Yisaaqi Dancha Galte Afiꞌri

TENNE misile aana noo beetto ayeetiro afootto? Suꞌmise Ribiqaati. Yisaaqi widira higge martanni no. Galtesi ikkitaraati. Galtesi ikkitinohu hiittoonniiti?

Yisaaqi anni Abirahaami beettisira dancha galte abbara hasiꞌrino. Abirahaami, Yisaaqi Kanaꞌꞌaani seenne adhara dihasiꞌrino; korkaatuno kuni manni kaphphu maganna magaꞌnanno. Konni daafira Abirahaami soqqamaanchosi woshshe, ‘Fiixiꞌya noowa Kaaraani hadhe beettiꞌya Yisaaqira seenne hasi’ yii.

Hakkawotenni Abirahaami soqqamaanchi tonne gaala haaꞌre seeda doogo haꞌri. Abirahaami fiixi noowa iilla rahiti, bue noote mule fooliishshiri. Hatti yanna qooxeessu meenti waa dirrirara daannote; hawarrooti yaate. Abirahaami soqqamaanchi hakko heeꞌre Yihowa togo yee huucciri: ‘Aneranna gaallaꞌyara waa hayikkissanno beetto ati Yisaaqira dooroottota ikkito.’

Hakkawotenni Ribiqa waa dirridhara daggu. Soqqamaanchu waa xaꞌmirita, agara uyitusi. Hakkiinnino goodhino gaalla duuchchanta duubba geeshsha hayikkissu. Gaalu lowo waa aganno daafira, kuni daafursanno loosooti.

Ribiqa waa hayikkisse kaꞌuta, Abirahaami soqqamaanchi annise suꞌma xaꞌmise. Qoleno, insate gala dandaannotanna teꞌee xaꞌmise. Ribiqa togo yitusi: ‘Anniꞌya Baatueeliiti; minenke galattowi no.’ Abirahaami soqqamaanchi, Baatueeli, Abirahaami rodii Naakoori beetto ikkinota afino. Konni daafira Abirahaami fiixi ledo xaadisinosi daafira guluphphe Yihowa galati.

Hakko hashsha Abirahaami soqqamaanchi Baatueeliranna Ribiqa rodii Laabara, mayira dayinoro kulinsa. Baatueelinna Laaba, Ribiqa isi ledo hadhe Yisaaqi galte ikkitanno gede maahoyye yitu. Ribiqa hadhara xaꞌminiseta mayituyya? ‘Ee haꞌreemma’ yitu. Layinki barra gaalla guluffe, Kanaꞌꞌaani higgu.

Kanaꞌꞌaani iillituta hashshi. Ribiqa mittu manchi battalate milli yaanna affu. Hakku manchi Yisaaqiiti. Yisaaqi Ribiqa laita tashshi yiisi. Amasi Saara reyitunkunni sase diro calla ikkino daafira hakkawote dadilla diagurino. Xa kayinni Ribiqa lowo geeshsha baxinohura hagiidhi.