ගිලියඩ් උපාධිලාභීහු මිෂනාරි සේවය නමැති දීමනාව භාර ගනිති
වර්ෂ 1992 මාර්තු 1 දා, වොච්ටවර් බයිබල් ස්කූල් ඔෆ් ගිලියඩ් පාසලේ 92වන පංතියේ සාමාජිකයන් 22දෙනා දීමනාවක්—මිෂනාරි සේවය නමැති දීමනාව භාර ගත්හ. පංතිය ඇමතූ අවස්ථාවේ දී, පාලක මණ්ඩලයේ ලොයිඩ් බැරී මෙසේ සඳහන් කළේ ය: “මහත් ප්‍රීතියක් සමඟ ඔබ එම පුදුමාකාර දීමනාව ලබා ගනීවා, වෙනත් අයට ප්‍රීතිය ගෙන ඒම සඳහා එය ඔබ විසින් යොදා ගනු ලැබේවා.”
ආරාධිත අමුත්තන් සහ බෙතෙල් පවුලේ සාමාජිකයන් 4,662ක්, උපාධි පිරිනැමීමේ වැඩසටහන සඳහා න්‍යූ ජර්සි හි, ජර්සි සිටි සමුළු ශාලාවට එක්රැස් වී සිටියහ. තවත් 970 දෙනෙක් වොල්කිල් හි, බෘක්ලින් හි, වොච්ටවර් සමිතියේ න්‍යූ යෝර්ක් ගොඩනැගිලි වෙත ද, පැටර්සන් මධ්‍යස්ථානය වෙත ද පැමිණ සිටි අතර, වැඩසටහන දුරකථන මගින් එම ස්ථානවලට සම්බන්ධ කර තිබිණි. මිෂනාරි සේවය නමැති දීමනාව ඉහළින් අගය කිරීමටත්, එය ඥානවන්ත ව භාවිතා කිරීමටත් උපකාරවත් වන උපදෙස් උපාධිලාභීන් හට දෙනු ලැබූ විට, සියලු දෙනා ම ප්‍රවේසමෙන් සවන් දී සිටියෝ ය.
මෙම වැඩසටහන, “ ‘එකිනෙකා ව සාදරයෙන් පිළිගන්න’!” නම් වූ අංක 155 දරන ගීතිකාව උද්‍යෝගයෙන් ගැයීමත් සමඟ ම ආරම්භ විණි. ඉන් පසු ව, ගිලියඩ් පාසලේ සභාපති වන 98 හැවිරිදි ෆෙඩ්රික් ඩබ්ලිව්. ෆ්‍රාන්ස් විසින් ඉදිරිපත් කරනු ලැබූ හෘදයාංගම යාච්ඤාවත් සමඟ ම, සියලු දෙනාගේ ම හදවත් පෙලඹී ගියේ ය. ඉන් පසු, වැඩසටහනේ සභාපති, පාලක මණ්ඩලයේ කේරී බාබර්, උපාධි ප්‍රධාන වැඩසටහනට සියලු දෙනා ව ම සාදරයෙන් පිළිගෙන මෙසේ පැවසී ය: “අද දින තරම් ගිලියඩ් මිෂනාරිවරුන්ගේ මහත් අවශ්‍යතාවයක් මීට පෙර කවදාවත් තිබී නැහැ.” ඔහුගේ වචනවලින් පසු ව, කෙටි, උපකාරවත් කථා මාලාවක් ඔහු විසින් හඳුන්වා දෙන ලදි.
