මුරටැඹ සහ පිබිදෙව්!—සත්‍යය පිළිබඳ කාලෝචිත සඟරා

“සැබෑකමේ දෙවිවූ ස්වාමිනී [යෙහෝවඃ වහන්ස, NW] ඔබ මා මිදූසේක.”—ගීතාවලිය 31:5.

1, 2. (අ) එක් සහෝදරියකට ඇය මුරටැඹ සඟරාවෙන් කිය වූ යම් දෙයක් ගැන හැඟුණේ කෙසේ ද? (ආ) අපගේ සඟරා ගැන අසනු ලබන ප්‍රශ්න මොනවා ද?

එක් ක්‍රිස්තියානි සහෝදරියක් මෙසේ ලීවා ය: “යූ කැන් ෆයින්ඩ් කම්ෆට් ඉන් ටයිම්ස් ඔෆ් ඩිස්ට්‍රෙස්a [විපත්ති කාලවල දී ඔබට සහනය සොයා ගත හැක] යන තේමාවෙන් යුත් ද වොච්ටවර් කලාපයේ පුදුමාකාර තොරතුරු සම්බන්ධයෙන් ඔබට බොහොම ස්තුතියි. ඔබ විසින් ගෙන හැර දක්වා තිබූ කරුණුවලින් බොහොමයක් හරියට ම මට කටයුතු කරන්නට සිදු ව තිබූ මා සිත තුළ වූ හැඟීම් ය; එය හරියට කෙලින් ම මා හට ලියවුණු ලිපියක් වගේ. මා එය කියවූ පළමු වතාවේ දී ම, මගේ දෙනෙතට කඳුලු ගලා ආවා. මට හැඟෙන ආකාරය තවත් කෙනෙක් දන්නවා කියා අවබෝධ වන විට එය හරි පුදුමයි! මා යෙහෝවඃ වහන්සේගේ සාක්ෂිකාරියක ව සිටීම ගැන මම බොහෝ සෙයින් කෘතඥ වෙනවා. අනාගතයේ දී පාරාදීසයේ සදාකාල ජීවනයේ පොරොන්දුව සහ දැන් අපගේ ආත්මවලට අස්වැසිල්ලක් සොයා ගත හැක්කේ වෙන කොහෙන් ද? ඔබට ස්තුතියි, අපමණ වාරයක් ස්තුතියි.”

² කවදා හෝ ඔබට එසේ හැඟී ගොස් තිබෙනවා ද? මුරටැඹ හි හෝ එහි සහකාර සඟරාව වන පිබිදෙව්! හි යම් දෙයක් විශේෂයෙන් ඔබ සඳහා ලියා තිබුණා ය කියා කවදා හෝ ඔබට පෙනී ගොස් තිබෙනවා ද? මිනිසුන්ගේ සිත් ඇදගන්නේ අපගේ සඟරාවල තිබෙන කුමකින් ද? ඒවායේ අන්තර්ගත වන ජීවිත-ගලවන පණිවුඩයෙන් ප්‍රයෝජන ලබා ගැනීම සඳහා වෙනත් අයට උපකාර කිරීමට අපට හැක්කේ කෙසේ ද?—1 තිමෝති 4:16.

සත්‍යය වෙනුවෙන් කථා කරන සඟරා

3. මුරටැඹ සහ පිබිදෙව්! බොහෝ පාඨකයන්ගේ හදවත්වලට බලපා ඇත්තේ කිනම් හොඳ හේතු උදෙසා ද?

³ යෙහෝවඃ වහන්සේ වනාහි “සත්‍යතාවයේ දෙවියන් වහන්සේ ය.” (ගීතාවලිය 31:5, NW) උන් වහන්සේගේ වචනය වන බයිබලය සත්‍යතාවයේ පොතක් ය. (යොහන් 17:17) අවංක හදවත් ඇති ජනයා සත්‍යයට ප්‍රතිචාර දක්වති. (යොහන් 4:23, 24 සසඳන්න.) මුරටැඹ සහ පිබිදෙව්! සඟරා මිලියන ගණනක් පාඨකයන්ගේ හදවත තුළට කාවැදී ගොස් තිබීමට එක් හේතුවක් නම්, ඒවා අඛණ්ඩතාවය සහ සත්‍යය පිළිබඳ සඟරා වීමයි. ඇත්ත වශයෙන් ම, මුරටැඹ ප්‍රකාශයට පත් කිරීම ආරම්භ වූයේ, බයිබල් සත්‍යයට පක්ෂපාත ව සිටීම පිළිබඳ ප්‍රශ්නය මත ය.

4, 5. (අ) සී. ටී. රසල් විසින් මුරටැඹ පළ කිරීමට තුඩු දුන්නේ කිනම් තත්ත්වයන් ද? (ආ) මුරටැඹ සඟරාව “විශ්වාසවූ නුවණ ඇති දාසයා” විසින් යොදා ගනු ලබන්නේ කෙසේ ද?

