ECIGABI C’OKUYIGA CA 22
LWIMBO 15 Rhukuze Enfula ya Yehova!
Izino lya Yehova, Ebi Lihugwîre Kuli Yezu
“Nabamanyisize izino lyawe, nanacibamanyisalyo.”—YN. 17:26.
EBI ECI CIBAGI CISEGIZE
Oku Yezu amanyisizemwo izino lya Yehova n’oku alicêsizemwo n’okulihalira.
1-2. (a) Bici Yezu ajijire omu budufu bw’embere anigwe? (b) Madoso gahi rhwaganirira mw’eci cigabi?
LWALI Lwa Kani bijingo bwenene, Nisani 14, mwaka gwa 33 Kano Kasanzi Kirhu (K.K.K.) na Yezu ali hofi alenganyizibwe, asambisibwe, atwirwe olubanja, alibuzibwe, n’okunigwa. Aciyusagya alya ishega lyago-lyago omu cumpa c’enyanya haguma n’entumwa zage nyishwekerezi. Enyuma z’ery’ishega, Yezu abwira entumwa zage nderho ndebe nzinda z’okuhâna omurhima. Na hisanzi hisungunu embere boshi barhenge mw’eco cumpa c’enyanya, Yezu ahulika hitya anajira isala ly’obulagirire bwenene. Entumwa Yowane yayandisire ery’isala; liba omu Yowane cigabi ca 17.
2 Bici isala lya Yezu lirhuyeresire lugenda ebyal’imuhangayisize mw’ako kasanzi? Gurhi ery’isala liyerekinemwo ebyali bya bulagirire kuli ye omu mango g’omukolo gwage goshi hanw’igulu? Leki rhuganirire amashuzo g’ago madoso.
“NABAMANYISIZE IZINO LYAWE”
3. Bici Yezu adesire lugenda izino lya Yehova, na bici al’ilonzize okuderha? (Yowane 17:6, 26)
3 Omw’isala lyage, Yezu aderha ntya: “Nabamanyisize izino lyawe.” Kobinali, adesire kabirhi koshi oku amanyisize abanafunzi bage izino lya Yehova. (Osome Yowane 17:6, 26.) Bici al’ilonzize okuderha? K’abafulûlire izino barhal’imanyire? Abanafunzi ba Yezu bali Bayahudi, muli ntyo bal’ikola bamanyire oku izino lya Mungu ye Yehova. Ery’izino lyali kali bihumbi omu Mandiko g’Ecihabraniya. Co cirhumire Yezu arhakag’iganirira izino lya Mungu lyo na nnene; lubero n’oko, akag’iganirira ebi ery’izino lihugwîre. Yezu amanyisize bwinja Nn’ery’izino, kuhiramwo emihigo yage, emikolo yage, n’amorhere gage; nta wundi muntu wakahashire okujira ntyo.
4-5. (a) Lwiganyo luhi luyerekine ebi okuhikira okumanya izino lya muntu mulebe kuhugwîre? (b) Omu njira nci abanafunzi ba Yezu bahikire okumanya izino lya Yehova?
4 Kwa lwiganyo, orhanye hali mugula muguma w’omu cigamba cinyu oba munganga obera abantu ohamagalwa David. Hakola hali myaka minji omanyire oyo mwene wirhu. Cikone lusiku luguma obe oli omu kanga kahûnyire obukwe duba-duba. Bakuhêke duba-duba oku hopitali, aho oyo mwene wirhu akolera, anakolese obulenga bwage bw’ecinganga ly’aciza obuzine bwawe. K’izino ly’oyo mwene wirhu lirhahugûle binji kuli we? Neci kobinali! David arhaciri kone olya mugula oba omanyire; cikone kandi akola ali munganga obera abantu wayokwire obuzine bwawe.
