ගණන් කතාව
13 යෙහෝවා දෙවියන් මෝසෙස්ට මෙහෙම කිව්වා. 2 “මම ඊශ්‍රායෙල් සෙනඟට දෙන්න යන කානාන් දේශය ගැන තොරතුරු හොයලා බලන්න පුරුෂයන් කීපදෙනෙක්ව යවන්න. ඒකට හැම ගෝත්‍රයකින්ම එක් කෙනෙක්ව තෝරගන්න. ඒ අය සෙනඟ අතරේ ඉන්න ප්‍රධානීන්+ වෙන්න ඕනේ.”+
3 ඉතින් මෝසෙස් යෙහෝවා කියපු විදිහටම එයාලව තෝරගෙන පාරාන් පාළුකරයෙන්+ පිටත් කරලා යැව්වා. ඒ හැමෝම ඊශ්‍රායෙල් සෙනඟ අතරේ හිටපු ප්‍රධානීන්. 4 ඒ අයගේ නම් මේවායි. රූබෙන් ගෝත්‍රයෙන් සක්කූර්ගේ පුතා වන ෂම්මුවා. 5 සිමියොන් ගෝත්‍රයෙන් හෝරීගේ පුතා වන ෂාපාත්. 6 යූදා ගෝත්‍රයෙන් යෙෆුන්නෙගේ පුතා වන කාලෙබ්.+ 7 ඉසකාර් ගෝත්‍රයෙන් යෝසෙප්ගේ පුතා වන ඉගාල්. 8 එෆ්‍රායිම් ගෝත්‍රයෙන් නූන්ගේ පුතා වන හෝෂෙයා.+ 9 බෙන්ජමින් ගෝත්‍රයෙන් රාෆුගේ පුතා වන පල්තී. 10 සෙබ්‍යූලන් ගෝත්‍රයෙන් සෝදීගේ පුතා වන ගද්දීයෙල්. 11 යෝසෙප්ගෙන්+ පැවතෙන මනස්සේ+ ගෝත්‍රයෙන් සූසිගේ පුතා වන ගද්දී. 12 දාන් ගෝත්‍රයෙන් ගෙමල්ලිගේ පුතා වන අමියෙල්. 13 ආෂෙර් ගෝත්‍රයෙන් මිකායෙල්ගේ පුතා වන සෙතුර්. 14 නෆ්තලී ගෝත්‍රයෙන් වොප්සීගේ පුතා වන නාබී. 15 ගාද් ගෝත්‍රයෙන් මාකීගේ පුතා වන ගෙවුයෙල්. 16 දේශයේ තොරතුරු හොයලා බලන්න මෝසෙස් පිටත් කරලා යවපු අයගේ නම් ඒවායි. මෝසෙස් නූන්ගේ පුතා වන හෝෂෙයාට යොෂුවා*+ කියන නම දුන්නා.
17 කානාන් දේශයේ තොරතුරු හොයලා බලන්න ඒ පුරුෂයන්ව පිටත් කරද්දී මෝසෙස් එයාලට මෙහෙම කිව්වා. “මෙතනින් නෙගෙබ්වලට ගිහින් ඊටපස්සේ කඳුකරයට යන්න.+ 18 දේශය මොන වගේද කියලා හොයලා බලන්න.+ එහේ ජීවත් වෙන මිනිස්සු ශක්තිමත් අයද දුර්වල අයද කියලා බලන්න. එහේ හුඟක් අය පදිංචි වෙලා ඉන්නවාද නැද්ද කියලත් හොයලා බලන්න. 19 ජීවත් වෙන්න ඒ දේශය හොඳද නැද්ද කියලත් එයාලා ජීවත් වෙන නුවරවල් බලකොටුවලින් වට වෙලාද නැද්ද කියලත් බලාගෙන එන්න. 20 ඒක ගස් වැල්වලින් පිරුණු සරුසාර දේශයක්ද කියලත් බලන්න.+ ඔයාලා බය නැතුව+ ඒ දේශයේ පලදාවෙන් ටිකක් අරගෙන එන්න.” දේශයේ තොරතුරු හොයලා බලන්න එයාලා ගියේ මිදිවතුවල මුල්ම පලදාව නෙළන කාලයෙදියි.+
