwalagale oku abantu b“ebindi bibuzi” bashinganine bamanye ebi bahûnyirwe okujira lyo balama ensiku n’amango omu Paradizo.​—Yn. 10:16.

GURHI AKALAMO KAYISH’IYORHA OMU PARADIZO?

5. Gurhi orhanya akalamo kayish’iyorha omu Paradizo?

⁵ Bici obona omu bwenge erhi orhanya lugenda akalamo omu Paradizo? Nkaba onabone ahantu hinja bwenene hali nk’obustani bw’e Edeni. (Murh. 2:7-9) Nkaba wanakengera obulebi bwa Mikeyo buyerekire abantu ba Nnâmahanga budesire oku “ngasi muguma akazitamala aha murhi gwage gw’omuzabibu, n’aha idako ly’omurhi gwage gw’omuzeti.” (Mik. 4:3, 4) Kandi nkaba wanakengera amandiko g’Ebibliya gadesire oku hanabe biryo binji bwenene. (Enna. 72:16; Iz. 65:21, 22) Erhi wanacibona otamire omu bustani bwinja bwenene, aha burhambi bw’ameza gayunjwire ebiryo binja bwenene. Omu bwenge bwawe, nkaba wanarhanya oku hihusi hy’ehisununu hinja hy’emirhi n’amauwa. Erhi kandi, nkaba wanayumva izu ly’abantu b’omulala n’abîra, kuhiramwo abantu bafûsire, bali basheka banali bashagalukira okugeza akasanzi haguma. Ebyo byoshi birhali bilorho kone. Buzira karhinda, ebintu biri nk’ebyo byayish’ijirikana hanw’igulu. Cikone, omu Paradizo rhwayish’ishagalukira n’okujira omukolo mwinja.

6. Mikolo ehi rhwayish’ijira omu Paradizo? (Olole enfoto.)

⁶ Yehova arhulemire n’obuhashe bw’okushagalukira omukolo gwirhu. (Muh. 2:24) Rhwayish’iba rhugwerhe mikolo minji bwenene omu Burhegesi bwa Kristu bw’Emyaka Cihumbi. Abantu banayokoke amalibuko madarhi n’emiliyoni y’abantu bayish’ifûka bayish’iba balagirire oku mishangi, ebiryo, n’ahantu h’okulama. Okuhikiriza ago malagirire goshi, kwayish’ihûna rhujire mukolo munji cikone gwa kushagalusa. Nk’oku Adamu na Eva bal’ihûnyirwe oku bakahinga omu bustani bal’ilamiremwo, nirhu rhwayish’iba n’omukolo mwinja bwenene gw’okujira igulu libe Paradizo. Kandi, orhanye kunganaci rhwayish’ishagalukira okuyigiriza emiliyoni y’abantu bayish’ifulwa, barhamanyiri binji lugenda Yehova n’omuhigo gwage, n’okurhabala abantu bishwekerezi balamaga embere z’amango ga Yezu lyo bayiga binji lugenda ebyajirikine kurhenga amango bafâga!

7. Bici rhwakayemera n’obwalagale, na bulya gurhi?

⁷ Rhwanayemera n’obwalagale oku omu Paradizo y’amango gayisha, rhwayish’ilama omu murhûla, rhwayish’iba na ngasi kantu rhulagirireko, na nta kavulindi kanabemwo. Bulya gurhi? Bulya Yehova arhuyeresire olwiganyo luyerekine gurhi akalamo kayish’iyorha idako ly’oburhegesi bw’Omugala. Rhwanabona ntyo omu mwanzi guganirire oburhegesi bwa Mwami Salomoni.

OBURHEGESI BWA MWAMI SALOMONI LULI LWIGANYO LW’OKU EPARADIZO YAYISH’IYORHA

8. Gurhi enderho ziri omu lwandiko lw’Ennanga 37:10, 11, 29 zahikiriremwo enyuma z’okuyandikwa na Mwami Daudi? (Olole ecigabi, “Amadoso g’Abantu Basoma Ebitabu Birhu” ciri mw’eyi gazeti.)

