යෙහෝවා දෙවිව විශ්වාස කරපු රාහබ්

අපි හිතමු අපි දැන් ඉන්නේ යෙරිකෝවෙ කියලා. ඒ නගරේ හිටපු අය යෙහෝවා දෙවිව විශ්වාස කළේ නැහැ. රාහබ් හිටියෙත් ඒ නගරෙයි.

රතු මුහුද මැදින් පාරක් හදලා මෝසෙස් ඊශ්‍රායෙල්වරුන්ව බේරගත්ත විදිහ රාහබ් පොඩි කාලේ අහලා තිබුණා. සතුරන්ව පරාජය කරන්න යෙහෝවා දෙවි ඊශ්‍රායෙල්වරුන්ට උදව් කරපු විදිහ ගැනත් එයා අහලා තිබුණා. ඊශ්‍රායෙල්වරු දැන් යෙරිකෝව ළඟ කඳවුරු බැඳගෙන ඉන්නවා කියලා එයාට ආරංචි වුණා.

දවසක් හැන්දෑවක යෙරිකෝව නගරේ ගැන විස්තර හොයලා බලන්න ඊශ්‍රායෙල්වරුන් දෙන්නෙක් ආවා. ඒ වගේ අයට කියන්නේ ඔත්තුකාරයෝ කියලයි. ඒ දෙන්නා රාහබ්ගේ ගෙදරටයි ගියේ. ඒ ගැන එදා රෑ යෙරිකෝවෙ රජුට ආරංචි වෙලා ඒ දෙන්නව අල්ලගෙන එන්න කට්ටියක්ව එහෙට යැව්වා. ඒත් රාහබ් ඒ දෙන්නව හංගලා, ආපු අයට මෙහෙම කිව්වා. ‘ඒ දෙන්නා මෙහෙට ආවා තමයි. ඒත් දැන් ටිකකට කලින් ඒ අය නගරෙන් පිට වෙලා ගියා. ඉක්මනට ගියොත් ඒ අයව අල්ලගන්න පුළුවන් වෙයි.’ රාහබ් ඒ දෙන්නව බේරගත්තේ ඇයි කියලා ඔයා දන්නවද?— එයා එහෙම කළේ යෙහෝවා දෙවිව විශ්වාස කරපු නිසයි. ඒ වගේම යෙරිකෝව නගරෙත් ඒක තිබුණු මුළු කානාන් දේශයත් දෙවි ඊශ්‍රයෙල්වරුන්ට දෙනවා කියලා එයා දැනගෙන හිටපු නිසයි.

ඒ දෙන්නා යන්න කලින් රාහබ්ට පොරොන්දුවක් දුන්නා. ඒ තමයි යෙරිකෝව විනාශ කරද්දී රාහබ්වත් එයාගේ පවුලේ අයවත් ආරක්ෂා කරනවා කියන එක. ඒත් රාහබ්ටත් දෙයක් කරන්න කිව්වා. ඒ මොකක්ද කියලා ඔයා දන්නවද?— ‘මේ රතු ලණුව ඔයාගේ ජනේලේ ගැටගහලා තියන්න. එතකොට ඔයාගේ ගෙදර කිසිම කෙනෙක් විනාශ වෙන්නේ නැහැ’ කියලා ඒගොල්ලො කිව්වා. රාහබ් ඒ විදිහටම කළා. ඔයා හිතන විදිහට ඊළඟට මොකද වුණේ?—

ටික දවසකට පස්සේ ඊශ්‍රායෙල්වරු යෙරිකෝව වටේට යන්න පටන්ගත්තා. දවසට එක පාර ගානේ දවස් හයක්ම එහෙම කළා. ඒත් හත්වෙනි දවසේ හත් පාරක් ඒ අය නගරේ වටේට ගියා. ඊටපස්සේ ඒ හැමෝම හයියෙන් කෑගහන්න පටන්ගත්තා. එතකොටම නගරේ වටේට තිබුණු උස තාප්පය කඩාගෙන වැටුණා. ඒක කළේ යෙහෝවා දෙවියි. ඒත් ඒ තාප්පයටම අල්ලලා හදලා තිබුණු රාහබ්ගේ ගෙදර ජනේලයේ රතු ලණුව ගැටගහලා තිබුණු නිසා ඒ ගේ විතරක් බේරුණා. ඔයාට ඒක මේ පින්තූරයෙන් පේනවද?— රාහබ් සහ එයාගේ පවුලේ අය බේරුණා.

රාහබ්ගෙන් ඔයාට ඉගෙනගන්න පුළුවන් මොනවද?— රාහබ්ට දෙවි ගැන ලොකු විශ්වාසයක් ඇති වුණේ දෙවි කරපු පුදුම දේවල් ගැන එයා දැනගෙන හිටපු නිසයි. යෙහෝවා දෙවි කරපු පුදුම දේවල් ගැන ඔයාත් ඉගෙනගන්නවා ඇති. රාහබ් වගේ ඔයාත් දෙවිව විශ්වාස කරනවද?— ඔයා එහෙම කරනවා කියලා අපි දන්නවා.