දෙමාපියෙනි බිළිඳු වයසේ පටන් ඔබේ දරුවන්ව පුහුණු කරන්න
1 “දරුවෙකු සුදුසු මාර්ගයෙහි පුහුණු කරන්න, එවිට ඔහු වයස්ගත වූ කලත් එයින් අහක්ව නොයන්නේය.” (හිතෝ. 22:6) දෙමාපියෙනි, ඔබේ දරුවන් සත්‍යයේ මාර්ගයෙන් ‘අහක්ව යනවා’ දකින්න ඔබ කැමති නැත්නම් ඔවුන්ව සුදුසු මාර්ගයේ පුහුණු කිරීම ඇරඹිය යුත්තේ කවදාද? බිළිඳු වයසේදීමයි!
2 තිමෝතිට ආත්මික අධ්‍යාපනය ලැබුණේ “බිළිඳු වයසේ පටන් [NW]” කියා පාවුල් පැවසුවා. (2 තිමෝ. 3:14, 15) එහි ප්‍රතිඵලයක් හැටියට තිමෝති කාගෙත් පැසසුමට ලක් වූ ආත්මික පුද්ගලයෙකු ලෙස වැඩුණා. (පිලි. 2:19-22) දෙමාපියෙනි, ඔබේ දරුවන්ට ‘යෙහෝවා ඉදිරියෙහි වැඩීමට’ අවශ්‍ය පුහුණුව දිය යුත්තේ ‘බිළිඳු වයසේ පටන්ය.’—1 සාමු. 2:21.
3 ඔවුන්ට වැඩීමට අවශ්‍ය ජලය සපයන්න: කුඩා පැළ විශාල ගස් ලෙස වැඩෙන්න නම්, ඒවාට නිතරම ජලය අවශ්‍යයි. ඒ වගේ තමයි දරුවන් දෙවිගේ මේරූ සේවකයන් ලෙස වැඩෙන්න නම්, ඔවුන් බයිබල් සත්‍යය නමැති ජලය හොඳින් උරාගත යුතුයි. දරුවන්ට සත්‍යය ඉගැන්වීමට හා යෙහෝවා සමඟ කිට්ටු සබඳතාවක් ගොඩනඟා ගැනීමට උපකාර කිරීම සඳහා තිබෙන ප්‍රධානතම මාර්ගය වන්නේ නිතිපතා පවත්වන පවුලේ බයිබල් පාඩමයි. කොහොමවුණත් දෙමාපියෙනි, මෙහිදී ඔබේ දරුවාට අවධානය දිය හැකි ප්‍රමාණය හා කාලය සැලකිල්ලට ගන්න. කුඩා දරුවන් සමඟ වැඩි වේලාවක් එක දිගටම පාඩම් කරනවාට වඩා කෙටි වේලාවන් කිහිපයකදී පාඩම් කිරීම වඩාත් ඵලදායක විය හැකියි.—ද්වි. 11:18, 19.
4 ඔබේ දරුවාගේ ඉගෙනගැනීමේ හැකියාව කවදාවත් අවතක්සේරු කරන්න එපා. බයිබල් චරිත පිළිබඳ කතන්දර ඔවුන්ට කියන්න. බයිබලයේ විස්තර කරන දේවල් ඇඳීමට හා ඇතැම් සිද්ධීන් රඟදැක්වීමට ඔවුන්ට අවස්ථාවක් දෙන්න. ඉගැන්වීමේදී වීඩියෝ පට හා බයිබල් නාට්‍යය ඇතුළු විවිධ ශ්‍රව්‍ය කැසට් පට යොදාගන්න. දරුවන්ගේ වයස් මට්ටම හා ඉගෙනගැනීමේ හැකියාව සැලකිල්ලට ගෙන පවුලේ පාඩම් සකස් කරගන්න. මුලින්ම කුඩා දේවල් සම්බන්ධයෙන් ටිකෙන් ටික පුහුණුව දෙන්න. ඒ වුණත් දරුවා වැඩෙද්දී ඔහුට දෙන පුහුණුවට බොහෝ දේ ඇතුළත් කළ යුතුයි. බයිබල් උපදෙස් දෙන විට එය ප්‍රාණවත්ව කරන්න. විවිධත්වයක් ඇති කරන්න. ඔබේ ආශාව වන්නේ දේවවචනය සඳහා ඔබේ දරුවා තුළ ‘මහත් ආශාවක්’ ඇති කරන්නයි. එනිසා පාඩම රසවත් එකක් කිරීම සඳහා ඔබට හැකි සෑම දෙයක්ම කරන්න.—1 පේතෘ. 2:3.