⁸ Omu kulongozibwa n’iroho litagatifu, Mwami Daudi ayandisire lugenda gurhi akalamo kakayosire erhi omwami w’obwenge na mwishwekerezi akatamire oku cirhi c’obwami. (Osome Ennanga 37:10, 11, 29.) Kanji-kanji rhunasomere abantu olwandiko lw’Ennanga 37:11 erhi rhubaganirira lugenda Eparadizo y’amango gayisha. Ebyo biyumvikine bulya Yezu agalukire olo lwandiko omu Mahubiri gage g’oku Ntondo, n’oko kuyerekine oku lwahikirira omu mango gayisha. (Mt. 5:5) Cikone kandi, ezo nderho za Daudi zayerekine gurhi akalamo kakayosire omu mango g’oburhegesi bwa Mwami Salomoni. Amango Salomoni al’irhegesire ecihugo c’e Israheli, abantu ba Nnâmahanga bal’igwerhe omurhûla gwago-gwago n’obololôke omu cihugo “cihululamwo amarhà n’obûci.” Nnâmahanga al’idesire ntya: “Mukakaz’ikulikira amarhegeko gani . . . , Nahira omurhûla omu cihugo cinyu, mwakaz’ihunga na ntaye wamufudusa.” (Lev. 20:24; 26:3, 6) Ebyo biragane byahikirire omu mango g’oburhegesi bwa Salomoni. (1 Nga. 22:9; 29:26-28) Kandi Yehova al’ilaganyize oku abantu bagalugalu ‘barhakacihabire.’ (Enna. 37:10) Co cirhumire, enderho ziri omu Ennanga 37:10, 11, 29 zahikirire omu mango ga mira na kandi zahikirira omu mango gayisha.

9. Bici mwamikazi w’e Sheba adesire lugenda oburhegesi bwa Mwami Salomoni?

⁹ Emyanzi lugenda omurhûla n’okuyololoka Abaisraheli bal’ishagalukire amango g’oburhegesi bwa Salomoni yahikako mwamikazi w’e Sheba. Oyo mwamikazi w’omu cihugo ca kuli bwenene abalamira e Yeruzalemu ly’acibonera yene ebi bamubwiraga. (1 Bam. 10:1) Enyuma z’okubona gurhi obwami bwa Salomoni bwal’iyosire, aderha ntya: “Ciru barhal’imbwizire ecihimbi. . . . Ab’omwishingo bali bantu bawe, n’ab’omwishingo bali bambali bawe bayimanga embere zawe ngasi mango lyo bayumvirhiza enderho zawe z’obwenge!” (1 Bam. 10:6-8, NWT) Cikone, oku akalamo kal’iyosire amango g’oburhegesi bwa Salomoni luli lwiganyo lw’ebi Yehova ayish’ijirira bene bantu amango g’oburhegesi bw’Omugala Yezu.

10. Omu njira zihi Yezu ali mukulu kulusha Salomoni?

¹⁰ Yezu ali mukulu kulusha Salomoni omu njira zoshi. Salomoni ali muntu orhali mwimana wajiraga amagosa madarhi ganahikira aha galerhera abakozi ba Nnâmahanga amazibu. Yezu yehe ali Murhegesi mwimana orhajira igosa lyoshi-lyoshi. (Lk. 1:32; Hb. 4:14, 15) Yezu ahimire amarhangulo madarhi Shetani amulerheraga. Ayerekine n’obwalagale oku arhakajira ecaha ciru n’olusiku luguma erhi kujira akantu koshi-koshi kakalerhera bacikala bage bishwekerezi amazibu. Kobinali, luli lukengwa okubona ye Mwami wirhu.

11. Bandi bayish’irhabala Yezu okurhegeka?

¹¹ Yezu ayish’ikola haguma na bantu 144 000 barhambula haguma naye lyo bashibirira bene bantu n’okuhikiriza omuhigo gwa Yehova okubiyerekire igulu. (Maf. 14:1-3) Abo bantu bahikirwe n’amarhangulo na mazibu manji amango bali balume n’abakazi hanw’igulu, co cirhumire bayish’iba barhegesi ba bwonjo. Mukolo guhi abo bantu bayish’irhegeka haguma na Yezu bayish’ijira?

MUKOLO GUHI ABAKRISTU BASHIGE AMAVURHA BAYISH’IJIRA?

