ECIGABI C’OKUYIGA CA 14
LWIMBO 8 Yehova Ye Lwakiro Lwirhu
“Cishogagi . . . oyu Mwakazikolera”
“Niono n’enyumpa yani rhwakolera Nyakasane [Yehova, NWT].”—YOZ. 24:15.
EBI ECI CIGABI CISEGIZE
Carhukengeza ebyarhumaga rhwacishoga okukolera Yehova.
1. Bici rhugwasirwe rhujire lyo rhuba n’omwishingo gw’okunali, na bulya gurhi? (Izaya 48:17, 18)
LARHA wirhu w’omu mpingu aba arhuzigire bwenene, anaba alonzize rhushagalukire akalamo mw’akano kasanzi n’omu kasanzi kayisha. (Muh. 3:12, 13) Arhulemire na buhashe bulebe bwago-bwago, cikone arharhuhâga obuhashe bw’okucirhegeka bwinja rhwenene erhi okucihiriraho amakanuni girhu rhwenene lugenda ebinja n’ebibi. (Muh. 8:9; Yer. 10:23) Aba amanyire oku, lyo rhuba n’omwishingo gw’okunali, rhugwasirwe rhumukolere n’okulama kushimbana n’amakanuni gage.—Osome Izaya 48:17, 18.
2. Bici Shetani aba alonzize rhuyemere, na gurhi Yehova ajijire ly’ayerekana oku Shetani aba munywesi?
2 Shetani aba alonzize rhuyemere oku rhwanaba n’omwishingo buzira Yehova, oku abantu banahasha okucirhegeka bwinja bonene. (Murh. 3:4, 5) Lyo Yehova ayerekana oku Shetani aba munywesi, alesire bene bantu bacirhegeke bonene kasanzi kalebe. Kuli kulembu bwenene okubona amalehe mabi g’oburhegesi bwa bene bantu. Oku bundi, Amandiko galimwo nyiganyo nyinji bwenene z’abalume n’abakazi babire n’akalamo k’omwishingo omu kukolera Yehova. Yezu Kristu ye lwiganyo lwinja bwenene muli bo. Lekagi rhurhang’iganirira ebyarhumaga acishoga okukolera Yehova. Enyuma z’aho, rhwaganirira bulya gurhi rhushinganine okuharamya Larha wirhu w’omu mpingu. Buzinda, rhwaganirira birhumire bilebe birhushumya rhucishoge okukolera Yehova.
EBYARHUMAGA YEZU ACISHOGA OKUKOLERA YEHOVA
3. Bici Yezu abwizirwe oku ahâbwa, na bici acishozire okujira?
3 Amango Yezu ali hanw’igulu, al’igwasirwe acishoge ndi akakolire. Kasanzi kasungunu enyuma z’okubatizibwa kwa Yezu, Shetani amubwira oku amuha amami goshi g’er’igulu akamujirira cijiro ciguma cone c’okumuharamya. Yezu amushuza erhi: “Rhengaha, shetani! bulya kuyandisirwe, mpu: Wakaz’iharâmya Nyakasane Nyamuzinda wawe, onakamukolera yenene.” (Mt. 4:8-10) Bici byarhumaga Yezu acishoga okujira ntyo? Rhuganirire birhumire bilebe.
4-5. Birhumire bilebe bihi byarhumaga Yezu acishoga okukolera Yehova?
4 Ecirhumire c’obulagirire bwenene carhumaga Yezu acishoga okukolera Yehova buli buzigire; Yezu aba azigire Ishe bwenene bwenene. (Yn. 14:31) Na kandi, Yezu anakolere Yehova bulya amanyire oku ko kantu kashinganine okujirwa. (Yn. 8:28, 29; Maf. 4:11) Aba amanyire oku Yehova yo Nshôko y’obuzine n’oku aba muhânyi na wa kulangalirwa. (Enna. 33:4; 36:9; Yk. 1:17) Ensiku zoshi Yehova abwizire Yezu okuli ye wanamuhâga ebi al’igwerhe byoshi. (Yn. 1:14) Lubero n’oko, Shetani adwirhe olufû. Aba munywesi oshumibwa n’irala ly’okuba na binji anaba wa kucikaliza. (Yn. 8:44) Yezu al’imanyire Yehova bwinja, anal’imanyire Shetani bwinja, arhalonzagya ciru n’ehitya okuba aka Shetani n’okugomera Yehova.—Fl. 2:5-8.