⁴ වර්ෂ 1876 දී, චාල්ස් ටී. රසල්, න්‍යූ යෝර්ක්, රොචෙස්ටර් හි, නෙල්සන් එච්. බාබර් සමඟ සම්බන්ධ වූයේ ය. බාබර්ගේ හෙරල්ඩ් ඔෆ් ද මෝනිං නමැති කලින් කලට පළ වන ආගමික සඟරාව මුද්‍රණය කිරීම යළි පන ගැන්වීම සඳහා රසල් මූල්‍යාධාර සැපයූ අතර, බාබර් ප්‍රධාන කර්තෘ වශයෙන් ද, රසල් සහායක කර්තෘ වශයෙන් ද කටයුතු කළේ ය. කෙසේ වෙතත්, වසර එකහමාරකට පමණ පසු ව, බාබර්, හෙරල්ඩ් හි 1878 අගෝස්තු කලාපයේ, ක්‍රිස්තුස් වහන්සේගේ මරණයේ මුදාගැනීමේ වටිනාකම ප්‍රතික්ෂේප කළා වූ ලිපියක් ලීවේ ය. බාබර්ට වඩා වයස අවුරුදු 30කින් පමණ බාල ව සිටි රසල්, මිදීමේ මිලය තහවුරු කරමින්, ඊළඟ කලාපයේ ලිපියක් ලියමින් ඊට ප්‍රතිචාර දැක් වූ අතර, ඔහු එය යොමු දැක්වූයේ, “දේව වචනයේ වඩාත් ම වැදගත් ඉගැන්වීමක්” යනුවෙන් ය. (මතෙව් 20:28) ශුද්ධ ලියවිලිවලින් තර්කානුකූල ව බාබර් හට ඒත්තු ගන්වන්නට රසල් විසින් යළි යළිත් ප්‍රයත්න දරනු ලැබීමෙන් පසු, හෙරල්ඩ් සමඟ තිබූ තම සම්බන්ධකම් සියල්ල ම කපා හරින්නට රසල් අවසානයේ දී තීරණය කළේ ය. එම සඟරාවේ 1879 ජූනි කලාපයේ පටන්, සහායක කර්තෘ වශයෙන් රසල්ගේ නම තවදුරටත් දක්නට ලැබුණේ නැත. මාසයකට පසු, විසිහත් හැවිරිදි රසල්, සයන්ස් වොච් ටවර් ඇන්ඩ් හෙරල්ඩ් ඔෆ් ක්‍රයිස්ට්’ස් ප්‍රෙසන්ස් (දැන් මුරටැඹ යෙහෝවඃ වහන්සේගේ රාජ්‍යය ප්‍රචාරය කරයි යනුවෙන් හැඳින්වේ) ප්‍රකාශයට පත් කිරීම ආරම්භ කළ අතර, එය ආරම්භයේ පටන් ම, මිදීමේ මිලය වැනි ශුද්ධ ලියවිලිමය සත්‍යතාවයන් තහවුරු කර තිබේ.

⁵ පසුගිය වසර 114 පුරා, මුරටැඹ, දක්ෂ නීතිඥයෙකු මෙන්, බයිබල් සත්‍යයන් හා මූල ධර්මවලට පක්ෂ ව කථා කරන්නෙකු වශයෙන් ස්ථාපිත වී තිබේ. එය දිගින් දිගට ම පළ වෙත් ම, මිලියන ගණන් අගය කරන සුලු පාඨකයන්ගේ විශ්වාසය දිනා ගෙන ඇත. එය තවමත් මිදීමේ මිලයට ප්‍රබල ලෙස අනුබල දෙන්නෙකි. (නිදසුනක් වශයෙන්, 1992 අප්‍රියෙල් 1දා කලාපය බලන්න.) තව ද, යෙහෝවඃ වහන්සේගේ පිහිටුවන ලද රාජ්‍යය ප්‍රචාරය කිරීම සඳහා සහ “නියම වේලාවට” ආත්මික ආහාර බෙදා දීම සඳහා එය, “විශ්වාසවූ නුවණ ඇති දාසයා” සහ එහි පාලක මණ්ඩලයේ ප්‍රධානතම උපකරණය ලෙස දිගට ම ක්‍රියා කරමින් සිටී.—මතෙව් 24:14, 45.

6, 7. ද ගෝල්ඩන් ඒජ් හි අරමුණ සම්බන්ධ ව සඳහන් කරන ලද්දේ කුමක් ද, තව ද කල්පනාකාරී පුද්ගලයන් එහි පණිවුඩයට ප්‍රතිචාර දැක් වූ බව පෙන්වන්නේ කුමකින් ද?

⁶ පිබිදෙව්! සඟරාව ගැන කුමක් කිව හැකි ද? පිබිදෙව්! ද, ආරම්භයේ පටන්, සත්‍යය වෙනුවෙන් කථා කොට තිබේ. ගෝල්ඩන් ඒජ් නමින් ආරම්භයේ දී හැඳින්වුණු මෙම සඟරාව, පිළියෙළ කරන ලද්දේ මහජනයා වෙත බෙදා හැරීම සඳහා ය. වර්ෂ 1919 ඔක්තෝබර් 1දා එහි ප්‍රථම කලාපයේ එහි අරමුණ ගැන මෙසේ සඳහන් කෙරිණි: “එහි අරමුණ නම්, වත්මන් දවසේ සිදුවන මහත් සිද්ධීන්වල සැබෑ අර්ථය දිව්‍ය ප්‍රඥාවේ ආලෝකයෙන් පහදා දීම සහ මිනිස් වර්ගයාගේ මහත් ම ආශීර්වාදාත්මක කාලය දැන් අත ළඟ තිබෙන බවට වාද කළ නොහැකි වූ ද, ඒත්තු ගන්වන සුලු වූ ද සාක්ෂිවලින් කල්පනාකාරී මනස්වලට ඔප්පු කිරීම ය.” කල්පනාකාරී අය ගෝල්ඩන් ඒජ් හි පණිවුඩයට ප්‍රතිචාරය දැක්වූහ. වසර ගණනාවක් මුළුල්ලේ, එහි බෙදා හැරීම, මුරටැඹ හි බෙදා හැරීමටත් වඩා බොහෝ සෙයින් වැඩි වී තිබිණි.b

⁷ කෙසේ වෙතත්, මුරටැඹ සහ පිබිදෙව්! ජනයාගේ සිත් ඇදගෙන තිබෙන්නේ, ඒවායේ මූල ධර්ම පිළිබඳ සත්‍යයන් පළවන නිසා සහ ලෝක තත්ත්වයන්හි අනාවැකිමය අර්ථය ගැන පහදා දෙන නිසා ම නොවේ. විශේෂයෙන් ම පසුගිය දශකයේ හෝ දශක දෙකේ, අපගේ සඟරා, තවත් හේතුවක් නිසා ද ජනයාගේ සිත් ගෙන තිබේ.

