ECIGABI C’OKUYIGA CA 20
LWIMBO 7 Yehova Ye Misi Yani
Yehova Akuha Oburhulirize
“Ayagirwe . . . Larha w’obwonjo na Nyamuzinda wa ngasi burhulirize.”—2 KR. 1:3.
EBI ECI CIGABI CISEGIZE
Amasomo rhwakaciyigiriza kugerera oku Yehova arhulirizagyamwo Abayahudi bal’ihêsirwe mpira.
1. Oganirire akanga k’Abayahudi bal’ihêsirwe mpira.
ORHANYE gurhi Abayahudi bal’ihêsirwe mpira e Babiloni bagwasirwe babe baciyumvirhe. Babwine oku ecihugo cabo casherezibagwa. Enyanya z’ebyaha byabo n’ebya bashakuluza babo, barhenzibwa omu nyumpa zabo banahêkwa omu cindi cihugo. (2 Nga. 36:15, 16, 20, 21) Kobinali, omu Babiloni abo Bayahudi bal’ihêsirwe mpira bal’igwerhe luhuma lulebe lw’okuhikiriza emikolo yabo ya ngasi lusiku. (Yer. 29:4-7) Ciru akaba ntyo, omu Babiloni akalamo karhali kalembu, arhanali ko kalamo bakacishozire okulama. Gurhi bakag’iciyumva enyanya z’akanga balimwo? Muguma muli bo adesire ntya: “Amango rhwali e Babeli oku burhambi bw’enyishi rhwatamala rhwakâlaka erhi rhwamâkengêra Sayuni.” (Enna. 137:1, Mashi Bible) Abo bahêkagwa mpira bal’ivunisire omurhima bal’ilagirire oku burhulirize, cikone ngahi bakabukuzire?
2-3. (a) Bici Yehova ajirire Abayahudi bal’ihêsirwe mpira? (b) Bici rhwaganirira mw’eci cigabi?
2 Yehova ye “Nyamuzinda wa ngasi burhulirize.” (2 Kr. 1:3) Bulya aba Mungu w’obuzigire, anashagalukire okurhuliriza abantu boshi bamuyegera. Yehova al’imanyire oku bantu baguma na baguma omu bahêkagwa mpira bakayemire obuhane bwage n’okugaluka emunda ali. (Iz. 59:20) Co cirhumire, myaka elushire 100 embere Abayahudi bahêkwe mpira, alongoza omulebi Izaya ly’ayandika ecitabu cihamagalwa okw’izino lyage. Gurhi ecitabu ca Izaya cakabarhabiremwo? Izaya adesire ntya: “‘Murhulîrize, murhûlîrize olubaga lwani,’ kwo adesire Nyamuzinda winyu.” (Iz. 40:1) Kobinali, kugerera ebi Izaya ayandikaga, Yehova ahîre Abayahudi bal’ihêsirwe mpira oburhulirize bal’ilagirireko.
3 Ak’abo Bayahudi bal’ihêsirwe mpira, nirhu rhuba rhulagirire oku burhulirize mango oku gandi. Mw’eci cigabi, rhwaganirira njira isharhu Yehova arhulirizizemwo Abayahudi bal’ihêsirwe mpira: (1) Al’ilaganyize oku ababalira abanya-byaha baciyunjuzize, (2) ahîre olubaga lwage obulangalire, na (3) abarhabire lyo barhag’iyoboha. Omu kuganirira ebyo bintu bisharhu Yehova ajiraga, rhwabona gurhi rhwakayunguka kugerera enderho za Yehova z’okurhuliriza.
YEHOVA ANARHUBABALIRE
4. Gurhi Yehova ayerekinemwo oku aba Nyamuzinda w’obwonjo? (Izaya 55:7)
4 Yehova aba “Larha w’obwonjo.” (2 Kr. 1:3) Ayerekine obo borhere erhi ahiga okubabalira Abayahudi bahêkagwa mpira bal’iciyunjuzize. (Osome Izaya 55:7.) Adesire ntya: “Nakufa bwonjo erhi buzigire bwani bw’ensiku n’amango burhuma.” (Iz. 54:8) Gurhi Yehova akayerekinemwo obwonjo bwage? Ciru akaba Abayahudi bakalibuzibwe enyanya z’ebijiro byabo, Yehova alaganya oku barhakabêzire e Babiloni ensiku n’amango. Bakabêzire eyo munda kasanzi kalebe kone. (Iz. 40:2) Ezo nderho zakarhulirizize bwenene n’okuha omurhima abakaciyunjuzize muli bo enyuma z’okuhêkwa e Babiloni!
