ද්විතීය කතාව

1 ඊශ්‍රායෙල් සෙනඟ යොර්දාන් ගඟට කිට්ටුවෙන් තිබුණ පාළුකරයේ කඳවුරු බැඳගෙන ඉද්දී මෝසෙස් එයාලට කතා කළා. ඊශ්‍රායෙල්වරුන් කඳවුරු බැඳගෙන හිටපු ඒ පාළුකරය පිහිටලා තිබුණේ සෆ් කියන තැනට ඉස්සරහින්. ඒ පාළුකරය අවට තමයි පාරාන්, තෝෆෙල්, ලාබන්, හෂේරොත් සහ දීෂාහාබ් කියන තැන් තිබුණේ. 2 හොරෙබ් කඳුකරයේ ඉඳන් සේයිර් කන්ද හරහා කාදෙෂ්බර්නේය+ කියන තැනට යන්න දවස් 11ක් ගත වෙනවා. 3 40වෙනි අවුරුද්දේ+ 11වෙනි මාසේ පළවෙනිදා තමයි යෙහෝවා දෙවියන් ඊශ්‍රායෙල් සෙනඟට කියන්න කියලා කියපු හැම දෙයක්ම මෝසෙස් එයාලට කිව්වේ. 4 ඒ වෙද්දී මෝසෙස්* හෙෂ්බොන් නගරයේ ජීවත් වුණ අමෝරිවරුන්ගේ රජ වුණ සීහොන්වයි,+ අෂ්ටාරොත් නගරයේ ජීවත් වුණ බාෂාන්වල රජ වුණ ඕග්වයි+ පරාජය කරලා තිබුණා. එයා ඕග් රජව පරාජය කළේ එද්රෙයිවලදී.*+ 5 මෝවබ් දේශයේ යොර්දාන් ගඟ කිට්ටුව තිබුණ ඒ පාළුකරයේදී මෝසෙස් ඊශ්‍රායෙල් සෙනඟට දෙවියන්ගේ නීතිය මේ විදිහට පැහැදිලි කරන්න පටන්ගත්තා.+

6 “හොරෙබ්වලදී අපේ දෙවි වන යෙහෝවා අපිට මෙහෙම කිව්වා. ‘ඔයාලා දැන් මේ කඳුකරයේ හිටියා ඇති.+ 7 දැන් මෙතනින් පිටත් වෙලා අමෝරිවරුන්+ ජීවත් වෙන කඳුකර ප්‍රදේශයටත් ඒ අවට තියෙන ප්‍රදේශවලටත් යන්න. ඒ කියන්නේ කඳුකර පළාත, අරබා,+ ෂෙපේලා,* නෙගෙබ් පළාත සහ වෙරළබඩ තීරය+ වෙතට යන්න. කානානිවරුන් ජීවත් වෙන ප්‍රදේශයටත් යන්න. ලෙබනොන්*+ දක්වාත් යුප්‍රටීස් මහ ගඟ+ දක්වාත් යන්න. 8 ඒ මුළු දේශයම අයිති කරගන්න ඔයාලට පුළුවන්. යෙහෝවා වන මම ඔයාලාගේ මුතුන්මිත්තන් වුණ ආබ්‍රහම්ට, ඊසාක්ට,+ යාකොබ්ට+ දෙනවා කියලා දිවුරලා පොරොන්දු වුණ දේශයට දැන් ගිහින් ඒක යටත් කරගන්න. එයාලටයි, එයාලාගෙන් පැවතෙන අයටයි ඒ දේශය දෙනවා කියලා මම පොරොන්දු වුණා.’+

