බයිබලය සත්‍ය තොරතුරු අඩංගු විශ්වාසවන්ත පොතක්

අතීතයේ ඉඳන්ම විවිධ ජාතීන්ට අයත් මිනිසුන් බයිබලයේ සඳහන් තොරතුරු සත්‍යයයි කියලා පිළි අරන් තියෙනවා. මේ වෙද්දී මිලියන ගාණක් අය බයිබලයේ තියෙන මඟ පෙන්වීම්වලට එකඟව ජීවත් වෙනවා. ඒත් බයිබලයේ තියෙන තොරතුරු අදට ගැළපෙන්නේ නැහැ කියලත් ඒක ගොතපු කතා ඇතුළත් පොතක් කියලත් සමහරු කියනවා. ඔයා හිතන්නේ මොකක්ද? බයිබලයේ තියෙන තොරතුරු සත්‍යයයි කියලා ඔයා පිළිගන්නවාද?

බයිබලයේ තියෙන තොරතුරු විශ්වාස කරන්න පුළුවන් ඇයි?

බයිබලයේ තියෙන තොරතුරු විශ්වාසවන්තද කියලා දැනගන්න පුළුවන් කොහොමද? ටිකකට හිතන්න, දන්න කාලේ ඉඳලා කවදාවත් ඔයාට බොරුවක් කියලා නැති යාළුවෙක් ගැන. ඔයාට එයාව හොඳටම විශ්වාසයි නේද? බයිබලයත් ඒ වගේ. ඒකේ තියෙන හැම තොරතුරක්ම සත්‍යයයි කියලා ඔප්පු වෙලා තියෙනවා. උදාහරණ කීපයක් දැන් බලමු.

ලේඛකයන් අවංකයි

බයිබල් ලේඛකයන් එයාලා අතින් වුණු වැරදි අඩුපාඩු ගැනත් අවංකව වාර්තා කරලා තියෙනවා. අනාගතවක්තෘවරයෙක් වුණු යෝනා ඒ අතරින් කෙනෙක්. තමන් දෙවියන්ට අකීකරු වුණු අවස්ථාවක් ගැන එයා වාර්තා කරලා තියෙනවා. (යෝනා 1:1-3) දෙවියන් එයාව හික්මවපු විදිහ ගැනත් කියලා තියෙනවා. හැබැයි එයාගේ වරද හදාගත්තත් ඒ ගැන සඳහන් කරලා නැහැ. තමන්ටම ප්‍රශංසාව ගන්න එයා කැමති වුණේ නැහැ කියලා ඒකෙන් තේරෙනවා. (යෝනා 4:1, 4, 10, 11) බයිබල් ලේඛකයන්ගේ අවංකකමින් පැහැදිලි වෙනවා සත්‍ය තොරතුරු වාර්තා කරන එක ගැන එයාලා හුඟක් සැලකිලිමත් වුණා කියලා.

මඟ පෙන්වීම් අදටත් ගැළපෙනවා

ජීවිතේ හැම කාරණයකටම අදාළ වෙන මඟ පෙන්වීම් බයිබලයේ තියෙනවා. උදාහරණෙකට කිට්ටු බැඳීම් පවත්වගන්න උදව් වෙන මඟ පෙන්වීම් කීපයක් බලන්න. “අනුන් ඔබට යම් දෙයක් කරනවාට ඔබ කැමතිද ඔබත් ඒ දේම ඔවුන්ට කරන්න.” (මතෙව් 7:12) “මෘදු පිළිතුරකින් කෝපය නිවී යයි. නමුත් සිත රිදවන වචනයකින් තරහ උපදවයි.” (හිතෝපදේශ 15:1) බයිබලයේ සඳහන් ඒ සත්‍යයන් එදාට වගේම අදටත් ගැළපෙනවා.