ජනයාගේ ජීවිතවලට බලපාන කාලෝචිත ලිපි

8. යූද් විසින් සභාව තුළ ඇති වූ බලපෑම්වලට එරෙහි වීමට තම පාඨකයන්ගෙන් උදක් ම ඉල්ලා සිටීම සඳහා ඔහු කළ සකස් කිරීම් මොනවා ද?

⁸ යේසුස් ක්‍රිස්තුස් වහන්සේගේ මරණයට හා උත්ථානයට වසර 30කට පමණ පසු ව, බයිබල් ලේඛක යූද් අභියෝගාත්මක තත්ත්වයකට මුහුණ දුන්නේ ය. දුරාචාර, සත්ත්ව ගතිගුණ ඇති මිනිස්සු ක්‍රිස්තියානින් අතරට රහසින් රිංගා ගෙන සිටියෝ ය. යූද් අදහස් කරගෙන තිබුණේ, සෙසු ක්‍රිස්තියානින් හට මූල ධර්මීය විෂයක් ගැන, එනම් පොදුවේ ආලේප ලත් ක්‍රිස්තියානින් බලාපොරොත්තුවෙන් සිටි ගැලවීම ගැන ලිවීමටයි. ඒ වෙනුවට, සභාව ඇතුළත තිබෙන දූෂිත බලපෑම්වලට එරෙහි ව සිටින ලෙස සිය පාඨකයන්ගෙන් උදක් ම ඉල්ලා සිටීමට අවශ්‍ය බව, ශුද්ධාත්මයෙන් මඟ පෙන්වනු ලැබූ ඔහුට පෙනී ගියේ ය. (යූද් 3, 4, 19-23) තත්ත්වයට අනුව සකස් වූ යූද්, තම ක්‍රිස්තියානි සහෝදරයන්ගේ අවශ්‍යතා සපුරාලූ කාලෝචිත උපදෙස් සැපයුවේ ය.

9. අපගේ සඟරා සඳහා කාලෝචිත ලිපි සැපයීමට කුමක් ඇතුළත් වේ ද?

⁹ ඒ හා සමාන ව, අපගේ සඟරා සඳහා කාලෝචිත ලිපි පිළියෙළ කිරීම අභියෝගාත්මක වගකීමකි. කාලය වෙනස් වෙයි, මිනිසුන් ද එසේ ම ය, එනම්, ඔවුන්ගේ අවශ්‍යතා, ඔවුන්ගේ ඕනෑ එපාකම් මීට දශකයකට හෝ දෙකකට පෙර තිබූ ඒවා නොවේ. එක් සංචාරක අවේක්ෂකයෙක් මෑතක දී මෙසේ නිරීක්ෂණය කළේ ය: “එක්දහස් නවසිය පණස් ගණන්වල මා සාක්ෂිකරුවෙකු බවට පත් වූ විට, බයිබල් පාඩම් පැවැත්වීම සඳහා අප මිනිසුන් වෙතට මූලික වශයෙන් එළැඹුණේ මූල ධර්ම ගැන සාකච්ඡා කිරීමටයි—එනම්, ත්‍රිත්වය, නිරාගින්න, ආත්මය යනාදිය පිළිබඳ සත්‍යය ඔවුන්ට ඉගැන්වීමටයි. එහෙත්, දැන්, පෙනෙන අයුරින්, මිනිසුන්ගේ ජීවිතවල ගැටලු හා දුෂ්කරතා එපමණට තිබෙන නිසා, ජීවත් විය යුතු ආකාරය ඔවුන්ට ඉගැන්වීමට අපට සිදුවෙනවා.” එය එසේ වන්නේ මන්ද?

10. වර්ෂ 1914 පටන්, මිනිස් කටයුතුවල නියත පිරිහීමක් ඇති වී තිබීම ගැන අප පුදුමයට පත් නොවිය යුත්තේ මන්ද?

¹⁰ “අන්තිම දවස්” සම්බන්ධයෙන් බයිබලය පුරෝකථනය කළේ මෙසේ ය: “නපුරු මනුෂ්‍යයොත් රැවටිලිකාරයොත් රවටමින්ද රැවටෙමින්ද වඩ වඩා නරක්වන්නෝය.” (2 තිමෝති 3:1, 13) මෙබැවින්, අන්තිම කාලය ආරම්භ වූ 1914 පටන්, මිනිස් කටයුතුවල නියත පිරිහීමක් දක්නට තිබීම ගැන අප පුදුම නොවිය යුතු ය. සාතන් හට ඉතිරි වී තිබෙන කාලය, වෙන කවරදාකටත් වඩා කෙටි වී තිබෙන අතර, ඔහු මින් කවර කලෙකවත් නොකළ අන්දමින් තම කෝපය මිනිස් සමාජය වෙත වේගයෙන් පළ කරමින් සිටී. (එළිදරව් 12:9, 12) මෙහි ප්‍රතිඵලයක් වශයෙන්, සාරධර්ම සහ පවුල් වටිනාකම්, මීට වසර 30කට හෝ 40කට පෙර තිබුණාට වඩා බොහෝ සෙයින් වෙනස් ය. සාමාන්‍ය ජනයා මීට ඉකුත් දශකවල තරම් ආගමික වශයෙන් නැඹුරුවාවක් නොදක්වයි. අපරාධ කොතරම් ව්‍යාප්ත වී තිබේදයත්, මිනිස්සු මීට වසර 20කට හෝ 30කට පෙර අසා නොතිබූ දේවල් ගැන දැන් සුපරීක්ෂාවෙන් පසුවෙත්.—මතෙව් 24:12.