5 Ko n’oko, abanafunzi ba Yezu bal’ikola bamanyire izino lya Yehova. Cikone enyanya z’omukolo gwa Yezu, ery’izino lyahugûla binji kuli bo. Bulya gurhi rhwanaderha ntyo? Bulya Yezu ayerekine obumuntu bw’Ishe muli ngasi kantu adesire na muli ngasi kantu ajijire. Co cirhumire, entumwa za Yezu zahikire ‘okumanya’ Yehova bwinja omu kuyumvirhiza oku Yezu akag’iyigiriza n’omu kubona oku akag’ijirira abantu.—Yn. 14:9; 17:3.
“IZINO LYAWE, IZINO WAMPÂGA”
6. Omu njira nci Yehova ahîremwo Yezu izino lyage? (Yowane 17:11, 12, Mashi Bible)
6 Omw’isala lyage, Yezu ahûnira abanafunzi bage omu kuderha ntya: “Obalange oku buhashe bw’izino lyawe, izino wampâga.” (Osome Yowane 17:11, 12, Mashi Bible.) K’oko kuhugwîre oku Yezu al’ilonzize amanyikane oku ye Yehova? Nanga. Erhi Yezu aderha lugenda izino lya Yehova, adesire “izino lyawe.” Co cirhumire izino lya Yehova lirhabaga ly’izino lya Yezu. Bicigi Yezu alonzagya okuderha erhi aderha oku ahâbirwe izino lya Mungu? Kobinali, Yezu al’irhumirwe na Yehova anali Mudesi wage. Ayishire omw’izino ly’Ishe anajira emikolo y’obuhashe mw’ery’izino. (Yn. 5:43; 10:25) Kandi, izino lya Yezu lihugwîre “Yehova Ye Bucire.” Kobinali, amahugûlo g’izino lya Yezu gahiziremwo izino lya Yehova.
7. Ohâne olwiganyo luyerekine gurhi Yezu akadesire okw’izino lya Yehova.
7 Kwa lwiganyo, bulya omuja-bugo erhi ambasadere aba muntu oyisha omw’izino ly’omurhegesi, anaderha okw’izino ly’oyo murhegesi. Co cirhumire enderho za ambasadere zijira buhashe buguma n’ez’omurhegesi wamurhumaga. Ko n’oko, Yezu al’iyishire omw’izino lya Yehova n’ebi akag’ibwira abantu, akag’ibiderha okw’izino lya Yehova.—Mt. 21:9; Lk. 13:35.
8. Gurhi izino lya Yehova lyali “muli” Yezu embere z’okuyisha kwage hanw’igulu? (Olubungo 23:20, 21)
8 Bulya Yezu ye Luderho, akozire nka Mudesi wa Yehova omu kumanyisa abandi bana ba Mungu b’ekiroho na bene bantu emyanzi n’obulongozi kurhenga emwa Yehova. (Yn. 1:1-3) Byanahashikana oku Yezu ye malahika Yehova arhumaga ly’ashibirira Abaisraheli omu mango g’Olubungo. Erhi abwira Abaisraheli barhumikire oyo malahika, Yehova aderha ntya: “Kulya kubâ izino lyani liri muli ye.”a (Osome Olubungo 23:20, 21.) Izino lya Yehova lyali “muli” Yezu bulya al’iyishire omw’izino lya Yehova ye na muntu w’obulagirire bwenene ohalira n’okucêsa izino ly’Ishe.
“LARHA, KUZA IZINO LYAWE!”
9. Kunganaci izino lya Yehova lyali lya bulagirire kuli Yezu? Ohugûle.
9 Nk’oku rhwaganirire, ciru n’embere Yezu ayishe hanw’igulu, izino lya Yehova lyali lya bulagirire bwenene kuli ye. Buzira karhinda, ngasi kantu Yezu ajijire amango ali hanw’igulu, kagwerhe olushangi n’izino lya Yehova! Hofi n’oku buzinda bw’omukolo gwage, Yezu ahûnyire Yehova ntya: “Larha, kuza izino lyawe!” Ho n’aho, Ishe ashuza ntya omw’izu linene kurhenga empingu: “Nalikuzize nanacilikuza kandi.”—Yn. 12:28.
