පාඩමක් කරන විදිහ හමු වූ මුල් අවස්ථාවේදීම පෙන්වන්න
බයිබල් පාඩමක් කරන්න කැමතිද කියා අප අසද්දී සමහර නිවැසියන් ‘නැහැ’ කියා හෝ ‘අපේ ආගමෙත් බයිබල් පංති පවත්වනවා’ කියා පවසනවා. ඔවුන් එසේ පවසන්නේ අප විසින් පවත්වන බයිබල් පාඩමෙන් කොතරම් දැනුමක් හා ප්‍රීතියක් ලැබෙනවාද කියා නොදන්නා නිසයි. ඒ සම්බන්ධයෙන් අපට කුමක් කළ හැකිද? ‘මම හොඳ කෝකියෙක්, පස්සෙ වෙලාවක හොඳ කෑමක් හදලා දෙන්නම්’ කියලා කිව්වට කෙනෙකුට කෑමක රස දැනෙන්නේ නැහැ. ඒ රසය දැනෙන්න නම් ඒ වෙලාවෙම කන්න යමක් හදලා දෙන්න අවශ්‍යයි. ඒ හා සමානව බයිබල් පාඩමක් කරන්න කැමතිද කියා නිකම්ම අසනවා වෙනුවට පාඩමක් කරන ආකාරය ඒ වෙලාවෙම කර පෙන්වන්න. වර්ෂ 2006 ජනවාරි රාජ්‍ය සේවාවේ 6වන පිටුවේ සඳහන් ආකාරයට එය කරන්නේ කොහොමද කියා අපි බලමු. ගත වෙන්නේ විනාඩි කීපයක් විතරයි.
“මෙතන කියන දේ ඉටු වෙන දවසක් එයි කියලා ඔයා හිතනවාද? [යෙසායා 33:24 කියවා ප්‍රතිචාරයට ඉඩ හරින්න.] ඒ ගැන තව වැදගත් දෙයක් ඔයාට පෙන්වන්නම්” කියා නිවැසියාට ‘බයිබලයේ ඉගැන්වීම්’ පොතක් දෙන්න. එහි 36වන පිටුවේ 22 ඡේදය බලන්න කියා ආරාධනා කරන්න. ඡේදයට අදාළ ප්‍රශ්නය කියවන්න. ඔබ ඡේදය කියවද්දී එයට පිළිතුර සොයන්න කියා නිවැසියාට කියන්න. කියවූ පසු නැවත ප්‍රශ්නය අසන්න. නිවැසියාගේ පිළිතුරට සවන් දෙන්න. තවත් ඡේදයකින් බයිබල් පදයක් කියවන්න. ඒ ඡේදයට අදාළ ප්‍රශ්නය අසන්න. පිළිතුර සාකච්ඡා කරන්න පසු අවස්ථාවක එන බව පවසන්න. නැවත පැමිණීම සඳහා නිශ්චිත වෙලාවක් යොදාගන්න. ඒ විදිහට ඔබ දැනටමත් බයිබල් පාඩමක් ආරම්භ කර අවසන්.