Shiimu Qaaqqi Maganoho Soqqami

KUNI shiimu qaaqqi difaayyaho? Suꞌmisi Saamueeliiti. Kuni Saamueeli umo amadinohu Eeliiti; Eeli Isiraeelete kakkalaanote biilooti. Kuri Saamueeli Eeliwa abbite noori Saamueeli annaatinna amaati; annu suꞌmi Hilqaanaati; amate suꞌmi kayinni Haannaati.

Saamueelira shoolu woyi ontu diri geeshshalla ikkannosi. Ikkeennano xaate koye Yihowahu xaadooshshu dunkaani giddo Eelinna wolootu kakkalaano ledo heeꞌraraati. Hilqaananna Haanna konne danqa qaaqqo, Yihowara xaadooshshu dunkaanisira soqqamara abbitinohu mayiraati? Hanni laꞌno.

Shiimu diri albaanni Haanna lowo geeshsha dadillitanni no. Dadillitinohuno qaaqqo ilate lowo geeshsha hasidhe ila hoogginohuraati. Konni daafira mitto barra Yihowaha xaadooshshu dunkaana marte, ‘Yihowaꞌya, habbootie! Labbaa qaaqqo uyittoero, heeshshosi diro woꞌma soqqamannohe gede atera eemma’ yite huuccidhu.

Yihowano Haanna huuccatto macciishshi; iseno agannate gedensaanni Saamueeli iltu. Haanna qaaqqose lowo geeshsha baxxanno; qolteno muru heeꞌreenna Yihoware rosiissinosi. Iseno ayiddaannase, ‘Saamueeli unuuna qana aguranni heeꞌreennanni, Yihowara soqqamanno gede xaadooshshu dunkaana masseemma’ yitu.

Koye misilete aana laꞌneemmonte gede, Haannanna Hilqaana ise yiture assanni no. Saamueeli Yihoware seekkine rosiinsoonnisi daafira, Yihowara koye dunkaanisi giddo soqqamasinni hagiidhino. Diru dirunku Haannanna Hilqaana konni baxxino dunkaanira Yihowa magansiꞌratenna qaaqqonsa layiꞌrate dagganno. Qoleno Haanna martu kiiro gobbinosita anga harancho haaro uddano Saamueelira massitanno.

Diru lexxanni haꞌri kiiro Saamueeli Yihowahu xaadooshshu dunkaanira soqqamanni keeshshi; iso Yihowano mannuno baxannosi. Kakkalaanote biilo ikkinohu Eeli ooso Afiniininna Finihaasi kayinni bushuulleho. Lowo bunshe assitanno; wolootuno Yihowara hajajantannokki gede assitanno. Eeli insa kakkalaano ikkitannota hoola hasiissannasi, dihoolino.

Wedellichchu Saamueeli xaadooshshu dunkaani giddo assinanni bunshenni caaccaawe Yihowara soqqama diagurino. Yihowa baxannohu shiima manna calla ikkinohura, Yihowa mannu oosora coyiꞌra agurinkunni lowo yanna saꞌino. Saamueeli lophphita ikkinore hanni laꞌno.

Saamueeli xaadooshshu dunkaani giddo goxe heeꞌreeenna, mitte huuro baqqi assitusi. Isino, ‘Kuneeti noommo’ yii. Hakkiinnino gotti yee Eeliwa mare, ‘Woshshittoeni, kuneeti dawoommo’ yii.

Eeli kayinni, ‘Diwoshshoommohe; hadhe goxi’ yiisi. Saamueelino haꞌre goxi.

Hakkiinnino layinkimeeshsho, ‘Saamueeli!’ yitanno huuro daggu. Saamueelino gotti yee xaano Eeliwa dodi. ‘Woshshittoeni, kuneeti dawoommo’ yii. Eeli kayinni, ‘Beettoꞌya diwoshshoommohe; hadhe goxi’ yiisi. Saamueelino haꞌre goxi.

Sayikkimeeshshono, ‘Saamueeli!’ yitanno huuro daggu. Saamueelino Eeliwa dodi. ‘Kuneeti dawoommo; xaa wote woshshoottoe’ yii. Xa Eeli, Saamueeli woshshanni noohu Yihowa ikkinota afi. Konni daafira Saamueelira togo yee kulisi: ‘Xaano hadhe goxi; tenne woshshihero, “Soqqamaanchikki macciishshannona, Yihowa coyiꞌri” yii.’

Saamueelino Yihowa galagale woshshisita, Eeli kulinosire coyiꞌri. Yihowano Eelinna oososi qorichchishara kainota Saamueelira kulisi. Gedensaannino Afiniininna Finihaasi Filisxeemete ledo olantanni reyitu; Eelino tenne macciishshiti uwe goowa hiiqqame reyi. Konni garinni Yihowa yiinoti ikkitu.

Saamueelino lophphe, Isiraeelete goofimarchu mesaafintichcho ikki. Isi geedhita Isiraeelete manni, ‘Gashshannonke nugusa doorinke’ yee xaꞌmisi. Nugusinsa Yihowa ikkino daafira, Saamueeli hatto assa dihasiꞌrino. Ikkeennano Yihowa mannootu hasidhinore assannonsa gede Saamueelira kulisi.