යෞවන අය අසති . . .
දෙවියන්වහන්සේගේ මිතුරෙකු වීම මට උපකාරයක් වේවිද?
අදදින බොහෝ යෞවනයන් හැදී වැඩෙන්නේ, පරම්පරාවකට ඉහතදී ඇදහිය නොහැකි වනු ඇති දැඩි පීඩන යටතේය. යෞවනයන් 1,60,000දෙනෙකු ඇතුළත් ජාතික සමීක්ෂණයක් පැවැත්වූ කර්තෘවරු මෙසේ පැහැදිලි කළෝය: “යෞවන අය අපට පවසන ආකාරයට ඔවුන්ගේ සිත්තැවුල්වලින් බොහොමයක් පැමිණෙන්නේ, තමන්ට සාර්ථකව කටයුතු කිරීමට අපොහොසත් පීඩනවලින්; තමන්ගේ ආත්ම ශක්තිය හීන කරවන අධෛර්යය කිරීම් සහ ශෝකයෙන්; එමෙන්ම තමන්ගේ ගැටලුවලට සංවේදී නොවන දෙමාපියන්ගෙන්ය.” යෞවනයෙකුට ජීවිතය කොතරම් දුරට වේදනාකාරි විය හැකිදැයි අනික් අය තේරුම් නොගන්නා බව ඔබටත් මෙයාකාරයෙන්ම හැඟෙනවා විය හැක.
චිත්තවේගීය සහය පැතිය හැකි කිට්ටු මිතුරෙක් ඔබට සිටිය හැකි අතර, මෙය ඔබට යම් සහනයක් ලබා දිය හැකි බව සැබෑවකි. එහෙත් ඔබට තනිවම මුහුණ දීමට සිදු වන වේදනාකාරි අපහසුතාවන් තිබෙන බව සැබෑ නොවන්නේද? ඇතැම් අවස්ථාවලදී ඔබගේම “සිත” පමණක් “[ඔබගේ] ශෝකය [දැන සිටින]” බව, කොතරම් සත්‍යයක්ද! (හිතෝපදේශ 14:10) එහෙත් ඔබව සම්පූර්ණයෙන්ම තේරුම්ගන්නා කෙනෙක් සිටී, තවද උන්වහන්සේ ඔබට ස්වකීය මිත්‍රත්වය ඉදිරිපත් කරනසේක. බොහෝ වේදනාකාරි අවස්ථාවලදී පවා, උන්වහන්සේගේ මිත්‍රත්වය විශාල උපකාරයක් බව බොහෝ යෞවනයන්ට පෙනී ගොස් තිබේ.
දෙවියන්වහන්සේ සමඟ මිත්‍රත්වය
ඇය යෙහෝවඃ දෙවියන්වහන්සේට වැඩියෙන්ම ස්තුති කළේ කුමකටද කියා එක් යෞවනියකගෙන් අසනු ලැබීය. ඇගේ පිළිතුර වූයේ: “අපට උන්වහන්සේව දැනහඳුනා ගැනීමට හැකිවීම සහ උන්වහන්සේගේ කිට්ටු මිතුරන් වීමට හැකිවීම නිසයි.” එසේය, මුළු විශ්වයේම ඇති කදිම මිත්‍රත්වයට ඇතුල්වීමට හැක! ගීතිකාකරු මෙසේ ලීවේය: “[යෙහෝවඃවහන්සේ සමඟ සමීප මිත්‍රත්වය, NW ] උන්වහන්සේ කෙරෙහි භය ඇත්තන් හා සමඟය.”—ගීතාවලිය 25:14.