බෙතෙල් නිවාස කමිටුවේ කර්ටිස් ජොන්සන්, “ඔබගේ උයන හොඳින් රැකබලා ගන්න” යන තේමාවෙන් යුතු ව පළමුවෙන් කථා කළේ ය. මෙම නව මිෂනාරිවරුන් තමන්ගේ පැවරුම් ලබන විට, ඔවුන් සෑම කෙනෙකුට ම වගා කිරීම සඳහා ආත්මික උයනක් තිබෙනු ඇති බව සහෝදර ජොන්සන් සටහන් කළේ ය. (1 කොරින්ති 3:9) ලොව වටා සිටින යෙහෝවඃ වහන්සේගේ ජනයා, සියලු ම ජාතීන් හමුවේ ධර්මිෂ්ඨකම හා ප්‍රශංසාව වගා කෙරෙන ආත්මික උයනකි. (යෙසායා 61:11) ‘අනාගතයේ දී, ඔබ ඔබගේ ආත්මික උයන රැකබලා ගන්නා ආකාරය, ඔබගේ මිෂනාරි පැවරුමේ සාර්ථකත්වයට ඔබට බොහෝ සෙයින් බලපෑම් කරනු ඇත’ යයි කථිකයා අවධාරණය කළේ ය. තම ආත්මික උයන හොඳින් රැකබලා ගැනීමට ඔවුන්ට උපකාරවත් වනු ඇත්තේ කුමක් ද? ‘යෙහෝවඃ වහන්සේ, ඔබගේ ආත්මික උයන වටේ තිබෙන ආරක්ෂක පවුරක් විය හැකි ය. හරි ක්‍රියා වගා කිරීමට ඔබ අධිෂ්ඨාන කරගෙන සිටිනවා නම්, යාච්ඤාවෙන් උන් වහන්සේට සමීප ව සිටින්න, ඉන් පසු ඔබගේ යාච්ඤාවන්ට එකඟ ව ක්‍රියා කරන්න.’
ඊළඟට, “ස්වාමීන් වහන්සේ තුළ සෑම විට ම ප්‍රීතිවන්න” යන තේමාවෙන් යුතු ව කථා කළේ ලොයිඩ් බැරී ය. (පිලිප්පි 4:4) ජපානයේ වසර 25කට වැඩිය මිෂනාරි සේවයේ නියැලී සිටි ඔහුට, මිෂනාරි සේවය නමැති දීමනාව භුක්ති විඳීම සඳහා මිෂනාරිවරුන්ට උපකාර කිරීමට ප්‍රායෝගික යෝජනා කිහිපයක් දීමට තිබිණි. ඔහු මෙසේ නිරීක්ෂණය කළේ ය: ‘දෙවියන් වහන්සේගේ සේවය තුළ ඔබට තිබෙන ප්‍රීතිය, බොහෝ පීඩාකාරී තත්ත්වයන් සහ සමහර විට ඔබට මුහුණ පෑමට සිදු වන සමහරක් ශාරීරික ගැටලුවලට මුහුණ දීමට උපකාරවත් වනු ඇති බව ඔබ විසින් සොයා ගන්නවා ඇත.’ (හිතෝපදේශ 17:22) තමන් හුරුපුරුදු ව සිටින තත්ත්වයන්ට හාත්පසින් ම වෙනස් ස්වභාවයන් හා තත්ත්වයන්ට මුහුණ පෑමට සිදු වනු ඇති බව ඔහු උපාධිලාභීන්ට මතක් කළේ ය. ඔවුන්ට අලුත් භාෂාවක් ඉගෙන ගැනීමට සිදු වනු ඇත. ‘එම භාෂාව ඉගෙන ගැනීමේ දී ඔබට බොහෝ වෙහෙස මහන්සි වී වැඩ කිරීමට සිදු වනු ඇත. නමුත් මිනිසුන් සමඟ ඔවුන්ගේ භාෂාවෙන් ම කථා බහ කිරීමට ඔබට හැකි වන විට, මෙයත් ඔබගේ ප්‍රීතියට යමක් එකතු කරනු ඇත.’
