සඟරා ලබාගත් අය සමඟ බයිබල් පාඩම් පටන්ගන්නා අයුරු
1. සඟරා ඉදිරිපත් කිරීමේදී අපේ ඉලක්කය වන්නේ කුමක්ද?
1 දේවසේවයේ හවුල් වීමේදී අපේ ඉලක්කය වන්නේ අවංක පුද්ගලයන්ට සත්‍යය ඉගැන්වීමයි. මුරටැඹ සහ පිබිදෙව්! සඟරා ජනයාට ඉදිරිපත් කිරීම එහි මුල් පියවර පමණයි. සෙනසුරාදා දවස්වල අපි බොහෝවිට සඟරා ඉදිරිපත් කරනවා. සඟරා ලබාගත් කෙනෙකුව නැවත බැලීමට ගොස්, බයිබලයේ ඉගැන්වීම් නමැති පොත ඉදිරිපත් කර බයිබල් පාඩමක් පටන්ගන්න ආකාරය ගැන යෝජනා කිහිපයක් පහත දැක්වෙනවා. ඔබේ බලප්‍රදේශයට ගැළපෙන පරිදි ඒවා සකස් කරගෙන ඔබේම වචනවලින් ඉදිරිපත් කරන්න පුළුවන්. සාර්ථක වෙනත් ක්‍රම තිබෙනවා නම් ඒවාත් යොදාගන්න.
2. බයිබල් පාඩමක් පටන්ගැනීමට බයිබලයේ ඉගැන්වීම් පොතේ හැඳින්වීමේ පිටු යොදාගන්න පුළුවන් කොහොමද?
2 හැඳින්වීමේ පිටු යොදාගන්න: නැවත බැලීමකදී මෙසේ පැවසිය හැකියි. “මම ඔබට දුන්න සඟරාවල තොරතුරු බයිබලයට සම්බන්ධයි. බයිබලය කියවන එක කොච්චර වැදගත්ද කියලා බයිබලයෙන්ම පෙන්නන්න මම කැමතියි.” යෙසායා 48:17, 18; යොහන් 17:3 හෝ වෙනත් යෝග්‍ය බයිබල් පදයක් කියවන්න. ඉන්පසු බයිබලයේ ඉගැන්වීම් පොත පෙන්වා, එහි පිටපතක් ගෙවැසියාට දී සාකච්ඡාව දිගටම පහත සඳහන් පරිදි කරගෙන යා හැකියි.
◼ “අපිට ප්‍රීතිමත් අනාගතයක් තියෙනවා කියලා බයිබලයේ පෙන්වලා තියෙනවා.” ගෙවැසියාට 4-5 දක්වා පිටු පෙන්වා මෙසේ අසන්න. “මේ පොරොන්දුවලින් ඔබ කැමති මොන පොරොන්දුව ඉටු වෙනවා දකින්නද?” ඔහු තෝරාගන්න පොරොන්දුව ගැන සඳහන් පරිච්ඡේදය ඔහුගේ අවධානයට යොමු කරවා, ඔහු කැමති නම් එහි ඡේදයක් හෝ දෙකක් කෙටියෙන් සලකා බලන්න.
◼ නැත්නම් ඔබට මෙසේ පැවසිය හැකියි: “ජීවිතයේ වැදගත් ප්‍රශ්නවලට බයිබලයේ උත්තර දීලා තියෙනවා.” ඔහුට 6වන පිටුව පෙන්වා එහි පහළ තිබෙන ප්‍රශ්න ගැන කල්පනා කර තිබෙනවාද කියා අසන්න. ඔහු පවසන ප්‍රශ්නය ගැන වැඩි විස්තර සඳහන් පරිච්ඡේදයට පෙරළා ඡේදයක් හෝ දෙකක් කෙටියෙන් සලකා බලන්න.
◼ එසේත් නැත්නම් ඔබට පුළුවන් පටුනේ තිබෙන මාතෘකාවලින් කිහිපයක් පෙන්වා ඔහු වැඩියෙන්ම කැමති කුමන එකටද කියා අසන්න. ඒ පරිච්ඡේදයට පෙරළා බයිබල් පාඩමක් කරන ආකාරය කෙටියෙන් පෙන්වන්න.
3. ගෙවැසියාට ලබා දුන්නේ (අ) ලෝකයේ පවතින තත්වය (ආ) පවුල් ජීවිතය (ඇ) බයිබලයේ නිවැරදිභාවය යන කාරණා සඳහන් සඟරා නම් ඔහු සමඟ බයිබල් පාඩමක් පටන්ගන්න පුළුවන් කොහොමද?