11. (අ) මිනිසුන්ගේ මනස්වල තිබෙන්නේ කිනම් ආකාරයේ විෂයයන් ද, තව ද විශ්වාස වූ නුවණ ඇති දාස පංතිය මෙම අවශ්‍යතාවලට ප්‍රතිචාර දක්වා ඇත්තේ කෙසේ ද? (ආ) ඔබගේ ජීවිතයට බලපා ඇති මුරටැඹ හෝ පිබිදෙව්! ලිපියක් පිළිබඳ උදාහරණයක් දෙන්න.

¹¹ එමනිසා, බොහෝ දෙනාගේ මනස්වල චිත්ත වේගී, සමාජීය හා පවුල් ප්‍රශ්න තිබීම අරුමයක් නොවේ. විශ්වාසවන්ත නුවණ ඇති දාස පංතිය, ජනයාගේ සැබෑ අවශ්‍යතා ගැන කථා කරන, සැබවින් ම ඔවුන්ගේ ජීවිතවලට සම්බන්ධ කාලෝචිත ලිපි පළ කිරීම මගින්, මුරටැඹ සහ පිබිදෙව්! තුළින් ධෛර්යයෙන් යුතු ව ප්‍රතිචාරය දක්වා තිබේ. උදාහරණ කිහිපයක් සලකා බලන්න.

12. (අ) වර්ෂ 1980 දී ද වොච්ටවර් සඳහා තනි මාපිය පවුල් ගැන ලිපි පිළියෙළ කරන ලද්දේ මන්ද? (ආ) තනි-මාපිය පවුල් ගැන ලියැවුණු ලිපි සම්බන්ධයෙන් එක් සහෝදරියක් තම අගය පළ කළේ කෙසේ ද?

¹² පවුල් ප්‍රශ්න. ලෝක ව්‍යාප්ත වාර්තා මගින්, තනි මාපිය පවුල්වල සීඝ්‍ර වැඩි වීමක් පෙන්වූ විට, 1980 සැප්තැම්බර් 15දා වොච්ටවර් කලාපය සඳහා, “වන්-පේරන්ට් ෆැමිලීස්—කෝපිං විත් ද ප්‍රොබ්ලම්ස් [තනි මාපිය පවුල්—ගැටලු සමඟ සාර්ථක ව කටයුතු කිරීම]” යන තේමාවෙන් යුත් අලුත් ආකාරයක ලිපි පිළියෙළ කරන ලදි. මෙම ලිපිවලට දෙයාකාර අරමුණක් තිබිණි: (1) තනි මාපියන් මුහුණපාන අතිවිශේෂ ගැටලු සමඟ සාර්ථක ව කටයුතු කිරීමට ඔවුන්ට උපකාර කිරීමත් (2) තනි මාපිය පවුල්වලට “අන්‍යෝන්‍ය අවබෝධයේ හැඟීම්” පෙන්වා, ඔවුන් ව නියම අන්දමින් ‘බලා ගැනීම’ පිණිස වෙනත් අය ව වඩා හොඳින් දැනුවත් කිරීමත් ය. (1 පේතෘස් 3:8, NW; යාකොබ් 1:27) බොහෝ පාඨකයෝ අගය කිරීම පළ කරමින් ලිපි ලීවෝ ය. එක් තනි මවක් මෙසේ ලීවා ය. “මම එහි කවරය දකින විට ඇත්තට ම මගේ ඇස්වලට කඳුළු ආවා. මා සඟරාව විවෘත කර එහි තොරතුරු කියෙවූ අවස්ථාවේ දී, අවශ්‍ය වේලාවට එවැනි තොරතුරු සැපයීම ගැන මගේ හදවත යෙහෝවඃ වහන්සේ කෙරෙහි කෘතඥතාවයෙන් පිරී ඉතිරී ගියා.”

13. වර්ෂ 1981 දී එවේක්! සඟරාවේ පළ වූ විෂාදය ගැන කරන ලද ගැඹුරු සාකච්ඡාව කුමක් ද, තව ද එක් පාඨකයෙකුට ඒ ගැන කීමට තිබුණේ කුමක් ද?

