සැබෑ නමස්කාරය දෙවියන්වහන්සේගේ ආශීර්වාද ලැබීමට හේතුව

“හලෙලූයා! [ජනයෙනි, යාඃට ප්‍රශංසා කරන්න! NW] ගැළවීමද මහිමයද බලයද අපගේ දෙවියන්වහන්සේට අයිතිය. මක්නිසාද උන්වහන්සේගේ විනිශ්චයෝ සැබෑය, ධර්මිෂ්ඨය.”—එළිදරව් 19:1, 2.

1. මහා බබිලෝනිය ඇගේ අවසානය දකිනු ඇත්තේ කෙසේද?

“දෙවියන්වහන්සේගේ දෘෂ්ටිකෝණයෙන් “මහා බබිලෝනිය” වැටී තිබෙන අතර, දැන් අභාවයට පත් වෙමින් සිටී. මෙම ලෝක ව්‍යාප්ත ආගමික වේශ්‍යාව වැඩි කල් නොගොස් ඇගේ දේශපාලනික ප්‍රේමවන්තයන් අතින් විනාශය අද්දකින බවට බයිබල් අනාවැකිය අඟවයි; ඇගේ අවසානය හදිසියෙන්, එමෙන්ම වහා සිදු වනු ඇත. යේසුස්වහන්සේ යොහන්ට දුන් එළිදරව්වෙහි මෙම අනාවැකිමය වචන අඩංගු විය: “තවද බලවත්වූ දේවදූතයෙක් මහත් ඇඹරුම් ගලක් වැනිවූ ගලක් ගෙන මුහුදේ හෙළා: ඒ මහත් නුවරවූ බබිලෝනිය මහත් වැටීමකින් මෙසේ හෙළනු ලබන්නීය, තවත් කිසිසේත් සම්බ නොවන්නීය.”—එළිදරව් 18:2, 21.

2. බබිලෝනියේ විනාශයට යෙහෝවඃවහන්සේගේ සේවකයන් ප්‍රතික්‍රියා කරනු ඇත්තේ කෙසේද?

² මහා බබිලෝනියේ විනාශයේදී සාතන්ගේ ලෝකයේ යම් කණ්ඩායම් ශෝක වනු ඇති මුත්, දෙවියන්වහන්සේගේ ස්වර්ගික හෝ භූමික සේවකයෝ නම් අනිවාර්යයෙන්ම එසේ නොකරන්නෝය. දෙවියන්වහන්සේට ඔවුන් කරන ප්‍රීතිමත් මොරගැසීම මෙය වනු ඇත: “හලෙලූයා [ජනයෙනි, යාඃට ප්‍රශංසා කරන්න, NW]! ගැළවීමද මහිමයද බලයද අපගේ දෙවියන්වහන්සේට අයිතිය. මක්නිසාද උන්වහන්සේගේ විනිශ්චයෝ සැබෑය, ධර්මිෂ්ඨය; මක්නිසාද ඇගේ වේශ්‍යාකමින් පොළොව කිලුටුකළ මහත් වේශ්‍යාව උන්වහන්සේ විනිශ්චයකළසේක, තමන්ගේ මෙහෙකරුවන්ගේ ලේ ගැන ඈට විපාක දුන්සේකැයි කීවෝය.”—එළිදරව් 18:9, 10; 19:1, 2.

සැබෑ ආගම නිපදවිය යුත්තේ කුමන ඵලද?

3. උත්තර අවශ්‍ය කුමන ප්‍රශ්නවලටද?

³ බොරු ආගම පොළොවෙන් සම්පූර්ණයෙන්ම තුරන් කරන්ට යන බැවින්, ඉතිරි වනු ඇත්තේ කුමනාකාරයේ නමස්කාරයක්ද? සාතන්ගේ බොරු ආගමේ ලෝක අධිරාජ්‍යය විනාශ වන විට, බේරී පවතිනු ඇත්තේ කුමන ආගමික කණ්ඩායමදැයි අදදින අපට තීරණය කළ හැක්කේ කෙසේද? මෙම කණ්ඩායම නිපදවිය යුතු ධර්මිෂ්ඨ ඵල මොනවාද? යෙහෝවඃවහන්සේගේ සැබෑ නමස්කාරය වෙන් කොට හඳුනාගැනීම සඳහා අඩුම තරමින් හඳුනාගැනීමේ ලක්ෂණ දහයක්වත් තිබේ.—මලාකි 3:18; මතෙව් 13:43.

4. සැබෑ නමස්කාරය සඳහා ප්‍රථම අවශ්‍යතාවක් කුමක්ද, තවද මේ සම්බන්ධයෙන් යේසුස්වහන්සේ ආදර්ශය තැබුවේ කෙසේද?