3 මුල් හමුවීමේදී ප්‍රශ්නයක් නඟා එන්න: තවත් ක්‍රමයක් නම් මුල් හමුවීමේදීම නැවත බැලීම සඳහා අඩිතාලම දැමීමයි. ගෙවැසියා සඟරා ලබාගැනීමෙන් පසු ඔහුගෙන් ප්‍රශ්නයක් අසන්න. එයට පිළිතුරු දීමට ඔබ නැවත එන බවට පොරොන්දු වන්න. ඔබේ පොරොන්දු කඩ කරන්න එපා. (මතෙ. 5:37) ඔබ නැවත ගිය පසු මුල් හමුවීමේදී නැඟූ ප්‍රශ්නය මතක් කර, බයිබලයේ ඉගැන්වීම් පොතේ දී තිබෙන පිළිතුර කෙටියෙන් සාකච්ඡා කරන්න. ඔහුටත් පිටපතක් ලබා දෙන්න. මෙය කළ හැකි ආකාරය ගැන යෝජනා කිහිපයක් පහත සඳහන් වෙනවා.
◼ ඔබ ගෙවැසියාට දුන් සඟරාවේ සඳහන් වන්නේ ලෝකයේ පවතින තත්වය ගැන නම් මෙසේ පැවසිය හැකියි. “දෙවි ඉදිරියේදී පොළොවේ සිදු කරන්න යන්නේ මොන වගේ වෙනස්කම්ද? මේ ප්‍රශ්නයට බයිබලයේ දෙන උත්තරය ඊළඟ වතාවේදී අපි සාකච්ඡා කරමු.” නැවත ගිය පසු 4-5 දක්වා පිටු පෙන්වන්න. එහෙම නැත්නම් මේ ප්‍රශ්නය අහන්න පුළුවන්. “මිනිසුන් දුක් විඳින එක දෙවිගේ කැමැත්තද?” නැවත බැලීමේදී 1වන පරිච්ඡේදයේ තිබෙන 7-8 දක්වා ඡේද ගෙවැසියාට පෙන්වන්න.
◼ ඔබ ගෙවැසියාට දුන්නේ පවුල් ජීවිතය ගැන සඟරාවක් නම් ඔබට මේ ප්‍රශ්නය තබා එන්න පුළුවන්. “පවුලේ සන්තෝෂයට දායක වෙන්න පවුලේ හැම සාමාජිකයෙකුටම කරන්න පුළුවන් මොනවාද?” නැවත ගිය විට 14වන පරිච්ඡේදයේ 4වන ඡේදය සලකා බලන්න.
◼ ඔබ ගෙවැසියාට ලබා දුන්නේ බයිබලයේ නිවැරදිභාවය ගැන සඟරාවක් නම් ඊළඟ වතාවේදී පිළිතුරු දීම සඳහා මේ ප්‍රශ්නය අසන්න පුළුවන්. “විද්‍යාව පැත්තෙන් බලද්දී බයිබලය නිවැරදිද?” නැවත බැලීමේදී 2වන පරිච්ඡේදයේ 8වන ඡේදය සාකච්ඡා කරන්න.
4. බයිබලයේ ඉගැන්වීම් පොත ලබාගන්න ගෙවැසියා කැමති නැත්නම් කළ හැක්කේ කුමක්ද?
4 සෑම සාකච්ඡාවක් අවසානයේදී ඊළඟ වතාවේ පිළිතුරු දීම සඳහා තවත් ප්‍රශ්නයක් අසන්න. නිතිපතා පාඩමක් පැවැත්විය හැකි තත්වයක් උදා වූ විට බයිබලයේ ඉගැන්වීම් පොතේ මුල සිට අග දක්වා ක්‍රමානුකූලව පාඩම් කරන්න. ගෙවැසියා පොත ලබාගන්න කැමති නැත්නම් කුමක් කළ හැකිද? ඔබට පුළුවන් දිගටම ඔහුට සඟරා ලබා දෙමින් බයිබලයේ සඳහන් කාරණා ගැන සාකච්ඡා කරන්න. මෙසේ කරද්දී ඔහු තුළ උනන්දුවක් ඇති වී පසු කලෙක බයිබල් පාඩමක් කරන්න කැමති විය හැකියි.
5. සඟරා ලබා දෙනවාට වඩා වැඩි යමක් අපි කළ යුතුයි. ඒ කුමක්ද?
5 මුරටැඹ සහ පිබිදෙව්! සඟරා මගින් බයිබලයේ උගන්වා තිබෙන දේවල් ඉගෙනගන්න ආශාවක් පුද්ගලයෙකු තුළ ඇති කරන්න පුළුවන්. මේ නිසා සඟරා ලබාගන්න අය සමඟ බයිබල් පාඩම් පටන්ගැනීමට හැකි සෑම වෑයමක්ම දරන්න. මෙසේ කිරීමෙන් මිනිසුන්ව ‘ගෝලයන් කරන්න. ඔවුන්ට උගන්වන්න’ කියා යේසුස් දුන් ආඥාවට කීකරු වන බව පෙන්වන්න අපිට පුළුවන්.—මතෙ. 28:19, 20.