ජීවිතයේ වැදගත්ම දෙයට අපව සන්නද්ධ කරන පාසැලක්
1 මිනිසුන් සාමාන්‍යයෙන් පාසැල් යන්නේ තම ජීවිතයේ ඉලක්කයන් අත් කරගැනීමට උපකාරවත් වන මඟ පෙන්වීම් ලබාගැනීම සඳහාය. කෙසේවෙතත්, ජීවනදායකයා වන යෙහෝවාට ප්‍රශංසා කරමින් ඔහුගේ අරමුණු හා මාර්ගයන් ගැන දැනගැනීමට අන් අයට උපකාර කිරීම තරම් වැදගත් ඉලක්කයක් තිබිය හැකිද? නැත. දිව්‍යාණ්ඩු සේවා පාසැලේ අරමුණ වන්නේ අපගේ ඇදහිල්ල ගැන අන් අයට ඉගැන්වීම සඳහා අපව සූදානම් කරවීමයි. මේ අනුව, සතියක් සතියක් පාසා පාසැලට සහභාගි වන විට අපි ජීවිතයේ ඉතා වැදගත් වූ කටයුතුවලට මුහුණ දීම සඳහා උපකාරවත් වන කුසලතා ප්‍රගුණ කරගනිමින් සිටිමු.
2 පසුගිය මාසයේ පළ වූ අපගේ රාජ්‍ය සේවාවේ “2003 වසර සඳහා දිව්‍යාණ්ඩු සේවා පාසැල් වැඩසටහන” සපයා තිබිණ. පාසැල පවත්වන අන්දම සම්බන්ධයෙන් තොරතුරුද මෙම වැඩසටහනට ඇතුළත් කර තිබේ. සතිපතා දිව්‍යාණ්ඩු සේවා පාසැලට රැගෙන ආ යුතු දිව්‍යාණ්ඩු සේවා පාසැල් අධ්‍යාපනයෙන් ප්‍රයෝජන ලබමු නමැති පොත සමඟ මෙම වැඩසටහනේ පිටපතක්ද තබාගැනීම ප්‍රායෝගික වනු ඇත. වර්ෂ 2003 සඳහා දිව්‍යාණ්ඩු සේවා පාසැලේ ඇතැම් අංගයන් කිහිපයක් සලකා බලමු.
3 කථික ගුණාංගය: ජනවාරි මාසයේ සිට සෑම රැස්වීමක්ම ඇරඹෙන්නේ යම් කථික ගුණාංගයක් හෝ කියවීමේ, අධ්‍යයනය කිරීමේ නැත්නම් ඉගැන්වීමේ යම් අංගයක් පිළිබඳව විනාඩි පහකට දිවයන කතාවක් සමඟිනි. මෙම ප්‍රාරම්භක කතාවන් ඉදිරිපත් කරනු ලබන්නේ පාසැල් අවේක්ෂක විසිනි. එසේ නැතහොත් මෙම කතාව දීමට වෙනත් සුදුසුකම් ලත් වැඩිමහල්ලෙකුවද භාවිත කරන්නට පුළුවන. කථිකයාට කථික ගුණාංගය නිර්වචනය කළ හැකි අතර එහි වැදගත්කමද සාකච්ඡා කළ හැකිය. අනතුරුව, එම තොරතුරු පදනම් කරගෙන අමතර කරුණු ගෙනහැර දැක්විය යුතුය. ඒ සඳහා ශුද්ධ ලියවිලිමය උදාහරණ සාකච්ඡා කළ හැකි අතර, එම ගුණාංගය ක්‍රියාත්මක කළ හැකි ආකාරය නිරූපණය කරන්නටද පුළුවන. මෙහිදී විශේෂ අවධානයක් දිය යුත්තේ එසේ කිරීමෙන් අපගේ ක්ෂේත්‍ර සේවයේ ගුණය වැඩිදියුණු විය හැකි අන්දම වෙතටය.