9 “එදා මම ඔයාලට* මෙහෙම කිව්වා. ‘ඔයාලව බලාගන්න මට ලැබිලා තියෙන වගකීම මට තනියම කරන්න බැහැ.+ 10 ඔයාලාගේ දෙවි වන යෙහෝවා ඔයාලාගේ ගාණ දැන් අහසේ තරු වගේ වැඩි කරලා තියෙනවා.+ 11 ඔයාලාගේ මුතුන්මිත්තන්ගේ දෙවි වන යෙහෝවා පොරොන්දු වුණ විදිහටම+ ඔයාලට ආශීර්වාද කරලා ඔයාලාගේ ගාණ තවත් දහස් ගුණයකින් වැඩි කරන්න+ කියලා මම ඉල්ලනවා. 12 ඒත් මම කොහොමද ඔයාලව තනියෙන් බලාගන්නේ? ඔයාලා කොච්චර නම් ප්‍රශ්න ඇති කරනවාද!* ඒක මට බරක්.+ 13 ඉතින් ඔයාලාගේ හැම ගෝත්‍රයකින්ම ඥානවන්ත, හොඳට හිතලා බලලා වැඩ කරන, අද්දැකීම් තියෙන පුරුෂයන්ව තෝරලා මං ළඟට එක්කගෙන එන්න. සෙනඟව බලාගන්න මම එයාලව පත් කරන්නම්.’+ 14 එතකොට ඔයාලා මට කිව්වා ‘ඒක හොඳ අදහසක්’ කියලා. 15 ඉතින් මම සෙනඟව දාහේ, සීයේ, පනහේ සහ දහයේ කණ්ඩායම්වලට බෙදලා එයාලව බලාගන්න ඔයාලාගේ ගෝත්‍රවල ප්‍රධානීන්ව පත් කළා. තවත් සමහරදෙනෙක්ව ගෝත්‍රවල නිලධාරීන් විදිහටත් පත් කළා.+ ඒ හැමෝම ඥානවන්ත, අද්දැකීම් තියෙන පුරුෂයන්.

16 “ඒ වෙලාවේදී සෙනඟව විනිශ්චය කරන්න පත් කරපු අයට මම මෙහෙම කිව්වා. ‘ඔයාලා නඩු විසඳද්දී සාධාරණ විදිහට වැඩ කරන්න.+ ප්‍රශ්නේ ඇති වුණේ ඊශ්‍රායෙල් ජාතිකයන් දෙන්නෙක් අතරේ වුණත් ඊශ්‍රායෙල් ජාතිකයෙක් සහ විදේශිකයෙක් අතරේ වුණත් යුක්තිය ඉටු කරන්න.+ 17 නඩු විභාග කරද්දී කාගෙවත් පැත්ත ගන්න එපා.+ තරාතිරම් බලන්නේ නැතුව හැමෝටම එක වගේ සලකන්න.+ විනිශ්චය කරද්දී ඔයාලා නියෝජනය කරන්නේ දෙවියන්ව කියලා මතක තියාගන්න.+ ඉතින් මිනිස්සුන්ට බය වෙන්න එපා.+ ඔයාලට විසඳන්න අමාරු නඩු මං ළඟට අරන් එන්න. මම ඒවා විභාග කරන්නම්.’+ 18 ඒ කාලේදී කරන්න ඕනෙ හැම දෙයක්ම මම ඔයාලට කියලා දුන්නා.

19 “ඊටපස්සේ අපේ දෙවි වන යෙහෝවා කියපු විදිහටම අපි හොරෙබ් කඳුකරයෙන් පිටත් වෙලා භයානක ඒ මහ පාළුකරය මැදින් ගමන් කළා.+ ඒ පාළුකරය කොච්චර භයානකද කියලා ඔයාලා දන්නවා. අපි අමෝරිවරුන්+ ඉන්න කඳුකර පළාතට යන මාර්ගය දිගේ ගිහිල්ලා කාදෙෂ්බර්නේයවලට+ ආවා. 20 මම ඔයාලට මෙහෙම කිව්වා. ‘අපි දැන් ඇවිත් ඉන්නේ අමෝරිවරුන් ඉන්න කඳුකර පළාතට. අපේ දෙවි වන යෙහෝවා අපිට ඒ දේශය ලබා දෙනවා. 21 ඒ නිසා දැන් ගිහින් ඔයාලාගේ මුතුන්මිත්තන්ගේ දෙවි වන යෙහෝවා ඔයාලට කියපු විදිහටම ඒ දේශය යටත් කරගන්න. ඔයාලාගේ දෙවි වන යෙහෝවා ඒ දේශය දැනටමත් ඔයාලට දීලයි තියෙන්නේ.+ ඉතින් කිසි දේකට බය වෙන්න එපා.’