5. Bulya gurhi rhugwerhe birhumire binji, kulusha ebi Abayahudi bal’ihêsirwe mpira bagwerhe, by’okuyemera oku Yehova anababalire ebyaha birhu?
5 Bici rhuciyigirizize? Yehova aba mubidu okubabalira abakozi bage omu njira nnene. Ene, rhugwerhe birhumire binji by’okuyemera ntyo kulusha ebi Abayahudi bal’ihêsirwe mpira bagwerhe. Bulya gurhi? Bulya rhumanyire ebi Yehova ajijire ly’ababalira ebyaha birhu. Magana g’emyaka enyuma z’obulebi bwa Izaya, Yehova arhuma Omugala muzigirwa okw’igulu ly’ahâna engombôlo oku banya-byaha boshi baciyunjuzize. Enterekêro y’engombôlo ya Yezu yo erhuma ebyaha ‘byazazibwa’ erhi kurhenzibwa loshi-loshi. (Ebj. 3:19; Iz. 1:18; Ef. 1:7) Kobinali, rhunakolere Nyamuzinda w’obwonjo bwenene!
6. Gurhi rhwakayungukamwo omu kusegeza obwenge oku bwonjo bwa Yehova? (Olole n’enfoto.)
6 Enderho za Yehova zalongozibagwa n’iroho lyage ziri omu Izaya 55:7, zanarhurhuliriza erhi akaba rhuzidohirwe n’entanya z’okucitumuza. Ciru n’enyuma z’okuciyunjuza, baguma na baguma muli rhwe banagendekera bacitumuza enyanya z’igosa bajiraga omu mango gageraga. Byanaba ntyo bwenene erhi akaba rhuciri rhwahikirwa n’amazibu enyanya z’igosa rhwajiraga. Ciru akaba ntyo, erhi akaba rhwahungamire ebyaha birhu rhwanashanja olugenzi lwirhu, rhwanayemera n’obwalagale oku Yehova arhubabalire. N’erhi Yehova arhubabalira, arhacikengera ecaha cirhu. (Oshushanye na Yeremiya 31:34.) Co cirhumire, bulya Yehova arhasegeza obwenge oku byaha birhu bya mîra, nirhu rhurhashinganini rhujire ntyo. Ebi rhuli rhwajira buno byo biba bya bulagirire kuli Yehova, c’arhali amagosa rhwajiraga omu mango gageraga. (Eze. 33:14-16) Hano hofi-hofi, Larha wirhu w’obwonjo bunji arhurhengeza loshi-loshi amazibu garhuhikira enyanya z’amagosa girhu.
Ebi rhuli rhwajira buno byo biba bya bulagirire kuli Yehova, c’arhali amagosa rhwajiraga omu mango gageraga (Olole ecifungo ca 6)
7. Bici byakarhushumya rhulonze oburhabale erhi akaba rhwafulisire ecaha?
7 Gurhi rhushinganine rhujire erhi akaba ezamiri yirhu eri yarhutumuza enyanya z’okufulika ecaha cizibu? Ebibliya erhuhîre omurhima rhuhûne abagula oburhabale. (Yk. 5:14, 15) Cikone, hali amango kwakaba kuzibu kuli rhwe okubabwira ebi rhwajijire. Ciru akaba ntyo, rhwanashumibwa okuganiza abo balume bishwekerezi erhi akaba rhuciyunjuzize, n’erhi rhwakakengera oku Yehova n’abo balume ahizireho lyo barhurhabala, barhuyeresa obuzigire n’obwonjo. Rhuganirire gurhi obwonjo bwa Yehova bwarhulirizizemwo mwene wirhu muguma ohamagalwa Arthur,a ezamiri yage yakag’itumuza bwenene enyanya z’ecaha ajiraga. Arthur adesire ntya: “Najijire hofi mwaka goshi ndi nalola epornografi. Cikone enyuma z’okuyumva ehotuba yal’iganirire ezamiri, nahungama ecaha cani embere za mukanie n’embere z’abagula. Enyuma z’aho, nayumva oburhulirize. Cikone, nacigendekire naciyumva mvunisire omurhima enyanya z’ebi najiraga. Abagula bankengeza oku Yehova arhankabuliraga. Anarhukubûle bulya aba arhuzigire. Enderho zabo nyinja zampuma oku murhima, zanantambala mpugûkwe oku kobinali Yehova ambabalire.” Ene, Arthur ali painiya na murhabazi w’abagula. Rhurhulirizibwe bwenene okumanya oku Yehova anarhuyerese obwonjo erhi akaba rhuciyunjuzize!