⁴ සියල්ලටම ප්‍රථම, යේසුස්වහන්සේ දිවි පුදමින් සිය පියාණන්ගේ පරමාධිපත්‍යය උසස් කළ ලෙසම සැබෑ ක්‍රිස්තියානීන්ද එය උසස් කළ යුතුය. යේසුස්වහන්සේ සිය ජීවිතය කිසිම දේශපාලනික, ගෝත්‍රික, වාර්ගික හෝ සමාජීය හේතුවක් සඳහා පුද නොකළසේක. යුදෙව් දේශපාලනය හෝ විප්ලවවාදී සංකල්පයන් සියල්ලටම ඉදිරියෙන් උන්වහන්සේ සිය පියාණන්ගේ රාජ්‍යය තැබූසේක. සාතන් ලෞකික බලය ඉදිරිපත් කළ විට, උන්වහන්සේ මෙසේ පිළිතුරු දුන්සේක: “සාතන් අහක්ව යව. මක්නිසාද—තාගේ දෙවිවූ ස්වාමීන්වහන්සේට නමස්කාරකරව, උන්වහන්සේට පමණක් සේවයකරවයි ලියා තිබේ.” මුළු පොළොව පුරා සැබෑ පරමාධිපතියාණන් යෙහෝවඃවහන්සේ බව උන්වහන්සේ හෙබ්‍රෙව් ශුද්ධ ලියවිලිවලින් දැන සිටිසේක. මෙම ලෝකයේ දේශපාලනික ක්‍රමවලට වඩා, යෙහෝවඃවහන්සේගේ පාලකත්වයට අසමසම සහයෝගිතාව දක්වන්නේ කුමන ආගමික කණ්ඩායමද?—මතෙව් 4:10; ගීතාවලිය 83:17.

5. (අ) සැබෑ නමස්කාරකයන් දෙවියන්වහන්සේගේ නම සැලකිය යුත්තේ කෙසේද? (ආ) යෙහෝවඃවහන්සේගේ සාක්ෂිකරුවන් එම නාමයට ගරු කරන බව පෙන්වන්නේ කුමකින්ද?

⁵ දෙවන අවශ්‍යතාවක් වනාහි, සැබෑ නමස්කාරය දෙවියන්වහන්සේගේ නාමය මහිමවත් හා විශුද්ධ කළ යුතු වීමය. සර්ව පරාක්‍රමයාණන් විසින් යෙහෝවා (ඇතැම් බයිබල් අනුවාදවල යාහ්වේ ලෙස පරිවර්තනය කෙරේ) යන ස්වකීය නාමය, ස්වකීය ජනයා වූ ඉශ්‍රායෙල්වරුන්ට හෙළි කළ අතර, එය හෙබ්‍රෙව් ශුද්ධ ලියවිලිවල වාර දහස් ගණනක් යොදා තිබේ. ඊටත් කලින් පවා, ආදම්, ඒව සහ වෙනත් අය එම නාමයට නිරතුරුවම ගෞරව නොකළත්, එය දැන සිටියහ. (උත්පත්ති 4:1; 9:26; 22:14; නික්මයාම 6:2) ක්‍රිස්තියානි ලෝකයේ හා යුදෙව්වන්ගේ පරිවර්තකයන්, සාමාන්‍යයෙන්ම තම බයිබල්වලින් දිව්‍ය නාමය ඉවත් කර තිබෙන මුත්, යෙහෝවඃවහන්සේගේ සාක්ෂිකරුවන් නිව් වර්ල්ඩ් ට්‍රාන්ස්ලේෂන් ඔෆ් ද හෝලි ස්ක්‍රිප්චර්ස් නම් බයිබල් පරිවර්තනයෙහි එම නාමයට හිමි විය යුතු නිසි තැන හා ගෞරවය දී ඇත. මුල් ක්‍රිස්තියානීන් කළාක් මෙන්ම ඔවුහු එම නාමයට ගෞරව කරති. යාකොබ් මෙසේ සාක්ෂි දුන්නේය: “දෙවියන් වහන්සේ තමන්ගේ නාමය දැරීමට විජාතීන් අතුරෙන් සෙනඟක් තෝරාගන්නා පිණිස මුල පටන් ම ක්‍රියා කළ සැටි සීමොන් කියා දුන්නේ ය. දිවැසිවරුන්ගේ වචනයෙන් ද එය අනුමත වේ, . . . ‘එවිට අවශේෂ මනුෂ්‍යයන් ද මාගේ නාමය දරන සියලු ජාතීන් ද, ස්වාමීන් වහන්සේ සොයන්නෝ ය. . . . ස්වාමීන් වහන්සේ මේ සියල්ල වදාරන සේක.’ ”—ක්‍රියා 15:14-17, නව අනුවාදය; ආමොස් 9:11, 12.

