බයිබල් පාඩමක් කරන්න—වෙලාවක් නෑ කියලා හිතන්න එපා
1. සමහර ප්‍රචාරකයන් බයිබල් පාඩම් කරන්න අදිමදි කරන්නේ ඇයි?
1 සමහර ප්‍රචාරකයන් බයිබල් පාඩම් කරන්න අදිමදි කරන්නේ ඒකට වෙලාවක් වෙන් කරගන්න බැරි හින්දයි. පාඩමට ලෑස්ති වෙන්න, පාඩම කරන්න, බාධා ජය ගන්න ශිෂ්‍යයාට උදව් කරන්න කාලෙ ඕනෙ. තෙසලෝනික සභාවේ අයට දෙවි ගැන කියා දීම වෙනුවෙන් එයාගෙ ජීවිතේ වුණත් දෙන්න පාවුල් කැමති වුණා. (1 තෙස. 2:7, 8) වැඩ ගොඩක් තිබුණත් බයිබල් පාඩමක් කරන්න අපිටත් පුළුවන්ද?
2. අපි දෙවිට ආදරේ නිසා අපි කරන්න ඕනෙ මොකක්ද?
2 කාලය වෙන් කරන්න වෙනවාමයි: රැස්වීම් යන්න, සේවයේ යන්න, බයිබලය කියවන්න, යාච්ඤා කරන්න කාලය වෙන් කරන්න වෙනවාමයි. උදාහරණයකට අලුත බැන්ද කෙනෙක් මොන වැඩේ තිබුණත් එයාගෙ සැමියා එක්ක හරි බිරිඳ එක්ක හරි කාලය ගත කරන්න කොහොමහරි වෙලාව හොයාගන්නවා. එහෙමනං අපි ගොඩක් ආදරේ කරන අපේ දෙවි වෙනුවෙන් වෙනත් දේවල්වලට යොදන කාලයෙන් යම් ‘කාලයක් මිල දී ගන්න’ අපි ඊටත් වඩා කැමති වෙන්න ඕනෙ නැද්ද? (එෆී. 5:15-17 පාද සටහන; 1 යොහ. 5:3) යේසුස් කියපු විදිහට මිනිස්සුන්ට ඔහුගේ ගෝලයන් වෙන්න උදව් කරන එක අපේ නමස්කාරයේ වැදගත්ම අංගයක්. (මතෙ. 28:19, 20) ඒ ගැන ටිකක් කල්පනා කරලා බැලුවොත් බයිබල් පාඩමක් කරන්න අපි අදිමදි කරන එකක් නැහැ.
3. පාඩම පවත්වන්න බැරිවෙන අවස්ථාවලදී කරන්න පුළුවන් මොනවද?
3 ඒත් රස්සාව නිසා, බරපතළ අසනීපයක් නිසා එහෙම නැත්නම් දෙවිගේ සංවිධානයෙන් ලැබුණ පැවරුමක් නිසා දිගටම පවත්වගෙන ගිය පාඩමක් කරන්න අමාරු වෙන අවස්ථාවලදී මොකද කරන්නෙ? සමහර අය ටෙලිෆෝන් එකෙන් නැත්නම් කොම්පියුටරය ආධාරයෙන් පාඩම් පවත්වනවා. බරපතළ අසනීපයකින් පෙළෙන සමහර අය පාඩම කරන්න බයිබල් ශිෂ්‍යයන්ට තමන්ගේ ගෙදරට ආරාධනා කරනවා. හදිස්සි හේතුවක් නිසා පාඩම කරන්න බැරි නම් ඒ පාඩමට යන්න පුළුවන් වෙන ප්‍රචාරකයෙක්ව සූදානම් කරන්නත් පුළුවන්.
4. බයිබල් පාඩමක් කරන එකෙන් ලැබෙන ආශීර්වාද මොනවාද?
4 කාලය වෙන් කරගෙන, මහන්සිය නොබලා අනිත් අයට දෙවි ගැන ඉගැන්වීමෙන් පාවුල් ලොකු සතුටක් ලැබුවා. (ක්‍රියා 20:35) තෙසලෝනිකයේ සිටි අය වෙනුවෙන් තමන් කරපු දේවලින් ලැබුණු ප්‍රතිඵල ගැන හිතද්දී දෙවිට ස්තුති කරන්න පාවුල් පෙලඹුණා. (1 තෙස. 1:2) බයිබල් පාඩමක් කරන එකෙන් ලැබෙන සතුට වචනවලින් විස්තර කරන්න බැරි නිසා අපේ කාර්ය බහුල ජීවිතය ඒකට බාධාවක් කරගන්න එපා.