YEHOVA ANARHUHE OBULANGALIRE
8. (a) Bulangalire buhi Yehova ahîre Abayahudi bal’ihêsirwe mpira? (b) Kushimbana na Izaya 40:29-31, gurhi obo bulangalire bwakarhabiremwo Abayahudi bal’iciyunjuzize?
8 Omu masu ga bene bantu, Abayahudi bal’ihêsirwe mpira barhal’igwerhe bulangalire bw’okugaluka omu cihugo cabo. Abababiloni bal’imanyikine oku barhakag’ilikula abantu bakag’igwarha mpira. (Iz. 14:17) Ciru akaba ntyo, Yehova aha abantu bage obulangalire. Alaganya oku akalikuzize olubaga lwage, na nta kantu kakamuhanzize okujira ntyo. (Iz. 44:26; 55:12) Omu masu ga Yehova, Babiloni kali nka katulo. (Iz. 40:15) Erhi omuntu abuha akatulo, kanayehuke. Ntyo ko kwakanabire kulembu kuli Yehova okulikuza abantu bage kurhenga omu Babiloni. Gurhi obo bulangalire bwakarhabiremwo abo Bayahudi bal’ihêsirwe mpira? Bwakabarhulirizize. Cikone bwakajijire binji kulusha. Izaya ayandisire ntya: “Abacikubagira Nyakasane [Yehova, NWT], emisi yabo kuyushûka eyushûka.” (Osome Izaya 40:29-31.) Kobinali, obulangalire bwakabahîre emisi; ‘bakamezirekwo ebyubi nka nyunda.’
9. Bici byakarhumire Abayahudi bal’ihêsirwe mpira e Babiloni balangalira oku eciragane ca Yehova c’okubarhenza yo cakahikirire?
9 Kandi Yehova ahîre Abayahudi bal’ihêsirwe mpira ebyakarhumire balangalira oku ebiragane byage byahikirira. Gurhi ajijiremwo ntyo? Orhanye lugenda amalebi gali gamahikirira. Bal’imanyire oku Abaasiriya bahimire obwami bw’emwenè bw’e Israheli n’okuhêka abantu mpira. (Iz. 8:4) Babwine gurhi Abababiloni basherezagya Yeruzalemu banahêka abantu mpira. (Iz. 39:5-7) Bal’imanyire gurhi mwami w’e Babiloni arhulaga Mwami Zedekiya amasu anamuhêka e Babiloni. (Yer. 39:7; Eze. 12:12, 13) Ebi Yehova alebaga byoshi byahikirire. (Iz. 42:9; 46:10) Ebyo byoshi bigwasirwe bibe byazibuhize obuyemere bwabo oku eciragane ca Yehova c’okubarhenza e Babiloni naco cakahikirire!
10. Muli zino nsiku nzinda, bici byakarhurhabala lyo rhugendekera rhwaba n’obulangalire?
10 Bici rhuciyigirizize? Amango rhuli rhwaciyumva rhuvunisire omurhima, obulangalire bwanarhurhuliriza n’okurhurhabala rhushub’iba n’emisi. Rhulamire omu mango madarhi rhunagwerhe bashombanyi balebe b’obuhashe. Ciru akaba ntyo, rhurhashinganini rhuheze obulangalire. Yehova arhuhîre obulangalire bwinja bwenene, ko kuderha, okulama ensiku n’amango omu murhûla gw’okunali n’akalembe. Rhugwasirwe rhugendekere rhwasegeza obwenge kw’obo bulangalire bwirhu. Lubero n’oko, rhurhakagendekera rhwabona obulangalire bwirhu n’obwalagale nka kula e eneo nyinja bwenene yakabula bubonekana bwinja bulya rhuli rhwayilolera omw’idirisha ly’eciyo cizinzire. Gurhi “rhwakacêsamwo ery’idirisha,” erhi kugendekera rhwaba n’obulangalire busezire? Rhwanajira ntyo omu kucihiriraho akasanzi ngasi mango k’okurhanya bwenene lugenda gurhi akalamo kirhu kayish’iba kinja bwenene omw’igulu lihyahya. Rhwanasoma emyanzi, rhwanalola amavideo, n’okuyumvirhiza enyimbo ziganirire obulangalire bwirhu. Kandi rhwanabwira Yehova kugerera isala lugenda ebiragane rhuli rhwalindirira bwenene okuhikirizibwa kwabyo.