6. (අ) සැබෑ නමස්කාරය සඳහා තෙවන අවශ්‍යතාවක් කුමක්ද? (ආ) යේසුස්වහන්සේ හා දානියෙල් රාජ්‍ය පාලකත්වය අවධාරණය කළේ කෙසේද? (ලූක් 17:20, 21)

⁶ සැබෑ නමස්කාරය සඳහා තෙවන අවශ්‍යතාවක් වනාහි, පාලකත්වය පිළිබඳව මිනිස්වර්ගයාට ඇති ගැටලු සඳහා එකම යුක්තිසහගත හා ස්ථායි විසඳුම වශයෙන් එය දේවරාජ්‍යය උසස් කළ යුතුවීමය. එම රාජ්‍යය, එනම් මුළු පොළොවේ පාලනය භාරගැනීම සඳහා දේවපාලනය පැමිණෙන පිණිස යාච්ඤා කිරීමට යේසුස්වහන්සේ සිය අනුගාමිකයන්ට පැහැදිලිවම ඉගැන්වූසේක. අන්තිම දවස් පිළිබඳව අනාවැකි කීමට දානියෙල්ට ආනුභාවය ලැබිණ: “ස්වර්ගයේ දෙවියන්වහන්සේ කිසිකලක නැති නොවන්නාවූ රාජ්‍යයක් පිහිටුවනසේක, . . . ඒක ඒ සියලු [ලෞකික, දේශපාලනික] රාජ්‍යවල් පොඩිකර නැති කරන්නේය, එයද සදාකාලේටම පවතින්නේය.” මෙම 20වන සියවසේදී තම ක්‍රියාපටිපාටිය තුළින් එම රාජ්‍යයට නොබෙදුණු සහයෝගයක් තමන් දෙන බව පෙන්වා තිබෙන්නේ කවරෙක්ද, මහා බබිලෝනියේ ආගම්ද නැතහොත් යෙහෝවඃවහන්සේගේ සාක්ෂිකරුවන්ද?—දානියෙල් 2:44, 45; මතෙව් 6:10; 24:14.

7. සැබෑ නමස්කාරකයන් බයිබලය සලකන්නේ කෙසේද?

⁷ දේවඅනුමැතිය සඳහා සිව්වන අවශ්‍යතාව වනුයේ, දෙවියන්වහන්සේගේ සේවකයන් බයිබලය දෙවියන්වහන්සේගේ ආනුභාව ලත් වචනය වශයෙන් උසස් කළ යුතු වීමය. බයිබලය හුදෙක් මිනිසා විසින් කරන ලද සාහිත්‍ය කෘතියක්, එනිසා එහි වැරදි තිබේයයි අඟවමින් බයිබලය බාල කිරීමට වෑයම් කරමින් කරන දැඩි විවේචනයට ඔවුන් ගොදුරු නොවනු ඇත. පාවුල් තිමෝතිට ලිව්වාක් මෙන්ම, බයිබලය දෙවියන්වහන්සේගේ ආනුභාවය ලත් වචනය බව යෙහෝවඃවහන්සේගේ සාක්ෂිකරුවෝ විශ්වාස කරති: “දෙවියන්වහන්සේගේ මනුෂ්‍යයා සම්පූර්ණව, සියලු යහපත් ක්‍රියාවලට සූදානම්ව සිටින පිණිස දේවානුභාවයෙන් දුන් මුළු ලියවිල්ල ඉගැන්වීමටත් තරවටුවටත් හික්මවීමටත් ධර්මිෂ්ඨකම ගැන ගුරුකම් දීමටත් ප්‍රයෝජනවත්ව තිබේ.”a මෙබැවින්, යෙහෝවඃවහන්සේගේ සාක්ෂිකරුවෝ බයිබලය තම මාර්ගෝපදේශකය, දෛනික ජීවිතය ගත කිරීම සඳහා අත්පොත හා අනාගතය සඳහා ඔවුන්ගේ බලාපොරොත්තුවේ උල්පත වශයෙන් සලකති.—2 තිමෝති 3:16.

වෛරයේ නොව ප්‍රේමයේ ආගම

8. සැබෑ නමස්කාරය සඳහා පස්වන අවශ්‍යතාව කුමක්ද?