22 “ඒත් ඔයාලා මං ළඟට ඇවිල්ලා මෙහෙම කිව්වා. ‘මුලින් අපි ඒ දේශය ගැන හොයලා බලන්න කීපදෙනෙක්ව යවමු. ඒ දේශයට ඇතුල් වෙන්න ඕනෙ මොන මාර්ගයෙන්ද කියලත් එහේ තියෙන නගර මොන වගේද කියලත් එයාලාගෙන් තොරතුරු දැනගමු.’+ 23 ඒ අදහස හොඳයි කියලා මටත් හිතුණා. ඉතින් මම හැම ගෝත්‍රයකින්ම එක් කෙනා ගාණේ පුරුෂයන් 12දෙනෙක්ව තෝරගත්තා.+ 24 එයාලා පිටත් වෙලා ඒ කඳුකර පළාතට ගියා.+ ඒ පුරුෂයන් එෂ්කොල් නිම්නය වෙන කල්ම ගිහිල්ලා දේශයේ තොරතුරු හොයලා බැලුවා. 25 එයාලා ඒ දේශයෙන් පලතුරු කඩාගෙන ඇවිත් ඒවා පෙන්නලා මෙහෙම කිව්වා. ‘අපේ දෙවි යෙහෝවා අපිට දෙන්න යන දේශය හරිම සරුසාර දේශයක්.’+ 26 ඒත් ඔයාලා* ඒ දේශයට යන්න කැමති වුණේ නැහැ. ඔයාලාගේ දෙවි වන යෙහෝවා දුන්න නියෝගයට විරුද්ධව ඔයාලා කැරලිගැහුවා.+ 27 ඔයාලා කූඩාරම්වලට වෙලා දිගටම මෙහෙම මැසිවිලි නැඟුවා. ‘යෙහෝවා අපිට වෛර කරනවා. ඒ නිසයි ඔහු ඊජිප්තු දේශයේ ඉඳන් අපිව මෙහෙට ගෙනාවේ. ඔහුට ඕනෙ අමෝරිවරුන්ගේ අතින් අපිව නැති කරලා දාන්නයි. 28 ඒ වගේ තැනකට යන්න අපිට ඕනෙ නැහැ. තොරතුරු බලන්න ගිය අපේ සහෝදරයන් කිව්ව දේවල් මතක නැද්ද? “එහේ ඉන්න මිනිස්සු යෝධයෝ වගේ. එයාලාගේ නගර පවුරුවලින් වට කරලයි තියෙන්නේ. ඒ පවුරු අහසේ ගෑවෙන තරම් උසයි.+ අනාක්ගෙන් පැවතෙන අයත් එහේ ඉන්නවා”+ කියලා එයාලා අපිට කිව්වා. ඉතින් අපේ හිතට ලොකු බයක් දැනෙනවා.’+

29 “එතකොට මම ඔයාලට මෙහෙම කිව්වා. ‘ඒ මිනිස්සුන්ට බය වෙන්න කිසිම හේතුවක් නැහැ.+ 30 ඔයාලාගේ දෙවි වන යෙහෝවා ඊජිප්තු දේශයේදී ඔයාලා වෙනුවෙන් සටන් කරපු විදිහ ඔයාලා ඇස් දෙකෙන්ම දැක්කා.+ ඒ විදිහටම දැනුත් ඔහු ඔයාලට ඉස්සරහින් ගිහින් ඔයාලා වෙනුවෙන් සටන් කරයි.+ 31 පාළුකරයේදී ඔයාලාගේ දෙවි වන යෙහෝවා හරියට තාත්තා කෙනෙක් එයාගේ පුතාව වඩාගෙන එන විදිහට ඔයාලව වඩාගෙන ආවා. මෙතනට එන කල් මුළු ගමනේදී ඔයාලව බලාගත්ත විදිහ ඔයාලා හොඳින් දන්නවා.’ 32 ඒ හැම දේම දැනගෙනත් ඔයාලා ඔයාලාගේ දෙවි වන යෙහෝවා ගැන විශ්වාසය තිබ්බේ නැහැ.+ 33 ඔහු තමයි ඔයාලට ඉස්සරහින් ගිහිල්ලා ඔයාලට කඳවුරු බැඳගන්න සුදුසු තැන් හොයලා දුන්නේ. ඔහු ඔයාලට මඟ පෙන්නන්න රාත්‍රියේදී ගිනි ටැඹක් සහ දවාලේදී වලා ටැඹක් යොදාගත්තා. ඒ විදිහට ඔහු ඔයාලා එක්ක ඉන්නවා කියලා පෙන්නුවා.+

