දෙවියන්ටත් දුක හිතෙනවා - දුකක් නොදී දෙවියන්ව සතුටු කරන්න අපිට පුළුවන්

ඔයාට ලොකු දුකක් දැනුණ දවසක් මතකද?—a සමහරවිට ඔයාට දුක හිතෙන්න ඇත්තේ කවුරු හරි ඔයා ගැන බොරුවක් කිව්ව නිසා වෙන්න ඇති. එහෙම දෙයක් වුණාම ගොඩක් දුක හිතෙනවා තමයි. කවුරු හරි දෙවියන් ගැන බොරු කියද්දි දෙවියන්ටත් දුක හිතෙනවා. අපි දැන් ඒ ගැන ටිකක් බලමු. එතකොට ඔයාට පුළුවන් දෙවියන්ට දුකක් දෙන්නේ නැතුව ඔහුව සතුටු කරන දේවල් කරන්න.

අපි දෙවියන්ට අකීකරු වෙද්දී දෙවිට ලොකු දුකක් දැනෙනවා. සමහර අය දෙවිගේ ‘හිත රිදෙව්වා’ කියලත් ඔහුගේ ‘හිතට වේදනා ඇති කළා’ කියලත් බයිබලේ කියනවා.

දෙවියන් මුලින්ම නිර්මාණය කරපු මිනිසුන් දෙන්නා දෙවිගේ හිතට ලොකු දුකක් දුන්නා. ඒ දෙන්නව දෙවියන් පදිංචි කළේ ‘ඒදන් උයනේ.’ ඒක හරිම ලස්සන තැනක්. ඒ දෙන්නා කවුද කියලා ඔයා දන්නවද?— හරියට හරි. දෙවියන් මුලින්ම ආදම්වත් ඊටපස්සේ ඒවවත් නිර්මාණය කළා.

ඒදන් උයන බලාගන්න කියලත් දරුවන්ව බිහි කරලා එයාලා එක්ක හැමදාටම ඒදන් උයනේ ජීවත් වෙන්න කියලත් දෙවියන් ඒ දෙන්නට කිව්වා. හැබැයි දරුවන් ඉපදෙන්න ඉස්සෙල්ලා ආදම් හා ඒව ලොකු වරදක් කළා. ඒ වරද මොකක්ද කියලා ඔයා දන්නවද?— ඒ දෙන්නා දෙවියන්ට අකීකරු වුණා. එහෙම කරන්න එයාලව පෙලඹෙව්වේ නරක දේවදූතයෙක්.

සර්පයෙක් කතා කරනවා වගේ පෙන්නලා ඒ දේවදූතයා ඒවව රැවැට්ටුවා. සර්පයා කිව්වේ ‘දෙවිට සමාන වෙන්න’ ඒවට පුළුවන් කියලයි. සර්පයා කියපු දේට ආස වුණ නිසා ඒව සර්පයා කියපු දේ කළා. ඔයා දන්නවද ඒව මොකක්ද කළේ කියලා?—

යෙහෝවා දෙවි ඒවව නිර්මාණය කරන්න ඉස්සෙල්ලා ආදම්ට මෙහෙම කියලා තිබුණා. “ඔබට උයනේ සියලු ගස්වලින් ඕනෑ තරම් කන්න පුළුවන. නමුත් ‘හොඳ හා නරක හඳුනාගැනීම’ යන නමින් හැඳින්වෙන ගසෙන් ඔබ නොකෑ යුතුය. මන්ද එයින් කෑ දවසේදීම ඔබ අනිවාර්යයෙන්ම මැරෙන්නෙහිය.” හැබැයි ඒව ඒ ගහෙන් ගෙඩි කඩාගෙන කෑවා.

දෙවියන් ආදම්ට දීලා තිබුණු ඒ නීතිය ගැන ඒව දැනගෙන හිටියා. හැබැයි ඒ ගහ දිහා බලාගෙන ඉද්දී ‘ගහේ ගෙඩි කන්න හොඳයි කියලත් ඒ ගෙඩි ඇහැට ප්‍රියයි කියලත්’ ඒවට හිතුණා. ඒ ගෙඩිවලට ලොකු ආසාවක් ඇති වුණු නිසා එයා ඒවා කඩාගෙන කෑවා. ඊටපස්සේ එයා ආදම්ටත් ඒ ගෙඩි දුන්නා. එයාත් ඒ ගෙඩි කෑවා. ඇයි ආදම් එහෙම කළේ?— ඒවව සතුටු කරන්න ඕන නිසයි. යෙහෝවා දෙවිට වඩා ආදම් ඒවට ආදරේ කළා. දෙවියන්ව සතුටු කරනවට වඩා ඒවව සතුටු කරන්න ආදම්ට ඕන වුණේ ඒ නිසයි. හැබැයි මතක තියාගන්න වෙන කාටත් වඩා අපි වැඩියෙන්ම කීකරු වෙන්න ඕන යෙහෝවා දෙවිටයි.

සර්පයෙක් කතා කරනවා කියලා ඒව දැක්කත් ඇත්තටම එයාට කතා කළේ කවුද?— ඒ තමයි දෙවිගෙන් ඈත් වුණු දේවදූතයා. එයා සාතන් කියන යක්ෂයායි. එයාට “මුල් සර්පයා” කියලත් කියනවා. රූකඩ නටවන අය රූකඩේට කටහඬ දෙනවා වගේ ඒවට කතා කරපු සර්පයාට කටහඬ දුන්නේ සාතන්.

යෙහෝවා දෙවිව සතුටු කරන්න පුළුවන් කොහොමද කියලා දැන් ඔයාට තේරුණාද?— ඔයා හැම වෙලේම යෙහෝවා දෙවිට කීකරු වුණොත් දෙවියන්ව සතුටු කරන්න ඔයාට පුළුවන්. සාතන් යෙහෝවා දෙවිට අපහාස කරලා කියන්නේ ඔයාවත් එයාගේ පැත්තට ගන්න පුළුවන් කියලයි. ඒ නිසයි යෙහෝවා දෙවි අපිට මෙහෙම කියලා තියෙන්නේ. “මාගේ පුත්‍රය, [දියණිය] මට නින්දා කරන්නාට මා උත්තර දෙන පිණිස ඔබ ප්‍රඥාවන්තව ක්‍රියා කර මාගේ සිත සතුටු කරන්න.” යෙහෝවා දෙවිට කීකරු වෙලා දිගටම දෙවිට නමස්කාර කළොත් දෙවියන් ඔයා ගැන හුඟක් සතුටු වෙයි. හැමදාම ඒ දේ කරන්න ඔයා උත්සාහ කරනවද?—