දෙවියන්ගෙන් ඉගෙනගන්න ඔයා කැමතිද?
බයිබලේ කියනවා “මුළු ශුද්ධ ලියවිල්ලම ලියා තිබෙන්නේ දෙවිගේ මඟ පෙන්වීම තුළිනි” කියලා. (2 තිමෝති 3:16) ඒ කියන්නේ සියලු බලැති දෙවියන් ඔහුගේ සිතුවිලි සහ අදහස් බයිබලය ලියපු අයට දැනුම් දීලා තියෙනවා කියන එකයි.
දෙවියන්ගෙන් ඉගෙනගන්න කියලා ඔහු ඔයාට ආරාධනා කරනවා
“මා යෙහෝවාය. ඔබේම ප්‍රයෝජනය සඳහා ඔබට උගන්වන්නෙත් ඔබ යා යුතු හරි මඟ ඔබට කියා දෙන්නෙත් මමය. අනේ, ඔබ මාගේ ආඥාවලට ඇහුම්කන් දුන්නා නම් ඔබේ සමාදානය ගංගාවක් මෙන්ද ඔබේ ධර්මිෂ්ඨකම මුහුදේ රැළි මෙන්ද වන්නේය.”—යෙසායා 48:17, 18.
ඒ වචන දෙවියන්ට ඇහුම්කන් දෙන්න කියලා ඔහු ඔයාට කරන ආරාධනයක් වගේ. දෙවියන්ට ඕනෙ ඔයා හැමදාටම සතුටින් ජීවත් වෙනවා දකින්න. ඒකට ඔයාට උදව් කරන්න ඔහු ආසාවෙන් ඉන්නවා.
දෙවියන්ගෙන් ඉගෙනගන්න ඔයාටත් පුළුවන්
“සියලු ජාතීන්ට ශුභාරංචිය දේශනා කළ යුතුයි.”—මාක් 13:10.
අපි බලපු විදිහට යෙහෝවා දෙවියන් පොරොන්දු වෙලා තියෙනවා අපි මුහුණ දෙන හැම දුකක්ම නැති කරලා මේ පොළොව ලස්සන පාරාදීසයක් කරනවා කියලා. ඒ වගේම මරණය නිසා වෙන් වුණ අපේ ආදරණීය අයට ආයෙත් ජීවිතය දෙනවා කියලත් ඔහු පොරොන්දු වෙලා තියෙනවා. ඒ දේවල් “ශුභාරංචියට” ඇතුළත්. යෙහෝවා දෙවිගේ සාක්ෂිකරුවන් බයිබලේ තියෙන ඒ ශුභාරංචිය ලෝකේ පුරාම ඉන්න අයට දැනුම් දෙනවා.