21 එයාලා ෂින් පාළුකරයේ+ ඉඳන් ලේබෝහමාත්*+ කිට්ටුව තියෙන රෙහොබ්+ වෙන කල් ගිහින් දේශයේ තොරතුරු හොයලා බැලුවා. 22 එයාලා නෙගෙබ් වෙන කල් ඇවිත් හෙබ්‍රොන්+ කියන නගරයට ආවා. අනාක්වරු+ වුණ අහිමාන්, ෂේෂයි සහ තල්මයි+ ජීවත් වුණේ ඒ ප්‍රදේශයේ. ඊජිප්තුවේ ෂොවන් නගරය ඉදි කරන්න අවුරුදු හතකට කලිනුයි හෙබ්‍රොන් නගරය ඉදි කරලා තිබුණේ. 23 එයාලා එෂ්කොල්+ නිම්නයට ඇවිත් එතන තිබුණ මිදිවැලකින් මිදිපොකුරක් තියෙන අත්තක් කපාගත්තා. ඒ අත්ත අරන් යන්න මිනිස්සු දෙන්නෙක් ඕනෙ වුණා. එයාලා ඒක පොල්ලක ගැටගහගෙනයි උස්සන් ගියේ. එතනින් එයාලා දෙළුම් ගෙඩිත් අත්තික්කා ගෙඩිත් කඩාගත්තා.+ 24 ඊශ්‍රායෙල්වරු එතනින් මිදිපොකුරක් කපාගත්ත නිසයි ඒ නිම්නයට එෂ්කොල්*+ කියන නම තිබ්බේ.
25 දේශයේ තොරතුරු හොයලා බලලා දවස් 40කට+ පස්සේ එයාලා ආයෙත් හැරිලා ආවා. 26 එයාලා මෝසෙස්, ආරොන් සහ සෙනඟ හිටපු පාරාන් පාළුකරයේ කාදෙෂ්+ කියන තැනට ඇවිත් දේශය ගැන තොරතුරු කිව්වා. ඒ දේශයෙන් ගෙනාපු පලතුරුත් පෙන්නුවා. 27 එයාලා මෝසෙස්ට මෙහෙම කිව්වා. “ඔයා අපිට යන්න කියපු දේශයට අපි ගියා. ඒක ඇත්තටම කිරියෙන් පැණියෙන් ඉතිරෙන+ දේශයක්. අපි මේ පලතුරු ගෙනාවේ එහෙන්.+ 28 ඒත් එහේ ඉන්න මිනිස්සු හරිම ශක්තිමත්. එයාලාගේ නුවරවල් හරිම විශාලයි. ඒවා පවුරුවලින් වට කරලයි තියෙන්නේ. එහේ අනාක්වරුත් ඉන්නවා අපි දැක්කා.+ 29 නෙගෙබ්වල+ ඉන්නේ අමලෙක්වරු.+ කඳුකර පළාතේ ඉන්නේ හිත්තීවරු, යෙබූසිවරු+ සහ අමෝරිවරු.+ මුහුද+ සහ යොර්දාන් ගඟ කිට්ටුව ඉන්නේ කානානිවරු.”+
30 ඒ වෙලාවේ මෝසෙස් ඉස්සරහා හිටපු සෙනඟ හුඟක් කලබල වුණා. එයාලව සන්සුන් කරන්න හිතාගෙන කාලෙබ් මෙහෙම කිව්වා. “අපිට අනිවාර්යයෙන්ම ඒ දේශය යටත් කරගන්න පුළුවන්. ඉතින් අපි දැන්මම ගිහින් ඒක අල්ලගමු.”+ 31 ඒත් එයාත් එක්ක ගිය අනිත් පුරුෂයෝ මෙහෙම කිව්වා. “ඒ මිනිස්සු අපිට වඩා හුඟක් ශක්තිමත්. අපි කොහොමද එයාලා එක්ක සටන් කරන්නේ?”+ 32 එයාලා දිගින් දිගටම ඊශ්‍රායෙල් සෙනඟට දේශය ගැන මේ විදිහේ නරක තොරතුරු කිව්වා.+ “අපි බලන්න ගිය දේශය, හරිම භයානක දේශයක්. එහෙට ගියොත් අපිට මැරෙන්නයි වෙන්නේ. එහේ ඉන්න හැම කෙනෙක්ම යෝධයෝ වගේ.+ 33 එහෙදී අපි නෙෆිලිම්වරුන්වත්* දැක්කා! අනාක්වරු+ කියන්නේ එයාලට. එයාලා එක්ක බලද්දී අපි නිකම්ම නිකම් තණකොළ පෙත්තෝ වගෙයි.”