10-11. (a) Gurhi Yezu akuzizemwo izino lya Yehova? (Olole n’enfoto.) (b) Bulya gurhi izino lya Yehova lyal’ishinganine licêsibwe n’okuhalirwa?
10 Yezu naye akuzize izino ly’Ishe. Omu njira nci? Njira nguma ajijiremwo ntyo kwali kumanyisa abandi amorhere minja g’Ishe n’ebijiro byage. Cikone, okukuza ery’izino kwal’ihiziremwo binji. Izino lya Yehova lyal’ishinganine licêsibwe n’irenge lyage lyal’ishinganine lihalirwe.b Yezu ayerekine kunganaci okujira ntyo kwali kwa bulagirire erhi ayigiriza abanafunzi bage isala ly’olwiganyo. Aderha ntya: “Larha, oli omu mpingu, izino lyawe likuzibwe [licêsibwe, NWT].”—Mt. 6:9.
11 Bulya gurhi izino lya Yehova lishinganine licêsibwe n’okuhalirwa? Bulya kurhenga omw’ishwa ly’e Edeni, Shetani Ibilisi ahegize Yehova Mungu irenge anamushobeka. Shetani aderha oku Yehova ali munywesi n’oku hali kantu kalebe kinja al’iyimire Adamu na Eva. (Murh. 3:1-5) Muli ntyo, Shetani ayerekana oku enjira ya Yehova y’okujira ebintu erhal’ishinganine. Obunywesi Shetani aderhaga lugenda Yehova bwanarhuma abantu barhanya oku Yehova aba Mungu mubi. Enyuma z’aho, omu nsiku za Ayubu, Shetani aderha oku abakolera Yehova banajire ntyo enyanya z’obunguke bamukûlako bone. Kandi oyo kakoza aderha oku abantu banaleka okukolera Yehova erhi bakarhimanana n’amazibu, bulya barhaba bamuzigire okunali. (Ayu. 1:9-11; 2:4) Byal’ihûnyire akasanzi ly’abantu bamanya erhi omunywesi ali Yehova erhi Shetani.
Yezu ayigirizize abanafunzi bage obulagirire bw’okucêsa izino lya Mungu (Olole ecifungo ca 10)
“MPÂNYIRE OBUZINE BWANI”
12. Bici Yezu ali mubidu okujira enyanya z’obuzigire bwage okw’izino lya Yehova?
12 Enyanya z’obuzigire bwage kuli Yehova, Yezu al’ilonzize okujira ebi akanahashire byoshi ly’acêsa n’okuhalira izino lya Yehova. Yezu adesire ntya: “Mpânyire obuzine bwani.” (Yn. 10:17, 18, Mashi Bible) Kobinali, ciru ali mubidu okufâ erhi izino lya Yehova lirhuma.c Bene bantu barhangiriza babirhi bimana, ko kuderha, Adamu na Eva, balesire Yehova banalunga Shetani okuboko. Lubero n’oko, Yezu ali mubidu okuyisha hanw’igulu n’okuyerekana obuzigire bwage kuli Yehova. Yezu ajijire ntyo omu kubêra mwishwekerezi kuli Yehova muli byoshi. (Hb. 4:15; 5:7-10) Abêzire mwishwekerezi omu kalamo kage koshi kuhika okufâ kwage oku murhi gw’amalibuko. (Hb. 12:2) Omu kujira ntyo, ayerekine obuzigire bwage kuli Yehova n’oku izino lyage.
