ගිනි ගනිමින් තිබුණු පඳුරක්

මෝසෙස් මිදියන්වල අවුරුදු 40ක් ජීවත් වුණා. එහෙදී එයා විවාහ වෙලා එයාලට දරුවොත් හම්බ වුණා. දවසක් මෝසෙස් සීනයි කන්ද ළඟ බැටළුවන් බලාගෙන ඉද්දී පුදුම දෙයක් දැක්කා. කටු පඳුරක් ගිනි ගන්නවා. ඒත් ඒක පිච්චෙන්නේ නැහැ. මෝසෙස් ළඟට ගියාම පඳුර අතරින් කෙනෙක් කතා කරලා කිව්වා ‘මෝසෙස්, තව ළං වෙන්න එපා. මේක ශුද්ධ තැනක්. ඒ නිසා ඔයාගේ පාවහන් ගලවන්න’ කියලා. දේවදූතයෙක් පාවිච්චි කරලා ඒ කතා කළේ යෙහෝවා.

මෝසෙස් බය වෙලා එයාගේ මූණ වහගෙන ඉද්දී දෙවියන් මෙහෙම කිව්වා. ‘ඊශ්‍රායෙල්වරු දුක් විඳින හැටි මට පේනවා. මං එයාලව ඊජිප්තුවෙන් බේරගෙන එයාලට හොඳ දේශයක් දෙනවා. එයාලව ඊජිප්තුවෙන් බේරගන්න මං යවන්නේ ඔයාවයි.’ ඒක අහලා මෝසෙස් කොච්චර පුදුම වෙන්න ඇද්ද!

මෝසෙස් දෙවියන්ගෙන් ඇහුවා ‘මාව එව්වේ කවුද කියලා ඇහුවොත් මං මොනවාද කියන්නේ’ කියලා. දෙවියන් මෙහෙම කිව්වා. ‘ආබ්‍රහම්ගේ, ඊසාක්ගේ සහ යාකොබ්ගේ දෙවියන් වන යෙහෝවා ඔයාව එව්වා කියලා කියන්න.’ පස්සේ මෝසෙස් ඇහුවා ‘මිනිස්සු මං කියන දේ ඇහුවේ නැත්නම් මොකද කරන්නේ’ කියලා. දෙවියන් මෝසෙස් එක්ක ඉන්නවා කියලා පෙන්නන්න ඔහු එයාගේ සැරයටිය බිමට දාන්න කියලා කිව්වා. එතකොට ඒක සර්පයෙක් වුණා. මෝසෙස් සර්පයාව වලිගෙන් අල්ලද්දී සර්පයා ආයෙත් සැරයටියක් වුණා. ‘මේකම සෙනඟ ඉස්සරහා කළාම ඔයාව එව්වේ මං කියලා එයාලා තේරුම්ගනියි’ කියලා යෙහෝවා කිව්වා.

‘මට දක්ෂ විදිහට කතා කරන්න බෑනේ’ කියලා මෝසෙස් කියද්දී ‘කියන්න ඕන දේ මං කියලා දෙන්නම්. උදව්වට ඔයාගේ අයියා ආරොන්වත් දෙන්නම්’ කියලා දෙවියන් කිව්වා. යෙහෝවා උදව් කරනවා කියලා දැනගත්තාම මෝසෙස් බිරිඳයි පුතාලයි එක්ක ඊජිප්තුවට ගියා.