යහපත් ක්‍රියාවලට අපව පොලඹවන්නේ අපේ ඇදහිල්ලයි
1 නෝවාව, මෝසෙස්ව හා රාහබ්ව ක්‍රියාවට පෙලඹුවේ ඇදහිල්ලයි. නෝවා නැවක් සෑදුවා. මෝසෙස් ඵාරාවෝගේ රජ මාළිගාවේ භුක්ති විඳින්න තිබුණු සැපවත් ජීවිතය අත්හැරියා. රාහබ් ඔත්තුකාරයන්ව සඟවාගෙන, ඔවුන් දුන් උපදෙස් පිළිපැද්දා. එනිසා ඇගේ පවුලේ අය ගැළවුණා. (හෙබ්‍රෙ. 11:7, 24-26, 31) අපේ ඇදහිල්ල අපව පොලඹවන්නේ මේ කාලයේ කුමන ආකාරයේ යහපත් ක්‍රියා කරන්නද?
2 සාක්ෂි දැරීම: අපේ පුදුමාකාර යහපත් දෙවි ගැනත් මනුෂ්‍යවර්ගයාගේ සදාකාලික සන්තෝෂය සඳහා ඔහු පිළියෙළ කර තිබෙන සැපයුම් ගැනත් කතා කරන්න අපව පොලඹවන්නේ ඇදහිල්ලයි. (2 කොරි. 4:13) සමහර අවස්ථාවලදී අපි සාක්ෂි දරන්න පසුබට වෙන්න පුළුවන්. නමුත් ‘යෙහෝවාව නිතර අප ඉදිරියෙහි තබාගන්නවා නම්’ අපට ශක්තිය ලැබෙන අතර අපේ බයාදු ගතියද පහ වී යයි. (ගීතා. 16:8) මෙසේ අපේ නෑදෑයන්ට, අසල්වාසීන්ට, අප සමඟ රැකියාව කරන අයට හා පාසැලේ ඉගෙනගන්න අයට හා වෙනත් අයට, සුදුසුයි කියා හැඟෙන ඕනෑම අවස්ථාවක ශුභාරංචිය ගැන කතා කරන්න අපේ ඇදහිල්ල අපව පොලඹවයි.—රෝම 1:14-16.
3 එකට එක්රැස්වීම: ඇදහිල්ල මගින් ජනිත කරවන තවත් යහපත් ක්‍රියාවක් වන්නේ නිතිපතා රැස්වීම්වලට පැමිණීමයි. එය සිදු වන්නේ කෙසේද? අප නිතිපතා රැස්වීමට පැමිණෙනවා නම්, එයින් අප පෙන්වන්නේ අප එකට එක්රැස් වී සිටින ක්‍රිස්තියානි රැස්වීම්වලදී දෙවිගේ ශුද්ධාත්මය මාර්ගයෙන් යේසුස් අප සමඟ සිටින බව විශ්වාස කරන බවයි. (මතෙ. 18:20) ඒ වගේම “ආත්මය සභාවලට කියන දේ [අසන්න]” අප ආශාවෙන් සිටින බවත් එමගින් අප පෙන්වනවා. (එළි. 3:6) රැස්වීම්වලදී අපි ඉගෙනගන්න දේවල් මහත් ඕනෑකමින් අපි සිතට ගන්නවා. මන්ද ඒවා අපට ලැබෙන්නේ අපේ ශ්‍රේෂ්ඨතම ගුරුවරයා වන යෙහෝවාගෙන් බව අපේ ඇදහිල්ල නමැති ඇස්වලින් අපට පේනවා.—යෙසා. 30:20.
4 අප කරන තේරීම්: අපේ ජීවිතයේ ආත්මික කාරණාවලට ප්‍රමුඛත්වය දීමට අපව පොලඹවන දෙයක් වන්නේ නොපෙනෙන යථාර්ථයන් පිළිබඳව ප්‍රබල විශ්වාසයක් ඇතුව සිටීමයි. (හෙබ්‍රෙ. 11:1) බොහෝ අවස්ථාවලදී මෙය කිරීම සඳහා ද්‍රව්‍යමය දේවල් පරිත්‍යාග කරන්න සිදු වෙනවා. උදාහරණයක් හැටියට වැඩිමහල්ලෙක් ඔහුගේ රැකියාවේ උසස් තනතුරක් සඳහා ඔහුට ලැබුණු අවස්ථාව පිළිගත්තේ නැහැ. ඔහු එසේ කළේ එය බාරගත්තා නම් රැස්වීම් අතපසු කිරීමට, පවුලේ අයගෙන් දුරස් වී සිටීමට හා ඔහු කරමින් සිටි පුරෝගාමී සේවය අත්හැරීමට සිදු වන නිසයි. යෙහෝවා ‘පළමුකොට රාජ්‍යයද තමන්ගේ ධර්මිෂ්ඨකමද සොයන’ අයගේ ද්‍රව්‍යමය අවශ්‍යතා සපුරාලන බවට බයිබලයේ දී ඇති සහතිකය කෙරෙහි අපිත් ඒ හා සමානව ස්ථිර විශ්වාසයක් තබමු.—මතෙ. 6:33.
5 ඇදහිල්ල අපේ ජීවිත මත ඇති කරන ප්‍රබල බලපෑම අන් අයගේ අවධානයට ලක් වෙනවා. ඇත්තෙන්ම, අපේ ඇදහිල්ල මුළු ලෝකය පුරාම ප්‍රසිද්ධයි. (රෝම 1:8) මේ නිසා අපේ ඇදහිල්ල ජීවමාන බව යහපත් ක්‍රියාවලින් පෙන්වීමට අප සියලුදෙනාම අදිටන් කරගනිමු.—යාකො. 2:26.