4 පැවරුම් අංක 1: උපදෙස් කතාව දීමට පැවරුම් ලැබී ඇති සහෝදරයන්ට නැවතත් මතක් කර දෙන්නට කැමති වන්නේ “සාකච්ඡා කරනු ලබන තොරතුරුවල ප්‍රායෝගික වටිනාකමට අවධානය” දෙන ලෙසටය. මින් අදහස් කරන්නේ සාකච්ඡා කරන තොරතුරු භාවිත කරන්නේ කෙසේදැයි සභාවට පෙන්වා දීමය. ඔබට මෙම පැවරුම ලැබෙන විට සූදානම් වීම සඳහා යෝජනා ලබාගැනීමට සේවා පාසැල් පොතේ 48-9වන පිටු කියවා, එම පොතේ සූචියේ “ප්‍රායෝගිකව අදාළ කිරීම” නමැති ශීර්ෂය යටතේ තිබෙන යොමු සටහන්වල තොරතුරු අධ්‍යයනය කරන්න.
5 බයිබලය කියවීමේ වැඩසටහන: මීට කලින් සතිපතා බයිබල් කියවීම අඛණ්ඩව කරන්නට ඔබ අසමත් වූවා නම්, මෙම වසරේ දී ඇති වැඩසටහනට ඇලී සිටීමට අධිෂ්ඨාන කර නොගන්නේ මන්ද? එසේ කරන අය වසර අවසානයේදී ක්‍රිස්තියානි ග්‍රීක් ලියවිලි කියවා නිම කරනු ඇත. ක්‍රිස්තියානි ග්‍රීක් ලියවිලි සමඟින් බයිබලය කියවීමේ වැඩපිළිවෙළක් ඇරඹීමේ ප්‍රයෝජන සේවා පාසැල් පොතේ 10වන පිටුවේ 5වන ඡේදයේ සාකච්ඡා කර තිබේ.
6 බයිබල් කියවීමේ විශේෂාංග: මෙම කොටසට වෙන් කර ඇති වේලාව දැන් විනාඩි දහයක් දක්වා වැඩි කර ඇති අතර එමනිසා සතියේ බයිබල් කියවීම ගැන අදහස් දැක්වීමට සබයටද අවස්ථාවක් ලැබේ. මෙම පැවරුම ලබන අය ඒ සඳහා නියමිත කාලයට සීමා විය යුතුය. මෙය සෑම සතියකම තිබෙන අංගයක් වන අතර වාචික පුනරීක්ෂණය කරන සතියේදීද ඉදිරිපත් කරනු ලැබේ. නියමිත පරිච්ඡේද කියවද්දී ඔබේ පවුලේ පාඩමට, ක්ෂේත්‍ර සේවයට හෝ එදිනෙදා ජීවිතයට ප්‍රයෝජනවත් විය හැකි කරුණු සොයන්න. යෙහෝවා මිනිසුන් සහ ජාතීන් සමඟ කටයුතු කළ ආකාරයෙන් ඔහුගේ කවර ගුණාංග දැකගත හැකි වූවාද? ඔබේ ඇදහිල්ල ශක්තිමත් කරගැනීමටත්, යෙහෝවා කෙරෙහි කෘතඥතාවක් ගොඩනඟා ගැනීමටත් උපකාරවත් වූ කවර දේවල් සම්බන්ධයෙන්ද ඔබ ඉගෙනගත්තේ? නියමිත පරිච්ඡේදවලට අයත් ඕනෑම පදයකින් අදහස් දැක්වීමට මැළි නොවන්න. පැවරුම් අංක 2 ඉදිරිපත් කරන සහෝදරයා එම පද පදනම් කරගෙන අදහස් නොදක්වන නිසා එම පදවලින්ද ඔබට අදහස් දක්වන්නට පුළුවන.