“ත්‍යාගය වෙත ඔබගේ නෙත් යොමා ගන්න” යන තේමාවෙන් ඊළඟට කථා කළේ, කම්හල් කමිටුවේ එල්ඩොර් ටිම් ය. ත්‍යාගය කුමක් ද? සදාකාල ජීවනය ය! එය දිනාගැනීමට නම්, අප අපගේ නෙත් එය මත නාභි ගත කර තබා ගත යුතු ය. ජීවනය සඳහා ධාවනයේ යෙදී සිටින ක්‍රිස්තියානින් සහ පළමු සියවසේ මලල ක්‍රීඩා තරඟවල ධාවකයන් අතර සමානකම් හා වෙනස්කම් සමහරක් ගැන කථිකයා සාකච්ඡා කළේ ය. ධාවකයන් මෙන්, ක්‍රිස්තියානින් දැඩි වීර්යකින් යුතු ව පුහුණු විය යුතු අතර, නීති පිළිපදිමින්, අනවශ්‍ය බර ඉවතට විසි කර තමන් ව ම සැහැල්ලු කර ගත යුතු ය. එහෙත් සාමාන්‍ය ධාවකයන් මෙන් නොව, ක්‍රිස්තියානින් සිටින්නේ ජීවිත කාලීන ධාවනයක වන අතර, ත්‍යාගය නම් සදාකාල ජීවනය ය. එක්කෙනෙක් ජයග්‍රාහකයෙකු වෙනවා වෙනුවට, අවසානය දක්වා ජීවනය කරා ධාවනය කරන සියල්ලන් ම ත්‍යාගය ලබා ගන්නවා ඇත. සහෝදර ටිම් මෙසේ අවසන් කළේ ය: ‘ජීවනයේ ත්‍යාගය දිනාගැනීමට නම්, ත්‍යාගයේ දායකයාණන් වන යෙහෝවඃ වහන්සේ සමඟ අප සමාදානයෙන් සිටිය යුතු ය. තව ද, යෙහෝවඃ වහන්සේ සමඟ සමාදානයෙන් සිටීමට නම්, අප අපගේ සහෝදරයන් සමඟ සමාදානයෙන් සිටිය යුතු ය.’
පාලක මණ්ඩලයේ මිල්ටන් හෙන්ෂෙල්, ඊළඟට, “ශුද්ධ ලියවිල්ලෙන් ලැබෙන සැනසීම තුළින්, අපට බලාපොරාත්තුවක් තිබේ” යන තේමාවෙන් කථා කළේ ය. (රෝම 15:4) කථිකයා මෙසේ ආරම්භ කළේ ය, ‘පසුගිය මාස පහ පුරා, ඔබ බයිබලය සමඟ කඩිසර ව සිටියා. මහත් සමීපතාවයක් ගොඩ නංවා තිබෙනවා. ඔබට ශක්තිමත් බලාපොරොත්තුවක් තිබෙනවා. ඔබ ඔබගේ පැවරුම වෙත යනවාත් සමඟ ම, ඔබගේ බලාපොරොත්තුව මෙතරම් ශක්තිමත් ඇයි ද කියා කරුණාකර මතක් කර ගන්න. ඒ, ඔබ ශුද්ධ ලියවිලිවලට සමීප ව සිටි නිසා ය.’ බලාපොරොත්තුව ප්‍රකෘතිමත් කරවන එක් බයිබල් වාර්තාවක උදාහරණයක් පෙන්වීම සඳහා, විනිශ්චයකාරයාණන් 6 සිට 8 වෙනි පරිච්ඡේදවලට කථිකයා යොමු දක්වා සිටියේ ය, එහි සඳහන් වන්නේ මිදියන්වරුන්ගේ පීඩාකාරී බලපෑමෙන් ඊශ්‍රායෙල් ජාතිය ව මුදවා ගැනීමට ගිඩියොන්ට පවරනු ලැබූ ආකාරයයි. එම වාර්තාව සහ එයින් අපගේ දිනට ගත හැකි අර්ථය ගැන සාකච්ඡා කළායින් පසු, ඔහු මෙසේ සටහන් කළේ ය: ‘ශුද්ධ ලියවිලිවලට සමීප වීමට ඔබට ප්‍රස්තාව තිබෙන විට, මේ දේවල් ගැන සිතන්න, ඒවා ඔබට නැවුම් බවක් ගෙන දෙනු ඇත, ඔබ ධෛර්යය ලබනු ඇත.