34 “ඔයාලා කියපු ඒ හැම දෙයක්ම අහගෙන හිටපු යෙහෝවා අන්තිමේදී ගොඩක් උදහස් වෙලා+ මෙහෙම කිව්වා. 35 ‘මම ඔයාලාගේ පියවරුන්ට දෙන්න පොරොන්දු වුණ දේශය මේ දුෂ්ට පරම්පරාවේ කිසිම කෙනෙක්ට දකින්න ලැබෙන්නේ නැහැ.+ 36 ඒත් යෙෆුන්නෙගේ පුතා වන කාලෙබ්ට ඒ අවස්ථාව ලැබෙනවා. මොකද එයා යෙහෝවා වන මට මුළු හදවතින්ම සේවය කරනවා.+ ඒ නිසා එයා බලන්න ගිය ඒ දේශයෙන් කොටසක් මම එයාටත් එයාගෙන් පැවතෙන අයටත් දෙනවා.’ 37 ඔයාලා නිසා යෙහෝවාට මං එක්කත් කේන්ති ගියා. ඔහු මට මෙහෙම කිව්වා. ‘ඔයාටත් එහෙට යන්න ලැබෙන්නේ නැහැ.+ 38 ඒ අවස්ථාව ලැබෙන්නේ ඔයාගේ සේවකයා විදිහට ඉන්න නූන්ගේ පුතා වන යොෂුවාටයි.+ ඊශ්‍රායෙල් සෙනඟව ඒ දේශයට අරගෙන යන්නේ යොෂුවායි.+ එයාව ශක්තිමත් කරන්න.’*+ 39 දෙවියන් ඔයාලට මෙහෙමත් කිව්වා. ‘මේ දේශයට ගියොත් සතුරන් ඔයාලාගේ ළමයින්ව පැහැරගනී කියලා ඔයාලා කිව්වා නේද?+ ඒත් ඇත්තටම ඒ දේශයට යන්නේ කිසිම දෙයක් නොතේරෙන ඒ ළමයි විතරයි. මම ඒ දේශය උරුම කරලා දෙන්නේ එයාලටයි.+ 40 දැන් ඔයාලා මෙතනින් පිටත් වෙලා රතු මුහුදට යන පාරෙන් ආපහු පාළුකරයට යන්න.’+

41 “ඒ වෙලාවේ ඔයාලා මට මෙහෙම කිව්වා. ‘අපි යෙහෝවාට විරුද්ධව කළේ ලොකු වරදක්. අපේ දෙවි යෙහෝවා අපිට කියපු විදිහටම අපි දැන් ගිහින් ඒ ජාතීන්ට විරුද්ධව සටන් කරමු.’ කඳුකරයට ගිහින් යුද්ධ කරලා ඒක යටත් කරගන්න එක ලේසි දෙයක් කියලයි ඔයාලා හිතුවේ. ඉතින් ඔයාලා අවිආයුධ අරගෙන සටනට යන්න සූදානම් වුණා.+ 42 ඒත් යෙහෝවා මට මෙහෙම කිව්වා. ‘එයාලට මෙහෙම කියන්න. “මං ඔයාලාගේ උදව්වට එන්නේ නැහැ.+ ඒ නිසා කඳුකරයට යන්න එපා. ගියොත් අනිවාර්යයෙන්ම සතුරන් අතින් ඔයාලා පරාජය වෙනවා.”’ 43 මං ඒ ගැන ඔයාලට කිව්වත් ඔයාලා ඒක ගණන් ගත්තේ නැහැ. ඔයාලා යෙහෝවා දෙවියන් දුන්න නියෝගයට විරුද්ධව කැරලිගැහුවා. හිතුවක්කාර විදිහට කඳුකරයට ගියා. 44 ඒ කඳුකරයේ හිටපු අමෝරිවරුන් ඇවිල්ලා ඔයාලට පහර දුන්නා. හරියට මීමැසි රංචුවක් වගේ එයාලා ඔයාලා පස්සේ එළවගෙන ආවා. එයාලා සේයිර් කඳුකරයේ හොර්මා කියන තැන වෙන කල්ම ඔයාලව පන්නලා දැම්මා. 45 ඊටපස්සේ ඔයාලා ආයෙත් කඳවුරට ඇවිල්ලා යෙහෝවා ඉස්සරහා අඬා වැලපුණා. ඒත් යෙහෝවා දෙවියන් ඔයාලට සවන් දුන්නේ නැහැ. ඔයාලා දිහා බැලුවෙවත් නැහැ. 46 ඔයාලා කාදෙෂ්වල සෑහෙන කාලයක් හිටියේ ඒ නිසයි.