7 පැවරුම් අංක 2: සතිපතා පවත්වන මුල්ම ශිෂ්‍ය පැවරුම ප්‍රසිද්ධ කියවීම හා සම්බන්ධ අභ්‍යාසයක් වනු ඇත. මාසයේ අවසාන සතියේ කරන කියවීම හැර සෑම සතියකම කරන කියවීම සතියේ බයිබල් කියවීම මත පදනම් කරනු ලැබේ. මාසයේ අවසාන සතියේ ඉදිරිපත් කරන කියවීමට පදනම සපයන්නේ මුරටැඹ සඟරාවේ කොටසකි. පවරා ඇති කොටස කියවද්දී ශිෂ්‍යයා එම කියවීමට හැඳින්වීමක් හෝ අවසානයක් එකතු නොකළ යුතුය. මේ අනුව, තම මූලික අවධානය තම කියවීමේ කුසලතා කෙරෙහි යොමු කර තබාගැනීමට ඔහුට පුළුවන් වේ.—1 තිමෝ. 4:13.
8 පැවරුම් අංක 3 සහ අංක 4: මෙම පැවරුම්වලින් සමහරකට මූලාශ්‍රයන් වන්නේ මගේ බයිබල් කතන්දර පොත නැත්නම් සාකච්ඡා කිරීම සඳහා බයිබල් විෂයන් නමැති පොත් පිංචයයි. සමහරක් ඒවාවලට දී තිබෙන්නේ තේමාවක් පමණි. තොරතුරු මූලාශ්‍ර අල්පයක් ඇති හෝ තේමාවක් පමණක් ඇති පැවරුම් ලබන අයට තම ඉදිරිපත් කිරීම් ගොඩනැඟීම සඳහා අපගේ ක්‍රිස්තියානි ප්‍රකාශන පර්යේෂණ කිරීමෙන් තොරතුරු එකතු කරගැනීමට පුළුවන. මෙය තම සහයකයන්ට අදාළ වන අන්දමින් තම අදහස් සකස් කිරීමට සහෝදරියන්ට පහසු කරවයි.
9 පසුබිම්: සේවා පාසැල් පොතේ 45වන පිටුවේ දක්වා ඇති පරිද්දෙන්, පාසැල් අවේක්ෂක විසින් පසුබිම නියම කිරීමට පුළුවන. එසේ කරන්නේ නැත්නම්, 82වන පිටුවේ දක්වා ඇති ලැයිස්තුවෙන් පසුබිමක් තෝරාගැනීමට සහෝදරියන්ට පුළුවන. සහෝදරියක් මාස දෙකකට වරක් කතාවක් දෙනවා නම්, මෙම පසුබිම් 30 වසර පහක් පුරා විවිධාකාරව යොදාගැනීමට ප්‍රස්තාව සැලසේ. අංක 30, එනම් “ඔබේ ප්‍රදේශයට උචිත වෙනයම් පසුබිමක්” නමැති පසුබිම තෝරාගන්නා සහෝදරියන් ඔවුන්ගේ පසුබිම ඔවුන්ගේ පැවරුම් පත්‍රයේ (S-89) පහළ කෙළවරේ හෝ අනික් පැත්තේ ලිවිය යුතුය. ශිෂ්‍යාව තම කතාව දුන් දිනය පාසැල් අවේක්ෂක විසින් ඇගේ පොතේ 82වන පිටුවේ ඇය භාවිත කළ පසුබිම ළඟ ලිවිය යුතුය. ශිෂ්‍යයාගේ උපදෙස් පත්‍රය ලකුණු කරන අවස්ථාවේදීම ඔහුට මෙය කළ හැකිය.
10 උපදෙස් පත්‍රය: ඔබේ උපදෙස් පත්‍රය ඔබේ පොතේ කොටසක් ලෙස ඊට අමුණා තිබේ. එය දක්නට ලැබෙන්නේ 79-81 දක්වා පිටුවලය. එමනිසා ඔබ කතාවක් දෙන සෑම අවස්ථාවකටම පසු ඔබේ පොත පාසැල් අවේක්ෂකට ඉදිරිපත් කළ යුතුය. ශිෂ්‍යයන් වැඩ කරමින් සිටින උපදෙස් ලබන කරුණු පිළිබඳව වාර්තාවක් තබාගැනීමට පාසැල් අවේක්ෂකටද සිදු වේ.