5 Ecindi cirhumire carhumaga Yezu acishoga okukolera Yehova, kwali kurhanya kw’ebi omukolo gwage gw’obwishwekerezi gwakahikirizize. (Hb. 12:2) Al’imanyire oku erhi akabêzire mwishwekerezi, akacêsize izino ly’Ishe anahashise okuyusa amalibuko goshi galerhagwa na Shetani.
BULYA GURHI RHUSHINGANINE RHUHARAMYE YEHOVA?
6-7. Bulya gurhi bantu banji ene barhakolera Yehova, cikone bulya gurhi ye rhushinganine rhuharamye?
6 Bantu banji ene barhakolera Yehova bulya barhasag’ihikira okumanya amorhere gage minja bwenene barhanaba bamanyire ebintu binja byoshi abajirire. Ko byali ntyo lugenda abantu entumwa Paolo yahâga obuhamirizi e Atene.—Ebj. 17:19, 20, 30, 34.
7 Paolo ahugûlira abumvirhiza bage oku Mungu w’okuli “ye shoboza boshi obuzine n’omûka n’ebindi byoshi byoshi.” Ayushûla ntya: “Ye rhukûlamwo obuzine, n’okugenda n’okubaho.” Mungu ye Mulemi, ye “warhenzagya abantu boshi oku muntu muguma,” co cirhumire yene rhushinganine rhuharamye.—Ebj. 17:25, 26, 28.
8. Bici Yehova arhakajira ciru n’ehitya? Ohugûle.
8 Bulya Yehova ye Mulemi ye na Murhegesi Mukulu w’igulu lyoshi n’amalunga, akasezize abantu boshi bamuharamye. Cikone nta mango Yehova anajire ntyo ciru n’ehitya. Lubero n’oko, arhuhîre ebiyerekine n’obwalagale oku ho aba n’oku aba azigire ngasi muguma wirhu bwenene. Alonzize bantu banji bwenene nk’oku byakanahashikana babe bîra bage ensiku n’amango. (1 Tm. 2:3, 4) Co cirhumire Yehova anarhukomereze okuyigiriza abandi lugenda omuhigo gwage n’okubabwira lugenda ebintu binja ayish’ijirira bene bantu. (Mt. 10:11-13; 28:19, 20) Arhupanzire omu bigamba anahiraho omupango ly’abagula b’obuzigire bakarhushibirira.—Ebj. 20:28.
9. Omu njira zihi Yehova ayeresire abantu boshi obuzigire?
9 Obuzigire bwago-bwago bwa Yehova bunabonekane kugerera oku ajirira abantu balahira okubaho kwage. Orhanye kw’ebi: Omu myaka myandu y’akalamo ka bene bantu, bantu banji bwenene bacishozire okulama kushimbana n’amakanuni gabo bonene lugenda ebinja n’ebibi. Ciru akaba ntyo, Yehova abahîre ebi balagirireko byoshi lyo bagendekera balama n’okushagalukira obuzine. (Mt. 5:44, 45; Ebj. 14:16, 17) Abahîre obuhashe bw’okuba n’abîra babazigire, okuba n’omulala, n’okuba n’obunguke omu mukolo gwabo muzibu. (Enna. 127:3; Muh. 2:24) Hali bintu binji biyerekine n’obwalagale oku Larha wirhu w’omu mpingu aba azigire abantu boshi. (Lub. 34:6) Lekagi rhucikengeze birhumire bilebe birhushumya rhucishoge okukolera Yehova n’oku agisha abacishoga okumukolera.