⁸ යේසුස්වහන්සේ සිය සැබෑ අනුගාමිකයන්ගේ වෙනස දැක්වූයේ කෙසේද? උන්වහන්සේගේ පිළිතුර අපව සැබෑ නමස්කාරය හඳුනාගැනීමේ පස්වන වැදගත් ලකුණ වෙතට ගෙනෙයි. යේසුස්වහන්සේ මෙසේ පැවසූසේක: “මා නුඹලාට ප්‍රේමකළාක්මෙන් නුඹලාත් එකිනෙකාට ප්‍රේමකරන ලෙස, එකිනෙකාට ප්‍රේමකරපල්ලාය කියා අලුත් ආඥාවක් මම නුඹලාට දෙමි. නුඹලා එකිනෙකාට ප්‍රේමකරනවා නම්, නුඹලා මාගේ ගෝලයෝ බව එයින් සියල්ලන් දැනගන්නවා ඇත.” (යොහන් 13:34, 35) යේසුස්වහන්සේ සිය ප්‍රේමය පෙන්වූයේ කෙසේද? සිය ජීවිතය මිදීමේ මිලයක් ලෙස පූජා කිරීමෙනි. (මතෙව් 20:28; යොහන් 3:16) සැබෑ ක්‍රිස්තියානීන්ට අව්‍යාජ ප්‍රේමය අතිවැදගත් ගුණාංගයක් වන්නේ මන්ද? යොහන් මෙසේ පැහැදිලි කළේය: “ප්‍රේමවන්තයෙනි, අපි එකිනෙකාට [නොකඩවා, NW] ප්‍රේමකරමු. මක්නිසාද ප්‍රේමය දෙවියන්වහන්සේගෙන්ය; . . . ප්‍රේම නොකරන්නා දෙවියන්වහන්සේව නාඳුනයි; මක්නිසාද දෙවියන්වහන්සේ ප්‍රේමයය.”—1 යොහන් 4:7, 8.

9. සැබෑ ප්‍රේමය පෙන්වා තිබෙන්නේ කවරෙක්ද, එමෙන්ම කෙසේද?

⁹ වාර්ගික, ජාතික හෝ ජනවාර්ගික වෛරය හමුවේ පවා, අපගේ කාලවල මෙයාකාර ප්‍රේමයක් පෙන්වා තිබෙන්නේ කවරෙක්ද? තම ප්‍රේමය පැතිර තිබිය යුතුවීම සඳහා මරණය පවා විඳිමින්, ශ්‍රේෂ්ඨ පරීක්ෂණය සමත් වී ඇත්තේ කවරෙක්ද? වර්ෂ 1994දී රුවන්ඩාවල සිදු වූ ජන සංහාරය සඳහා කතෝලික පූජකයන් හා කන්‍යා සොහොයුරියන් නිසැකවම යම් දුරකට වගකිව යුතුයයි අපට කිව හැකිද? බෝල්කන්හි ඇති වූ සිවිල් යුද්ධයේදී “ජනවාර්ගික ශෝධනයෙහි” හා වෙනත් ක්‍රිස්තියානි නොවන ක්‍රියාවල යෙදී ඇත්තේ සර්බියාවල ඔර්තඩොක්ස් ආගමිකයන් හෝ ක්‍රොඒෂියාවල කතෝලිකයන්ද? නැතහොත් ඉකුත් දශක කිහිපය පුරා උතුරු අයර්ලන්තයේ අගතියේ හා වෛරයේ ගිනිදළු බුර බුරා නැඟීමට සැලැස්වූයේ කතෝලික හෝ රෙපරමාදු පූජකයන්ද? එවන් ගැටුම් එකකට හෝ සහභාගි වී ඇතැයි කියා යෙහෝවඃවහන්සේගේ සාක්ෂිකරුවන්ට චෝදනා එල්ල කළ නොහැකි බව ස්ථිරය. ඔවුන් සිය ක්‍රිස්තියානි ප්‍රේමය පාවා දෙනවා වෙනුවට, මරණය විඳින තෙක් පවා බන්ධනාගාරවල හා ගාල් කඳවුරුවල දුක්විඳ ඇත.—යොහන් 15:17.

10. සැබෑ ක්‍රිස්තියානීන් මධ්‍යස්ථව සිටින්නේ මන්ද?

