යෙහෝවාගේ ප්‍රේමය අගය කිරීමෙන් ලැබෙන ආශීර්වාද—1වන කොටස

¹ “අප ප්‍රේම කරන්නේ [යෙහෝවා] පළමුකොට අපට ප්‍රේම කළ නිසාය” කියා ප්‍රේරිත යොහන් ලිව්වා. (1 යොහ. 4:19) යෙහෝවා අපට සපයා තිබෙන සෑම දෙයක් ගැනම කල්පනා කරද්දී, ඒවා ඉමහත් සේ අගය කිරීමට අප තුළ පෙලඹවීමක් ඇති වෙයි. මේ සම්බන්ධයෙන් යේසුස් කීකරුව දෙවිගේ නාමය හා රාජ්‍යය ගැන සාක්ෂි දැරීමෙන් ආදර්ශයක් තැබුවා. (යොහ. 14:31) යෙහෝවාගේ ප්‍රේමය අප අගය කරන බව පෙන්විය හැකි ආකාර කිහිපයක් හා එසේ කිරීමෙන් අප ලබන ආශීර්වාද ගැන සලකා බැලීම ප්‍රයෝජනවත්.

² ගෙයින් ගෙට යෑමෙන්: රාජ්‍යය ගැන දේශනා කරන ආකාරය ගැන යේසුස් ඔහුගේ ගෝලයන්ට ඉගැන්නුවා. ශුභාරංචිය පතුරුවමින් ඔවුන් ගෙයින් ගෙට ගිය බව ඔහු දුන් මඟ පෙන්වීම්වලින් පැහැදිලි වෙයි. (ලූක් 9:1-6; 10:1-7) මිනිසුන්ගේ උදාසීන ප්‍රතිචාර හා විරුද්ධවාදීකම් මැද පවා අත්නෑර ගෙයින් ගෙට යෑමට නම් දෙවි සහ අසල්වැසියා කෙරෙහි ප්‍රේමයක් තිබිය යුතුයි. මෙසේ අපි දිගටම ගෙයින් ගෙට යෑමෙන් අපේ ඇදහිල්ල තව තවත් ස්ථිර වෙනවා. සත්‍යය පිළිබඳ අපේ විශ්වාසය තවත් ශක්තිමත් වන අතර අපේ බලාපොරොත්තුවද තවත් දීප්තිමත් වෙනවා. මේවා අප දිගටම ගෙයින් ගෙට යෑමෙන් පෞද්ගලිකව ලබන ප්‍රයෝජනයි.

³ දේවදූතයන්ගේ මඟ පෙන්වීම යටතේ අප සේවය කරන නිසා සත්‍යය සඳහා කුසගින්නක් හා පිපාසයක් තිබෙන බොහෝදෙනෙකුව අපට හමු වී තිබෙනවා. (එළි. 14:6) උපකාරය ඉල්ලා තමන් යාච්ඤා කරමින් සිටි අවස්ථාවලදී සාක්ෂිකරුවෙක් තමන්ගේ නිවසට පැමිණි බව ඇතැම් ගෙවැසියන් පවසා තිබෙනවා. සාක්ෂිකාරියන් දෙදෙනෙක් දරුවෙකු සමඟ කැරිබියන් දූපතක ගෙයින් ගෙට යමින් සිටියා. සේවය අවසන් කර ගෙදර යෑමට සාක්ෂිකාරියන් දෙදෙනා සූදානම් වෙද්දී දරුවා ඊළඟ නිවසට ගොස් තට්ටු කළා. තරුණ කාන්තාවක් දොර ඇරියා. සාක්ෂිකාරියන් දෙදෙනා මෙය දැක ඒ නිවසට ගොස් ඒ කාන්තාවට කතා කළා. ඇය ඔවුන්ට නිවස ඇතුලට ආරාධනා කරමින් පවසා සිටියේ, තමාට බයිබලය ගැන උගන්වන්න සාක්ෂිකාරයන්ව එවන්න කියා දරුවා දොරට තට්ටු කරන අවස්ථාවේදී ඇය දෙවිට යාච්ඤා කරමින් සිටි බවයි!

