තොරතුරු වෙනස් කරන්න ගත් උත්සාහයන් අසාර්ථකයි

අවදානම: දිරාපත් වෙන එක, විරුද්ධවාදීකම් වගේ මොන බාධා මැද වුණත් බයිබලය විනාශ වුණේ නෑ. ඒත් සමහර පරිවර්තකයන් සහ පිටපත්කරුවන් බයිබලයේ තියෙන අදහස් වෙනස් කරන්න උත්සාහ කළා. බයිබලයට එකඟව තමන්ගේ අදහස් වෙනස් කරගන්නවා වෙනුවට එයාලා උත්සාහ කළේ එයාලගේ අදහස්වලට අනුව බයිබලය වෙනස් කරන්නයි.

• නමස්කාර කරන තැන: ක්‍රි.පූ. 4වෙනි සහ 2වෙනි සියවස අතර කාලයේදී සමාරිය පංච පුස්තකය ලියපු අය නික්මයාම 20:17ට පස්සේ “ගෙරිසීම් කන්දේ පූජාසනයක් ගොඩනඟන්න” කියන අදහස එකතු කළා. එයාලට ඕන වුණේ ගෙරිසීම් කන්දේ පූජාසනයක් හදන එක බයිබලයට එකඟයි කියලා පෙන්වන්නයි.

• ත්‍රිත්වය: ත්‍රිත්වය විශ්වාස කරන ලේඛකයෙක් බයිබලය ලියලා අවුරුදු 300ක් යන්නත් කලින් 1 යොහන් 5:7 තියෙන අදහසට මේ අදහස එකතු කළා. “ස්වර්ගයේ ඉන්න පියාණන්, වචනය සහ ශුද්ධාත්මය එක්කෙනෙක්.” ඒත් බයිබලයේ මුල් පිටපත්වල එහෙම තිබුණේ නැහැ. ‘හයවෙනි සියවසේ ඉඳලා පිටපත් කරපු “ඕල්ඩ් ලතින්,” “ලතින් වල්ගේට්” වගේ අත්පිටපත්වල වැඩි වැඩියෙන් ඒ වරද දකින්න ලැබුණා’ කියලා බයිබල් විශාරදයෙක් වන බෲස් මෙට්ස්ග කියනවා.

• දෙවියන්ගේ නම: යුදෙව් ආගමේ මිථ්‍යා මතයක් විශ්වාස කරපු හුඟක් පරිවර්තකයන් දෙවියන්ගේ නම බයිබලයෙන් අයින් කරලා ඒ වෙනුවට “දෙවියන්වහන්සේ,” “ස්වාමීන්වහන්සේ” වගේ යෙදුම් පාවිච්චි කළා. දෙවියන්ව හඳුන්වන්න විතරක් නෙමෙයි මිනිසුන්ව, දෙවියන් පිළිගන්නේ නැති නමස්කාරය සඳහා යොදාගන්නා දේවල් වගේම යක්ෂයාව හඳුන්වන්නත් බයිබලයේ ඒ යෙදුම් පාවිච්චි කරලා තියෙනවා.—යොහන් 10:34, 35; 1 කොරින්ති 8:5, 6; 2 කොරින්ති 4:4.a

බයිබලය ආරක්ෂා වුණේ කොහොමද? බයිබලය පිටපත් කරපු සමහරු ඒ ගැන කිසිම සැලකිල්ලක් දැක්වුවේ නැහැ. තවත් අය වංකයි. ඒත් පරෙස්සමින් තොරතුරු පිටපත් කරපු දක්ෂ පිටපත්කරුවන් හුඟදෙනෙකුත් හිටියා. ඒ අතරේ හිටිය මැසොරෙට්වරුන් ක්‍රි.ව. 6වෙනි සියවසේ ඉඳන් 10වෙනි සියවස දක්වා කාලය තුළ බයිබලයේ හෙබ්‍රෙව් ලියවිල්ල පිටපත් කළා. ඒක හඳුන්වන්නේ මැසරෙටික් ලියවිල්ල කියලයි. පිටපත් කළාට පස්සේ වරදක් වෙලා තියෙනවද කියලා බලන්න එයාලා වචනයි අකුරුයි ගණන් කරලා බැලුවා. පිටපත් කරන්න පාවිච්චි කරපු ලියවිලිවල වැරදි දෙයක් තියෙනවා කියලා දැනුණොත් එයාලගේ පිටපත්වල ඒ ගැන සඳහන් කළා. බයිබලයේ අදහස් වෙනස් කරන්න එයාලා පොඩ්ඩක්වත් කැමති වුණේ නැහැ. “බයිබලයේ අදහස් වෙනස් කරන එක මැසොරෙට්වරු සැලකුවේ දරුණුම අපරාධය විදිහට” කියලා මහාචාර්යවරයෙක් වන මෝෂා ගොට්ස්ටින් ලියලා තියෙනවා.

