අපි ඇදහිල්ල ඇත්තෝ වන්නෙමු

පෙරූහි සානුවල රාජ්‍යය ගැන දේශනා කිරීම

නිසසල නිල්වන් ඇන්ඩීස් කඳුවැටිය විහිදී තිබෙන්නේ සුන්දර රටාවකටය. එහි නැඟෙනහිර හා බටහිර මායිම්වලට මැදින් “සානුව” හෙවත් “උස් මිටියාවත” යන අදහස ඇති ඇල්ටිප්ලෑනෝ නමින් හැඳින්වෙන චමත්කාරජනක දේශයක් දක්නට ඇත. එමෙන්ම පෙරූ හා බොලිවියාව යන රටවල් හමු වන දේශ සීමා මායිමද එහි පිහිටා ඇත. එම දේශයෙන් වැඩිපුර කොටසක් අයත් වන්නේ බොලිවියාවටය.

සාමාන්‍යයෙන් මුහුදු මට්ටමේ සිට මීටර 3,700ක් පමණ උසින් පිහිටා ඇති ඇල්ටිප්ලෑනෝවලට, පළල කිලෝමීටර 100ක හා දිග කිලෝමීටර 1,000ක බිම් ප්‍රමාණයක් අයත්ය. පෙරූහි වෙරළබඩ ප්‍රදේශයක් වන ලීමා නගරය සිසාරා ඔබ ගුවනින් පියාසර කළොත්, සුදෝ සුදුවන් හිම සළු පොරවාගත් එල් මිස්ටි ගිනි කන්ද ඔබේ නෙතට රසඳුනක් මෙන් විය හැකියි. අහසේ වලා පටලවල ගෑවී නොගෑවී තිබෙන මෙම කන්දේ උස මුහුදු මට්ටමේ සිට මීටර 5,822කි. මීටර් 6,000ක් ඉක්මවා ගොස් තිබෙන නෙවාඩෝ ඇම්පාටෝ හා නෙවාඩෝ කොරෝපියුනා කඳු ශිඛරද ඒ අතරින් නෙත ගැටේ. මෙම ශිඛරද සම්පූර්ණයෙන්ම හිමවලින් වැසී ඇත. දකුණු පෙරූහි ඇල්ටිප්ලෑනෝවලට පැමිණෙන විට විගස නෙත ගැටෙන්නේ විශාල සානු ප්‍රදේශයකි.

පෙරූවියානු ඇල්ටිප්ලෑනෝවල අගනුවර පූනෝ වන අතර එහි වයඹ දිගින් පිහිටා ඇත්තේ නිහඬ නිසසල ටිටිකාකා විලය. එය යාත්‍රා කළ හැකි, ලොවේ උස්ම බිමේ පිහිටි විලය. මෙම පළාත මුහුදු මට්ටමේ සිට මීටර 3000ක් පමණ උසකින් පිහිටි නිසා එහි පැමිණෙන විදේශිකයන්ට හුස්ම ගැනීමේ අපහසුතාවලට මුහුණ දීමට සිදු වේ. එයට හේතුව එම පරිසරයේ අඩු වායු පීඩනයක් තිබීමය. එමනිසා ඔවුනට එම පීඩනයට හුරුවීම සඳහා ටික වේලාවක් ගත වේ. කෙචුවා හා අයිමාරා ඉන්දියානුවන් පදිංචිව සිටින්නේ ටිටිකාකා විල ආශ්‍රිතවය. රත් නිල් හා කොළ වර්ණවලින් යුත් ඇඳුම් ඔවුන්ගේ ගත අලංකාරවත් කරන අතර, ඔවුන් චක්රාස්වල හෙවත් කුඩා ගොවිපොළවල වැඩ කරන ආකාරය දැකගත හැකිය. පෙරූවල ප්‍රධාන භාෂාව ස්පාඤ්ඤ භාෂාව වන අතර, ඇල්ටිප්ලෑනෝවල කෙචුවා හා අයිමාරා භාෂා කතා කරන අයද සිටී.

දේශනා කටයුතු ව්‍යාප්ත කිරීම

කෙචුවා හා අයිමාරා භාෂා කතා කරන, දුක් මහන්සි වී වැඩ කරන අහිංසක මිනිසුන් බොහෝදෙනෙකුට මෑතකදී බයිබල් සත්‍යය පිළිබඳව නිවැරදි දැනුමක් ලැබී ඇත. දේශනා කටයුතුවලට ඉතා ජ්වලිතව සහභාගි වන පුරෝගාමීන්ට යෙහෝවා නොමසුරු ලෙස ආශීර්වාද කිරීමේ ප්‍රතිඵලයකි මෙය.