⁴ වීදිවල සාක්ෂි දැරීමෙන්: නිවෙස්වලදී මිනිසුන්ව හමුවීම හුඟාක් අමාරු නිසා ශුභාරංචිය දේශනා කිරීම බලපෑමෙන් යුතුව කළ හැකි මාර්ගයක් වන්නේ වීදිවල සාක්ෂි දැරීමයි. ඒ වගේම, සමහර නිවෙස්වල ගේට්ටු අගුල් දමා වසා තිබෙනවා. අධිආරක්ෂක නිවාස සංකීර්ණවල අපට ගෙයින් ගෙයට යන්න බැහැ. කොහොමවුණත්, අපි යෙහෝවාගේ ප්‍රේමය අගය කරන බව පෙන්වනවා නම්, රාජ්‍ය පණිවිඩය සමඟින් ජනයාව හමුවීම සඳහා වීදි සාක්ෂි දැරීම ඇතුළුව හැකි සෑම ආකාරයකින්ම ප්‍රයෝජන ගන්නෙමු.—හිතෝ. 1:20, 21.

⁵ නැවත බැලීම් කිරීමෙන්: අප සොයන්නේ “තමන්ගේ ආත්මික අවශ්‍යතා ගැන සාවධානව” සිටින අයව නිසා, ඔවුන්ගේ එම අවශ්‍යතාව තෘප්තිමත් කිරීම සඳහා අපට පුළුවන් දේ කිරීමට වුවමනාවක් අප තුළ තිබීම අවශ්‍යයි. (මතෙ. 5:3, NW) මේ සඳහා අප පැළ කළ සත්‍යයේ බීජවලට වතුර දැමීමට ආපසු යා යුතුයි. (1 කොරි. 3:6-8) ඕස්ට්‍රේලියාවේ සිටින සහෝදරියක් එතරම් උනන්දුවක් නැති බව පෙනෙන්න තිබූ ස්ත්‍රියකට පත්‍රිකාවක් දුන්නා. ඉන්පසු, මේ සහෝදරිය ඒ ස්ත්‍රියව හමුවීමට කිහිපවතාවක්ම ගියත් ඇය නිවසේ සිටියේ නැහැ. අවසානයේදී ඇයව හමු වූ අවස්ථාවේදී සහෝදරියට දැනගන්න ලැබුණා, මුල් හමුවීමෙන් පසු මේ ස්ත්‍රිය සෑහෙන මුදලක් දී බයිබලයක් මිල දී ගෙන තිබූ බව. පසුව මේ සහෝදරිය ඒ ස්ත්‍රිය සමඟ පාඩමක් පටන්ගත්තා.

⁶ බයිබල් පාඩම් පැවැත්වීමෙන්: අපේ සේවයේ බොහෝ ප්‍රීතියක් හා යහපත් විපාක ලබන අංගයකි මෙය. යෙහෝවා ගැන ඉගෙනගන්න ජනයාට උපකාර කිරීම මොනතරම් ආශීර්වාදයක්ද! අප සමඟ පාඩම් කරන අය යෙහෝවාව සතුටු කිරීම සඳහා තමන්ගේ ජීවිත වෙනස් කරගෙන, දෙවිට කැපවීම සංකේතවත් කරමින් බව්තීස්ම වෙනවා දකිද්දී අපි එම ආශීර්වාදය අද්දකින්නෙමු.—1 තෙස. 2:20; 3 යොහ. 4.

⁷ යෙහෝවාගේ ප්‍රේමය අප අගය කරන බව පෙන්වීමෙන් අප ආශීර්වාද ලබන තවත් ආකාර කිහිපයක් ඊළඟ කලාපයේදී අප සලකා බලනවා.