ඉතිහාසයට සම්බන්ධ තොරතුරු නිවැරදියි

බයිබලයේ සඳහන් පුද්ගලයන්, ප්‍රදේශ සහ සිද්ධීන් නිවැරදියි කියලා ඔප්පු වෙන සාක්ෂි පුරාවිද්‍යාත්මක කැණීම්වලින් හොයාගෙන තියෙනවා. උදාහරණෙකට බයිබලයේ සඳහන් පුංචිම පුංචි තොරතුරක් ගැන ලැබිලා තියෙන සාක්ෂියක් බලන්න. නෙහෙමියාගේ කාලේ යෙරුසලමේ ජීවත් වුණු තීර්හි වැසියන් (තීර්වලින් ආපු ෆිනීෂියානු ජාතිකයන්) “විවිධ මසුන් වර්ග හා වෙනත් බඩු බාහිරාදිය” එහෙට ගෙන්වාගත්තා කියලා බයිබලයේ සඳහන් වෙනවා.—නෙහෙමියා 13:16.

ෆිනීෂියාවෙන් ගෙන්වාගත් දේවල් ඊශ්‍රායෙල් දේශයේදී පුරාවිද්‍යාඥයන්ට හමු වෙලා තියෙනවා. ඒකෙන් පැහැදිලි වෙනවා ඒ රටවල් දෙක අතර වෙළඳ ගනු දෙනු සිද්ධ වෙලා තියෙනවා කියලා. ඒ විතරක් නෙවෙයි මධ්‍යධරණී මුහුදෙන් අල්ලාගත් මසුන්ගේ ෆොසිලත් යෙරුසලමෙන් හොයාගෙන තියෙනවා. ඒ මසුන් අරන් එන්න ඇත්තේ දුර ඈත ප්‍රදේශයක වෙළෙන්දන් වෙන්න ඇති කියලයි පුරාවිද්‍යාඥයන් කියන්නේ. සාක්ෂි සලකලා බැලුවාට පස්සේ බයිබල් විශාරදයෙක් වන බෙන්ජමින් නූනන් මෙහෙම කියලා තියෙනවා. “තීර්හි වැසියන් යෙරුසලමේ අයට මසුන් විකුණුවා කියලා නෙහෙමියා 13:16 කියලා තියෙන දේ ඇත්තක් කියලා හිතන්න පුළුවන්.”

විද්‍යාවට සම්බන්ධ තොරතුරු නිවැරදියි

බයිබලයේ මූලිකවම සඳහන් වෙන්නේ ආගමික තොරතුරු සහ ඉතිහාසය ගැන තොරතුරු. හැබැයි විද්‍යාවට සම්බන්ධ කාරණා ගැනත් ඒකේ සඳහන් වෙනවා. ඒ තොරතුරු නිවැරදියි කියලත් ඔප්පු වෙලා තියෙනවා. උදාහරණයක් බලන්න.

මීට අවුරුදු 3,500කට විතර කලින් බයිබලයේ සඳහන් වුණා පෘථිවිය “හිස් අවකාශයේ එල්ලා” තියෙනවා කියලා. (යෝබ් 26:7) හැබැයි ඒ කාලේ මිනිසුන් විශ්වාස කළේ පෘථිවිය වතුරේ පාවෙනවා, යෝධ ඉබ්බෙක් පෘථිවිය උස්සන් ඉන්නවා වගේ මිථ්‍යා අදහස්. යෝබ් පොත ලියලා අවුරුදු 1,100ක් විතර ගත වුණාට පස්සෙත් මිනිසුන් විශ්වාස කළේ පෘථිවිය යම් දෙයක් මත රඳලා තියෙන්න ඕනෙ කියලයි. 1687දී ඒ කියන්නේ මීට අවුරුදු 300කට කලින් තමයි පෘථිවියට එහි නියමිත කක්ෂයේ ගමන් කරන්න පුළුවන් වෙලා තියෙන්නේ ගුරුත්වය ඇතුළු භෞතික බලයන් නිසයි කියලා අයිසැක් නිව්ටන් ගුරුත්වය ගැන ලියපු පොතක සඳහන් කළේ. විද්‍යාවේ වැදගත් සංධිස්ථානයක් වුණු මේ සොයාගැනීම මගින් අවුරුදු 3,000කටත් කලින් පෘථිවියේ පිහිටීම ගැන බයිබලයේ සඳහන් දේ ඇත්තක් කියලා තහවුරු වෙනවා.