Yihowa Saamueeli Hasaawisi

Kakkalaanote Biili Eelira lame ooso noosi; insa qullaawu dunkaani giddo kakkalaasine ikkite soqqantanno. Suꞌminsa Afiininna Finihaasiiti. Insa Yihowa seera diayirrissanno, hattono manna beebba assidhanno. Israeelete manni Yihowara kakkalo abbiꞌranno yannara, Afiininna Finihaasi dancha dancha maala uminsara adhitanno. Eeli oososi assitannore macciishshinoha ikkirono diseejjinonsa. Yihowa insa konne coye assitanna sammi yee lainoni?

Saamueeli qaaqqo ikkirono, Afiininna Finihaasi assitannore diassino. Isi Yihowa hagiirsiisino. Mitto hashsha isi goxe heeꞌreenna ‘Saamueeli!’ yine woshshinisi. Saamueelino dodanni Eeliwa mare, ‘Kune dayommo’ yii. Eeli kayinni “Ani diwoshshoommohena marte goxi” yiisi. Saamueelino haꞌre goxi. Xaano ‘Saamueeli!’ yitanno huuro macciishshi. Saamueeli sayikkimeeshsho hattenne huuro macciishshita, Eeli Saamueeli woshshanni noohu Yihowa ikkinota huwati. Eeli, Saamueeli galagale tenne huuro macciishshiro togo yaanno gede kulisi: ‘Yihowa, borojjichikki macciishshanni noona coyiꞌri.’

Saamueeli galagale haꞌre goxi. Hakkiinni ‘Saamueeli! Saamueeli!’ yitanno huuro macciishshi. Saamueeli togo yee qoli: ‘Ani soqqamaanchikki macciishsheemmona coyiꞌri.’ Yihowa Saamueelira togo yii: ‘Eelira, isonna minisi manna qorichishammora kaoommota kuli. Isi oososi qullaawu dunkaaniꞌya giddo busha coye assitanni noota afanni heeꞌre diseejjino.’ Layinki barra, Saamueeli bashshosinte gede, qullaawu dunkaani cufana fani. Isi Yihowa yiinosire Eelira kula waajji. Ikkollana Eeli togo yee xaꞌmisi: ‘Beettoꞌya, Yihowa kulinoheri maati? Mittoreno maaxittokki kulie.’ Saamueeli Yihowa kulinosire mittoreno maaxikki Eelira kuli.

Saamueeli lophe lowoha ikkitano Yihowa isiwiinni dibaxxino. Israeelete daga baala, Yihowa Saamueeli masaalaanchonna daanya asse doorinota affino.