දෙවියන් වහන්සේගේ අරමුණ දැන් උච්චාවස්ථාවට ළඟාවෙමින් පවතී

පොළොව මැවීමෙහි දෙවියන් වහන්සේගේ අරමුණ වූයේ එය ධර්මිෂ්ඨ තත්ත්වයන් යටතේ ජීවත් වන ප්‍රීතිමත් ජනයාගෙන් ජනාවාස කරලීම ය. අඛණ්ඩ ව ජීවත් වීම සඳහා, මනුෂ්‍යයා දෙවියන් වහන්සේගේ ආඥාවන්ට කීකරු විය යුතු ව තිබුණු නමුත්, පළමු මනුෂ්‍ය යුවළ අකීකරු වී, මරණයට නියම වූ පව්කාරයින් බවට පත් වූහ. ඔවුන්ගෙන් පැවතෙන සියල්ලන් මත පාපය සහ මරණය ගෙන ආවේ ය.—උත්පත්ති 1:27, 28; 2:16, 17; 3:1-19; රෝම 5:12.

යෙහෝවඃ නම් වූ දෙවියන් වහන්සේ අකීකරුකමේ ප්‍රතිඵල සහ පාපය පොළොවෙන් ඉවත් කිරීමට අධිෂ්ඨාන කළ සේක. නියමිත කාලයේ දී උන් වහන්සේ පොළොව දෙස බලා මනුෂ්‍ය වර්ගයා අතර ඇදහිලිවන්ත මනුෂ්‍යයෙකු වූ ආබ්‍රම් දුටු අතර, උන් වහන්සේ ඔහුගේ නාමය ආබ්‍රහම් බවට වෙනස් කළ සේක. ඔහුගෙන් පැවතෙන්නන් මහත් ජාතියක් වන බවත්, පොළොවේ සියලු පවුල් තමන්ට ආශීර්වාද කර ගන්නා පිණිස වංශයක් ඔහුට ලබාදෙන බවත් දෙවියන් වහන්සේ පොරොන්දු වූ සේක.—උත්පත්ති 12:1-3; 18:18, 19; 22:18; ගීතාවලිය 83:17; හෙබ්‍රෙව් 11:8-16.

පොදු යුගයට පෙර 16 වන සියවසේ අවසානයේ දී පමණ, ආබ්‍රහම්ගේ මුනුබුරෙකු වූ යාකොබ් නොහොත් ඊශ්‍රායෙල්, ඊජිප්තුවේ වහල් භාවයෙහි වාසය කරන ගෝත්‍ර 12සක් වී තිබුණි. යෙහෝවඃ වහන්සේ මෙම ඊශ්‍රායෙල්වරුන් මුදාගෙන ජාතියක් බවට පත් කළ සේක. සීනයි කන්දේ දී මෝසෙස් මගින් උන් වහන්සේ නීති සංග්‍රහය ජාතික ව්‍යවස්ථාවක් ලෙස දානය කළ සේක. යෙහෝවඃ වහන්සේ ඔවුන්ගේ රජාණන්, විනිශ්චයකරුවාණන්, සහ ව්‍යවස්ථා දායකයාණන් වූ සේක. දෙවියන් වහන්සේ තෝරා ගත් ජනයා වූ ඊශ්‍රායෙල් ජාතිය, ස්වකීය අරමුණ ක්‍රියාත්මක කිරීම සඳහා සංවිධානය කරන ලද, උන් වහන්සේගේ සාක්ෂිකරුවන් බවට පත් විය. සියලු ජාතීන්ගේ සුවසෙත පිණිස සදාකාල රාජ්‍යයක් පිහිටුවන ගැලවුම්කරුවාණන් ඔවුන් තුළින් පැමිණීමට තිබුණි.—නික්මයාම 19:5, 6; 1 ලේකම් 17:7-14; 1 රාජාවලිය 4:20, 25; යෙසායා 33:22; 43:10-12; රෝම 9:4, 5.

