යේසුස්ගේ ජීවිත පූජාවෙන් ප්‍රයෝජන ගැනීමට අන්‍යයන්ට උදව් කරන්න ක්‍රිස්තුස්ගේ මරණය සිහි කිරීම පැවැත්වෙන්නේ අප්‍රියෙල් 12 වනදා
1. දෙවිගේ ජනයා යේසුස්ගේ ජීවිත පූජාව කෙරෙහි කෘතඥභාවය පළ කරන එක් ක්‍රමයක් කුමක්ද?
1 “කියා නිම කළ නොහැකි, දෙවි නොමිලේ දෙන දීමනාව සඳහා ඔහුට ස්තුති වේවා!” (2 කොරි. 9:15) මේ වචනවලින් දෙවි ගැන මොනතරම් කෘතඥපූර්වක හැඟීමක් අපට ඇති වෙනවාද! දෙවිගේ යහපත්කම සහ ප්‍රේමණීය කරුණාව තම පුත් යේසුස් ක්‍රිස්තුස්ව එවීමෙන් අපට පෙන්වා තිබෙනවා. අප්‍රියෙල් 12වනදා අප සියලුදෙනා එකට රැස් වී ක්‍රිස්තුස්ගේ මරණය සිහි කරන විට, ඒ සඳහා අප තුළ තිබෙන කෘතඥභාවය තව තවත් වැඩි වේවි.
2. අප සමඟ සිහි කිරීමට සහභාගි වෙන්නේ තවත් කවුරුන්ද? යේසුස්ගේ ජීවිත පූජාවෙන් ප්‍රයෝජන ගැනීමට නම් ඔවුන් කුමක් කළ යුතුද?
2 අප සමඟ, සෑම වසරකම තවත් මිලියන දහයක් පමණ ජනතාවක් සිහි කිරීමට සහභාගි වෙනවා. මේ මගින් ඔවුන් පෙන්වන්නේ ක්‍රිස්තුස්ගේ පූජාව ගැන ඔවුන්ට යම් කෘතඥභාවයක් තිබෙන බවයි. කෙසේවෙතත්, ඔවුන්ට ප්‍රයෝජන අත්වීමට නම් ඔවුන් ඒ කෙරෙහි ඇදහිල්ල තැබිය යුතුයි. (යොහ. 3:16, 36) අපි ඔවුන්ට උදව් කරන්නේ කොහොමද? අප සමඟ බයිබලය පාඩම් කිරීමටත් සතිපතා සභා රැස්වීම්වලට සහභාගි වීමටත් සිහි කිරීමේ කාලයේදී ඔවුන්ව දිරිගන්වන්න අපට හැකියි. ඒ සඳහා පහත දී ඇති යෝජනා සලකා බලන්න.
3. යමෙකුට සිහි කිරීමට ආරාධනා කිරීමේදී අපට බයිබල් පාඩමක් පටන්ගත හැක්කේ කෙසේද?
3 බයිබල් පාඩම්: ඔබ උනන්දුව දක්වන කෙනෙකුට සිහි කිරීමට ආරාධනා කරන අවස්ථාවේදී ඔහු හෝ ඇය සමඟ බයිබලයේ ඉගැන්වීම් පොතෙන් බයිබල් පාඩමක් පටන්ගැනීමට උත්සාහ කරන්න. ඒ අවස්ථාවේදී, මේ පොතේ 206-208 දක්වා පිටුවල සඳහන් “දෙවිව ගෞරවයට පත් කරන සැමරීමක් වන ස්වාමීන්ගේ සන්ධ්‍යා භෝජනය” යන කොටස එම තැනැත්තා සමඟ සාකච්ඡා කරන්න. බැහැදකින වතාවකදී හෝ දෙකකදී එම තොරතුරු සාකච්ඡා කිරීමට පුළුවන්. සමහරවිට දොරකොඩ ළඟ සිට කරන පාඩමකදී වුවත් එය කරන්න පුළුවන්. ඉන්පසු, ඔහු සමඟ 5වන පරිච්ඡේදයේ “දෙවි මිනිසුන්ට දුන් වටිනාම තෑග්ග” යටතේ ඇති තොරතුරු සාකච්ඡා කරන්න. ඒ තැනැත්තා දිගටම බයිබලය පාඩම් කරන්න කැමති නම්, මුල් පරිච්ඡේද හතරද ඇතුළත්ව පිළිවෙළින් පාඩම කරගෙන යා හැකියි.