11. Bici birhabala mwali wirhu muguma oba olwazire endwala zirhafuma ly’ashub’iba n’emisi?
11 Rhuganirire gurhi obulangalire bwarhulirizize n’okuzibuhya mwali wirhu muguma ohamagalwa Joy, oba olwazire endwala zirhafuma. Adesire ntya: “Erhi nciyumva ngogomirwe, nambwire Yehova oku ndi naciyumva omu kandalala erhi nanyemire oku ahugûkwa oku ndi naciyumva. Yehova ashuzize amasala gani omu kumpa ‘obuhashe burhali bwani.’”(2 Kr. 4:7, Mashi Bible) Kandi Joy anacibone omu bukengere bwage ali omw’igulu lihyahya, hantu “nta muntu wanaciderhe . . . okw’amâlwala.” (Iz. 33:24, Mashi Bible) Erhi nirhu rhwakabwira Yehova ebirhuli oku murhima byoshi n’okusegeza obwenge bwirhu oku bulangalire bwirhu, rhwanashub’iba n’emisi.
12. Birhumire bihi rhugwerhe by’okurhushumya rhulangalire ebiragane bya Yehova? (Olole n’enfoto.)
12 Nk’oku Yehova ajiriraga Abayahudi bal’ihêsirwe mpira, nirhu arhuhîre birhumire binji byakarhushumya rhulangalire ebiragane byage. Orhanye oku malebi rhuli rhwabona gahikirira. Kwa lwiganyo, rhuli rhwabona oburhegesi bukulu bw’igulu lyoshi buli ‘lunda luguma buzibu n’olundi lunda bulembagusire.’ (Dan. 2:42, 43) Rhuli rhwayumva emyanzi lugenda “omusisi . . . hanji,” rhunali rhwashangira okuhubiri “omu igulu lyoshi.” (Mt. 24:7, 14) Ago malebi n’agandi manji ganazibuhye obuyemere bwirhu oku ebiragane bya Yehova by’okurhuliriza byoshi byahikirizibwa.
Amalebi rhuli rhwabona gahikirira ene, garhuhîre ebirhumire by’okurhushumya rhulangalire ebiragane bya Yehova (Olole ecifungo ca 12)
YEHOVA ANARHURHABALE LYO RHURHAYOBOHAGA
13. (a) Mazibu gahi Abayahudi bakalwisize amango g’okulikulwa kurhenga e Babiloni? (b) Nk’oku biyerekinwe omu Izaya 41:10-13, gurhi Yehova arhulirizizemwo Abayahudi bal’ihêsirwe mpira?
13 Ciru akaba Yehova arhulirizize Abayahudi bal’ihêsirwe mpira kugerera obulangalire bwinja bwenene, al’imanyire oku bakalwisize amazibu amango g’okulikulwa kwabo. Ali alebire oku, oku buzinda bw’okuhêkwa mpira kw’Abayahudi, omwami w’obuhashe akarhezire amashanja gal’izungulusire Babiloni n’okugahima, na buzinda akarhezire na Babiloni. (Iz. 41:2-5) K’Abayahudi bal’ishinganine bayobohe? Yehova arhulirizize olubaga lwage embere z’akasanzi omu kuderha ntya: “Orhayobohaga, bulya ndi haguma nawe, orhabaga bihamba, bulya nie Nyamuzinda wawe.” (Osome Izaya 41:10-13.) Bici al’ilonzize okubabwira kugerera enderho “nie Nyamuzinda wawe”? Arhal’ilonzize okukengeza Abayahudi oku bamuharamye, bulya bal’imanyire oku bal’ishinganine okujira ntyo. Lubero n’oko, al’ilonzize okubakengeza oku aciri olunda lwabo.—Enna. 118:6.
14. Gurhi Yehova ajijire ly’arhabala Abayahudi bal’ihêsirwe mpira lyo barhayobohaga?
14 Kandi Yehova arhabire Abayahudi bal’ihêsirwe mpira lyo barhayobohaga omu kubakengeza obuhashe bwage n’obumanye bwage burhagwerhi lugero. Ahûna abo Bayahudi balole oku nyenyezi emalunga. Ababwira oku arhali kulema kone alemire enyenyezi cikone al’imanyire amazino g’ezo nyenyezi zoshi. (Iz. 40:25-28) Erhi akaba amanyire izino lya ngasi nyenyezi, kuli kuderha oku aba amanyire izino lya ngasi muguma omu bakozi bage! N’erhi akaba Yehova agwerhe obuhashe bw’okulema enyenyezi, buzira karhinda agwerhe obuhashe bw’okurhabala abantu bage. Kobinali, Abayahudi bal’ihêsirwe mpira barhagwerhe ecirhumire coshi-coshi c’okuyoboha.