¹³ චිත්ත වේගීය ප්‍රශ්න. විෂාදය හෙවත් මානසික අසහනය පිළිබඳ විෂය, 1960 ගණන්වල පටන්, මුරටැඹ සහ පිබිදෙව්! හි සාකච්ඡා කොට තිබේ. (1 තෙසලෝනික 5:14) එහෙත්, වර්ෂ 1981 සැප්තැම්බර් 8දා එවේක්! හි “යූ කැන් ෆයිට් ඩිප්‍රෙෂන්! [විෂාදය සමඟ සටන් කිරීමට ඔබට හැක!]” මැයෙන් යුත් කවරයේ ලිපි මාලාව මෙම විෂය ගැන නැවුම් ඒකාන්ත මුහුණුවරක් ගත්තේ ය. වොච් ටවර් සමිතියට ලොව දස දෙසින් අගය කිරීමේ ලිපි ගලා එන්නට විය. එක් සහෝදරියක් මෙසේ ලීවා ය: “මගේ හදවතේ තිබෙන හැඟීම් කඩදාසියක් මත මා කෙසේ පළ කරන්න ද? මගේ වයස අවුරුදු 24යි, පසුගිය අවුරුදු දහය පුරා, මා විෂාදයෙන් පෙළුණු බොහෝ කාල පරිච්ඡේද තිබුණා. නමුත් මම දැන් යෙහෝවඃ වහන්සේ වෙතට ළංවී සිටින බවක් මට දැනෙනවා, එමෙන් ම, මෙම ප්‍රේමනීය ලිපි සමඟින් විෂාදයෙන් පෙළෙන අයගේ අවශ්‍යතාවයන්ට ප්‍රතිචාරය දැක්වීම ගැන මම උන් වහන්සේට කෘතඥ වෙනවා. තව ද එය ඔබට කීමට මට වුවමනා වුණා.”

14, 15. (අ) ළමා දූෂණය සම්බන්ධ විෂය අපගේ සඟරාවල සාකච්ඡා කොට තිබුණේ කෙසේ ද? (ආ) ඕස්ට්‍රේලියාවේ අසරුවෙකුගේ සිත් ඇදගත්තේ කිනම් සඟරා ලිපි ද?

¹⁴ සමාජීය ප්‍රශ්න. “අන්තිම දවස්වලදී” මනුෂ්‍යන්, ‘තමුන්ට ම ප්‍රේම කරන, . . . ජන්ම ස්නේහය නැති, ආත්ම දමනය නැති, කෲර, යහපතට ප්‍රේම නොකරන’ අය වනු ඇති බව බයිබලය පුරෝකථනය කළේ ය. (2 තිමෝති 3:1-3) එමනිසා, අද දින ළමා දූෂණය මහා පරිමානයකින් සිදු වීම අප හට අරුමයක් නොවිය යුතුයි. වර්ෂ 1983 ඔක්තෝබර් 1දා, ද වොච්ටවර් හි, “හෙල්ප් ෆො ද වික්ටිමිස් ඔෆ් ඉන්සෙස්ට් [ව්‍යාභිචාරයට ගොදුරුවූවන්ට උපකාර]” යන ලිපිය තුළ මෙම විෂය ගැන අවංක ලෙස කථා කරන ලදි. ඊට වසර නවයකට පසු, එනම් 1992 මාර්තු 1දා පිබිදෙව්! කලාපයේ “ළමා දූෂණයේ කැලැල් සුව කිරීම” යන ලිපිය ප්‍රවේසමෙන් පිළියෙළ කරන ලද්දේ, ඊට ගොදුරු වූවන්ට අවබෝධයක් හා බලාපොරොත්තුවක් සැපයීමටත්, එවැනි අයට උපකාරවත් සහයෝගය දීම පිණිස අන්‍යයන් ව දැනුවත් කිරීමටත් ය. මෙම ලිපි මාලාවට, අපගේ සඟරාවල ඉතිහාසයේ වඩාත් වැඩි ම පාඨක ප්‍රතිචාරය ලැබිණි. එක් පාඨකයෙක් ලීවේ මෙසේයි: “මෙම ලිපිවල තිබූ සැනසිලිදායක සිතිවිලි හා ශුද්ධ ලියවිලිමය යොමු දැක්වීම්, මින් සුවය ලැබීමට මා හට ඉතා දැඩි සේ බලපෑවා. යෙහෝවඃ වහන්සේ මා වඩාත් පහත් කෙනෙකු කියා නොසිතන බව දැනගැනීම මට කියා නිම කළ නොහැකි සැනසිල්ලක් වුණා. මා තනි ව නොසිටින බව දැනගැනීමත් ඒ හා සමාන අස්වැසිල්ලක් වුණා.”

¹⁵ ඕස්ට්‍රේලියාවේ මැල්බෝර්න් නුවර, අසරුවෙක්, සිඩ්නි නුවර පිහිටි වොච් ටවර් සමිතියේ කාර්යාලය වෙත බොහෝ දුරක සිට දුරකථන ඇමතුමක් කර, අශ්ව රේස් පැවැත්වෙන වාතාවරණය සම්බන්ධයෙන් තමාගේ පිළිකුල් සහගත බව පළ කළේ ය. තමා මාර්තු 8දා පිබිදෙව්! සඟරාවේ (ඉංග්‍රීසි කලාපයේ) “රේප්—අ වුමන්ස් නයිට්මෙයාර් (ස්ත්‍රී දූෂණය—ස්ත්‍රියකගේ නපුරු සිහිනය)” මේ දැන් කිය වූ බවත්, එවැනි වටිනා සඟරාවක් පවතින බව විශ්වාස කිරීම තමාට අසීරු කරුණක් වූ බවත් කියා සිටියේ ය. ඔහු විනාඩි 30ක පමණ කාලයක් මුළුල්ලේ ප්‍රශ්න ඇසූ අතර, ලැබූ පිළිතුරු ගැන ඉතා සතුටට පත් විය.

16. අපගේ සඟරා සඳහා ඔබගේ අගය නිරූපනය කිරීමට ඔබට හැක්කේ කිනම් ක්‍රමවලින් ද?