13. Bulya gurhi Yezu ye wal’ishinganine bwenene okuyerekana oku Shetani aba munywesi? (Olole n’enfoto.)
13 Kugerera akalamo kage koshi, Yezu ayerekine buzira karhinda koshi-koshi oku Shetani ye munywesi, ci arhali Yehova! (Yn. 8:44) Yezu al’imanyire Yehova bwinja bwenene kulusha owundi muntu yeshi-yeshi wali wamakalama. Mw’ebi Shetani ashobekaga Yehova mucibage ciru kantu kalebe k’okuli, Yezu akakamanyire. Cikone Yezu agendekera ahalira buzibu-zibu irenge ly’Ishe, erhi izino lyage. Ciru n’amango byabonekanaga nka Yehova al’imulekerire, Yezu ali mubidu okufâ ahali h’okuleka Ishe muzigirwa.—Mt. 27:46.d
Akalamo ka Yezu koshi kayerekine buzira karhinda oku Shetani ye munywesi, ci arhali Yehova! (Olole ecifungo ca 13)
“NAYUKIRÎZE OMUKOLO WAMPÂGA”
14. Gurhi Yehova ehembiremwo obwishwekerezi bwa Yezu?
14 Omw’isala Yezu ajiraga omu budufu bw’embere z’okufâ kwage, akadesirage ntya: “Nayukirîze omukolo wampâga mpu njire.” Al’ilangalire oku Yehova akamuhembire enyanya z’obwishwekerezi bwage. (Yn. 17:4, 5) Yezu arhahabaga omu kulangalira Ishe. Yehova arhamulekaga abêre omu kaburi. (Ebj. 2:23, 24) Afûzire Yezu anamuha ecikono cikulu omu mpingu. (Fl. 2:8, 9) Buzinda, Yezu arhondera arhambula nka Mwami w’Obwami bwa Nnâmahanga. Bici obo Bwami bwakahikirizize? Ecigabi ca kabirhi c’isala ly’olwiganyo cirhubwizire ntya: “Obwami bwawe buyishe, obulonza bwawe [bwa Yehova] bube en’igulu nk’empingu.”—Mt. 6:10.
15. Bindi bici Yezu ayish’ihikiriza?
15 Omu mango gayisha gali hofi-hofi, Yezu alwisa abashombanyi ba Mungu n’okushereza abantu babi okw’ivita lya Harmagedoni. (Maf. 16:14, 16; 19:11-16) Hisanzi hisungunu enyuma z’aho, ayish’ikweba Shetani omu “nyenga,” erhi abiso, ko kuderha, hali arhakabamwo n’obuhashe bw’okujira akantu koshi-koshi. (Maf. 20:1-3) Yezu ayish’igalulira bene bantu omurhûla n’ehali y’okuba bimana omu Burhegesi bwage bw’Emyaka Cihumbi. Ayish’ifûla abafîre. Ayish’ijira igulu lyoshi libe paradizo. Omuhigo gwa Yehova gwayish’ihikirizibwa!—Maf. 21:1-4.
16. Gurhi akalamo ka bene bantu kayish’iyorha enyuma z’Oburhegesi bw’Emyaka Cihumbi?
16 Gurhi akalamo kayish’iyorha oku buzinda bw’Oburhegesi bw’Emyaka Cihumbi? Ehali ya bene bantu y’okurhaba bimana n’okuba banya-byaha yayish’irhenzibwa. Bene bantu barhakaciba balagirire oku kuhûna bababalirwe ebyaha byabo kugerera engombôlo; barhakanaciba balagirire oku mulagizi erhi oku bukuhani. N’‘omushombanyi muzinda wayish’iba amashabulwa, lwo Lufû [lwalerhagwa na Adamu].’ Akaburi kayish’ibêra bwamwa. Abafîre bayish’iba bamafûlwa. Ngasi muntu okw’igulu ayish’iba mwimana.—1 Kr. 15:25, 26.
17-18. (a) Bici byayish’iba enyuma z’Oburhegesi bw’Emyaka Cihumbi? (b) Bici Yezu ayish’ijira hano akasanzi kage k’okurhegeka kahikira oku buzinda? (1 Abakorinti 15:24, 28) (Olole n’enfoto.)