5 සභාවේ කටයුතුවලට ඔවුන්ව හවුල් කරවාගන්න: දරුවන්ට සභාවේ කටයුතුවලට හැකි පමණ හවුල් වීමට පුළුවන් වන පරිදි පියවරෙන් පියවර අත් කරගත හැකි ඉලක්ක ඔවුන් ඉදිරියෙහි තබන්න. මුලින්ම තැබිය හැකි ඉලක්ක මොනවාද? කුඩා දරුවන් දෙදෙනෙකුගේ මාපියන් මෙසේ පැවසුවා. “දරුවන් දෙන්නාව මුලින්ම පුහුණු කළේ රාජ්‍ය ශාලාවේ නිහඬව වාඩි වෙලා ඉන්නයි.” කල්ගත වෙත්ම රැස්වීම්වලදී ඔවුන්ගේම වචනවලින් අදහස් දැක්වීමට හා දිව්‍යාණ්ඩු සේවා පාසැලට ඇතුළත් වීමට ඔවුන්ට උපකාර කරන්න. ක්ෂේත්‍ර සේවයේදී අත් කරගැනීම සඳහා තබාගත හැකි හොඳ ඉලක්කයන් ලෙස පත්‍රිකාවක් ගෙවැසියාට ඉදිරිපත් කිරීම, ශුද්ධ ලියවිලි පාඨයක් කියවීම, සඟරාවක් ඉදිරිපත් කිරීම හා ගෙවැසියන්ව අර්ථාන්විත සාකච්ඡාවකට හවුල් කරවාගැනීම සඳහන් කරන්න පුළුවන්.
6 උනන්දුව වඩවාලන ආදර්ශයක් තබන්න: ඔබ දිනපතා යෙහෝවා ගැන කතා කරනවා හා ඔහුට යාච්ඤා කරනවා ඔබේ දරුවන්ට ඇහෙනවාද? ඔබ බයිබලය අධ්‍යයන කරනවා, රැස්වීම්වලට යනවා, ක්ෂේත්‍ර සේවයේ හවුල් වෙනවා, දෙවිගේ කැමැත්ත කිරීමෙන් සතුටක් ලබනවා ඔවුන් දකිනවාද? (ගීතා. 40:8) ඔබ ඒ දේවල් කරන බව ඔවුන් දැකීම හා පවුලක් හැටියට ඒ දේවල් එකට කිරීම ඉතාමත් වැදගත්. දරුවන් හයදෙනෙකුව ඇදහිලිවන්ත සාක්ෂිකරුවන් ලෙස හදාවඩා ගත් මවක් ගැන දියණියක් මෙසේ පැවසුවා. “අපේ හිතට තදින්ම කාවැදුණේ අම්මාගේ ආදර්ශයයි. වචනවලට වඩා එය හුඟාක් ප්‍රබල වුණා.” දරුවන් හතරදෙනෙකුගේ දෙමාපියෙකු මෙසේ පැවසුවා. “‘මුල් තැන යෙහෝවාටයි’ කියන ප්‍රකාශය නිකම්ම වචනවලට සීමා වුණේ නැහැ. අපි ජීවත් වෙන ආකාරයෙන් ඒ බව පෙන්නුවා.”
7 දෙමාපියෙනි, ඔබේ දරුවන්ට දේවවචනයේ සත්‍යය ඉගැන්වීමෙන්ද පියවරෙන් පියවර අත් කරගත හැකි ඉලක්ක ඔවුන් ඉදිරියේ තැබීමෙන්ද හොඳ ආදර්ශයක් සැපයීමෙන්ද ඔබේ දරුවන්ව බාල කාලයේ පටන් පුහුණු කරන්න. මේ දේවල් කරනවා නම් ඔබ ඉමහත් ප්‍රීතියක් ලබනවා නිසැකයි!