‘යෙහෝවඃවහන්සේ සමඟ සමීප මිත්‍රත්වයක්’—මොනතරම් අනගි ප්‍රස්තාවක්ද! මුල් හෙබ්‍රෙව් වචනය ඉදිරිපත් කරන අදහස වනාහි, විශේෂ මිතුරෙකු වන යම් කෙනෙකු සමඟ විවෘත, පෞද්ගලික කතා බහේ යෙදීමය. මෙසේ, එය ප්‍රේමය මත පදනම් කිට්ටු සබඳතාවකි, අන්‍යොන්‍ය විශ්වාසයේ ප්‍රතිඵලයක් වන වරප්‍රසාද ලත් සමීප සබඳතාවකි. පුද්ගලයෙක් වශයෙන් ඔබගේ සැබෑ වටිනාකම සැබවින්ම වටහාගන්නා මෙම තැනැන්වහන්සේ විසින් ඔබව අගය කරනු ලබන බව, දෙවියන්වහන්සේගේ මිතුරෙකු හැටියට ඔබට දැනෙනු ඇත. එහෙත් මෙම මිත්‍රත්වයේ තිබෙන ප්‍රයෝජන කුමක්ද?
“තරුණ වයස පටන් මාගේ විශ්වාසය”
බොහෝ යෞවනයන් ව්‍යාජ නිර්භීතකමක් දැක්වුවත්, ඔවුහු ආත්ම විශ්වාසයෙන් ඌන වෙත්. “මම මගේ අදහස් ප්‍රකාශ කළත්, තවත් කෙනෙක් ඔවුන්ගේ අදහස ඉදිරිපත් කර මගේ අදහස සම්පූර්ණයෙන්ම වෙනස් කරනවා” කියා අවුරුදු 13ක් වයසැති ජූඩි කනගාටුවෙන් යුක්තව ප්‍රකාශ කළාය. “මට මා ගැනම එතරම් විශ්වාසයක් නැහැ.” කෙසේවෙතත් අපගේ ස්වර්ගික මිත්‍රයාණෝ, ස්වකීය ලිඛිත වචනය වන බයිබලය තුළ සාර්ථකව ජීවත්වීම සඳහා නිශ්චිත මඟ පෙන්වීම් සපයනසේක. ඇත්තවශයෙන්ම, හිතෝපදේශ නම් බයිබල් පොතේ දී තිබෙන උපදෙස් නිර්මාණය කර තිබෙන්නේ, “තරුණයාට දැනගැන්ම සහ සිහිකල්පනාව” දීමටය, එමගින් ඔහුගේ මාර්ගය නිවැරදි කිරීමට ඔහුට හැකි වනු ඇත. (හිතෝපදේශ 1:1-4; 3:1-6) මෙය ඔබට නිසැකකමක් ලබා දිය හැක! ජීවත්වීමට හොඳම මාර්ගය ඔබට දැනගත හැක.
බයිබලය සමඟ මෙම සඟරාව වැනි බයිබල් ආධාරක, මිතුරන් තෝරාගන්නා ආකාරයේ සිට ඔබගේ දෙමාපියන් සම්බන්ධයෙන් හරි ආකල්පයක් දැරීම දක්වා ජීවිතයේ සෑම අංගයක් සම්බන්ධයෙන්ම වාගේ උපදෙස් සපයයි. (හිතෝපදේශ 1:8, 9; 13:20) එවැනි මඟ පෙන්වීමට අවනත වන අයට “මරහුගේ මලපත්වලින් මිදීමට” හැක. (හිතෝපදේශ 14:27) නිදසුනක් වශයෙන්, තමාගේ මාංසික සහෝදරිය බයිබල් ප්‍රතිපත්ති උල්ලංගනය කරන බව මේ නමැති ගැහැනු ළමයෙක් දුටුවාය. ඒ සහෝදරිය තමාගේ දුරාචාර ජීවන රටාවේ ප්‍රතිඵලයක් වශයෙන් අකල් මරණයකට ගොදුරු වූවාය. එවැනි දුරාචාරයට එරෙහි වීමට මේහට හැකි වූ ආකාරය ඈ මෙසේ පැහැදිලි කළාය: “සදාචාරය සම්බන්ධයෙන් යෙහෝවඃවහන්සේගේ ප්‍රතිපත්ති පැහැදිලිවම මගේ මනසට නංවාගැනීමට මට හැකි අතර, මෙය මාව ශක්තිමත් කරවනවා. යෙහෝවඃවහන්සේ මොනතරම් සැබෑ පුද්ගලයෙක්ද කියාත්, උන්වහන්සේගේ මාර්ගය හොඳම මාර්ගය වන බවත් වටහාගැනීමට මෙම ප්‍රතිපත්ති මට උපකාරවත් වෙනවා.”