17 Bindi bici byayish’iba enyuma z’Oburhegesi bw’Emyaka Cihumbi? Ago mango, hayish’iba kantu kalebe kago-kago. Akadali kayerekire okucêsibwa kw’izino lya Yehova kayish’ihwa. Gurhi kayish’ihwamwo? Omw’ishwa ly’e Edeni, Shetani adesire oku Yehova aba munywesi n’oku arhali buzigire bumushumya okurhegeka bene bantu. Kurhenga ago mango, izino lya Yehova lyacêsibwe kanji-kanji n’abantu bamukenga. Muli ntyo, oku buzinda bw’Oburhegesi bw’Emyaka Cihumbi, irenge lya Yehova lyayish’iba lyamahalirwa loshi-loshi. Ayish’iba amayerekana buzira karhinda koshi-koshi oku aba Larha w’obuzigire w’omu mpingu.
18 Enyuma z’Oburhegesi bw’Emyaka Cihumbi, ngasi muntu ayish’imanya oku ebi Shetani ashobekaga Yehova byoshi byali bya bunywesi. Bici Yezu ayish’ijira hano akasanzi kage k’okurhegeka kahikira oku buzinda? K’ayish’ikulikira olwiganyo lwa Shetani n’okugomera Yehova? Nanga! (Osome 1 Abakorinti 15:24, 28.) Yezu ayish’igalulira Ishe Obwami. Ayish’icihira idako ly’oburhegesi bwa Yehova. Kobinali, lubero na Shetani, Yezu aba mubidu okuleka ngasi kantu enyanya z’obuzigire bwage kuli Yehova.
Yezu amaba mubidu okugalulira Yehova Obwami enyuma z’Oburhegesi bw’Emyaka Cihumbi (Olole ecifungo ca 18)
19. Bici izino lya Yehova lihugwîre kuli Yezu?
19 Buzira karhinda, Yehova ali mubidu okuha Yezu izino lyage! Yezu ayerekine n’obwimana oku Ishe ayorha. Muli ntyo, bici izino lya Yehova lihugwîre kuli Yezu? Lihugwîre byoshi kuli ye. Ali mubidu okufâ erhi ery’izino lirhuma, anayish’iba mubidu okugalulira Yehova ngasi kantu enyuma z’Oburhegesi bw’Emyaka Cihumbi. Gurhi rhwakayigamwo olwiganyo lwa Yezu? Rhwaganirira ishuzo ly’ery’idoso omu cigabi cikulikire.
LWIMBO 16 Rhukuze Yehova n’Omugala Mushîgwa
a Hali amango bamalahika nabo bayishire omw’izino lya Yehova amango bakag’imanyisa emyanzi okw’izino lyage. Co cirhumire omu Bibliya, hali amango malahika aganirirwe nka Yehova ye na nnene. (Murh. 18:1-33) Ciru akaba Amandiko gadesire oku Musa ahâbirwe Irhegeko na Yehova, hali eyindi milongo eyerekine oku Yehova akolesize bamalahika lyo baha Musa ery’Irhegeko omw’izino lyage.—Lev. 27:34; Ebj. 7:38, 53; Gl. 3:19; Hb. 2:2-4.
b AMAHUGÛLO GA NDERHO NDEBE: “Okucêsa” kuhugwîre okukenga kantu kalebe erhi muntu mulebe, okubona kantu kalebe erhi muntu mulebe nka mutagatifu, erhi kuba na bukenge bunji kuli kantu kalebe erhi kuli muntu mulebe. “Okuhalira” muntu mulebe kuhugwîre okuyerekana oku oyo muntu arhagwerhi magosa amango abandi bamusheregize irenge erhi kumuderhera eby’obunywesi.
c Olufû lwa Yezu kandi lwahîre bene bantu obulyo bw’okuba n’obuzine bw’ensiku n’amango.
d Olole “Amadoso g’Abantu Basoma Ebitabu Birhu” omw’Ilabiro ly’Akalalizi ly’Omwezi gwa 4, 2021, buk. 30-31.