අපේම හැකියාවෙන් අනාවැකි තේරුම්ගන්න බැහැ. මෙහෙම හිතන්න. ඔයා නොදන්න පැත්තක ගමනක් යනවා. හැබැයි ඔයාත් එක්ක ඉන්න යාළුවාට ඒ පැත්ත හොඳට හුරුයි. ඔයාලා ඉන්න තැන එයා හරියටම දන්නවා. හැම පාරක්ම වැටෙන්නේ කොහෙටද කියලත් එයා දන්නවා. යෙහෝවා දෙවියනුත් ඒ යාළුවා වගේ. කාල රේඛාවේ අපි දැන් ඉන්න තැන ඔහු හරියටම දන්නවා. ඉස්සරහට වෙන්නේ මොනවාද කියලත් ඔහු දන්නවා. ඒ නිසා අපි නිහතමානී වෙලා යෙහෝවාගේ උදව් ඉල්ලන්නම ඕනේ. (දානි. 2:28; 2 පේතෘ. 1:19, 20) සාමාන්‍යයෙන් ඕනම දෙමාපියෙක් ආසයි දරුවන්ගේ අනාගතේ හොඳ එකක් වෙනවාට. අපේ ආදරණීය තාත්තා වන යෙහෝවාත් ඒ වගේ. (යෙරෙ. 29:11) හැබැයි මිනිස්සු වගේ නෙවෙයි දෙවියන්ට පුළුවන් අනාගතේ වෙන දේ අකුරටම කියන්න. ඒකයි ඔහු ඉස්සරහට වෙන වැදගත් සිද්ධීන් ගැන ඒවා වෙන්න කලින්ම අපිව දැනුවත් කරන්නේ. එහෙම බලද්දී අනාවැකි කියන්නේ ඇත්තටම දෙවියන්ගෙන් අපිට ලැබුණ තෑගි. ඒත් බයිබලේ තියෙන දේවල් ඇත්තටම ඉටු වෙයි කියලා සහතික කරගන්නේ කොහොමද?—යෙසා. 46:10. w23.08 8 3-4¶

මිනිස්සුන්ගේ හැම ප්‍රශ්නයක්ම විසඳන්න දෙවියන් යේසුස්ට බලය දුන්නා. යේසුස් කරපු ආශ්චර්යයන්වලින් පැහැදිලි වුණා ඕනම ප්‍රශ්නයක් විසඳන්න යේසුස්ට පුළුවන් කියලා. උදාහරණෙකට ඔහුට පුළුවන් අසනීප, මරණය ඇතුළුව අපි මුහුණ දෙන හැම ප්‍රශ්නෙකටම මුල් වුණ හේතුව ඒ කියන්නේ පාපය වුණත් අයින් කරලා දාන්න. (මතෙ. 9:1-6; රෝම 5:12, 18, 19) “සියලු ආකාර” අසනීප හොඳ කරන්න පුළුවන් කියලා යේසුස් ඔප්පු කළා. (මතෙ. 4:23) කොටින්ම කිව්වොත් කෙනෙක්ව මරණයෙන් නැඟිට්ටවන්නත් යේසුස්ට බලය තියෙනවා. (යොහ. 11:43, 44) ඒ වගේම බිහිසුණු කුණාටු නිහඬ කරන්න, දරුණු භූතයන්ව මෙල්ල කරන්න ඔහුට පුළුවන්. (මාක් 4:37-39; ලූක් 8:2) යෙහෝවා ඒ තරම් බලයක් යේසුස්ට දුන්නා නම් යේසුස් අපේ හැම ප්‍රශ්නයක්ම විසඳයිද කියලා අපි සැකයක් තියාගන්න ඕනෙද? දේවරාජ්‍යයෙන් පොරොන්දු වෙලා තියෙන ආශීර්වාද අනිවාර්යයෙන්ම ලැබෙනවා කියලා අපිට සහතිකයි. මොකද යේසුස් ඒ හැම ආශ්චර්යයක්ම කළේ මනුෂ්‍යයෙක් විදිහට ඉද්දී. එහෙමනම් දේවරාජ්‍යයේ රජ විදිහට ඔහු ඉස්සරහට ඊට වඩා කොච්චර දේවල් කරයිද! w23.04 3 5-7¶

ඔයා ඉන්නේ ගොඩක් ප්‍රචාරකයන් ඉන්න සභාවක නම් ඔයා උත්තර දෙන්න අත ඉස්සුවත් ඔයාට අවස්ථාව ලැබෙන්නේ නැතුව ඇති. එහෙනම් ඔයාටත් හිතිලා ඇති ‘මං රැස්වීම් ගිහින් ඔහේ අහන් ඉඳලා එනවා’ කියලා. හැබැයි එහෙම හිතලා අදහස් දෙන්නේ නැතුව ඉන්න එපා. උත්තරේකට, දෙකකට නෙවෙයි කීපයකටම ලෑස්ති වෙලා යන්න. එතකොට පාඩම මුලදී උත්තරයක් දෙන්න බැරි වුණත් ඒ අවස්ථාව පස්සේ හරි හම්බ වෙයි. ‘මුරටැඹ’ ලිපිය ලෑස්ති වෙද්දී හැම ඡේදයක්ම ප්‍රධාන තේමාවට සම්බන්ධ වෙන විදිහ ගැන හිතන්න. එතකොට ඕනම ඡේදයකදී හොඳ අදහසක් දෙන්න ඔයාට පුළුවන් වෙයි. ඊට අමතරව ඔයාට කරන්න පුළුවන් තව දෙයක් තියෙනවා. ගැඹුරු කාරණා ගැන සාකච්ඡා කරන ඡේදවලට වැඩිපුර ලෑස්ති වෙන්න. ඒ ඇයි? මොකද ඒ වගේ ඡේදවලදී වැඩිදෙනෙක් අත් උස්සන්නේ නැති නිසා ඔයාගෙන් උත්තරේ අහන්න තියෙන ඉඩකඩ වැඩියි. ඒත් රැස්වීම් කීපයකදීම එක දිගට ඔයාගෙන් අදහසක් ගත්තේ නැත්නම්? ඔයාට පුළුවන් මෙහෙයවන සහෝදරයාව හම්බ වෙලා “මං මේ ප්‍රශ්නෙට උත්තරයක් දෙන්න කැමතියි” කියලා එයාට කලින්ම කියන්න. w23.04 21-22 9-10¶