නිදසුනක් සලකා බලන්න. ටිටිකාකා විලේ සිට කිලෝමීටර 50ක් පමණ ඈතින් පිහිටි පියුටීනා නගරයට යෑම සඳහා විශේෂ පුරෝගාමීන් දෙදෙනෙකු වන හොසේට හා සිල්වියාට පැවරුමක් ලැබිණ. මාස දෙකක් තුළදී සිල්වියා ගෘහ බයිබල් පාඩම් 16ක්ද හොසේ 14ක්ද ආරම්භ කළහ. මාස 6ක් තුළදී සභාවේ ප්‍රචාරකයන්ගේ සංඛ්‍යාව 23 සිට 41 දක්වා වැඩි විය. මේ අතරතුරේදී රැස්වීම්වලට සහභාගි වන අයගේ සංඛ්‍යාව 48 සිට 132 දක්වා ශීඝ්‍ර වර්ධනයක් පෙන්නුම් කර ඇත.

“හුදෙකලා ප්‍රදේශවල මුලින්ම සභා රැස්වීම් පවත්වද්දී අපි ප්‍රායෝගික අත්හදා බැලීමක් කළා” යනුවෙන් හොසේ පවසයි. “අපි මුලින්ම පැවැත්තුවේ ප්‍රසිද්ධ රැස්වීම හා සභා පොත් පාඩමයි. මේ නිසා අලුතින් උනන්දුව දක්වන අයට රැස්වීම්වලට එන එක අමාරු වුණේ නෑ.”

පියුටීනා නගරයේ සිට කිලෝමීටර 20ක් පමණ දුරින් පිහිටි පිටිසර ගමක් වූ මුන්‍යානිවලට ප්‍රථමයෙන් ශුභාරංචිය ගෙන ගියේ එකම පවුලේ සහෝදරියන් දෙදෙනෙකි. ඔවුන්ගෙන් එක් තැනැත්තියක් පුරෝගාමියක් වූවාය. ඔවුන් දෙදෙනා එම ගමේ සිටි එක්තරා අන්ධ මනුෂ්‍යයෙකු වූ ල්‍යූසියෝa සමඟ බයිබල් පාඩමක් ආරම්භ කළෝය. ල්‍යූසියෝ ඔහුගේ බාල සහෝදරයා වන මිගෙල්ටද ආරාධනා කළේය. මිගෙල් ගිහි ජීවිතයක් ගත කළ කතෝලික මිෂනාරිවරයෙකු මෙන්ම ළඟපාත ප්‍රදේශයක මුලාදෑනියෙකුද විය. සෑම සතියකම මුන්‍යානිවලට යන්නේ ඇයි කියා දිනක් මිගෙල්ගේ මිතුරෙකු ඔහුගෙන් ඇසූ විට ඔහු කියා සිටියේ, යෙහෝවා හා ඔහුගේ වචනය ගැන ඉගෙනගැනීම සඳහා එහි යන බවයි. එවිට ඔහුගේ මිතුරා තවත් ප්‍රශ්නයක් නැඟුවේය. “ඇයි අපට මෙතැනම බයිබලය පාඩම් කරන්න බැරිද?” වැඩි කල් යන්න කලින්, මිගෙල් ජීවත් වූ ප්‍රදේශයේ සිටි මිනිසුන් දැක්වූ උනන්දුව නිසා එම ප්‍රදේශයේ රැස්වීම් පැවැත්වීමට සාක්ෂිකරුවෝ තීරණය කළහ.

මිගෙල් ඉගෙනගත් දේවල් අන් අය සමඟද බෙදාගත්තේය. ගිහි ජීවිතයක් ගත කරන කතෝලික මිෂනාරිවරයෙක් හා නියෝජ්‍ය ආණ්ඩුකාරයෙක් වශයෙන් ඔහු දැරූ නිලතලවලට සිදු වූයේ කුමක්ද? ඔහු එම පළාතේ ශාලාවක රැස්වීමක් අමතමින් සිටියදී ඔහු කතෝලික මිෂනාරි ධුරයෙන් ඉල්ලා අස් වන බව ප්‍රසිද්ධියේ නිවේදනය කළේය. එසේ නම් ඔහු වෙනුවට මෙම ධුරයට පත් කළ යුත්තේ කාවද? රැස්වීමට පැමිණ සිටි පිරිස අතරින් එක් ස්ත්‍රියක් මෙසේ පැවසුවාය. “අපි සත්‍යය ඉගෙනගන්න නිසා දැන් අපිට මිෂනාරිවරයෙක් අවශ්‍යමද?” ඇත්තටම ඇය කතා කරමින් සිටියේ යෙහෝවාගේ සාක්ෂිකරුවන් උගන්වමින් සිටි දේවල් ගැනය. මේ අතර තවත් පුද්ගලයෙක්ද මෙම කතාවට සම්බන්ධ විය. “ඔබගේ ඉල්ලා අස්වීම අපට පිළිගන්න බෑ. ඔබ අස් වෙනවා නම් අපි හැමෝම ඉල්ලා අස් වෙන්න ඕනේ.” ඉන්පසු, “පැමිණ සිටි සියල්ලෝම අපි හැමෝම ඉල්ලා අස් වෙනවා” යයි එක් හඬින් කියා සිටියහ.