කෙසේවෙතත්, යෙහෝවඃවහන්සේව මිතුරෙකු ලෙස තබාගැනීමට නම්, උන්වහන්සේගේ ප්‍රමිති ඉගෙනගැනීමට වඩා වැඩි යමක් ඇතුළත් වේ. ඔබගේ ජීවිතය කෙරෙහි උන්වහන්සේගේ පෞද්ගලික සැලකිල්ල ඔබට අද්දැකිය හැකිය. තමාගේ යෞවන කාලයේ සිට දෙවියන්වහන්සේ විසින් උගන්වනු ලැබූ දාවිත් රජ සම්බන්ධයෙන් බයිබලය පවසයි. දාවිත් දෙවියන්වහන්සේගේ මිතුරෙක් වූයේය, තවද ඔහුට ‘බොහෝ කරදර’ අද්දැකීමට සිදු වූවත්, ඔහුගේ ජීවිතය තුළ දෙවියන්වහන්සේ ක්‍රියා කරන අයුරු ඔහු ඇත්තෙන්ම අද්දුටුවේය. තමා වෙනුවෙන් දෙවියන්වහන්සේ කළ “ආශ්චර්යවත් ක්‍රියා” පිළිබඳව, එමෙන්ම තම ජීවිතය තුළ යෙහෝවඃවහන්සේගේ ‘හස්තය’ නැතහොත් ශක්තිය ක්‍රියාවට යොදවනු ලැබූ ආකාරය පිළිබඳව දාවිත් කතා කළේය. එවැනි පෞද්ගලික අද්දැකීම් මත පදනම් කරගෙන දාවිත් මෙසේ ලීවේය: “ස්වාමිවූ දෙවියන්වහන්ස [යෙහෝවඃවහන්සේ, NW ], මාගේ බලාපොරොත්තුව ඔබය. තරුණ වයස පටන් මාගේ විශ්වාසය ඔබය.” (ගීතාවලිය 71:5, 17, 18, 20) ඔබගේ ජීවිතයේ යෙහෝවඃවහන්සේගේ ආශීර්වාදය ඔබට දැනෙන විට ඔබටත් මෙම නිසැකකමම තබාගත හැකිය. අභියෝග මධ්‍යයෙහි වුවද, උන්වහන්සේගේ මඟ පෙන්වීම් අනුගමනය කිරීමට ඔබ වෑයම් කරනවාත් සමඟම, ඔබ සැබවින්ම දෙවියන්වහන්සේ සමඟ අනගි සබඳතාවක් පවත්වා ගනිමින් උන්වහන්සේ සමඟ හැසිරෙනු ඇත.—උත්පත්ති 6:9 සසඳන්න.