¹⁰ දෙවියන්වහන්සේට පිළිගත හැකි නමස්කාරය සඳහා සයවන අවශ්‍යතාවක් වන්නේ, මේ ලෝකයේ දේශපාලනික කටයුතු සම්බන්ධයෙන් මධ්‍යස්ථභාවයය. ක්‍රිස්තියානීන් දේශපාලනය සම්බන්ධයෙන් මධ්‍යස්ථව සිටිය යුත්තේ මන්ද? එම ස්ථාවරය සඳහා පාවුල්, යාකොබ් සහ යොහන් අපට ප්‍රබල හේතු සපයති. භේදකාරි දේශපාලනය ඇතුළුව හැකි සෑම අයුරකින්ම නොඇදහිලිවන්තයන්ගේ සිත් අන්ධ කරන “මේ දේවල පිළිවෙළේ දෙවියා” සාතන් බව ප්‍රේරිත පාවුල් ලීවේය. “ලෝකය සමඟ මිත්‍රකම දෙවියන්වහන්සේට සතුරුකම” බව ශ්‍රාවක යාකොබ් ප්‍රකාශ කළ අතර, “මුළු ලෝකයා නපුරා තුළ” පවතින බව ප්‍රේරිත යොහන් පැවසුවේය. එමනිසා, සැබෑ ක්‍රිස්තියානියෙකුට දේශපාලනයෙන් හා බලයෙන් දූෂ්‍ය වී ඇති සාතන්ගේ ලෝකය හා සම්බන්ධ වීමෙන් දෙවියන්වහන්සේට වූ සිය භක්තිය පාවා දිය නොහැක.—2 කොරින්ති 4:4, NW; යාකොබ් 4:4; 1 යොහන් 5:19.

11. (අ) ක්‍රිස්තියානීන් යුද්ධය සලකන්නේ කෙසේද? (ආ) මෙම ස්ථාවරය සඳහා තිබෙන්නේ කුමන ශුද්ධ ලියවිලිමය පදනමද? (2 කොරින්ති 10:3-5)

¹¹ පෙර සඳහන් අවශ්‍යතාවන් දෙක සලකා බලද්දී, සත්වැන්නක් ප්‍රත්‍යක්ෂ වේ, එනම් සැබෑ ක්‍රිස්තියානි නමස්කාරකයන් යුද්ධවල සහභාගි නොවිය යුතු බවය. සැබෑ ආගම වනාහි, ප්‍රේමය මත පදනම් ලෝක ව්‍යාප්ත සහෝදරත්වයක් බැවින්, “ලෝකයෙහි සිටින . . . සහෝදරයන් [මුළු සහෝදර සමාගම, NW]” භේද කිරීමට හෝ විනාශ කිරීමට කිසිවකට නොහැක. යේසුස්වහන්සේ ඉගැන්වූයේ වෛර කරන්ට නොව, ප්‍රේම කරන්ටය; යුද්ධ කරන්ට නොව සාමයෙන් සිටින්ටය. (1 පේතෘස් 5:9; මතෙව් 26:51, 52) ආබෙල්ව මැරීමට කායින්ව පෙලඹවූ “නපුරා” වන එම සාතන්ම, නොකඩවාම මිනිස්වර්ගයා අතරෙහි වෛරය වපුරන අතර දේශපාලනික, ආගමික හා ජනවාර්ගික භේද මත පදනම්ව ගැටුම් හා රුධිරය වැගිරවීම්වලට පොලඹවයි. කුමක් පරදුවට තබන්ට සිදු වුවත්, සැබෑ ක්‍රිස්තියානීන් ‘තවදුරටත් යුද්ධ කරන්ට ඉගෙනගන්නේ නැත.’ උපමාලංකාරයෙන් පවසනවා නම්, ඔවුන් දැනටමත් ‘ඔවුන්ගේ කඩුවලින් හීවැල්ද, හෙල්ලවලින් දෑකැතිද තනාගෙන ඇත.’ ඔවුහු දෙවියන්වහන්සේගේ ආත්මයේ සමාදාන ඵල නිපදවති.—1 යොහන් 3:10-12; යෙසායා 2:2-4; ගලාති 5:22, 23.

හැසිරීමේ හා ඉගැන්වීම්වල නිර්මලත්වයට දෙවියන්වහන්සේ ආශීර්වාද කරනසේක

12. (අ) අටවන අවශ්‍යතාව කුමක්ද, නමුත් කුමන ආගමික බෙදීම් ඔබට සඳහන් කළ හැකිද? (ආ) පාවුල් මෙම අටවන අවශ්‍යතාව හුවා දැක්වූයේ කෙසේද?