EBIRHUMA RHUCISHOGA OKUKOLERA YEHOVA
10. (a) Ecirhumire cirhangiriza cirhushumya rhukolere Yehova ciba cihi? (Mateyo 22:37) (b) Gurhi wayungusiremwo n’obulembedu bwa Yehova? (Ennanga 103:13, 14)
10 Aka Yezu, ecirhumire cirhangiriza cirhushumya rhukolere Yehova buba buzigire bunji rhujira kuli Ye. (Osome Mateyo 22:37.) Rhunayegere Yehova erhi rhuyiga lugenda amorhere gage. Kwa lwiganyo, orhanye oku bulembedu Yehova arhuyeresa. Ciru akaba Abaisraheli kanji-kanji barhakag’irhumikira Yehova, abayinginga ntya: “Yaga ngasi muguma aleke engeso zage mbi.” (Yer. 18:11, Mashi Bible) Na kandi, ciru akaba rhunajire magosa manji, Yehova anarhubabalire bulya anakengere oku rhuba luvu erhi bidaka. (Osome Ennanga 103:13, 14.) Erhi orhanya bwenene oku bulembedu bwa Yehova n’oku gandi morhere gage minja bwenene, k’oko kurhakushumya olonze okumukolera ensiku n’amango?
11. Bindi birhumire bilebe bihi birhuma rhwacishoga okukolera Larha wirhu w’omu mpingu?
11 Kandi rhunashumibwe okukolera Yehova bulya ko kantu kinja kashinganine okujirwa. (Mt. 4:10) Na kandi rhuba rhumanyire ebi omukolo gwirhu gw’obwishwekerezi guhikiriza. Erhi rhukolera Yehova n’obwishwekerezi, rhunacêse izino lyage, rhunayerekane oku Ibilisi aba munywesi, rhunanashagaluse Larha wirhu. N’erhi rhucishoga okukolera Yehove ene, rhunabe n’obulangalire bw’okumukolera ensiku n’amango!—Yn. 17:3.
12-13. Bici rhuciyigirizize kugerera olwiganyo lwa Jane na Pam?
12 Amango rhuciri barhorho, rhwanayiga okuzigira Yehova bwenene, n’obuzigire bwirhu kuli ye bwanagendekera bwasêra amango rhuli rhwakula. Rhuganirire olwiganyo lwa Jane na Pam,a banyere babirhi ba nda nguma. Jane al’igwerhe myaka 11 na Pam al’igwerhe myaka 10 erhi barhondera bayiga Ebibliya. Ciru akaba ababusi ba Jane na Pam barhal’isimisibwe n’ifunzo, babaha oluhusa lw’okukacilunga n’Abahamirizi ba Yehova, caziga kone bakaja omu misa haguma n’omulala oku buzinda bw’omugobe. Jane adesire ntya: “Ebi Abahamirizi ba Yehova banyigirizagya kurhenga omu Bibliya, byantabire okuhagalika amashumi g’abîra bani g’okunywa amafumu g’okucilalusa n’okucihira omu lugenzi lw’eby’enshonyi.”
13 Erhi abo banyere bahika omu myaka yabo mizinda y’omushûko, bombi baba bahubiri. Buzinda, barhondera omukolo gw’obupainiya erhi banali bashibirira ababusi babo bal’ikola bashosi. Jane ahugwîre oku aciyumva lugenda ebi Yehova abajirire byoshi, adesire ntya: “Nacibwinire oku Yehova anashibirire n’obwishwekerezi abîra bage n’oku, nk’oku olwandiko lwa 2 Timoteyo 2:19 ludesire, ‘Nyakasane [Yehova, NWT] ayishi abage.’” Buzira karhinda, Yehova anashibirire abacishoga okumuzigira n’okumukolera!
