හොඳ නමක වටිනාකම

හොඳ නමක් කොයි තරම් වටිනවාද! සමහර රටවල හොඳ නමක් තියෙන එක කොයි තරම් වැදගත් දෙයක් විදිහට සලකනවාද කියනවා නම් කෙනෙක් එදිනෙදා කතාබහේදී හරි ජනමාධ්‍යයෙන් හරි කෙනෙක්ගේ නමට අපහාස කළොත් ඒ වෙනුවෙන් නීතිමය පියවර ගන්න අවසර දීලා තියෙනවා. “වස්තු සම්භාරයක් තිබීමට වඩා වටින්නේ හොඳ නමක් ඇතුව සිටීමයි. හොඳ නමක් දිනාගැනීම රන් රිදීවලටත් වඩා වටින්නේය” කියලා බයිබලයේ කියන දේ කොයි තරම් ඇත්තක්ද! (හිතෝපදේශ 22:1) හොඳ නමක් ඇති කරගන්නත් අනිත් අයගේ ගෞරවය දිනාගන්නත් උදව් වෙන යෝජනා කීපයක් බයිබලයෙන් බලමු.

ගීතාවලිය 15:1-5 මෙහෙම කියනවා. ‘යෙහෝවා දෙවියනි, ඔබේ ශුද්ධ කූඩාරමට ඇතුල් විය හැක්කේ කාටද? ධර්මිෂ්ඨකම් කරමින් නිර්දෝෂ ජීවිතයක් ගත කරන, සිතින් සත්‍යය පවසන තැනැත්තාටය. ඔහු කේලම් කියන්නේ නැත. තමාගේ අසල්වැසියාට කිසි අයහපතක් කරන්නේ නැත. තමාගේ හිතවත් මිතුරා ගැන කටකතා පතුරුවන්නේද නැත. ඔහු පිළිකුල් ක්‍රියාවල යෙදෙන්නන්ව මුළුමනින්ම ප්‍රතික්ෂේප කරයි. ඔහුට පාඩුවක් සිදු වුණත් ඔහු දුන් පොරොන්දු එලෙසම ඉටු කරයි. ඔහු ණයකරුවන්ගෙන් පොලී අය නොකරයි.’ ඒ වගේ කෙනෙක්ට ගෞරවය කරන්න ඔයා පෙලඹෙන්නේ නැද්ද?

අනිත් අයගේ ගෞරවය දිනාගෙන හොඳ නමක් තියාගන්න උදව් වෙන තව ගුණාංගයක් තමයි නිහතමානීකම. “යටහත්පහත්ව කටයුතු කළොත් මිසක ගෞරවයක් හිමි නොවන්නේය” කියලා බයිබලයේ කියනවා. (හිතෝපදේශ 15:33) සාමාන්‍යයෙන් නිහතමානී කෙනෙක් තමන්ගේ අඩුපාඩු හඳුනගෙන ඒවා හදාගන්න වෑයම් කරනවා, වරදක් වුණාම සමාව ඉල්ලනවා. (යාකොබ් 3:2) හැබැයි උඩඟු අය ඉක්මනින්ම කේන්තිගන්නවා. බයිබලයේ කියන්නේ “විනාශයට මුල උඩඟුකමය. වැටීමට හේතුව අහංකාර සිතකි” කියලයි.—හිතෝපදේශ 16:18.

කවුරු හරි ඔයාගේ නමට අපහාස කළොත් මොකද කරන්නේ? ‘කේන්තියෙන් වැඩ කළොත් මං ගැන කියලා තියෙන දේ තවත් පැතිරෙයිද’ කියලා හිතන්න. නීතිමය පියවරක් ගන්න අවස්ථාව තිබුණත් ඉක්මන් වෙන්න එපා. බයිබලයේ කියන්නේ ‘ඔබ හඳුනන කෙනෙකුට විරුද්ධව නඩුවක් දමන්න ඉක්මන් නොවන්න. යමෙකු සමඟ ප්‍රශ්නයක් ඇති වූ විට එය ඔහු සමඟ පමණක් කතා කර විසඳගන්න’ කියලයි. (හිතෝපදේශ 25:8, 9)a එහෙම කළොත් නඩුහබවලට වියදම් වෙන සල්ලිත් ඉතුරුයි.

අපේ ජීවිතේට අදාළ කරගන්න පුළුවන් මඟ පෙන්වීම් රැසක් බයිබලයේ තියෙනවා. හොඳ නමක් ඇති කරගන්නත් අනිත් අයගේ ගෞරවය දිනාගන්නත් ඒ මඟ පෙන්වීම් ඔයාට උදව් වෙයි.