¹² ක්‍රිස්තියානි එක්සත්කම සැබෑ නමස්කාරයේ අටවන අවශ්‍යතාව වේ. කෙසේවුවද, ක්‍රිස්තියානි ලෝකයේ භේදකාරි ආගම් මෙම අවශ්‍යතාවට දායක වී නැත. ක්‍රිස්තියානියයි කියා සිටින බොහෝ ප්‍රධාන නිකායන් විවිධාකාර ලබ්ධිවලට බෙදී ඇති අතර, එහි ප්‍රතිඵලය වියවුල්භාවය වේ. උදාහරණයක් වශයෙන්, එක්සත් ජනපදයේ, උතුරු බැප්ටිස්ට් බැතිමතුන් (අ.එ.ජ.හි අමෙරිකානු බැප්ටිස්ට් පල්ලි) හා දකුණු බැප්ටිස්ට් බැතිමතුන් (දකුණු බැප්ටිස්ට් සම්මතය), මෙන්ම භේද හේතුවෙන් මතු වී ඇති වෙනත් බැප්ටිස්ට් කණ්ඩායම් ගණනාව අතර බෙදී පවතින බැප්ටිස්ට් ආගම සලකා බලන්න. (වර්ල්ඩ් ක්‍රිස්ටියන් එන්සයික්ලොපීඩියා, 714වන පිටුව.) ධර්මය හෝ පල්ලියේ පරිපාලනය සම්බන්ධ වෙනස්කම් නිසා බොහෝ භේද හටගෙන තිබේ (නිදසුනක් ලෙස, ප්‍රෙස්බිටේරියන්, එපිස්කෝපලියන්, කෝන්ග්‍රිගේෂනල්). ක්‍රිස්තියානි ලෝකයේ බෙදීම් ක්‍රිස්තියානි ලෝකයෙන් පිටත—එනම් බෞද්ධ, ඉස්ලාම් හෝ හින්දු ආදී ආගම් හා සමාන වේ. මුල් ක්‍රිස්තියානීන්ට ප්‍රේරිත පාවුල් අවවාද කළේ කුමක්ද? “ඉතින්, සහෝදරයෙනි, නුඹලා සියල්ලන් විසින් එකම දේ කථාකරන හැටියටද, නුඹලා අතරෙහි භේද නැතුව එක සිතින් හා එක කල්පනාවෙන් එකඟව සම්පූර්ණව සිටින හැටියටද අපගේ ස්වාමීවූ යේසුස් ක්‍රිස්තුස්වහන්සේගේ නාමයෙන් නුඹලාගෙන් ඉල්ලමි.”—1 කොරින්ති 1:10; 2 කොරින්ති 13:11.

13, 14. (අ)ශුද්ධව සිටීම යන්නෙන් අදහස් කරන්නේ කුමක්ද? (ආ) සැබෑ නමස්කාරය පවිත්‍රව තබනු ලබන්නේ කෙසේද?

¹³ දෙවියන්වහන්සේගේ අනුමැතිය ලත් ආගමකට තිබිය යුතු නවවන අවශ්‍යතාව කුමක්ද? ලෙවී කථාව 11:45හි බයිබල් ප්‍රතිපත්තියක් මෙසේ ප්‍රකාශ කර තිබේ: “මම ශුද්ධ බැවින් නුඹලාත් ශුද්ධව සිටපල්ලා.” ප්‍රේරිත පේතෘස් මෙම අවශ්‍යතාව යළි සඳහන් කරමින් මෙසේ ලීවේය: “නුඹලා කැඳවූ තැනැන්වහන්සේ ශුද්ධව සිටින්නාක්මෙන් නුඹලාත් නුඹලාගේ මුළු හැසිරීමේදී ශුද්ධව සිටපල්ලා.”—1 පේතෘස් 1:15.

¹⁴ ශුද්ධව සිටීමට තිබෙන මෙම අවශ්‍යතාවෙන් ඇඟවෙන්නේ කුමක්ද? යෙහෝවඃවහන්සේගේ නමස්කාරකයන් ආත්මිකව හා සදාචාරමය ලෙස පවිත්‍රව සිටිය යුතු බවය. (2 පේතෘස් 3:14) තම හැසිරීම මගින් ක්‍රිස්තුස්වහන්සේගේ මිදීමේ මිල පූජාවට අවමන් කරන්නන් වන පසුතැවිලි නොවන, හිතා මතාම පව්කරන්නන්ට ඉඩක් නොමැත. (හෙබ්‍රෙව් 6:4-6) ක්‍රිස්තියානි සභාව පවිත්‍රව හා ශුද්ධව තබාගැනීමට යෙහෝවඃවහන්සේ ඉල්ලා සිටිනසේක. එය ඉටු කරනු ලබන්නේ කෙසේද? තරමක් දුරට එය සිදු වන්නේ, සභාව කැළැල් කරන අය සභා ඇසුරෙන් කපාහැරීමේ විනිශ්චයක ක්‍රියාමාර්ගය මගිනි.—1 කොරින්ති 5: 9-13.

15, 16. බොහෝ ක්‍රිස්තියානීන් ඔවුන්ගේ ජීවිතයන්හි කර තිබෙන්නේ කුමන වෙනස් කිරීම්ද?