11 වාචික පුනරීක්ෂණය: දිව්‍යාණ්ඩු සේවා පාසැලේ පුනරීක්ෂණය වාචිකව මෙහෙයවනු ලැබේ. මාස දෙකකට වරක් පවත්වනු ලබන මෙම පුනරීක්ෂණය විනාඩි 30කට සීමා වේ. පුනරීක්ෂණයේදී සලකා බලන ප්‍රශ්න අපගේ රාජ්‍ය සේවාවේ පෙර පරිදි පළ වනු ඇත. වාචික පුනරීක්ෂණය සඳහා නියමිත සතියේදී චාරිකා එක්රැස්වීමක් හෝ චාරිකා අවේක්ෂකගේ බැහැදැකීම තිබේ නම්, ඊළඟ සතියේ කතා එම සතියේදී ඉදිරිපත් කර වාචික පුනරීක්ෂණය ඊළඟ සතිය සඳහා කල් දැමිය යුතුය.
12 අමතර පංති: පාසැලට බඳවාගෙන ඇති ශිෂ්‍ය සංඛ්‍යාව 50 ඉක්මවා ගොස් ඇති සභාවල වැඩිමහල්ලන්ට අමතර පංති පැවැත්වීම ගැන සලකා බැලිය හැක. “මෙම විධිවිධානය සියලුම ශිෂ්‍ය කතා සඳහා හෝ අවසාන කතා දෙක සඳහා ක්‍රියාත්මක කරන්නට පුළුවන.” (සේවා පාසැල්, 285 පි.) දෙවනුව සඳහන් කළ යෝජනාව ඉදිරිපත් කර ඇත්තේ සහෝදරියන් රාශියක් සිටින නමුත්, කියවීමේ පැවරුම් ඉටු කළ හැකි සහෝදරයන් අතළොස්සක් සිටින සභාවන්වල ප්‍රයෝජනය සඳහාය. මෙම පංති මෙහෙයවීම සඳහා වැඩිමහල්ලන් සුදුසුකම් ලත් සහෝදරයන්ව තෝරාගත යුතුය.
13 අමතර උපදේශක: දිව්‍යාණ්ඩු සේවා පාසැල් වැඩසටහනෙහි දක්වා ඇති පරිදි බයිබල් විශේෂාංග සහ උපදෙස් කතා ඉදිරිපත් කරන වැඩිමහල්ලන් සහ සභා සේවකයන්ට පෞද්ගලික උපදෙස් ලබා දීමට වැඩිමහල් මණ්ඩල විසින් අමතර උපදේශකයෙකු පත් කළ යුතුය. මෙම පැවරුම ලබන සහෝදරයා අද්දැකීම් ලත් කෙනෙකු විය යුතුය. මෙසේ ඔහුගේ උපදෙස්වලට ගරු කරන්නට අනික් වැඩිමහල්ලන්ට හැකි වේ. ඔහු දෙන උපදෙස් ගොඩනංවනසුලු තලයක තිබිය යුතු අතර, හොඳ කථිකත්වයක් හා ඉගැන්වීමක් දුටු විට ඒ සඳහා ප්‍රශංසා කරමින් වැඩිදියුණුව සඳහා කරුණක් හෝ දෙකක් නිර්දේශ කරන්නට පුළුවන. නිතරම කතා ඉදිරිපත් කරන සහෝදරයෙකු දෙන සෑම කතාවකටම පසු උපදෙස් ලබා දීම අවශ්‍ය වන්නේ නැත. කෙසේවෙතත්, මෙම උපදෙස් දීමේ පැවරුම ලබා සිටින සහෝදරයා උපදෙස් දෙන විට හොඳ විචාර බුද්ධියකින් හා අවබෝධයකින් ක්‍රියා කළ යුතුය. එවිට දැනටමත් ප්‍රසිද්ධ කථා දෙන සහෝදරයන්ට පවා තවත් දියුණු විය හැකි පැති පෙන්වා දිය හැකි වේ.—1 තිමෝ. 4:15.