හරි මාර්ගය අනුගමනය කිරීමට දෙවියන්වහන්සේ අපට උපකාර කරනසේක
ජීවිතයේ ඇති වන පරීක්ෂා සහ පීඩන සියල්ල සමඟ දෙවියන්වහන්සේගේ මඟ පෙන්වීම් අනුගමනය කිරීම පහසු දෙයක් නොවේ. යෞවන වියේදී මත් ද්‍රව්‍යවලට ඇබ්බැහි වූ සහ ගණිකාවක්ව සිටි පෙගී සම්බන්ධයෙන් මෙය විශේෂයෙන්ම සත්‍යයක් විය. බයිබලය අධ්‍යයනය කිරීම තුළින්, ඇයට ඇගේ ඇබ්බැහි වීමෙන් ජයගැනීමට සහ සදාචාර වෙනස්කම් කිරීමට හැකි වූ අතර, ඒ හේතුවෙන් ඈ දෙවියන්වහන්සේ සමඟ මිත්‍රත්වයක් වර්ධනය කළාය. එහෙත් මත් ද්‍රව්‍ය තුළින් යම් සහනයක් ලබාගැනීමට ඇයට පෙලඹීම් ඇති කළ එම පීඩනවලටම තවදුරටත් මුහුණ දීමට පෙගීට සිදු විය. නොකඩවාම එරෙහි වීමට ඇයට හැකි වූයේ කෙසේද කියා ඇගෙන් අසනු ලැබූ විට, ඈ මෙසේ පිළිතුරු දුන්නාය: “එය යෙහෝවඃවහන්සේගේ ආත්මය තුළින් පමණක් බව මට කියන්න පුළුවන්.”
දෙවියන්වහන්සේ තම මිතුරන්ට ස්වකීය ශුද්ධාත්මය නොහොත් ක්‍රියාකාරික බලය දානය කරන බවත්, එයට උන්වහන්සේගේ ප්‍රමිති අනුව ජීවත්වීමට ඔවුන්ව බලවත් කළ හැකි බවත් පෙගී දැන සිටියාය. (ක්‍රියා 5:32; 1 කොරින්ති 6:9-11) “විශේෂයෙන්ම මා තනියෙන් සිටින අවස්ථාවලදී, ඒ පරණ හැඟීම් මට නැවත ඇති වන අවස්ථාවන් තියෙනවා,” කියා පෙගී පිළිගත්තාය, “නමුත් මා එවෙලේම යාච්ඤා කරන්න පටන්ගන්නවා. මෙම ගැටලු ජයගැනීම සඳහා ඇති හැකියාව මගේ ජීවිතයේ කිසිදිනක ඕනෑම දෙයකින් මා ලැබූ ප්‍රබෝධයට වඩා වැඩි ප්‍රබෝධයක් ඇති කරවනවා.” මිතුරෙකු වශයෙන් දෙවියන්වහන්සේට, “අප තුළ ක්‍රියාකරන්නාවූ බලයේ හැටියට අපි ඉල්ලන නොහොත් සිතන හැම දේට වඩා ඉතා අධිකලෙස” අපට උපකාර කිරීමට හැකි බව දැනගැනීම කොතරම් දිරිගන්වනසුලුද!—එපීස 3:20.
දෙවියන්වහන්සේගේ ආත්මය ඉවසිලිවන්තකම, මෘදුකම සහ ආත්ම-දමනය වැනි ගුණාංග වර්ධනය කරගැනීම සඳහා අපට උපකාර කරයි. (ගලාති 5:22, 23) තවද, යෙහෝවඃවහන්සේගේ සාක්ෂිකරුවන්ගේ සභාවල ශුද්ධාත්මයෙන් පත් කරන ලද වැඩිමහල්ලන් නොහොත් එඬේරුන්ව දෙවියන්වහන්සේ විසින් සපයා තිබෙන්නේ ප්‍රායෝගික උපකාර සැපයීමටය. පෙගී තවදුරටත් මෙසේ පවසන්නීය: “මට සභාවේ අයගෙන්, විශේෂයෙන්ම වැඩිමහල්ලන්ගෙන් බොහෝ සහයෝගය ලැබුණා. එය මහත් උපකාරයක් වුණා.”
