ලෙවී කතාව
9 අටවන+ දවසේදී මෝසෙස් ආරොන්වත් ඔහුගේ පුත්‍රයන්වත් ඊශ්‍රායෙල්හි වැඩිමහල්ලන්වත් කැඳෙව්වේය. 2 ඔහු ආරොන්ට මෙසේ කීවේය. “පාප පූජාවක්+ සඳහා නිකැළැල් වස්සෙකුව හා දවන පූජාවක්+ සඳහා නිකැළැල් බැටළුවෙකුව ගෙන උන්ව යෙහෝවා දෙවි ඉදිරියේ ඔප්පු කරන්න.+ 3 ඔබ ඊශ්‍රායෙල් සෙනඟට මෙසේ කියන්න. ‘පාප පූජාවක් සඳහා එළුවෙකුව+ ගෙනෙන්න. දවන පූජාවක් සඳහා අවුරුද්දක් වයසැති වස්සෙකුව හා බැටළු පැටවෙකුවද+ ගෙනෙන්න. උන් නිකැළැල් සතුන් විය යුතුයි. 4 හවුල් පූජාවක්+ ලෙස යෙහෝවා දෙවි ඉදිරියේ ඔප්පු කරන පිණිස ගවයෙකුව හා බැටළුවෙකුවද තෙල් සහිත ධාන්‍ය පූජාවක්ද+ ගෙනෙන්න. මන්ද යෙහෝවා දෙවි අද ඔබ ඉදිරියේ පෙනී සිටිනවා.’”+
5 එබැවින් මෝසෙස් ගෙනෙන්න කියා අණ කළ සියල්ල රැගෙන ඔවුහු සම්මුඛ වීමේ කූඩාරම ඉදිරියට ගියෝය. මුළු සෙනඟම එතැනට ඇවිත් යෙහෝවා දෙවි ඉදිරියේ සිටගත්තෝය.+ 6 එවිට මෝසෙස් මෙසේ කීවේය. “ඔබ යෙහෝවා දෙවිගේ තේජස දකින පිණිස මේ දේවල් කරන්න කියා යෙහෝවා දෙවි අණ කළා.”+ 7 ඉන්පසු මෝසෙස් ආරොන්ට මෙසේ කීවේය. “යෙහෝවා දෙවි අණ කළ ලෙස පූජාසනය ළඟට ගොස් ඔබ ගෙනා පාප පූජාව+ සහ දවන පූජාව ඔප්පු කර ඔබේ සහ ඔබේ ගෙයි වැසියන්ගේ පව්වලට සමාව ලබාගන්න.+ සෙනඟ+ ගෙනා පූජාව ඔවුන් වෙනුවෙන් ඔප්පු කර ඔවුන්ගේ පව්වලට සමාව ලබාගන්න.”+
8 ආරොන් එවෙලේම පූජාසනය ළඟට ගොස් පාප පූජාව සඳහා තමා ගෙනා වස්සාව මැරුවේය.+ 9 ඉන්පසු ආරොන්ගේ පුත්‍රයෝ සතාගේ ලේ+ ඔහු වෙතට ගෙනාවෝය. ඔහු තම ඇඟිල්ල ලේවල+ ගිල්වා පූජාසනයේ අං මත එය තැවරීය.+ ඔහු ඉතුරු ලේ ටික පූජාසනයේ පාමුලට වත් කළේය. 10 යෙහෝවා දෙවි මෝසෙස්ට අණ කළ ලෙසම, ආරොන් පාප පූජාවට ගෙනා සතාගේ තෙල්+ කොටස්ද වකුගඩු දෙකද අක්මාව වටා තිබෙන තෙල්ද පූජාසනය මත දැවීය.+ 11 ඉන්පසු සතාගේ මාංසය සහ හම කඳවුරෙන් පිටතට ගෙන ගොස් ගින්නෙන් පිලිස්සුවේය.+