¹⁵ ක්‍රිස්තියානි සත්‍යය දැනගැනීමට පෙර, බොහෝදෙනෙක් අනාචාර, සුඛපරමවාදී, ආත්මාර්ථකාමී ජීවිත ගත කළහ. එහෙත් ක්‍රිස්තුස්වහන්සේ පිළිබඳ වචනය ඔවුන්ව වෙනස් කළ අතර, ඔවුන් තම පාපවලට සමාව ලබාගෙන ඇත. පාවුල් ප්‍රබල ලෙස ඒ ගැන ප්‍රකාශ කරමින් මෙසේ ලීවේය: “අධර්මිෂ්ඨයන් දෙවියන්වහන්සේගේ රාජ්‍යය උරුමකරගන්නේ නැති බව නුඹලා දන්නේ නැද්ද? නොරැවටෙල්ලා. වේශ්‍යාකම්කරන්නෝවත් රූපවඳින්නෝවත් කාමමිථ්‍යාචාරිකයෝවත් ස්ත්‍රීන් ලෙස හැසිරෙන්නෝවත් පිරිමින් සමඟ අනාචාරකරන්නෝවත්, සොරුවත් ලෝභයෝවත් බේබද්දෝවත් නින්දා කරන්නෝවත් කොල්ලකන්නෝවත් දෙවියන්වහන්සේගේ රාජ්‍යය උරුමකර නොගන්නෝය. නුඹලාගෙන් සමහරු එබන්දෝව සිටියෝය. නුමුත් . . . නුඹලා සෝදනු ලැබුවහුය.”—1 කොරින්ති 6:9-11.

¹⁶ ශුද්ධ ලියවිල්ලට පටහැනි තම හැසිරීම සම්බන්ධව පසුතැවී, හැරී, ක්‍රිස්තුස්වහන්සේගේ හා උන්වහන්සේගේ ඉගැන්වීම්වල සැබෑ අනුගාමිකයන් වන අයව යෙහෝවඃවහන්සේ අනුමත කරන බවට ප්‍රත්‍යක්ෂය. සවන් දෙන සියල්ලන්ට ජීවනයේ පණිවුඩය පිරිනමන සේවයක අඛණ්ඩව නිරතවීම වැනි ආකාර බොහොමයකින්, ඔවුහු සැබවින්ම තමන්ට මෙන්ම තම අසල්වැසියන්ට ප්‍රේම කරති.—2 තිමෝති 4:5.

“සැබෑවද නුඹලා නිදහස්කරන්නේය”

17. සැබෑ නමස්කාරය සඳහා දහවන අවශ්‍යතාව කුමක්ද? උදාහරණ දෙන්න.

¹⁷ ආත්මයෙන් හා සැබෑකමෙන් තමන්වහන්සේට නමස්කාර කරන අය සඳහා යෙහෝවඃවහන්සේ නියම කරන දහවන අවශ්‍යතාවක් තිබේ—එනම් නිර්මල ඉගැන්වීමය. (යොහන් 4:23, 24) යේසුස්වහන්සේ සිය අනුගාමිකයන්ට මෙසේ පැවසූසේක: “නුඹලා සැබෑව දැනගන්නවා ඇත, සැබෑවද නුඹලා නිදහස්කරන්නේය.” (යොහන් 8:32) අමරණීය ආත්මය, නිරය හා ශුද්ධගිනි ස්ථානය වැනි දෙවියන්වහන්සේට අගෞරව කරන ධර්මවලින් බයිබලයේ සැබෑව අපව නිදහස් කරයි. (දේශනාකාරයා 9:5, 6, 10; එසකියෙල් 18:4, 20) ක්‍රිස්තියානි ලෝකයේ “අතිශුද්ධ ත්‍රිත්වය” පිළිබඳ බබිලෝනීය අභිරහසෙන් එය අපව නිදහස් කරවයි. (ද්විතීය කථාව 4:35; 6:4; 1 කොරින්ති 15:27, 28) බයිබල් සත්‍යයට කීකරුවීමේ ප්‍රතිඵලයක් වශයෙන් ප්‍රේමනීය, සැලකිලිමත්, කරුණාවන්ත සහ දයාවන්ත ජනයා ඇති වේ. ටොමාස් ඩි ටොර්කමාඩා වැනි පළිගන්නාසුලු, නොඉවසිලිවන්ත අධර්ම මර්දකයන් හෝ කුරුස යුද්ධවලට අනුබල දුන් පාප්වරුන් වැනි වෛරයෙන් පිරි යුද්ධයට උසිගන්වන්නන් සැබෑ ක්‍රිස්තු ධර්මය මගින් ඇති කර නැත. එහෙත්, මහා බබිලෝනිය මගින් අඩුම තරමින් නිම්රොද්ගේ කාලයේ සිට මේ වන තෙක් ඉතිහාසය පුරා මෙයාකාර ඵල බිහි කර ඇත.—උත්පත්ති 10:8, 9.

