Haanna Magano Qaaqqo Uyie Yite Huuccidhino

Hilqaana yinanni Israeelaawichira Haannanna Finaana yinanniri lame galte noosi; kayinni isi Haanna roorse baxanno. Haanna ooso diꞌꞌiltino, Finaanara kayinni haammata ooso noose; konni daafira ise Haanna mishshanno. Hilqaana Maganoho kakkalo shiqishiꞌrara diru dirunkunni Seelo yinanni katama haꞌranno. Mitto barra insa hakko heeꞌreenna Hilqaana Haanna lowo geeshsha dadillitinota lai. Isi togo yiise: ‘Haanna wiꞌlitooti ballo. Ani ate lowo geeshsha baxeemmohe.’

Gedensaanni Haanna huuccatto assidhara insawiinni kaꞌe hadhu. Hururante wiꞌlitanni Yihowa kaaꞌlasera huuccidhu. Ise Yihowara togo yite xaꞌnitino: ‘Labbaa qaaqqo uyittoero, heeshshosi diro woꞌma soqqamannohe gede atera eemmahe.’

Kakkalaanote Biili Eeli, Haanna heqqifatte wiꞌlitanna laino daafira dimbitinoha lawinosi. Haanna Eelira togo yitu: ‘Mootichaꞌya, diiwe dimboomma. Ani qarramoomma daafira, konne qarra Yihowara hasaaphanni noomma.’ Eeli coyiꞌrinori soꞌro ikkinota afe, ‘Maganu huucciꞌroottare oohe’ yiise. Hakkiinni Haanna hagiidhitanni minisera hadhu. Mitto diro woꞌmikkinni Haanna labbaa qaaqqo iltu; qaaqqisera suꞌma Saamueeli yite fushshitu. Haanna qaaqqo ilte mageeshshi geeshsha hagiidhitinoha lawannohe?

Haanna Yihowara eꞌino qaale dihabbino. Saamueeli unuuna qana aguranni heeꞌreenna Maganoho soqqamanno gede qullaawa dunkaana haadhe hadhino. Ise Eelira togo yitu: ‘Yihowa konne qaaqqo aaera huucciꞌroomma; Isino huucciꞌroommaha uyinoe. Qaaqqiꞌya lubbote noo geeshsha Yihowaha ikkanno.’ Hilqaananna Haanna diru dirunkunni Saamueeli laꞌꞌara Seelo katama haꞌranno woyite, aanaanni uddiꞌrannota haaro uddano haaꞌre haꞌranno. Yihowa Haannara wole sase labballonna lame seenne uyinose.