යේසුස් ගෝලයන් හතරදෙනෙක්ට ආරාධනා කරයි

නාසරෙත්වල මිනිසුන් යේසුස්ව මරන්න හදපු සිද්ධියෙන් පස්සේ යේසුස් ගලීල මුහුද ඒ කියන්නේ “ගෙනසරෙත් විල” ළඟ පිහිටි කපර්ණවුමට යනවා. (ලූක් 5:1) යේසුස් මේ පළාතට යන නිසා ගලීල දේශයේ අය මහත් ආලෝකයක් දකිනවා කියලා යෙසායා කියපු අනාවැකිය ඉටු වෙනවා.—යෙසායා 9:1, 2.

යේසුස් ගලීලයෙත් දේශනා කරන්නේ “ස්වර්ග රාජ්‍යය ළං වී ඇත” කියන පණිවිඩයයි. (මතෙව් 4:17) මෙහෙදී යේසුස්ට ගෝලයන් හතරදෙනෙක්ව මුණගැහෙනවා. ඒ අය කලින් යේසුස් එක්ක හිටියත්, යුදයේ ඉඳලා ගලීලයට ආවාට පස්සේ ඔවුන් ආපහු තමන්ගේ සුපුරුදු රැකියාවල නියැලුණා. (යොහන් 1:35-42) හැබැයි දැන් ඔවුන් යේසුස් එක්ක ඉන්න ඕන කාලය ඇවිත්. මොකද යේසුස්ගෙන් පස්සේ ශුභාරංචිය දේශනා කරන කාර්යය භාරගන්න ඉන්නේ ඔවුන් නිසා ඒක කරන්න ඔවුන්ට යේසුස්ගෙන් පුහුණුවක් ඕනේ.

යේසුස් වෙරළ දිගේ ඇවිදගෙන යද්දී සීමොන් පේතෘස්, ඔහුගේ සහෝදරයා වුණු අන්දෘ සහ තවත් අය ඔවුන්ගේ දැල් පිරිසිදු කරමින් ඉන්නවා යේසුස් දකිනවා. ඒ වෙනකොට එතැන විශාල සෙනඟක් එක් රොක් වෙලයි ඉන්නේ. ඒ නිසා පේතෘස්ගේ ඔරුවට නඟින යේසුස් ඒ ඔරුව ගොඩින් ටිකක් ඈතට ගෙනියන්න කියලා පවසනවා. ඊටපස්සේ ඔහු ඔරුවේ ඉඳගෙන, ඇවිත් ඉන්න සෙනඟට දෙවිගේ රාජ්‍යය ගැන උගන්වන්න පටන්ගන්නවා.

සෙනඟට උගන්වලා ඉවර වුණාට පස්සේ “දැන් දියඹට ගොස් දැල් හෙළන්න” කියලා ඔහු පේතෘස්ට කියනවා. එතකොට පේතෘස් කියන්නේ මෙහෙමයි. “ගුරුතුමනි, රෑ තිස්සේම මාළු අල්ලන්න ගිය අපට එක මාළුවෙක්වත් අල්ලගන්න බැරි වුණා. ඒත් ඔබ කියන නිසා මම දැල් හෙළන්නම්.”—ලූක් 5:4, 5.

ඒ අය දැල් හෙළුවාම දැල් ඉරෙන තරමටම මසුන් රාශියක් අහු වෙනවා. ඒ නිසා තමයි ඔවුන් අනිත් ඔරුවේ හිටපු හවුල්කරුවන්ගෙනුත් උදව් ඉල්ලන්නේ. ඔරු දෙක මසුන්ගෙන් පිරෙව්වාම මසුන්ගේ බරට ඔරු දෙකම ගිලෙන්න පටන්ගන්නවා. ඒ වෙලාවේ පේතෘස්, යේසුස් ඉදිරියේ වැටිලා “ස්වාමීනි, මම පව්කාරයෙක්. ඔබ ළඟ සිටින්න තරම්වත් මම වටින කෙනෙක් නෙවෙයි” කියා පවසනවා. ඒත් යේසුස් ඔහුට කියන්නේ “භය වෙන්න එපා. මෙතැන් පටන් ඔබ අල්ලන්නේ මිනිසුන්ව” කියායි.—ලූක් 5:8, 10.

පේතෘස්ටයි අන්දෘටයි යේසුස් මෙහෙම කියනවා. “මා පසුපස එන්න. මම ඔබව මසුන් අල්ලන්නන් වෙනුවට මිනිසුන් අල්ලන්නන් කරනවා.” (මතෙව් 4:19) සෙබදීගේ පුතුන් දෙදෙනා වන යාකොබ්ටත් යොහන්ටත් යේසුස් කතා කළාම ඒ දෙන්නත් ඒ මොහොතේම යේසුස් එක්ක එකතු වෙනවා. මේ හතරදෙනාම තමන්ගේ ධීවර රැකියාව අත්හැරලා දිගටම යේසුස්ගේ ගෝලයන් විදිහට කටයුතු කරන්න පටන්ගන්නවා.