4. සිහි කිරීමේ කාලයේදී අපට බයිබල් පාඩම් පටන්ගත හැක්කේ කා සමඟද?
4 මේ ක්‍රමයට බයිබල් පාඩම් පැවැත්විය හැක්කේ කා සමඟද? ඔබේ රැකියා ස්ථානයේ අය සමඟ, පාසැලේ ළමුන් සමඟ හෝ අසල්වාසීන් සමඟ මෙය කළ හැකියි. සභාවේ සහෝදරියන්ගේ නොඇදහිලිකාර ස්වාමිපුරුෂයන්ට බයිබල් පාඩමක් කිරීමටද සහෝදරයන්ට හැකියි. ඔබේ නෑදෑයන් සාක්ෂිකරුවන් නොවේ නම්, ඔවුන්වද අමතක කරන්න එපා. ඊට අමතරව, සභාවේ අක්‍රියාශීලී අයවද සිහි කිරීමට ආරාධනා කිරීමට අපි විශේෂ ප්‍රයත්නයක් දරමු. (ලූක් 15:3-7) මෙසේ, අපි යේසුස්ගේ ජීවිත පූජාවෙන් ප්‍රයෝජන ගැනීමට මේ සියල්ලන්ට උදව් කරමු.
5. බයිබල් ශිෂ්‍යයන්ට හා උනන්දුව දක්වන වෙනත් අයට සතිපතා සභා රැස්වීම්වලින් ප්‍රයෝජන ගැනීමට අපට කෙසේ දිරිගැන්විය හැකිද?
5 සභා රැස්වීම්: බයිබල් ශිෂ්‍යයන් බොහෝදෙනෙක් සහ උනන්දුව දක්වන තවත් අය මුල් වතාවට සහභාගි වන්නේ සිහි කිරීමට විය හැකියි. එහෙත්, අපේ සතිපතා සභා රැස්වීම්වලින් ප්‍රයෝජන ගැනීමට මේ අයට අප උපකාර කරන්නේ කෙසේද? වර්ෂ 2005 අප්‍රියෙල් අපගේ රාජ්‍ය සේවාවේ 8වන පිටුවේ මෙම යෝජනාව සඳහන් වුණා. “ඊළඟ ප්‍රසිද්ධ කතාවේ මාතෘකාව සඳහන් කරන්න. මුරටැඹ පාඩමේදී හා පොත් පාඩමේදී සලකා බැලෙන තොරතුරුද පෙන්වන්න. දිව්‍යාණ්ඩු සේවා පාසැල සහ සේවා රැස්වීම ගැන පැහැදිලි කරන්න. ඔබට පාසැලේ පැවරුමක් තිබෙන විට ඔබට හැකියි, එය ඔවුන් සමඟ පුහුණු වන්න. රැස්වීම්වලදී ඉදිරිපත් කළ විශේෂ කරුණු ඔවුන් සමඟ බෙදාගන්න. රැස්වීම්වලදී සිදු වන දේ පිළිබඳව යම් චිත්‍රයක් මවාගැනීමට උපකාර කිරීම සඳහා අපේ ප්‍රකාශනවල ඇති පින්තූරු ඔවුන්ට පෙන්වන්න. මුල් පාඩමේදීම රැස්වීම්වලට සහභාගි වීමට ඔවුන්ට ආරාධනා කරන්න.”
6. අවංක සිත් ඇති අයට යේසුස්ගේ ජීවිත පූජාවෙන් ප්‍රයෝජන ගැනීමට අපට උපකාර කළ හැකි ක්‍රම දෙක කුමක්ද?
6 අවංක සිත් ඇති අය නිතිපතා බයිබලය පාඩම් කරනවා නම්, රැස්වීම්වලට සහභාගි වෙනවා නම්, ඔවුන් ඉක්මන් ප්‍රගතියක් ලබනවා නිසැකයි. එමනිසා දෙවිගේ මේ අතිමහත් ත්‍යාගය වන යේසුස්ගේ ජීවිත පූජාවෙන් ප්‍රයෝජන ගැනීමට හැකි තරම් ඔවුන්ව දිරිගන්වමු.