15. Gurhi Mungu arheganyizemwo Abayahudi bal’ihêsirwe mpira lugenda amango gali embere?
15 Kandi Yehova arheganyize abantu bage omu kubabwira ebi bakajijire omu mango gali embere. Omu cigabi c’embere c’ecitabu ca Izaya, Mungu abwizire abantu bage ntya: “Oje omu nyumpa zawe [byumpa byawe by’endani, NWT], onaciyigalirekwo enyumvi; orhang’icifulika kasanzi kasungunu kuhika obukunizi bugere.” (Iz. 26:20) Nkaba ogo mulongo gwahikirire oburhangiriza erhi Mwami Sirusi ahima Babiloni. Mulume muguma Mugiriki wa mîra wasomire eby’ehistware adesire oku erhi Sirusi aja omu Babiloni, “arhegeka [abasoda bage] banige abantu boshi bakarhimanyire embuga.” Orhanye kunganaci bacikala b’omu Babiloni baciyumvirhe bayobohire! Cikone, Abayahudi bal’ihêsirwe mpira e Babiloni nkaba bacizire bulya barhumikire obulongozi bwa Yehova.
16. Bulya gurhi rhurhashinganini rhuyobohe okurhalusire olugero enyanya z’ebyaba omu mango gayisha? (Olole n’enfoto.)
16 Bici rhuciyigirizize? Hano hofi-hofi rhwahikirwa n’amalibuko madarhi garhasag’iba bundi. Hano garhondera, abantu omw’igulu bayish’ihwerwa n’okuyoboha bwenene. Cikone, abantu ba Yehova barhakayoboha. Rhumanyire oku Yehova ye Mungu wirhu. Rhurhakadundagana, bulya rhumanyire oku “obuyokoke [bwirhu] buli hofi.” (Lk. 21:28) Ciru na hano omulungano gw’amashanja gurhurhera, rhurhakadundagana. Yehova ayish’irhulanga kugerera bamalahika n’okurhuha obulongozi bw’okuyokola obuzine bwirhu. Gurhi ayish’irhuhamwo obo bulongozi? Rhulinde kone rhwayish’ibona. Cikone, byanahashikana oku rhwayish’ikahâbwa obo bulongozi kugerera ebigamba birhu. Omu njira ndebe, ebyo bigamba byanaba byo ‘byumpa birhu by’endani’ rhwayish’ipatamwo obulanzi. Gurhi rhwakacirheganyamwo oku bintu byajirikana omu mango gayisha? Rhugwasirwe rhuyegere bene wirhu na bali birhu, rhukarhumikira obulongozi bw’eciteokrasi buzira kusezibwa, n’okuyemera n’obwalagale oku Yehova ye oli walongoza ikubuliro lirhu.—Hb. 10:24, 25; 13:17.
Okurhanya bwenene oku misi ya Yehova n’obuhashe bwage bw’okurhuciza, kwarhurhabala lyo rhurhag’iyoboha okurhalusire olugero omu mango g’amalibuko madarhi (Olole ecifungo ca 16)b
17. Gurhi wakajira ly’ogendekera walangalira oburhulirize Yehova ahâna?
17 Ciru akaba Abayahudi bal’ihêsirwe mpira e Babiloni bakabire omu kanga kazibu, Yehova abahîre oburhulirize bakalagirireko. Nirhu ayish’irhujirira ntyo. Co cirhumire, ciru bici byakaba omu mango gayisha, ogendekere walangalira oburhulirize Yehova ahâna. Neci, olangalire obwonjo bwage bunji. Ogendekere waba n’obulangalire busezire. Okengere oku bulya Yehova ye Mungu wawe, ntaco wakayoboha.
LWIMBO 3 Misi Yani, Bulangalire Bwani, We Ncikubagira
a Mazino maguma na maguma gashanjirwe.
b AMAHUGÛLO G’ENFOTO: Ecigusho cisungunu ca bene wirhu na bali birhu cirhimanine haguma. Balangalire emisi ya Yehova n’obuhashe bwage bw’okulanga abantu bage ngasi hoshi bakaba balamire okw’igulu.