‘මාගේ හෘදයේ පර්වතය’
“මිත්‍රයෙක් සෑම කල්ම ප්‍රේමවන්නේය, සහෝදරයෙක් ඉපද සිටින්නෙත් විපත්තියේදී පිහිටවීමටය.” හිතෝපදේශ 17:17හි එසේ සඳහන් වේ. විශේෂයෙන්ම මිතුරෙක් අවශ්‍ය කරන්නේ ‘විපත්ති කාලවලදීය’. ගීතිකාකාර ආසාප් දැඩි චිත්තවේගීය වියවුල්සහගත තත්වයක් අද්දුටු නමුත්, ඔහු මිතුරෙකු ලෙස දෙවියන්වහන්සේ වෙතට කිට්ටු වී තිබුණේය. මෙසේ ඇතුළාන්ත වේදනාවෙන් ඔහුගේ ‘සිත කැලඹී’ තිබුණත්, ඔහු මෙසේ පැවසුවේය: ‘දෙවියන්වහන්සේ මාගේ හෘදයේ පර්වතය වනසේක.’ (ගීතාවලිය 73:21, 26, 28) ආසාප්ට හැඟී ගිය ආකාරය සැබවින්ම තේරුම්ගත් යෙහෝවඃවහන්සේ, ඔහුට චිත්තවේගී අනුබලය දුන්සේක. බලාපොරොත්තුව සහ ධෛර්යය අහිමි කර නොගන්නා ලෙසින්, යෙහෝවඃවහන්සේ ආසාප්ට ස්ථිර කරවන බලපෑමක් වූසේක.
ඒ හා සමානව, විපත්ති කාලවලදී ඔබට පර්වතයක් බඳු අත්තිවාරමක් වීමට අපගේ ස්වර්ගික මිතුරාණන්ට හැකිය. නහඹර වියේ සිටි තැනැත්තියක් මෙය පෞද්ගලික අද්දැකීම තුළින් වටහාගත්තාය. බොර්නිට වයස අවුරුදු 13ක්ව සිටියදී, ඇයගේ කුඩා ගම්බද පාසැලේ සිටිය සමහර ගැහැනු ළමයි ඇය ගැන නරක අපහාසාත්මක කටකතාවක් පැතිරෙව්වෝය. මෙම බොරුව සියලුදෙනාම විශ්වාස කළාක් මෙන් බොර්නිට හැඟිණ. ඇගේ පන්තියේ මිතුරියන්ගෙන් බොහෝදෙනෙක් ඇයව උණුසුම් ලෙස නොපිළිගත් අතර, ඇයට නොහොබිනා නම්වලින් පවා විහිළු කළහ. “හැම රැයකම වගේ මම ගෙදර ඇවිත් අඬනවා,” කියා බොර්නි පැහැදිලි කළාය. “මගේ හිත කොයිතරම් රිදුණාද කියනවා නම්, මට මාවම මරාගන්න පවා සිතුණා.” උපකාරය ලබාගැනීම සඳහා ඈ ඇයගේ මිතුරන් සමහරදෙනෙකු වෙතට ගියාය. “මා මනුෂ්‍යයන් සමඟ කතා කිරීමට උත්සාහ කළා, නමුත් ඔවුන් මාව තේරුම්ගන්න බවක් පෙනුණේ නැහැ. ඒගොල්ලෝ මගේ ගැටලුව ඉතා සුළු දෙයක් ලෙස පෙනෙන්ට සැලැස්සුවා. සමහර අවස්ථාවලදී මට තනිකමක් හැඟුණා.” මෙවන් සිත්තැවුල් මධ්‍යයෙහි ඇයගේ බලාපොරොත්තුව අහිමි කර නොගැනීමට ඇයට උපකාර කළේ කුමක්ද? ඈ තවදුරටත් මෙසේ පවසයි: “යෙහෝවඃවහන්සේ නොහිටියා නම් මම මාවම මරාගනීවි. මා උන්වහන්සේට ගොඩක් ප්‍රේම කරනවා. උන්වහන්සේ මගේ හොඳම මිතුරායි.” චිත්තවේගීය වශයෙන් පීඩාකාරි වූ එම අද්දැකීම විඳදරාගැනීමට ඇයට උපකාර කළේ දෙවියන්වහන්සේ සමඟ තිබුණු ඇයගේ මිත්‍රත්වය බව ඈ දැන් දනියි.
