නෝවා නැවෙන් කපුටෙකුත් පසු ව කොබෙයියෙකුත් පිට කළේ ඇයි?
බයිබලය විස්තරාත්මක ව පැහැදිලි කිරීමක් කරන්නේ නැත. කෙසේ වෙතත්, නෝවාගේ ක්‍රියා මාර්ගයේ යම් තර්කානුකූල බවක් තිබෙන බව පෙනී යයි.
මාස පහක් පමණ කලකට කඳු මුදුන් පවා වසා දැමූ මහා ජල ගැල්මක් ඇති කරවමින්, දහවල් 40ක් සහ රාත්‍රි 40ක් මුළුල්ලේ පොළොවට මහ වැසි ඇද හැලෙන්නට විය. ඉන් පසු, “නැව . . . අරරත් කඳු පිට නැවතුණය.” (උත්පත්ති 7:6–8:4) මාස ගණනකට පසු ව, “කඳු මුදුන් පෙනුණු” පසු, නෝවා, “කපුටුවෙකු පිටතට යැවීය, ඌ පිටතට ගොස් . . . ඔබ මොබ ගියේය [ඔබ මොබ ගොස් ආපසු පැමිණියේ ය NW].”—උත්පත්ති 8:5, 7.
කපුටුවෙකු යැවුවේ ඇයි? මෙම කුරුල්ලා ශක්ති සම්පන්න පියාඹන්නෙකු වන අතර, මළ සිරුරු ඇතුළු, වෙනත් ආහාර වර්ග ගණනාවකින් පෝෂණය වීමෙන් මෙම පක්ෂියාට ජීවත් විය හැක. නෝවා කපුටුවෙකු යවන්නට ඇත්තේ, ඌ නැවත එනවා ද, නැතහොත් සමහරවිට ජලය බැස ගොස් ගොඩ බිම මතුවනවාත් සමඟ ඒ මත අනාවරණය වී තිබෙන මළ සිරුරුවල කොටස් බුදිමින් නැවෙන් පිටතට වී සිටිනවා ද කියා බැලීමට විය හැක. කෙසේ වෙතත්, කපුටුවා බැහැර ව සිටියේ නැත. ඌ ආපසු පැමිණි බවක් බයිබලය කියයි, නමුත් ඌ නෝවා වෙත ආපසු පැමිණි බවක් බයිබලය පවසන්නේ නැත. සමහරවිට ඌ නැව මත මහන්සි හැරීමට පැමිණෙන්නට ඇත්තේ, තවමත් රැඳී තිබෙන වතුරේ පාවෙන ආහාර සොයන්නට පියඹා එන විට දී ය.
පසු ව, කොබෙයියෙකු පිටතට යවන්නට නෝවා තෝරා ගත්තේ ය. අපට මෙසේ කියවීමට තිබේ: “ . . . පරෙවියා [කොබෙයියා NW] උගේ පතුල තබන්ට තැනක් නොලැබ ඔහු වෙත නැවට හැරී ආවේය.” (උත්පත්ති 8:9) මින් යෝජනා කරන්නේ, ජල ගැල්මේ වතුර බැස ගොස් තිබුණා ද කියා නිශ්චය කිරීමට කොබෙයියා ව උගේ ම ක්‍රමයෙන් සොයා ගත හැකි ව තිබුණු බව ය. කොබෙයියෝ සැලකිය යුතු ප්‍රමාණයකට මිනිසුන් කෙරෙහි විශ්වාසයක් තබති. කොබෙයියා, හුදෙක් නැවට නොව, නමුත් තමා වෙතට ම නැවත එන බවක් නෝවාට අපේක්ෂා කිරීමට හැකි විය.
කොබෙයියන් රැඳෙන්නේ වියළි බිම් මත බවත්, නිමිනවල දී පහතින් පියාසර කරන බවට ප්‍රසිද්ධ බවත්, ඔවුන් ශාක භක්ෂකයන් බවත් කියැවේ. (එසකියෙල් 7:16) ග්‍රිස්මෙක්’ස් ඇනිමල් ලයිෆ් එන්සයික්ලොපීඩියා මෙසේ සඳහන් කරයි: “ඇට සහ ගෙඩි බුදින සියලු පරෙවියන් සහ කොබෙයියන් ගැන සැබෑ වන්නාක් මෙන්, හිමෙන් [හෝ ජලයෙන්] දවසකට වඩා වැඩි කාලයක් පොළොව වැසී තිබෙන විට, ඔවුන්ගේ ආහාර වැඩි ප්‍රමාණයක් තිබෙන්නේ භූමිය මතුපිට හෙයින් ඔවුන්ට ආහාර ගැනීමට දුෂ්කරතාවයක් තිබේ.” එබැවින්, කොබෙයියා හට වියළි බිමක් හමුවුනු බවට යම් සාක්ෂියක් හෝ අතු රිකිල්ලක් නෝවා වෙත ගෙන ඒමට පුළුවන. නෝවා ඌ ව පළමු වතාවට පිටතට යැවූ අවස්ථාවේ දී, කොබෙයියා නැව වෙතට ආපසු පැමිණියේ හිස් අතිනි. දෙවන වතාවේ දී, කොබෙයියා ආපසු පැමිණියේ ඔලීව කොලයක් රැගෙන ය. තුන්වන වතාවේ දී, ඌ ආපසු පැමිණියේ නැත, දැන් නෝවාට නැවෙන් පිටත යාමට හැකි බවත් ආරක්ෂාකාරී බවත් ඒ මගින් සාක්ෂි දුණි.—උත්පත්ති 8:8-12.
මේවා යම් සිද්ධියක් පිළිබඳ ව අහම්බෙන් දී ඇති විස්තර ලෙසට යමෙකු සලකනවා විය හැකි වුවත්, මෙහි තිබෙන සත්‍යය කරුණ නම්, මෙම වාර්තාව මේ තරම් ම නියත විස්තරයක් වුවත්, සම්පූර්ණ පහදා දීමක් සඳහා පමණට වඩා වෑයම් කොට නොකීමෙන් පිළිබිඹු වන්නේ බයිබලයේ විශ්වාසවන්ත භාවය ය. මෙම වාර්තාව ගෙතූ හෝ ඇමුණූ එකක් නොව, නමුත් අවංක ව නිවැරදි එකක් බවට අමතර හේතුවක් අප වෙත සපයයි. දීර්ඝ විස්තර හෝ පැහැදිලි කිරීම් මඳ ව තිබීමෙන් යෝජනා කෙරෙන්නේ ද, නෝවා නැවත නැගිටවනු ලැබූ විට, ඔහුගෙන් විමසීමට ඇදහිලිවන්ත ක්‍රිස්තියානින් හට මොනතරම් උනන්දුමය දේවල් තිබෙනු ඇති බවත්, සහ ඔහු කළ දේවල් හා ඊට හේතුව සම්බන්ධ ව අමතර විස්තර පැහැදිලි කිරීමට ඔහුට හැකි වන බවත් ය.—හෙබ්‍රෙව් 11:7, 39. w92 1/15