3 උත්සාහය අත්හරින්න එපා

මොනවා හරි දේකට අලුතින් පුරුදු වෙන්න දවස් 21ක් ගත වෙනවා කියලා හුඟක් අය අතරේ මතයක් තියෙනවා. හැබැයි සමහර අයට ඒ දේ කරන්න ඒ තරම් කාලයක් ගත වෙන්නේ නැහැ කියලත් තවත් අයට ඒ දේ කරන්න ඊටත් වඩා වැඩි කාලයක් ගත වෙනවා කියලත් පර්යේෂණවලින් හෙළි වෙලා තියෙනවා. ඒත් ඒකෙන් අදහස් කරන්නේ උත්සාහ කරන එකෙන් පලක් නැහැ කියලද?

හිතන්න ඔයාට ඕනෙ සතියට දවස් තුනක් ව්‍යායාම කරන පුරුද්ද ඇති කරගන්න කියලා.

• පළවෙනි සතියේ ඔයා ඒක කරනවා.

• දෙවෙනි සතියේ දවසක් මඟ ඇරෙනවා.

• තුන්වෙනි සතියේ දවස් තුනේම කරනවා.

• හතරවෙනි සතියේ දවසක් විතරක් කරනවා.

• පස්වෙනි සතියේ දවස් තුනේම කරනවා. එතන ඉඳන් ඒක දිගටම කරන්න ඔයාට පුළුවන් වෙනවා.

සති පහ ඔයාට ලොකු කාලයක් වගේ පෙනෙයි. ඒත් ඉලක්කය ජයගත්තාම හොඳ පුරුද්දක් ඇති කරගත්තා කියන සතුට ඔයාට දැනෙයි.

බයිබලයේ කියන්නේ උත්සාහය අත්හරින්න එපා කියලයි. ඇත්තටම වටින්නේ අපි කී වතාවක් වැටුණාද කියන එක නෙවෙයි, කී වතාවක් නැඟිට්ටාද කියන එකයි.

කරන්න පුළුවන් දේ

• සැරයක් දෙසැරයක් අසාර්ථක වුණා කියලා හැමදාමත් අසාර්ථක වෙන්නේ නැහැ. ඉලක්කයට යද්දී පසුබෑම් තියෙයි කියලා තේරුම්ගන්න.

• ඔයා ඒ දේ හරියට කරපු අවස්ථාවන් ගැන හිතන්න. උදාහරණෙකට දරුවන් එක්ක හොඳින් කතාබහ කරන පුරුද්ද ඇති කරගන්න ඕනෙ නම් ඔයාගෙන්ම මෙහෙම අහන්න. ‘දරුවන්ට බණින්න හිතුණු වෙලාවේ කෑගහන්නේ නැතුව ඉන්න අන්තිමට මට පුළුවන් වුණේ කවදාද? එහෙම කරන්න පුළුවන් වුණේ මං මොනවා කරපු නිසාද? ඒ දේ දිගටම කරන්න පුළුවන් කොහොමද?’ අසාර්ථක වුණු අවස්ථාවන් ගැන ළත වෙන්නේ නැතුව සාර්ථක වුණු අවස්ථාවන් ගැන හිතන්න ඒ ප්‍රශ්න උදව් වෙයි.

කනස්සල්ල නැති කරගන්න, සතුට පිරුණු පවුල් ජීවිතයක් ගෙවන්න වගේම නියම සතුට හොයාගන්න බයිබල් ප්‍රතිපත්ති උදව් වෙන විදිහ දැනගන්න ඔයා කැමතිද? එහෙනම් යෙහෝවා දෙවිගේ සාක්ෂිකරුවෙක් එක්ක කතා කරන්න. නැත්නම් jw.org/si වෙබ්අඩවිය වෙත පිවිසෙන්න.