ටික වේලාවකට පසු රැස්ව සිටි පිරිස පිළිම හා කුරුස ගැන සාකච්ඡා කිරීමට පටන්ගත්හ. මේ අතරතුර එක් මනුෂ්‍යයෙක් පැමිණ සිටි සියල්ලන්ගෙන් ද්විතීය කථාව 7:25 කියවන මෙන් ඉල්ලා සිටියේය. එහි මෙසේ පවසා තිබේ. “ඔවුන්ගේ දෙවිවරුන්ගේ රූප ගින්නෙන් දවාදමන්න. ඒවායේ තිබෙන රන් රිදීවලට ආශාවී ඒවා නොගන්න, එසේ කළොත් නුඹ මලපතකට අසුවන්නේය. මක්නිසාද ඒවා නුඹේ දෙවිවූ [යෙහෝවාට] පිළිකුලක්ය.”

සියලුම පිළිම ගින්නෙන් පුලුස්සා විනාශ කර දමනවාට කැමති අය තමන්ගේ අත් ඉහළට ඔසවන මෙන් ඔහුන්ගෙන් ඉල්ලා සිටියේය. එවිට සියල්ලෝම එකවර අත් ඉහළට ඔසවා ඊට කැමැත්ත පළ කළහ. (ක්‍රියා 19:19, 20) දැන් එම පළාතේ පවුල් 25න් 23ක්ම බයිබලය පාඩම් කරමින් සිටී. බව්තීස්ම නොලත් ප්‍රචාරකයන් ලෙස පුද්ගලයන් දෙදෙනෙකු සේවය කරන අතර, විවාහය යෙහෝවා ඉදිරියේ පිරිසිදුව තිබීමේ අවශ්‍යතාව වටහාගෙන ඇති නිසා යුවළයන් 5ක් ඒ අයගේ විවාහය ලියාපදිංචි කිරීමට සැලසුම් යොදා ඇත.—තීතස් 3:1; හෙබ්‍රෙව් 13:4.

කැසට් පටි මගින් ඉගැන්වීම

ඇල්ටිප්ලෑනෝවල කියවීමට නොහැකි බොහෝදෙනෙක් සිටිති. ඒ අය සමඟ ගෘහ බයිබල් පාඩම් පැවැත්වීම සඳහා විශාල රුකුලක් වූයේ දේශීය භාෂාවෙන් තිබෙන වොච් ටවර් කැසට් හා වීඩියෝ පටිය. විශේෂ පුරෝගාමියක් වන ඩෝරා දෙවිට අපෙන් ඕනෑ කරන්නේ කුමක්ද? යන විවරණිකාවෙන් බයිබල් පාඩම් පැවැත්වූ ආකාරය සලකා බලමු. පළමුවෙන්ම ඇය කැසට් පටියෙන් ඡේදයක් අසන්න සලස්වන අතර පසුව ඇය ශිෂ්‍යයාගෙන් එම ඡේදයට අදාළ ප්‍රශ්නය අසයි.

ඕනෑ කරන්නේ විවරණිකාවෙන් කොටසක් කෙචුවා භාෂාවෙන් නිතිපතා දේශීය ගුවන් විදුලිය ඔස්සේ ප්‍රචාරය කරනු ලබයි. එලෙසම පිබිදෙව්! සඟරාවෙන් කොටසක්ද ස්පාඤ්ඤ භාෂාවෙන් ප්‍රචාරය කරයි. මෙනිසා ජනතාවගෙන් බහුතරයකට රාජ්‍යයේ ශුභාරංචිය දැනගැනීමට ලැබෙන අතර යෙහෝවාගේ සාක්ෂිකරුවන් තම නිවසට පැමිණෙන විට වැඩි විස්තර දැනගැනීමට අවශ්‍ය අය ඔවුන්ට නැවත පැමිණෙන ලෙස ආරාධනා කරති.

සාමාන්‍යයෙන් ලෝකයාගේ ඇස නොගැටෙන නමුත් දෙවිගේ ඇස ගැටුණු ප්‍රදේශයකි, ඇල්ටිප්ලෑනෝ. මනුෂ්‍යවර්ගයා උදෙසා යෙහෝවා දක්වන ප්‍රේමයට ඇත්තෙන්ම ස්තුති කළ යුතුය. මන්ද ඒ හේතුවෙන් ඇන්ඩීස්හි උස් මිටියාවතක් වන ඇල්ටිප්ලෑනෝවල සිටින බොහෝදෙනෙකු යෙහෝවාගේ රාජකීය තේජසින් පිරි සැබෑ නමස්කාරයේ ගෘහයට ප්‍රශංසාව ගෙන දෙමින් එහි කොටස්කරුවන් බවට පත් වී තිබෙන නිසාය.—හග්ගයි 2:7.

[පාදසටහන]