12. Mukolo guhi Yehova ayish’iha abantu 144 000?

¹² Omukolo Yezu n’abantu bayish’irhegeka haguma naye bahabirwe guli munji bwenene kulusha omukolo Salomoni ahabagwa. Oyo mwami Muisraheli agwerhe omukolo gw’okushibirira emiliyoni y’abantu omu cihugo ciguma cone. Cikone, abayish’irhegeka omu Bwami bwa Nnâmahanga bayish’iba n’omukolo gw’okushibirira emiliyare y’abantu omw’igulu lyoshi. Olo luli lukengwa lwinja bwenene Yehova ahire abo bantu 144 000!

13. Bici omukolo gw’abantu bayish’irhegeka haguma na Yezu guhiziremwo?

¹³ Aka Yezu, abantu 144 000 bayish’ikola nka bami na bakuhani. (Maf. 5:10) Amango Abaisraheli bakag’irhumikira Irhegeko lya Musa, bwenene abakuhani bo bal’igwerhe omukolo gw’okurhabala abantu lyo bagendekera baba n’amagala minja g’omubiri n’ehali nyinja y’ekiroho. Irhegeko lyali “cizunguzungu c’aminja gayisha,” co cirhumire rhwanaderha oku abantu bayish’irhegeka haguma na Yezu bayish’irhabala oku mukolo gw’okushibirira amalagirire g’omubiri n’ag’ekiroho g’abantu ba Nnâmahanga. (Hb. 10:1) Rhurhamanyiri gurhi abo bami n’abakuhani bayish’ikashambazamwo bacikala b’Obwami bwa Nnâmahanga bali okw’igulu. Ciru Yehova akarhôla mupango guhi, rhwanayemera n’obwalagale oku omu Paradizo yayisha, abantu bayish’ilama okw’igulu bayish’ikahabwa obulongozi balagirireko.​—Maf. 21:3, 4.

BICI ABANTU B’“EBINDI BIBUZI” BAHÛNYIRWE OKUJIRA LYO BALAMA OMU PARADIZO?

14. Lushangi luhi lubaho egarhi k’abantu b’“ebindi bibuzi” na bene wabo Kristu?

¹⁴ Yezu adesire oku abantu bayish’irhegeka haguma naye bo “buso busungunu.” (Lk. 12:32) Kandi aganirire ecigusho ca kabirhi, acihamagala ‘bindi bibuzi.’ Ebyo bigusho byombi bijijire buso buguma bone bugwerhe ecinyabuguma. (Yn. 10:16) Byombi bikola biri byakola haguma, byanagendekera byakola haguma hano igulu liba Paradizo. Kobinali, ago mango abantu b’‘obuso busungunu’ bayish’iba bali omu mpingu n’ab’“ebindi bibuzi” bayish’iba n’obulangalire bw’okushagalukira obuzine bw’ensiku n’amango hanw’igulu. Cikone, hali ebintu abantu b’“ebindi bibuzi” bashinganine bajire ene lyo balama omu Paradizo.

15. (a) Gurhi abantu b’“ebindi bibuzi” balungamwo bene wabo Kristu okuboko? (b) Gurhi wakayigamwo olwiganyo lw’oyu mwene wirhu oli omu magazé? (Olole enfoto.)

¹⁵ Olya mulume w’ecishumusi afîre embere z’okuba n’obulyo bw’okuyerekana oku avuzire omunkwa kw’ebi Yezu amujirire. Lubero n’oko, rhwe bantu b’“ebindi bibuzi” rhugwerhe bulyo bunji bw’okuyerekana gurhi rhuciyumva lugenda Yezu. Kwa lwiganyo, rhunayerekane oku rhumuzigire kugerera oku rhujirira bene wabo bashige amavurha. Yezu adesire oku olubanja ayish’itwira ebindi bibuzi lwayish’iba luyimangire kw’ebi bajirire bene wabo. (Mt. 25:31-40) Rhwanalunga bene wabo Kristu okuboko omu kuba n’obushiru omu mukolo gw’okuhubiri n’okujira abanafunzi. (Mt. 28:18-20) Lyo rhujira ntyo, rhulonzize rhukakolesa bwinja ebikolanwa rhuhabwa by’ifunzo ly’Ebibliya, kwa lwiganyo ecitabu Oshagalukire Akalamo Ensiku n’Amango!. Akaba nt’ifunzo ly’Ebibliya oli walongoza, wanacihiriraho omuhigo gw’okurhondeza mafunzo manji g’Ebibliya nk’oku wakanahasha.