මේ වෙද්දී හුඟක් අත්පිටපත් හොයාගෙන තියෙන නිසා බයිබල් පිටපත්වල තියෙන වැරදි හඳුනගන්න විශාරදයන්ට ඒක උදව් වුණා. උදාහරණෙකට හුඟක් ආගමික නායකයන් ඉගැන්නුවේ ලතින් භාෂාවෙන් තිබුණ බයිබල් නිවැරදියි කියලයි. අපි කලින් බලපු විදිහට 1 යොහන් 5:7 තියෙන අදහසට වැරදි අදහසක් එකතු කරන්න ඔවුන් බය වුණේ නැත්තේ ඒ නිසයි. ඉංග්‍රීසි “කිං ජේම්ස් වර්ෂන්” බයිබලයෙත් ඒ වරද තිබුණා. ඒත් හොයාගත්ත අත්පිටපත්වලින් ඒ වරද හෙළි වුණා. ඒ ගැන බෲස් මෙට්ස්ග කිව්වේ “1 යොහන් 5:7ට අලුතින් එකතු කරපු අදහස ලතින් අත්පිටපත්වලට අමතරව වෙන කිසිම පැරණි අත්පිටපතක (සිරියැක්, කොප්ටික්, ආර්මේනියානු, ඉතියෝපියානු, අරාබි ස්ලාවෝනික්) තිබුණේ නැහැ” කියලයි. ප්‍රතිඵලයක් විදිහට “කිං ජේම්ස් වර්ෂන්” ඇතුළු තවත් බයිබල්වල ඒ වරද නිවැරදි කරලා තියෙනවා.

බයිබලයේ තොරතුරු වෙනස් වෙලා නැහැ කියන්න පැරණි අත්පිටපත්වල සාක්ෂි තියෙනවාද? අවුරුදු දාහකට වැඩි කාලෙකට කලින් තිබුණු මළ මුහුදේ ලියවිලි 1947දී හොයාගත්තට පස්සේ විශාරදයන් ඒවා මැසරෙටික් ලියවිලිත් එක්ක සැසඳුවා. මළ මුහුදේ ලියවිලි ගැන අධ්‍යයනය කරන කෙනෙක් ඒ ගැන මෙහෙම කිව්වා. “යුදෙව් පිටපත්කරුවන් අවුරුදු දාහකට වැඩි කාලයක් තිස්සේ බයිබලය නිවැරදිව, විශ්වාසවන්තව පිටපත් කරලා තියෙනවා” කියලා කියන්න එක ලියවිල්ලකින් ඕන තරම් සාක්ෂි හොයාගන්න පුළුවන්.

අයර්ලන්තයේ පුස්තකාලෙක බයිබලයේ ග්‍රීක ලියවිල්ලේ හැම පොතකම වගේ පැපිරස් ලියවිලිවල එකතුවක් තියෙනවා. ඒ අතරින් සමහර අත්පිටපත් හදලා තියෙන්නේ ක්‍රි.ව. 2වෙනි සියවසේදී. ඒ කියන්නේ බයිබලය ලියලා අවුරුදු 100ක් විතර ගියාට පස්සේ. එක පොතක ඒ ගැන සඳහන් වෙන්නේ මෙහෙමයි. “පැපිරස් ලියවිලිවලින් අලුත් තොරතුරු දැනගන්න පුළුවන් වෙනවා විතරක් නෙමෙයි බයිබලයේ තියෙන තොරතුරු මොන තරම් නිවැරදිද කියලා දැනගන්නත් ඒවා උදව් වෙනවා.”—The Anchor Bible Dictionary.

ප්‍රතිඵලය: හුඟක් පැරණි අත්පිටපත් විශාල ප්‍රමාණයක් තියෙන නිසා බයිබලය නිවැරදිව පිටපත් කරන්න පුළුවන් වෙලා තියෙනවා. බයිබල් විශාරදයෙක් වන ෆ්‍රෙඩ්රික් කෙන්යන් ග්‍රීක ලියවිල්ල ගැන මෙහෙම ලිව්වා. “බයිබලය තරම් වෙනත් කිසිම පැරණි පොතක් නිවැරදියි කියන්න සාක්ෂි ලැබිලා නැහැ. පැති ගන්නේ නැති විශාරදයන් කවදාවත් කියන්නේ නැහැ බයිබලයේ තියෙන අදහස් වෙනස් කරලා තියෙනවා කියලා.” විශාරදයෙක් වන විලියම් ග්‍රීන් ග්‍රීක ලියවිල්ල ගැන කිව්වේ “පුරාණයේ තිබුණ කිසිම ලියවිල්ලක තොරතුරු මේ තරම් නිවැරදිව පිටපත් කරලා නැහැ කියලා ස්ථිරවම කියන්න පුළුවන්” කියලයි.