12 ඉන්පසු ඔහු දවන පූජාව සඳහා ගෙනා සතාව මැරීය. ආරොන්ගේ පුත්‍රයෝ සතාගේ ලේ ඔහු වෙත ගෙනාවෝය. එවිට ඔහු ඒ ලේ පූජාසනයේ සෑම පැත්තටම ඉසීය.+ 13 දවන පූජාවට මැරූ සතාගේ මස් කැබලිද උගේ හිසද ඔවුහු ආරොන්ට දුන්නෝය. ඔහු ඒවා පූජාසනය මත දැවීය.+ 14 උගේ බඩවැල් හා පාද සෝදා පූජාසනයේ තිබූ දවන පූජාව මත ඒවා දැවීය.+
15 ඉන්පසු ඔහු සෙනඟ ගෙනා පූජා ඔප්පු කළේය.+ කලින් කළාක් මෙන් පාප පූජාව සඳහා සෙනඟ ගෙනා එළුවාව මරා ඔවුන්ගේ පාප වෙනුවෙන් ඌව ඔප්පු කළේය. 16 ඉන්පසු ඔහු දවන පූජාවද ඔප්පු කළේය. සාමාන්‍යයෙන් දවන පූජා ඔප්පු කරන ආකාරයටම එය ඔප්පු කළේය.+
17 ඉන්පසු ඔහු ධාන්‍ය පූජාව+ ගෙනැවිත් එයින් අහුරක් ගෙන එය පූජාසනය මත දැවීය. උදෑසන ඔප්පු කළ දවන පූජාවට අමතරව මෙම ධාන්‍ය පූජාවද ඔප්පු කළේය.+
18 පසුව සෙනඟ හවුල් පූජාව+ සඳහා ගෙනා ගවයාව සහ බැටළුවාව ඔහු මැරුවේය. ඉන්පසු ආරොන්ගේ පුත්‍රයෝ එම සතුන්ගේ ලේ ඔහු වෙතට ගෙනාවෝය. ඔහු ලේ ගෙන පූජාසනයේ සෑම පැත්තටම ඉසීය.+ 19 ඔවුහු ගවයාගේ තෙල් කොටස්ද+ බැටළුවාගේ තෙලින් පිරුණු වලිගයද+ බඩවැල් වටා ඇති තෙල් තට්ටුවද වකුගඩු දෙකද අක්මාව වටා තිබෙන තෙල්ද ගෙන, 20 සතාගේ පපු+ කොටස මත ඒවා තැබූහ. ඉන්පසු ආරොන් තෙල් කොටස් පූජාසනය මත දැවීය. 21 නමුත් ඔහු සතාගේ පපු කොටස සහ දකුණු ගාතය අතට ගෙන, දෙවිට පිළිගන්වන පිණිස කරන සෙලවීමේ පූජාවක්+ වශයෙන් ඒවා යෙහෝවා දෙවි ඉදිරියේ ඒ මේ අත සෙලෙව්වේය. මෝසෙස් අණ කළ ලෙස ඔහු කළේය.
22 ඉන්පසු ආරොන් සෙනඟ දෙසට අත් දිගු කර ඔවුන්ට ආශීර්වාද කළේය.+ පාප පූජාව, දවන පූජාව සහ හවුල් පූජාව ඔප්පු කළ පසු ඔහු පූජාසනය වෙතින් බැස ආවේය.+ 23 පසුව මෝසෙස් සහ ආරොන් සම්මුඛ වීමේ කූඩාරමට ඇතුල් වුණෝය. ඉන්පසු ඔවුහු පිටතට පැමිණ සෙනඟට ආශීර්වාද කළෝය.+
එවිට මුළු සෙනඟට යෙහෝවා දෙවිගේ තේජස+ දකින්න ලැබිණ. 24 යෙහෝවා දෙවි වෙතින් ගින්නක් නික්ම ඇවිත්+ පූජාසනය මත තිබූ දවන පූජාව සහ තෙල් කොටස් සියල්ල දවා දැමුවේය. එය දැක මුළු සෙනඟ මහත් හඬක්+ නඟමින් දණින් වැටී නමස්කාර කළෝය.