සිසුන් වෙත පාසලේ මූලික උපදේශකවරුන් දෙදෙනා හට දීමට තිබෙන්නේ කිනම් උපදෙස් දැයි සියලු දෙනා ම පුල පුලා බලා සිටියෝ ය. ජැක් රෙඩ්ෆඩ් ප්‍රථමයෙන්, “හරි දේ කරන්න” යන තේමාවෙන් යුතු ව කථා කළේ ය. ඔහු උපධිලාභීන්ට මෙසේ මතක් කළේ ය: ‘ශුද්ධ ලියවිලිවලට අනුව, හරි දේ කුමක් ද කියා ඔබට ගිලියඩ් හි දී හොඳ පුහුණුවක් දෙනු ලැබුවා. දැන් ඔබ අභියෝගාත්මක මිෂනාරි පැවරුම් වෙත යනවා. මේ යන මඟේ ඔබට සමහර විට දුෂ්කරතා තිබෙන්නට යන බව අපි දන්නවා. ඒ වුණත්, ඔබට මොනයම් හෝ හැඟීම් තිබුණත් ඔබට හරි දේ කිරීමට හැකි බව අපි දන්නවා.’ උපකාර කරනු ඇත්තේ කුමක් ද? එක් දෙයක් නම්, අනෙක් අය දෙස හරි කෝණයකින් බැලීමයි. කථිකයා මෙසේ කීය: ‘අසම්පූර්ණකමින් පරිපූර්ණකම බලාපොරොත්තු වෙන්න එපා.’ පීඩාකාරී තත්ත්වයන් දෙස හරි විදිහට බැලීම ද උපකාරවත් වනු ඇත. ‘අප සියලු දෙනාට ම ජීවිතයේ ජය පරාජයන් තිබෙනවා’ ඔහු සටහන් කළේ ය. ‘ජයග්‍රහණයන් පිළිගන්නට ඕනෑ ම කෙනෙකුට පුළුවන්. නමුත් ඔබ මිෂනාරි සේවය තුළ විඳදරා ගන්නවා ද කියා නිශ්චය කෙරෙන්නේ ඔබ පරාජයන් කෙසේ පිළිගන්නවා ද යන්න අනුවයි.’—යාකොබ් 1:2-4.
පාසලේ ලේඛන භාර යුලිසීස් ග්ලාස්, තෝරා ගත්තේ “අනාගතය සඳහා තිබෙන බලාපොරොත්තුව කුමක් ද?” යන තේමාවයි. පියෙකුගේ කටහඬින්, ඔහු උපාධිධාරීන් ව දිරිගැන්වූයේ ඔවුන්ගේ බලාපොරොත්තුව දීප්තිමත් ව දැල්වෙමින් තබා ගන්නා ලෙසයි. (හිතෝපදේශ 13:12) ‘බලාපොරොත්තුව නැති වී යාමේ ආරම්භය නොදැනෙන තරම් විය හැකියි.’ ඔහු පැහැදිලි කළේ ය. ‘දෙවියන් වහන්සේ සමඟ අපට තිබෙන සම්බන්ධතාවය වෙනුවට අපගේ ම දේවල් සමඟ ඇලී ගැලී සිටින තත්ත්වයන්ට සමහර විට අප පත් වෙනවා විය හැකි ය. අපට අසනීප විය හැකි ය, නැත්නම් වෙනත් අය අපට වැරදියට සලකනවා යයි හැඟෙන්නට පුළුවන. සමහරුන්ට අපට වඩා ද්‍රව්‍යමය දේවල් තිබෙනවා විය හැකිය, නැත්නම් දේව සේවය තුළ වඩාත් හොඳ ප්‍රතිඵල ලැබෙන්නට පුළුවන, අපට මඳක් ඊර්ෂ්‍යා හිතෙනවා විය හැකියි. එවැනි දේවලින් අප ව ටිකෙන් ටික වසාලන්නට අප ඉඩ හැරියහොත්, වැඩි කල් යන්නට මත්තෙන්, රාජ්‍යය බලාපොරොත්තුව අපගේ හදවතෙන් සහ මනසෙන් මැකී ගොස්, ජීවනය සඳහා වූ ධාවනයේ විඳදරා ගැනීම අප විසින් නතර කරන්නට පවා පුළුවන.’ කුමක් කළ හැකි ද? ‘අප අපගේ බලාපොරොත්තුව ප්‍රාණවත් කර ගන්නට නම්, ඒකාන්ත පියවර ගත යුතු ය. අප අපගේ මනස් හා හෘදයන් දෙවියන් වහන්සේගේ පොරොන්දුවලින් පුරවා, සැබෑවට ම දෙවියන් වහන්සේගේ රාජ්‍යයට අපගේ මුළු අවධානය යොමු කළ යුතු ය. තව ද, අප යෙහෝවඃ වහන්සේ සමඟ තිබෙන අපගේ අදහස් හුවමාරුව යළිත් පිහිටුවා ගත යුතු ය, මන්දයත් ස්ථිර ව ම මෙය අපගේ ප්‍රීතියට තුඩු දෙන නිසා ය.’