14. Gurhi enderho zirhu n’ebijiro birhu birhabala okucêsa izino lya Yehova? (Olole n’enfoto.)
14 Rhulonzize rhurhabale okucêsa izino lya Yehova. Orhanye kw’aka kanga: Ogwerhe omwîra wawe wa hofi-hofi oba wa lukogo, muhânyi, na wa kubabalira. Lusiku luguma oyumve muntu muguma ashobeke oyo mwîra wawe oku aba muminya arhanaba mwikubagirwa. Gurhi wakajira? Wanamuhalira. Ko n’oko, erhi Shetani n’abali idako ly’oburhegesi bwage balonza okusheregeza Yehova irenge omu kulumiza obunywesi lugenda Ye, rhunacihire eluhya omu kuderha okuli lugenda Yehova n’okuhalira izino lyage n’obushiru. (Enna. 34:1; Iz. 43:10) Rhunayerekane kugerera enderho zirhu n’ebijiro birhu oku rhulonzize okukolera Yehova n’obuguma-guma bwirhu boshi.
Ka warhabala okucêsa izino lya Yehova? (Olole ecifungo ca 14)b
15. Omu kujira empindûlo omu kalamo kage, bunguke buhi entumwa Paolo yabire nabo? (Abafilipi 3:7, 8)
15 Rhunabe babidu okujira empindûlo omu kalamo kirhu lyo rhushagalusa Yehova erhi lyo rhujira binji omu mukolo gwage. Kwa lwiganyo, entumwa Paolo yacishozire okuleka okumanyikana bwenene omu lubaga lwage ly’akulikira Kristu n’okukolera Yehova. (Gl. 1:14) Enyanya z’oko, aba na migisho minji omu kalamo kage anahâbwa obulyo bw’okurhegeka haguma na Kristu omu mpingu. Arhaciyunjuzagya ciru n’ehitya enyanya z’omuhigo gwage gw’okukolera Yehova, na nirhu rhurhakaciyunjuza ciru n’ehitya.—Osome Abafilipi 3:7, 8.
16. Bici olwiganyo lwa Julia lurhuyigirizize? (Olole n’enfoto.)
16 Erhi rhwakajira okukolera Yehova kabe ko kantu k’obulagirire bwenene omu kalamo kirhu, anarhugisha ene n’omu mango gayisha. Rhuganirire olwiganyo lwa mwali wirhu muguma ohamagalwa Julia. Embere Julia ayige okuli, akag’iyimba omu korale y’akanisa kurhenga amango aciri murho. Mwimbiza muguma w’obulenga ahugûkwa oku oyo munyere al’igwerhe buhashe bunji bw’okuyimba anamukomereza. Enyuma za kasanzi kasungunu, Julia aba mwimbiza omanyikine bwenene anakayimbira omu nyumpa zimanyikine bwenene. Erhi aba ali asomera oku masomo g’emiziki gamanyikine bwenene, owabo mwanafunzi amuyigiriza lugenda Mungu anamuhugûlira oku izino lya Mungu ye Yehova. Kasanzi kasungunu enyuma z’aho, Julia arhondera ayiga Ebibliya kabirhi omu mugobe. Buzinda, Julia ahiga okusegeza obwenge oku mukolo gwa Yehova, ahali h’okushimbulira akasi k’omuziki. Ogo muhigo gurhali mulembu. Adesire ntya: “Bantu banji bakambwira oku ndi nashereza engalo yani. Cikone, nal’ilonzize nkolese akalamo kani koshi omu kukolera Yehova.” Gurhi aciyumva ene lugenda ogo muhigo arhôlaga hamagera myaka elushire 30? Ashubir’iderha ntya: “Ngwerhe omurhûla omu bukengere, nanangalire oku omu mango gayisha, Yehova ahikiriza ngasi irala liri omu murhima gwani.”—Enna. 145:16.
Amango okukolera Yehova ko kantu k’obulagirire bwenene omu kalamo kirhu, rhunashagalukire akalamo kinja bwenene kakahashikana (Olole ecifungo ca 16)c
OGENDEKERE WAKOLERA YEHOVA
17. Gurhi okumanya oku rhuyegerire bwenene obuzinda bw’er’igulu kurhabire abacishozire okukolera Mungu n’abarhacicishoga okujira ntyo?