ශතවර්ෂ 15කට පසු හෝ අවුරුදු 2000කට පමණ පෙර යෞවන යුදෙව් කන්‍යාවක් වූ මරියාගෙන් ඉපදීමට දෙවියන් වහන්සේ ස්වකීය ඒක ජාතක පුත්‍රයාණන් ස්වර්ගයේ සිට පෘථිවියට එවූ සේක. උන් වහන්සේට යේසුස් යන නාමය තබනු ලැබ, දෙවියන් වහන්සේ, උන් වහන්සේගේ ආදි පිතෘ දාවිත්ට පොරොත්දු වූ රාජ්‍යය උරුමකර ගැනුමට සිටි සේක. වයස අවුරුදු 30 දී යේසුස් වහන්සේ යොහන් බව්තීස්ත විසින් බව්තීස්ම කරනු ලැබ, දෙවියන් වහන්සේගේ රාජ්‍යය ප්‍රකාශ කිරීමට පටන් ගත් සේක. රෝගාතුරයන් සුව කිරීම මගින්, උන් වහන්සේ පැමිණෙන රාජ්‍යය මනුෂ්‍ය වර්ගයාට ආශීර්වාද කරන්නේ කෙලෙස දැයි නිරූපනය කළ සේක. සදාකාල ජීවනය වුවමනා සියල්ලන්ගෙන් අවශ්‍ය කරවන්නේ කුමක් දැයි උන් වහන්සේ නිදර්ශනයන් මගින් පහදා දුන් සේක. එවිට තම පරිපූර්ණ මනුෂ්‍ය ජීවිතය, මනුෂ්‍ය වර්ගයා උදෙසා මිදීමේ මිලයක් බවට පත් කරවමින් යේසුස් වහන්සේ ව වධ කණුවක් මත මරණයට පත්කරනු ලැබී ය.—මතෙව් 1:18-24; 3:13-16; 4:17-23; 6:9, 10; පරිච්ඡේද 13; 20:28; ලූක් 1:26-37; 2:14; 4:43, 44; 8:1; යොහන් 3:16; ක්‍රියා 10:37-39.

මෙසියානු රාජ්‍යය පිහිටුවනු ලබන්නේ දුර ඈත අනාගතයෙහි දේවල පිළිවෙළේ අවසානයෙහි දී බව යේසුස් වහන්සේ පහදා දී තිබුණි. එම කාලයේ දී උන් වහන්සේ රජකම් කරන රජු වශයෙන් ස්වර්ගයන්හි අදෘශ්‍යමාන ව වැඩ සිටිනු ඇති අතර, තම පැමිණ සිටීම පොළොවට අවධානය යොමු කිරීම මගින් දැන ගැනීමට සලසනු ඇත. අප මෙම කාලයෙහි එනම් 1914 සිට ජීවත් වෙමින් සිට ඇති බව ලෝක සිද්ධීන් පෙන්නුම් කරයි. යේසුස් වහන්සේ පුරෝකථනය කළ පරිදි, රාජ්‍යයේ ශුභාරංචිය සියලු ජාතීන්ට සාක්ෂියක් පිණිස ලොව මුළුල්ලේ ප්‍රකාශ කරනු ලබමින් පවතී. ප්‍රතිඵලයක් ලෙස දෙවියන් වහන්සේගේ රාජ්‍යයේ පැත්තට සියලු ජාතීන්ගෙන් ජනයා එක් රැස් කරනු ලැබේ. මොවුහු වර්තමාන දේවල පිළිවෙළේ අවසානයෙන් බේරී, මෙසියානු රාජ්‍යය යටතේ පොළොව මත සදාකල ජීවිතය ලබා ගනු ඇත.—මතෙව් පරිච්ඡේද 24 සහ 25; එළිදරව් 7:9-17.

දෙවියන් වහන්සේගේ කැමැත්ත කරමින් සිටින බව අද දින බොහෝ පල්ලි කියා පායි. සැබෑ ක්‍රිස්තියානි සභාව ඔබට හඳුනා ගත හැක්කේ කෙසේ ද? පළමු සියවසේ ක්‍රිස්තියානි සභාව පිළිබඳ වූ ශුද්ධ ලියවිලි විභාග කර, ඉන් පසු එම පිළිවෙළ ම අද අනුගමනය කරන්නේ කවුරුන් දැයි බැලීම මගිනි.

• දෙවියන් වහන්සේගේ අරමුණ ක්‍රියාත්මක කිරීම සඳහා ආබ්‍රහම් සහ ඊශ්‍රායෙල් දැරුවේ කිනම් කොටසක් ද?

• යේසුස් වහන්සේ ස්වකීය සේවය හා මරණය මගින් ඉෂ්ට කළේ කුමක් ද?

• අපේ වර්තමාන කාලය හඳුනා ගැනීම සඳහා කුමන සිද්ධීන් පුරෝකථනය කර තිබුණා ද?