පාලක මණ්ඩලයේ කාල් ක්ලයින් උපාධි ප්‍රදාන කථාව කළේ ය. ඔහුගේ තේමාව වූයේ “යටහත් පහත් විය යුත්තේ ඇයි?” යන්න ය. තව ද එම ප්‍රශ්නයට පිළිතුර කුමක් ද? ‘මන්දයත්, එය කිරීමට තිබෙන හරි දෙයයි, කිරීමට තිබෙන යුක්ති සහගත දෙයයි, කිරීමට තිබෙන ප්‍රඥාවන්ත ප්‍රේමනීය දෙයයි’ යනුවෙන් ඔහු තම ආරම්භක වදන්වල පැහැදිලි කළේ ය. අපට අනුකරණය කිරීමට යටහත් පහත්කමේ මනා ආදර්ශයන් හතරක් ගැන ඔහු සාකච්ඡා කරද්දී සබය කුතුහලයෙන් ඇළලී ගියේ ය: (1) ආබ්‍රහම් සහ මෝසෙස් සමඟ කටයුතු කරන විට නිසැක ව ම යටහත් පහත් වූ යෙහෝවඃ දෙවියන් වහන්සේ (උත්පත්ති 18:22-33; ගණන් කථාව 14:11-21; එපීස 5:1); (2) ‘යටහත් පහත් වී, වධ කණුවේ මරණය දක්වා කීකරු වුණා වූ’ යේසුස් ක්‍රිස්තුස් වහන්සේ (පිලිප්පි 2:5-8; 1 පේතෘස් 2:21) (3) ‘මනසින් මහත් සේ නිහතමානීකමින් ස්වාමීන් වහන්සේට වහල්කම් කළා වූ’ ප්‍රේරිත පාවුල් (ක්‍රියා 20:18, 19; 1 කොරින්ති 11:1); සහ (4) සමිතියේ පළමු සභාපති වූ සහෝදර රසල් වැනි ‘අප අතර පෙරමුණ ගන්නා අය,’ වරක් මෙසේ ලීවේ ය: “අපගේ යටහත් පහත් කුසලතාවයන් පාවිච්චි කිරීමට ස්වාමීන් වහන්සේ සතුටු වී සිටින වැඩ, අලුතින් පිහිටුවීමේ වැඩකට වඩා, යළි සකස් කිරීමේ, එකඟ කිරීමේ වැඩක් වී තිබේ.” (හෙබ්‍රෙව් 13:7) යටහත් පහත්වීම සඳහා තිබෙන තවත් ප්‍රබල හේතු සහෝදර ක්ලයින් තවදුරටත් ගෙන හැර දැක්වී ය. ස්ථිර ව ම, යටහත් පහත්වීමට දී තිබෙන උපදෙස්වලට අවනත වීම, මිෂනාරි සේවය නමැති දීමනාව ඥානවන්ත ව භාවිතා කිරීමට උපාධිලාභීහු හට උපකාරවත් වනු ඇත.