¹⁶ ඔබ ගැන කුමක් කිව හැකි ද? මුරටැඹ හෝ පිබිදෙව්! සඟරාවේ පළවූ යම් විශේෂ ලිපියක් ඔබගේ ජීවිතයට බලපෑම් කර තිබෙනවා ද? එය එසේ නම්, අපගේ සඟරා උදෙසා ඔබට කෘතඥතාවයේ ගැඹුරු හැඟීමක් තිබෙන බවට කිසිඳු සැකයක් නැත. ඔබගේ අගය නිරූපනය කිරීමට ඔබට හැක්කේ කෙසේ ද? සෑම කලාපයක් ම ඔබ විසින් ම කියවීමෙන් බව සහතික ය. මෙම අනර්ඝ සඟරා හැකි තරම් පුළුල් ලෙස බෙදා දීමෙන් ද ඔබට හවුල් විය හැකියි. මෙය කළ හැක්කේ කෙසේ ද?

වෙනත් අය සමඟ බෙදා ගන්න

17. සඟරා බෙදා හැරීම වැඩි කිරීමට සභාවන්ට කළ හැක්කේ කුමක් ද?

¹⁷ පළමු ව, සෑම සභාවකට ම කළ හැකි යම් දෙයක් තිබේ. ඉන්ෆෝමන්ට් [දැන් අපගේ රාජ්‍යය සේවාව] හි 1952 ඔක්තෝබර් කලාපය මෙසේ පැවසී ය: “සඟරා බෙදා දිය හැකි වඩාත් බලපෑමෙන් යුත් ක්‍රමය නම්, ගෙයින් ගෙට හා සාප්පුවෙන් සාප්පුවට බෙදා හැරීමයි. “මෙබැවින් සඟරා බෙදා හැරීමට මේ මාර්ග උපයෝගි කිරීම සඟරා දවසේ වැඩකටයුතුවල දී නිති පතා කොටසක් ලෙස සමිතිය නිර්දේශ කරයි.” එම අවවාදය තවමත් අද දිනට වලංගු ය. නිති පතා සඟරා දවසක්, එනම්, මූලික වශයෙන් සඟරා සාක්ෂි දැරීම සඳහා දවසක් වෙන් කර තැබීමට සභාවන්ට හැක. බොහෝ සභාවන් හට, විශේෂ සෙනසුරාදා දිනයන් ඒ සඳහා හොඳ දවසක් බවට කිසිඳු සැකයක් නැත. එසේ ය, ගෙයින් ගෙට, සාප්පුවෙන් සාප්පුවට සේවයේ දී, සඟරා මාර්ගවල දී, සඟරා මගින් සාක්ෂි දැරීමට සෑම සභාවක් ම විශේෂ දිනයන් හා සැඳෑවන් වෙන් කොට තබා ගනීවා. මීට අමතර ව, සඟරා බෙදා හැරීම වැඩි කිරීමට රාජ්‍යය ප්‍රචාරකයෙක් වන ඔබට කුමක් කළ හැකි ද?

18, 19. (අ) මුරටැඹ සහ පිබිදෙව්! සඟරා පිළිබඳ ව සාවධානයෙන් සිටීම, සඟරා බෙදා දීමට ඔබට උපකාරවත් විය හැක්කේ කෙසේ ද? (ආ) සඟරා ඉදිරිපත් කරන විට, කෙලින් ම කාරණයට බසින කෙටි ඉදිරිපත් කිරීම්වල ඇති වාසිය කුමක් ද? (ඇ) ජනයාගේ නිවෙස්වලට සඟරා යැවීමේ වටිනාකම පෙන්වන්නේ කුමකින් ද?

¹⁸ මූලික පියවර නම්, මුරටැඹ සහ පිබිදෙව්! සඟරා ගැන හොඳින් සාවධාන ව සිටීමයි. සඟරා වේලාසනින් ම කියවන්න. එක් එක් ලිපිය කියවන විට, ඔබගෙන් ම මෙසේ අසන්න, ‘මෙම ලිපිය ප්‍රයෝජනවත් වනු ඇත්තේ කාට ද? ලිපිය කෙරෙහි උනන්දුව පුබුදුවාලීම සඳහා ඔබට පැවසිය හැකි වචන කිහිපයක් ගැන කල්පනා කරන්න. නිති පතා සඟරා දවසේ ඒවා බෙදා දෙනවාට අමතර ව, ඔබට වෙනත් අය හමු වන සෑම අවස්ථාවක දී ම—එනම්, ගමන් කරන විට හෝ සාප්පු යන විට, ඔබ සමඟ එකට වැඩ කරන අය, අසල්වාසීන්, පාසලේ ළමුන් හෝ ගුරුවරුන් සමඟ කථා කරන විට—එම අවස්ථාවලින් ප්‍රයෝජන ගනු වස් පිටපත් කිහිපයක් රැගෙන නොයන්නේ මන්ද?

