පොරොන්දුව කඩ කළා

දෙවියන් මෝසෙස්ට කිව්වා ‘කන්ද උඩට නැඟලා එන්න, මගේ නීති ගල් පුවරුවල ලියලා මං ඔයාට දෙන්නම්’ කියලා. මෝසෙස් කන්දට නැඟලා එතන දවස් 40ක් හිටියා. එයා එතන ඉද්දී යෙහෝවා නීති 10ක් ගල් පුවරු දෙකක ලියලා මෝසෙස්ට දුන්නා. ඒකට කිව්වේ දසපනත කියලා.

ටික දවසක් යද්දී ඊශ්‍රායෙල්වරු හිතුවේ මෝසෙස් එයාලව දාලා යන්න ඇති කියලයි. ඒ නිසා එයාලා ආරොන්ට කිව්වා ‘අපිට නායකයෙක් ඕනෙ, අපිට දෙවි කෙනෙක්ව හදලා දෙන්න’ කියලා. එතකොට ‘මට ඔයාලාගේ රත්තරන් දෙන්න’ කියලා ආරොන් කිව්වා. ඊටපස්සේ එයා ඒවාවලින් වස්සෙක්ගේ රූපයක් හැදුවා. ‘මේ වස්සා තමයි ඊජිප්තුවෙන් අපිව නිදහස් කරගෙන ආපු අපේ දෙවියන්’ කියලා සෙනඟ ඒ රූපයට නමස්කාර කරන්න පටන්ගත්තා. විනෝද වෙන්නත් පටන්ගත්තා. යෙහෝවාට විතරක් නමස්කාර කරන්න එයාලා පොරොන්දු වෙලයි තිබුණේ. ඒත් එයාලා ඒ පොරොන්දුව කැඩුවා.

යෙහෝවා මෝසෙස්ට මෙහෙම කිව්වා. ‘ආයෙත් සෙනඟ ළඟට යන්න. එයාලා මට අකීකරු වෙලා බොරු දෙවියෙක්ට නමස්කාර කරනවා.’ මෝසෙස් ගල් පුවරු දෙකත් අරන් කන්දෙන් බැහැලා ආවා.

සෙනඟ සින්දු කියනවා මෝසෙස්ට දුර ඉඳලාම ඇහුණා. සෙනඟ නටන විදිහත් රත්තරන් වස්සාට වඳින විදිහත් දැක්කාම මෝසෙස්ට හුඟක් කේන්ති ගියා. එයා අතේ තිබුණු ගල් පුවරු දෙක බිමට වීසි කරලා ඉක්මනටම ගිහින් රූපය විනාශ කළා. පස්සේ එයා ආරොන් ළඟට ගිහින් මෙහෙම ඇහුවා. ‘ඔයා මෙච්චර ලොකු වරදක් කළේ ඇයි?’ එතකොට ආරොන් මෙහෙම කිව්වා. ‘කේන්ති ගන්න එපා. මේ සෙනඟ ගැන ඔයා දන්නවානේ. එයාලට දෙවි කෙනෙක් ඕනෙ වුණා. ඉතින් මං එයාලාගේ රත්තරන් අරන් ගින්නට වීසි කළාම මේ වස්සාගේ රූපය එළියට ආවා.’ ආරොන් කරපු දේ වැරදියි. පස්සේ මෝසෙස් ආයෙත් කන්ද උඩට ගිහින් සෙනඟට සමාව දෙන්න කියලා යෙහෝවාගෙන් ඉල්ලුවා.

කීකරු වෙන්න කැමති අයට යෙහෝවා සමාව දුන්නා. ඊශ්‍රායෙල්වරු මෝසෙස්ට කීකරු වෙන එක කොච්චර වැදගත් දෙයක් වුණාද!