මෙම කථාවලින් පසු, සභාපති, පොළොවේ විවිධ ප්‍රදේශවලින් පැමිණි සුභපැතුම් බෙදා ගත්තේ ය. උපාධිලාභීන්ට තමන්ගේ ඩිප්ලෝමා ලබා ගැනීමට දැන් කාලය ඇවිත් තිබිණි. ඔවුහු රටවල් හතකින් පැමිණ සිටියෝ ය—කැනඩාව, ෆින්ලන්තය, ප්‍රංශය, මොරීෂස්, නෙදර්ලන්තය, ස්වීඩනය, සහ එක්සත් ජනපදය. එහෙත් ඔවුන්ගේ මිෂනාරි පැවරුම් ඔවුන් ව රටවල් 11කට ගෙන යනු ඇත—බොලීවියාව, එස්ටෝනියාව, ග්‍රෙනෙඩාව, ග්වාටමාලාව, හොන්ඩුරාස්, හංගේරියාව, මොරීෂස්, පේරු, ටොගෝ, තුර්කිය, සහ වෙනිසියුලාව.
විවේක කාලයෙන් පසු, සේවා අංශ කමිටුවේ ජෝවෙල් ඇඩම්ස් විසින් පවත්වන ලද කෙටි කළ මුරටැඹ සාරාංශය සමගින් පස්වරු වැඩසටහන ආරම්භ විණි. ඉන් පසු ව, පාසල් කාලය අතරතුරේ දී තමන් භුක්තිවිඳි ක්ෂේත්‍ර සේවා අත්දැකීම් කිහිපයක් උපාධිලාභීන් විසින් නිරූපනය කරන ලදි. අවසානයේ දී, උපාධිලාභීන් ඇතුළු මුළු සබයේ ඥානාභිවෘද්ධිය පිණිස, වයි රිස්පෙක්ට් තියොක්‍රටික් ඕඩර්? [දිව්‍යාණ්ඩු පිළිවෙළට ගෞරව කළ යුත්තේ ඇයි?] නමැති නාට්‍යය ඉදිරිපත් කරන ලදි.
ඇත්තෙන් ම, මෙම උපාධිලාභීන් තමන්ගේ පැවරුම් වෙත ගියේ, ඔවුන්ට පමණක් නොව, නමුත් අන්‍යයන්ට ද ප්‍රීතිය ගෙන ඒම සඳහා, මිෂනාරි සේවය නමැති දීමනාව ඥානවන්ත ව පාවිච්චි කිරීමට ඔවුන්ට උපකාරවත් වන උපදෙස් හා දිරිගැන්වීම් සමඟයි. w92 6/1
පංතියේ දත්ත
නියෝජනය කළ රටවල් සංඛ්‍යාව: 7
පැවරුම් ලැබූ රටවල් සංඛ්‍යාව: 11
මුළු සිසුන් සංඛ්‍යාව: 22
වයසේ සාමාන්‍යය: 33.4
සත්‍යය තුළ සිටි අවුරුදු සාමාන්‍යය: 16.7
පූර්ණ කාලීන සේවය තුළ වූ අවුරුදු සාමාන්‍යය: 11.8
වොච්ටවර් බයිබල් ස්කූල් ඔෆ් ගිලියඩ් පාසලේ 92 වෙනි උපාධිලාභී පංතිය
පහත දැක්වෙන ලැයිස්තුවේ, පෙළවල් ගණන් කරනු ලැබ තිබෙන්නේ ඉදිරියේ සිට පිටුපසට වන අතර, නම් ලැයිස්තු ගත කොට ඇත්තේ, එක් එක් පේළියේ වමේ සිට දකුණට ය. (1) චාන් චින් වා, එම්.; බොවන්ෂෝ, එන්.; චැප්මන්, බී.; ඕස්ට්බර්ග්, ඒ.; කෝල්, එල්.; ජැක්සන්, කේ.; ම්‍යර්විජ්ක්, ඒ.; (2) ස්මිත්, ජේ.; වොලින්, කේ.; චැප්මන්, ආර්.; ගබෝර්, එන්.; චාන් චින් වා, ජේ.; ස්මිත්, සී.; එඩ්වික්, එල්.; (3) බොවන්ෂෝ, ඊ.; ඕස්ට්බර්ග්, එස්.; කෝල්, කේ.; ජැක්සන්, ආර්.; ගබෝර්, එස්.; එඩ්වික්, වී.; ම්‍යර්විජ්ක්, ආර්.; වොලින්, ජී.