16. Bici rhwakajira ene lyo rhucirheganya okuba bacikala bw’Obwami bwa Nnâmahanga?

¹⁶ Rhurhakalinda mpu amango rhwahika omu Paradizo lyo rhwaba bantu Yehova alonzize bayilamemwo. Kurhangira buno rhwanacihangana okuba bikubagirwa omu nderho n’omu bijiro birhu na ba lugero omu kalamo kirhu. Kandi rhwanaba bishwekerezi kuli Yehova, kuli bene wirhu na bali birhu, na ngasi muguma wirhu anaba mwishwekerezi kuli iba erhi mukage. Erhi rhwakacihangana okurhumikira amakanuni ga Yehova mw’er’igulu ligalugalu, kwanayish’iba kulembu kuli rhwe okugarhumikira omu Paradizo. Na kandi rhwanacihangana okuba n’obulenga n’engeso nyinja lyo rhuyerekana oku rhuli rhwacirheganya okulama ago mango. Olole ecigabi cidesire “K’Ocirheganyize ‘Okuyima Omw’Igulu’?” ciri mw’eyi gazeti.

17. K’ebyaha birhu bya mira bishinganine birhuvune omurhima? Ohugûle.

¹⁷ Kandi rhushinganine rhucihangane lyo rhuyaka entanya z’okucitumuza rhwakaba rhugwerhe enyanya z’ebyaha rhwajiraga omu mango gageraga. Kobinali, rhurhashinganini rhukabona nk’engombôlo erhuhire obulyo bw’‘okujira ebyaha n’oluhinzo.’ (Hb. 10:26-31) Cikone rhwanayemera n’obwalagale oku Yehova arhubabalire omu njira nnene erhi akaba rhwaciyunjuzize okunali ecaha cizibu rhwajiraga, rhwalonza oburhabale ahâna, rhwanashanja olugenzi lwirhu. (Iz. 55:7; Ebj. 3:19) Okengere enderho Yezu abwiraga Abafarizeyi: “Ntal’ihamagala aberu-kweru, ci abanya-byaha.” (Mt. 9:13) Enterekêro y’engombôlo egwerhe obuhashe bw’okufunika ebyaha birhu byoshi.

WANALAMA ENSIKU N’AMANGO OMU PARADIZO

18. Bici wakalonza oyish’iganirira haguma na cirya cishumusi cafâga aha burhambi bwa Yezu?

¹⁸ Rhanya oli omu Paradizo, oli waganira na cirya cishumusi caganizagya Yezu. Kobinali, mwembi mwanayerekana kunganaci muvuzire omunkwa enyanya z’engombôlo Yezu ahânaga. Nkaba wanamubwira akuganirire kwa buliri ebyajirikanaga omu nsa nzinda z’akalamo ka Yezu hanw’igulu na gurhi aciyumvirhe erhi Yezu ashuza kw’ebi amuhûnaga. Nkaba naye anakudosa gurhi akalamo kaliyosire omu nsiku nzinda z’igulu lya Shetani. Lwayishiba lukengwa lunene okuyiga Akanwa ka Nnâmahanga haguma n’abantu bali nk’oyo mulume!​—Ef. 4:22-24.

19. Bulya gurhi akalamo omu Paradizo karhakaba ka kurhamya? (Olole enfoto eri oku cijalada c’eyi gazeti.)

¹⁹ Akalamo omu Paradizo karhayish’ibe ka kurhamya ciru n’ehitya. Ensiku zoshi, hayish’iba abantu rhwakashagalukira okurhimanana nabo n’omukolo mwinja gw’okujira. N’akantu kinja kulusha byoshi, ngasi lusiku rhwayish’ikaba n’obuhashe bw’okumanya Larha wirhu w’omu mpingu bwinja n’okushagalukira ebintu arhuhire. Nta lusiku rhwanabule ebi rhwayiga lugenda Larha wirhu, kandi rhwayish’iba na binji bya kuyiga lugenda obulemi bwage. Oku rhwanagendekere rhwalama, ko n’obuzigire bwirhu kuli Nnâmahanga bwanagendekere bwayushuka. Rhuvuzire Yehova na Yezu omunkwa bwenene bulya barhuhire eciragane ciyerekine oku rhwanalama ensiku n’amango omu Paradizo!