අප බලාපොරොත්තු වන්නාවූ සංවේදීතාව අන්‍යයන් අපට නොදක්වන විට, යෙහෝවඃවහන්සේ අපගේ තත්වයන් තේරුම්ගන්න බවත්, අපට ඇත්තෙන්ම සිදු වූයේ කුමක්ද කියා උන්වහන්සේ දන්නා බවත් දැනගැනීම අපට මහත් සහනයකි. තවදුරටත් අපට අකාරුණික ලෙස සලකනු ලබන විට හෝ අපට අතවරයකට ලක්වීමට සිදු වන විට පවා, ‘දයාබර කරුණාවේ පියා’ අපේ මිතුරා බව දැනගැනීම ලොකු උපකාරයකි. සමහරවිට අපගේම සිත් අපට දෝෂාරෝපණය කළ හැකි වුවත්, “දෙවියන්වහන්සේ අපේ සිතට වඩා උතුම්ව සියලු දේම [දන්නාසේක].” (2 කොරින්ති 1:3, 4; 1 යොහන් 3:20) කාරණයක් සම්බන්ධයෙන් යෙහෝවඃවහන්සේගේ දෘෂ්ටිකෝණය ඇතුව සිටීම අව්‍යාජ සහනයක් ලබා දිය හැක. නිදසුනක් වශයෙන්, එක් 13 හැවිරිදි පිරිමි ළමයෙකුව, පුරුෂයන් තිදෙනෙකු විසින් කුරිරු ලෙස දූෂණය කරනු ලැබීය. “ඊට පසු, මා අතිශයින් ලජ්ජාවට පත් වූ අතර, සිදු වූ දේ සම්බන්ධයෙන් මටම දොස් පවරාගත්තා,” කියා ඔහු පැවසුවේය. “මා බොහෝ සෙයින් කනස්සල්ලට පත් වුණා.” ඉන්පසු ඔහු බයිබලය මත පදනම් වූ වොච් ටවර් සමිතියේ ප්‍රකාශන තුළ, දූෂණය නමැති විෂය සම්බන්ධයෙන් ගවේෂණය කිරීමට පටන්ගත්තේය. “මෙම තොරතුරු කියෙවූ විට මා බොහෝ සෙයින් හඬා වැලපුණා. එය හරියට මගෙන් විශාල බරක් ඉවතට ගෙන තිබුණා හා සමාන බව මට දැනුණා. මම යමකට ගොදුරු වී සිටියා. යෙහෝවඃවහන්සේ, පවුලේ අය සහ මිතුරන් මත රඳා සිටීම තුළින් මෙම පීඩාකාරි කාලය තුළදී සාර්ථකව කටයුතු කිරීමට මට හැකි වුණා.” බයිබලය මත පදනම් වූ එම වදන් මොනතරම් උපකාරයක් වූවාද!
දෙවියන්වහන්සේ සමඟ මිත්‍රත්වයක් ඇතුව සිටීම බොහෝ ආකාරවලින් උපකාරවත් විය හැකිය! අපට ජීවිතය කෙරෙහි සැබෑ විශ්වාසයක්ද, දෙවියන්වහන්සේගේ මාර්ගය අනුගමනය කිරීමට ඇතුළාන්ත ශක්තියක්ද වර්ධනය කිරීමට සහ විපත්ති කාල තුළදී පර්වතයක් බඳු ආධාරයක් ලබාගැනීමටද අපට හැක. එහෙත් අපට එවැනි මිත්‍රත්වයක් ගොඩනඟා ගත හැක්කේ කෙසේද? මෙම ලිපි මාලාවේ ඉදිරියේදී පළ වන ලිපියක් තුළින් මෙය පැහැදිලි කරනු ලැබේ.
[13වන පිටුවේ පින්තූරය]
දෙවියන්වහන්සේට ඔබගේ ‘හෘදයේ පර්වතය’ විය හැක