¹⁹ දෙවෙනුව කළ හැකි යෝජනාව නම්, කාරණා සරල ව තබා ගැනීමයි. වර්ෂ 1956 දෙසැම්බර් 1දා ද වොච්ටවර් කලාපය මෙසේ සඳහන් කළේ ය: “සඟරා ඉදිරිපත් කරන විට, කරන්නට තිබෙන හොඳ ම දේ නම්, ඉදිරිපත් කිරීම කෙලින් ම කාරණයට බසින කෙටි එකක් කිරීමයි. මෙහි පරමාර්ථය පිටපත් බොහෝ ගණනක් බෙදා දීම ය. ඒවායේ “කථාව” ඒවා විසින් ම කෙරෙනු ඇත. එක් ලිපියකින් එක් අදහසක් ගෙන, එය තමන්ගේ ම වචනවලට පෙරලා සඟරා ඉදිරිපත් කිරීම බලපෑමෙන් යුක්ත බව ඇතැම් ප්‍රචාරකයන් සොයා ගෙන තිබේ. වරක් සඟරා නිවෙස තුළට ගිය විට, ඒවා ඔබෙන් ලබා ගත් පුද්ගලයාට අමතර ව, තවත් අයටත් “කථා කරනවා” ඇත. අයර්ලන්තයේ සරසවි සිසුවියක්, තම පියා සාක්ෂිකරුවෙකුගෙන් ලබා ගෙන තිබූ 1991 සැප්තැම්බර් 1දා ද වොච්ටවර් [1992 මැයි 1දා මුරටැඹ] කලාපය කියෙව්වා ය. අදහස් හුවමාරුව සහ වෙනත් විෂයන් පිළිබඳ ලිපි ඇගේ උනන්දුව පුබුදුවාලී ය. ඈ සඟරාව කියවා අවසන් වූ විගස, දුරකථන නාමාවලියේ ලයිස්තු ගත කර ඇති අංක කරකවමින් සාක්ෂිකරුවන්ට දුරකථනයෙන් කථා කළා ය. ඉක්මනින් ම බයිබල් පාඩමක් පටන් ගැනිණි, තව ද එම යෞවන කාන්තාව 1993 ජූලි මස පැවැති “දිව්‍ය ඉගැන්වීම” දිස්ත්‍රික්ක සමුළුවේ දී බව්තීස්ම වූවා ය. සඟරාවලට ජනයා හට “කථා කළ” හැකි නිවෙස්වලට ඒවා යැවීමට හැකි සෑම ක්‍රමයක් ම යොදා ගනිමු! එක් සංචාරක අවේක්ෂකයෙක් තවත් සරල යෝජනාවක් ඉදිරිපත් කළේ මෙසේ ය: “සඟරා ඔබගේ මල්ලෙන් පිටතට ගන්න.” ඇත්ත වශයෙන් ම, ඔබ පවසන දේ ගෙවැසියාගේ සිත් ඇද නොගනී නම්, සමහරවිට ඒවායේ සිත් ඇදගන්නා කවරවල පින්තූරු ඔබ වෙනුවෙන් කථා කරනවා ඇත.

20, 21. (අ) සඟරා වැඩයේ හවුල්වීමේ දී නම්‍ය සුලු වීමට ඔබට හැක්කේ කෙසේ ද? (ආ) සෑම මසක ම, වැඩියෙන් සඟරා බෙදා දීම සඳහා ඔබට කුමක් කළ හැකි ද?

²⁰ තුන්වෙනි යෝජනාව නම්, නම්‍ය සුලු වීමයි. (1 කොරින්ති 9:19-23 සසඳන්න.) කෙටි ඉදිරිපත් කිරීම් කිහිපයකට සූදානම් වෙන්න. පිරිමින්ගේ සිත් ඇදගන්නා ලිපියක් මනසේ තබා ගන්න, තවත් ලිපියක් ස්ත්‍රීන්ට. යෞවනයන් සඳහා, “යෞවන අය අසති . . . ” ලිපි විශේෂ කොට දැක්වීමට ඔබට හැකි ය. ඔබ සඟරා සේවයේ යෙදෙන විටත් නම්‍ය සුලු වන්න. සඟරා දවසට අමතර ව, සවස් කාලයේ සාක්ෂි දැරීම ද ගෙයින් ගෙට සාක්ෂි දැරීම සඳහා අනගි ප්‍රස්තාවක් උදා කරන බව ඔබට පෙනී යනවා ඇත.

²¹ හතරවෙනි යෝජනාව නම්, පුද්ගලික ඉලක්කයක් තබා ගැනීම ය. වර්ෂ 1984 මාර්තු මස අපගේ රාජ්‍යය සේවාවේ “සඟරා ජීවනයට යන මාර්ගය පෙන්වයි” යන මැයෙන් වූ අතිරේකයේ මෙසේ සඳහන් විය: “යෝජනාවක් වශයෙන්, ප්‍රචාරකයන්ට පුද්ගලික ඉලක්කයක් තබා ගත හැක, නිදසුනක් වශයෙන්, තමන්ගේ තත්ත්වයට අනුව, මාසයකට සඟරා 10 බැගින්; පුරෝගාමින්ට සඟරා 90ක් සඳහා වීර්ය කළ හැකි ය. ඇත්ත වශයෙන් ම, ඇතැම් ප්‍රචාරකයන්ට මාසයකට සඟරා වැඩි ප්‍රමාණයක් බෙදා දෙන්නට හැකි බැවින්, ඒ සඳහා වඩාත් ඉහළ පුද්ගලික ඉලක්කයක් තබා ගන්නවා ඇත. කෙසේ වුවද, දුර්වල සෞඛ්‍යය, ප්‍රදේශයේ ස්වභාවය හෝ වෙනත් හොඳ හේතු නිසාවෙන් තවත් අයගේ ඉලක්කය වඩාත් අඩු එකක් විය හැකියි. එහෙත් ඔවුන් යෙහෝවඃ වහන්සේට කරන සේවය එක සමාන වටිනාකමකින් යුක්ත ය. (මතෙව් 13:23; ලූක් 21:3, 4) වැදගත් ම දේ නම්, පුද්ගලික ඉලක්කයක් තබා ගැනීමයි.”

