3 දුක දරාගන්න

සුව කරන්න බැරි ලෙඩ

රෝස්ගේ අද්දැකීම බලන්න. “මට හැදිලා තියෙන ලෙඩේ නිසා කාලයක් තිස්සේ මං ඉන්නේ ලොකු වේදනාවකින්. මං දැන් හුඟක් දුර්වල වෙලා.” බයිබලය හොඳින් අධ්‍යයනය කරන්න, දෙවියන් වෙනුවෙන් දේවල් තවත් වැඩියෙන් කරන්න එයාට ලොකු ආශාවක් තිබුණත් වෙලාවකට ඒ දේවල් හරියට කරගන්න එයාට බැරි වුණා. ඒ ගැන එයා ගොඩක් දුක් වුණා. හැබැයි “දෙවිට සියල්ල කළ හැකියි” කියලා මතෙව් 19:26 කියලා තියෙන දේ එයාට හයියක් වෙලා තියෙනවා. පොත් පත් කියවන එක එයාට ලේසි වුණේ නැහැ. හැබැයි බයිබලය සහ තවත් ප්‍රකාශනa පටිගත කරලා තියෙනවා කියලා දැනගත්තාම එයා ඒකෙන් ප්‍රයෝජන ගත්තා. “මට දිගටම දෙවියන් එක්ක කිට්ටු බැඳීමක් තියාගන්න පුළුවන් වුණේ ඒ දේවල් නිසයි” කියලා එයා කිව්වා.

කරන්න බැරි දේවල් ගැන දුකක් දැනෙද්දී 2 කොරින්ති 8:12 කියන මේ දේ රෝස් මතක් කරගන්නවා. “සුදුසුම දේ වන්නේ පුද්ගලයෙකු සිය කැමැත්තෙන් යමක් දීමයි. එලෙසම කෙනෙකුගෙන් බලාපොරොත්තු වන්නේ තමාට නැති දේ දීම නොව තමාට තිබෙන දෙයින් දීමයි.” දෙවියන් සතුටු වෙන්නේ තමන්ට පුළුවන් උපරිමයෙන් දේවල් කරන එක ගැනයි කියලා ඒ පදයේ කියන දෙයින් රෝස්ට ලොකු දිරිගැන්වීමක් ලැබෙනවා. මොකද එයා තමන්ට පුළුවන් උපරිමය කරමිනුයි ඉන්නේ.

වියෝදුක

කලින් සඳහන් කරපු ඩෙල්ෆින් මෙහෙම කියනවා. “මගේ දුව මැරෙද්දී එයාට වයස 18යි. මං නං හිතුවේ නැහැ දුව නැතුව මට ජීවත් වෙන්න පුළුවන් වෙයි කියලා. මගේ මුළු ලෝකෙම වෙනස් වුණා.” හැබැයි ගීතාවලිය 94:19 කියන මේ දේ එයාට සැනසීමක් වෙලා තියෙනවා. “මාගේ සිත නොසන්සුන් වූ විට ඔබේ ඉමහත් ප්‍රේමය මට සැනසීමක් විය.” ඩෙල්ෆින් මෙහෙම කියනවා. “මගේ වේදනාව දරාගන්න මං කරන්න ඕනෙ දේ මට පෙන්නලා දෙන්න කියලා මං යෙහෝවා දෙවියන්ට කිව්වා.”

ඩෙල්ෆින් පුළුවන් උපරිමයෙන් අනිත් අයට උදව් කළා. සමහර වෙලාවට එයාට හිතිලා තියෙනවා එයාත් හරියට කැඩිච්ච චෝක් කෑල්ලක් වගේ කියලා. මොකද ඒ වගේ චෝක් කෑල්ලකිනුත් පාට කරන්න පුළුවන්. එයාගේ හිත කැඩිලා, බිඳිලා තිබුණත් එයා තේරුම්ගත්තා තවමත් අනිත් අයට උදව් කරන්න එයාට පුළුවන් කියලා. එයා කියපු දේ බලන්න. “මාත් එක්ක බයිබලයේ තියෙන දේවල් ඉගෙනගන්න අයව සනසන්න මං බයිබලය පාවිච්චි කරද්දී මට දැනුණේ ඒකෙන් යෙහෝවා දෙවියන් මාව සනසනවා වගෙයි.” වියෝදුක අද්දැකපු බයිබල් චරිත ගැන එයා අධ්‍යයනය කළා. “එයාලා හැමෝටම ඒ වේදනාව දරාගන්න පුළුවන් වුණේ යාච්ඤාව නිසයි” කියලා එයා තේරුම්ගත්තා. “වේදනාව දරාගන්න නම් බයිබලය කියවන්නම ඕනෙ” කියලත් එයා කිව්වා.

බයිබලය අධ්‍යයනය කරපු එකෙන් ඩෙල්ෆින් තවත් දෙයක් තේරුම්ගත්තා. ඒ තමයි අතීතය ගැන හිතහිත ළත වෙනවා වෙනුවට අනාගතය ගැන හිතන්න ඕන කියන දේ. අනාගතයේදී “ධර්මිෂ්ඨ අය වගේම අධර්මිෂ්ඨ අයත් නැවත නැඟිටිනවා” කියලා ක්‍රියා 24:15 සඳහන් දෙයින් එයා ලොකු සහනයක් අද්දකිනවා. ඉදිරියේදී එයාගේ දුවට දෙවියන් ආයෙත් ජීවිතය දෙන එක ගැන එයාට කොයි තරම් විශ්වාසයක් තියෙනවාද කියලා එයා කියපු මේ දෙයින් පැහැදිලියි. “දුව ඉපදුණු දවසේ මට දැනුණු සතුට මට තාමත් මතකයි. ළඟදීම යෙහෝවා දෙවියන් එයාට ආයෙත් ජීවිතය දුන්නාම මට ඒ සතුටම අද්දකින්න පුළුවන්. එදාට මං මගේ දුවව ආදරෙන් බදාගන්න විදිහ මට මැවිලා පේනවා.”