කැපීපෙනෙන නාමයක්

18. (අ) සැබෑ නමස්කාරය සඳහා වූ අවශ්‍යතා දහයට එකඟව ක්‍රියා කරමින් සිටින්නේ කවරෙක්ද, එමෙන්ම කෙසේද? (ආ) ඉදිරියේ තිබෙන ආශීර්වාද උරුම කරගැනීමට අප පෞද්ගලිකව කුමක් කළ යුතුද?

¹⁸ අදදින සැබෑ නමස්කාරය සම්බන්ධයෙන් මෙම අවශ්‍යතා දහය ඇත්තෙන්ම සපුරාලන්නේ කවරෙක්ද? තම අඛණ්ඩතාව හා සාමකාමීබව රක්ෂා කරන අය වශයෙන් වෙනත් අය විසින් පිළිගන්නා මෙන්ම ප්‍රසිද්ධ අය කවරහුද? යෙහෝවඃවහන්සේගේ සාක්ෂිකරුවන් “ලෝකයට අයිති නොවන” බවට ලොව පුරා ප්‍රසිද්ධය. (යොහන් 15:19, න. අ.; යොහ 17:14, 16; 18:36) යේසුස් ක්‍රිස්තුස්වහන්සේ සිය පියාණන්ට විශ්වාසවන්ත සාක්ෂිකරුවෙකුව සිටියාක් මෙන්ම, යෙහෝවඃවහන්සේගේ නාමය දැරීමට හා උන්වහන්සේගේ සාක්ෂිකරුවන් වීමට ස්වකීය ජනයා ගෞරව ලැබ සිටිති. අප එම ශුද්ධ නාමය දරන්නේ, එය නියෝජනය කරන දෙයට එකඟව ජීවත්වීමට අපට ඇති වගකීම පිළිබඳව අවබෝධයෙන් යුතුවය. තවද, උන්වහන්සේගේ සාක්ෂිකරුවන් වශයෙන්, අප ඉදිරියේ පවතින්නේ මොනතරම් මහිමාන්විත අපේක්ෂාවක්ද! එනම් මිහිපිට ප්‍රකෘතිමත් කළ පාරාදීසයක විශ්වලෝක පරමාධිපතිට නමස්කාර කරමින්, කීකරු, එක්සත් මිනිස් පවුලක කොටසක් වීමේ අපේක්ෂාවය. එවන් ආශීර්වාද ලබන්ට නම්, අපි දිගටම සැබෑ නමස්කාරය සමඟ පැහැදිලිව අපව හඳුන්වා දෙමින් හා ආඩම්බරයෙන් යෙහෝවඃවහන්සේගේ සාක්ෂිකරුවන් යන නම දරමින් සිටිමු, මන්දයත් ‘උන්වහන්සේගේ විනිශ්චයන් සැබෑ හා ධර්මිෂ්ඨ’ බැවිනි!—එළිදරව් 19:2; යෙසායා 43:10-12; එසකියෙල් 3:11.

[පාදසටහන]

ඔබ කෙසේ පිළිතුරු දෙන්නෙහිද?

◻ යෙහෝවඃවහන්සේගේ සේවකයන් මහා බබිලෝනියේ විනාශය සලකන්නේ කෙසේද?

◻ සැබෑ නමස්කාරය සඳහා ප්‍රධාන අවශ්‍යතා මොනවාද?

◻ සත්‍යය ඔබව නිදහස් කරන්නේ කෙසේද?

◻ යෙහෝවඃවහන්සේගේ සාක්ෂිකරුවන් වශයෙන් අපට තිබෙන විශේෂිත ගෞරවය කුමක්ද?

[17වන පිටුවේ පින්තූර]

යෙහෝවඃවහන්සේගේ සාක්ෂිකරුවෝ දේවරාජ්‍යය පිළිබඳ ශුභාරංචිය දේශනා කරමින් හා උගන්වමින් සිටිති

[18වන පිටුවේ පින්තූරය]

සැබෑ ක්‍රිස්තියානීන් ලෞකික දේශපාලනය හා යුද්ධ සම්බන්ධයෙන් සැමවිටම මධ්‍යස්ථව සිට ඇත

[හිමිකම් විස්තර]

අහස් යානය: Ministry of Defense, London අනුග්‍රහය ඇතුවයි