22. සත්‍යය පිළිබඳ අපගේ කාලෝචිත සඟරා උදෙසා අප යෙහෝවඃ වහන්සේට ස්තුතිවන්ත වන බව පෙන්වීමට අපට හැක්කේ කිනම් ක්‍රමවලින් ද?

²² “සැබෑකමේ දෙවිවූ” යෙහෝවඃ වහන්සේ, මෙම කාලෝචිත සඟරා අප හට සැපයීම සඳහා විශ්වාස වූ නුවණ ඇති දාසයා ව යොදා ගැනීම ගැන අප උන් වහන්සේට කොතරම් ස්තුතිවන්ත වෙමු ද! (ගීතාවලිය 31:5) යෙහෝවඃ වහන්සේ කැමති වන තාක්කල්, මෙම සඟරා, ජනයාගේ සැබෑ අවශ්‍යතාවයන් මනා ලෙස වටහා ගෙන කටයුතු කරනවා ඇත. ඒවා සදාචාරය පිළිබඳ යෙහෝවඃ වහන්සේගේ උසස් ප්‍රමිති තහවුරු කරමින් සිටිනවා ඇත. හරි මූල ධර්මවලට අනුබල දීම ඒවා විසින් නවතා දමන්නේ නැත. තව ද, දෙවියන් වහන්සේගේ රාජ්‍යය පාලනය කරමින් තිබෙන්නා වූ ද සංඛ්‍යාවෙන් වැඩිවෙමින් සිටින යෙහෝවඃ වහන්සේගේ සැබෑ නමස්කාරකරුවන් විසින් පෙර නොවූ විරූ අන්දමින් පොළොව මත දෙවියන් වහන්සේගේ කැමැත්ත කරනු ලබමින් තිබෙන්නා වූ ද අපගේ දවස් සනිටුහන් කරන බයිබල් අනාවැකිවලට අවධානය යොමු කරවීම ඒවා මගින් දිගට ම කෙරෙනවා ඇත. (මතෙව් 6:10; එළිදරව් 11:15) මුරටැඹ සහ පිබිදෙව්! සඟරාවල අපට තිබෙන්නේ මොනතරම් මිල කළ නොහැකි නිධානයක් ද! ජනයාගේ ජීවිතවලට බලපෑම් කරන්නාවූ ද, එමෙන් ම රාජ්‍යය සත්‍යතාවයන් හි ජය ගොස පළ කරන්නා වූ ද මෙම වැදගත් සඟරා මොළොක් හදවත් ඇති අයට බෙදා දීමට තිබෙන සෑම ප්‍රස්තාවකින් ම අපි ප්‍රයෝජන ගනිමු.

[පාදසටහන්වල]

ඔබගේ පිළිතුර කුමක් ද?

◻ මුරටැඹ සහ පිබිදෙව්! සත්‍යය පිළිබඳ සඟරා බව පෙන්වන්නේ කුමකින් ද?

◻ මුරටැඹ සහ පිබිදෙව්! ජනයාගේ ජීවිතවලට බලපා ඇත්තේ කෙසේ ද?

◻ සඟරා බෙදා හැරීම වැඩි කිරීමට සභාවන්ට කුමක් කළ හැකි ද?

◻ වැඩියෙන් සඟරා බෙදා හැරීමට ඔබට උපකාරවත් විය හැක්කේ කුමන යෝජනා ද?

[22වන පිටුවේ කොටුව]

ජනයාගේ ජීවිතවලට බලපා ඇති සමහරක් ලිපි

මුරටැඹ සහ පිබිදෙව්! හි පළ වී ඇති විශේෂ ලිපිවලට තම අගය ප්‍රකාශ කරමින්, වසර ගණනාවක් පුරා පාඨකයන් බොහෝ දෙනෙක් ලිපි එවා ඇත. පහත ලයිස්තු ගත කොට තිබෙන්නේ, අපගේ පාඨකයන්ගේ ජීවිතවලට බලපෑම් කර ඇති විෂයන් බොහොමයකින් කිහිපයකි. මෙම ලිපි හෝ වෙනත් ලිපි ඔබගේ ජීවිතය වෙනස් කොට තිබෙනවා ද?

මුරටැඹ

“රහසින් කරන වැරදිවලින් ජය ගැනීමට දේව උපකාරය පතන්න.” (1985 දෙසැම්බර් 1)

“වයස්ගත දෙමාපියන් කෙරෙහි භක්තිවන්ත ලෙස හැසිරීම” (1987 දෙසැම්බර් 1)

“අරමුණක් සහිත අධ්‍යාපනය” (1992 මුරටැඹ විශේෂ අතිරේක කලාපය)

පිබිදෙව්!

“යූ කැන් ෆයිට් ඩිප්‍රෙෂන් [විෂාදය සමඟ සටන් කිරීමට ඔබට හැක]” (1981 සැප්තැම්බර් 8, එවේක්!)

ඔබ ප්‍රේම කරන කෙනෙක් මැරුණ විට . . . ” (1985 පිබිදෙව්! 5-3)

“ප්‍රොටෙක්ට් යෝර් චිල්ඩ්රන්! [ඔබගේ දරුවන් ආරක්ෂා කර ගන්න!]” (1993 ඔක්තෝබර් 8 එවේක්!)

[23වන පිටුවේ පින්තූරය]

කැනඩාවේ—සඟරා සමඟින් ගෙයින් ගෙට දේශනා කිරීම

[24වන පිටුවේ පින්තූරය]

මයන්මා හි,—ජීවනයට මඟ පෙන්වන සඟරා ඉදිරිපත් කිරීම