17 Rhulamire omu kasanzi kahûnyire okujira duba-duba. Entumwa Paolo yayandisire ntya: “Hacisigîre hisanzi hitya hyone, olya wàyisha ayishe, arhanacilegerere.” (Hb. 10:37) Gurhi oko kurhurhabiremwo? Kantu kaguma, rhuhugûsirwe oku akasanzi kasigire ly’abantu bacishoga okukolera Yehova kakola kasungunu. (1 Kr. 7:29) N’erhi akaba rhwacishozire okukolera Mungu, rhumanyire oku ciru akaba rhugwasirwe rhulembere amalibuko, rhwagalembera “hisanzi hitya hyône.”
18. Bici Yezu na Yehova balonzize rhujire?
18 Yezu arhahâga abanafunzi bage omurhima oku bamushimbe kone cikone abahîre omurhima oku bagendekere bamushimba. (Mt. 16:24) Co cirhumire erhi akaba rhugwerhe myaka minji rhuli rhwakolera Yehova, rhuhige okugendekera rhwajira ntyo ensiku zoshi. Rhugwasirwe rhucihangane bwenene lyo rhugendekera rhwalama kushimbana n’ogo muhigo gwirhu gw’okukolera Yehova. Nkaba kwanaba kuzibu okujira ntyo, cikone ciru n’ene, okumukolera kwanarhulerhera omwishingo na migisho minji!—Enna. 35:27.
19. Bici rhwakaciyigiriza kugerera ebyahikiraga Gene?
19 Bantu baguma na baguma banarhanye oku okukolera Yehova kuba kuhûnyire baciyime binji bwenene. Akaba oli musole, k’onarhanye oku erhi wakakolera Yehova wanabulirwa na kantu kalebe? Mwene wirhu muguma ociri musole ohamagalwa Gene adesire ntya: “Nakag’irhanya oku okuba Muhamirizi wa Yehova kunayime omuntu oluhuma. Byakag’ibonekana nka banji omu bana nakulaga haguma nabo bakag’ishagalukira ebintu nk’okujira amadinye, okujira obwîra n’abana-nyere, erhi okusharha emicezo y’evideo eyerekine eby’obuminya, amango niehe nal’igwasirwe nkageza akasanzi kani oku ntimanano n’omu mukolo gw’amahubiri.” Malehe gani entanya za ntyo zadwirhire Gene? Adesire ntya: “Narhondera nalama akalamo k’obulyalya, nanacishagalusa kasanzi kalebe. Cikone, oko kurhanderheraga omwishingo gw’okunali. Narhondera narhanya oku nyigirizo z’Ebibliya nali namaleka nanahiga okukolera Yehova n’omurhima goshi. Kurhenga ago mango, nambone nka Yehova ashuzize oku ngasi isala lyani.”
20. Bici rhushinganine rhuhige okujira?
20 Muzihi muguma w’ennanga ayimbire Yehova ntya: “Ow’obushagaluke ali muntu ocishozire n’okumulerha hofi ly’alama omu ngo zawe.” (Enna. 65:4, NWT) Lekagi rhuhige aka Yozwe waderhaga ntya: “Niono n’enyumpa yani rhwakolera Nyakasane [Yehova, NWT].”—Yoz. 24:15.
LWIMBO 28 Okuba Mwîra wa Yehova
a Mazino maguma na maguma gashanjirwe.
b AMAHUGÛLO G’ENFOTO: Mukazi muguma amayumva ebi abarhuhagalika bali baderha embuga z’aha entimanano nkulu eri yajirirwa. Enyuma z’aho, amayegera eprezantware n’okuyumva okuli kw’Ebibliya.
c AMAHUGÛLO G’ENFOTO: Enfoto egalukire ebyabire omu kalamo ka Julia lugenda omuhigo arhôlaga gw’okusegeza obwenge oku mukolo gwa Yehova.