Saamueeli Danchare Assa Diagurino

Saamueeli shiinqu qaaqqi noo warinni jammare, xaadooshshu dunkaanira soqqamanni heeꞌrino; hakkiichi mannu Yihowa magansiꞌrara haꞌrannowaati. Saamueeli xaadooshshu dunkaanira heeꞌra jammarinohu hiittoonniitiro afootto? Hanni balanxe amasita Haanna xagge ronso.

Haanna ooso ila lowo geeshsha halchitino; ikkirono iltukki lowo yanna saꞌino. Hakko daafira ila aannose gede Yihowa huuccidhu. Ise qaaqqo ilturo, xaadooshshu dunkaanira soqqamanno gede Yihowara eemma yite xaꞌnitino. Yihowa huuccattose macciishshe kaaꞌleennase, labbaa qaaqqo iltu. Ise qaaqqoho Saamueeli yite suꞌma fushshitu. Hakkiinnino albaanni coyidhino qaali garinni, Saamueelira sase woy shoole diro ikkisita Maganoho soqqamara xaadooshshu dunkaana massitu.

Hakkawaro xaadooshshu dunkaanira Eeli yinanni manchi no; isi kakkalaanote biilo woy sooreessa ikke soqqamannoho. Isiti lame labballu oosono hakko soqqantanno. Xaadooshshu dunkaani mannu Magano magansiꞌranno bayicho ikkinota albaanni ronsoommo; hakko daafira, hakkiicho mannu danchare calla assanno yee heda garaho. Eeli ooso kayinni lowo geeshsha bushinore assitanno. Saamueeli insa assitanno bunshe afino. Saamueelino insa gede bushare assinoha lawannohe?— Isi insa gede ikkikkinni danchare assanni heeꞌrino; annisinna amasi rosiissinosihu danchare assanno gedeeti.

Eeli bushare assitannota lamenta oososi ma assiro woyyanno yaatto?— Isi oososi qorichishiro woyyanno. Qoleno Maganu mine soqqantannota hoola hasiissannosi. Eeli kayinni hatto diassino; hakko daafira, Yihowa isono oososino hanqi. Yihowa insa qaxxaasate kai.

Mitto hashsha Saamueeli goxe heeꞌre, ‘Saamueeli!’ yite woshshitanno huuro macciishshi. Isi goxinowiinni kae Eeliwa dode mari; Eeli kayinni, ‘Ani diwoshshoommohe’ yiisi. Hakkuyi gedensaanni kuni coyi lame hige ikki. Sayikkimeeshshoho, Eeli Saamueeli togo yii: ‘Xaano hatto yite woshshitanno huuro macciishshittoro, “Yihowa, macciishshanni noommona coyiꞌri ballo” yii.’ Saamueelino yiinosita assi. Hakkiinnino Yihowa Saamueeli togo yii: ‘Eelinna minisi manna assitino bunshera qaxxaasammora kaoommota Eelira kuli.’ Saamueeli tenne sokka Eelira kula waajjinoha dilawannohe?— Ee, waajjino. Ikkirono, Yihowa kuli yiinosire Eelira kulino. Yihowa yiinori woꞌmino. Lamenti Eeli ooso reyitu, Eelino reyi.

Saamueeli ninkera dancha lawishsha ikkino. Isi wolu manni bushare assanna lainoha ikkirono, danchare assino. Atino Saamueeli gede danchare assatto? Hatto ikkiro, Yihowano annakkinna amakkino hagiirsiisatto.