14 අවධානය යොමු කළ යුතු දේවල්: යම් ඉදිරිපත් කිරීමක් විග්‍රහ කිරීමට උපදේශකයන්ට උපකාරවත් විය හැක්කේ කුමක්ද? සේවා පාසැල් පොතේ අංකනය කර ඇති පරිච්ඡේද 53න් වැඩිහරියක තිබෙන තුන්වන කොටුවෙහි අවධානය යොමු කළ යුතු මූලික දේවල් පිළිබඳව කෙටි සමාලෝචනයක් ඉදිරිපත් කෙරේ. ඉදිරිපත් කිරීමක් තර්කානුකූලව ගොඩනඟා ඇද්ද යන්නත්, එය බලපෑමෙන් යුක්තද යන්නත් ඉක්මනින් ඇගයීමට හැකි වන පරිද්දෙන් පොතේ සඳහන් වෙනත් සිහිගැන්වීම් හෝ යෝජනා පාසැල් අවේක්ෂක විසින් සැලකිල්ලට ගත යුතු වේ. නිදසුනකට, 55වන පිටුවේ මුල සඳහන් වී ඇති ප්‍රශ්න සමුදාය සහ 163වන පිටුවේ අවසාන ඡේදයේ ඉදිරිපත් කර ඇති අදහස් සැලකිල්ලට ගන්න.
15 හිස් තැන් පුරවන්න: සේවා පාසැල් පොතේ පිටුවල මායිමේ පුළුල් හිස් තීරු තිබෙනවාට අමතරව, පෞද්ගලික අධ්‍යයනයේදී සහ දිව්‍යාණ්ඩු සේවා පාසැලට සහභාගි වෙද්දී සටහන් ඇතුළත් කිරීම සඳහා හිස් ඉඩ ප්‍රමාණයක් සපයා ඇත. (77, 92, 165, 243, 246 සහ 250 යන පිටු බලන්න.) සතිපතා ඔබේ පොත රැගෙන ඒමට වගබලා ගන්න. මුල් කතාව ඉදිරිපත් කරද්දී ඔබේ පොත අදාළ පාඩමට විවෘත කර තබන්න. පාසැල පුරාම ඔබේ පොත විවෘතව තබන්න. පාසැල් අවේක්ෂක ඉදිරිපත් කරන යෝජනා සැලකිල්ලට ගන්න. කථිකයා විසින් ඉගැන්වීමේදී අනුගමනය කරන ක්‍රම, භාවිත කරන ප්‍රශ්න, නිදසුන්, වාක්‍යාලංකාර, උපමා, දෘශ්‍යාධාරක සහ වෙනස දැක්වීමට කරන සැසඳීම් ආදියට විශේෂ අවධානයක් දෙන්න. හොඳින් සටහන් ගැනීමෙන් පාසැලේදී ඉගෙනගත් කරුණු සම්භාරය මතකයට නැංවීමටත් භාවිත කිරීමටත් ඔබට හැකි වනු ඇත.
16 කෙනෙකුට ලබා දිය හැකි උතුම්ම වරප්‍රසාදය දේවරාජ්‍යය පිළිබඳ ශුභාරංචිය දේශනා කිරීම බව යේසුස් ක්‍රිස්තුස් දැන සිටියේය. ඔහුගේ ප්‍රධාන පැවරුම වූයේ එයයි. (මාක් 1:38) ඔහු මෙසේ පැවසීය. “දෙවිගේ රාජ්‍යය ගැන ශුභාරංචිය දේශනා කළ යුතුය. මන්ද, මාව එවන ලද්දේ ඒ සඳහාය.” (ලූක් 4:43, NW) ඔහුව අනුකරණය කිරීමට කර ඇති ආරාධනය පිළිගෙන ඇති අය ලෙස ශුභාරංචිය දේශනා කිරීමේ කටයුත්තට අපි පූර්ණ අවධානයක් දෙන්නෙමු. ඒත් සමඟම අපගේ ‘ප්‍රශංසාව නමැති පූජාවේ’ ගුණය දියුණු කරගැනීමට නිරතුරු උත්සාහයක්ද දරන්නෙමු. (හෙබ්‍රෙ. 13:15) එසේනම්, ජීවිතයේ වැදගත්ම දේ සඳහා අපව සූදානම් කිරීමට උපකාරවත් වන දිව්‍යාණ්ඩු සේවා පාසැලට නිතිපතා සහභාගි වන්නට අදිටන් කරගනිමු.