Wocawaaro

Abirahaami ledosi noo soqqamaanosiwiinni baxxi wote togo yiinonsa: “Kiꞌne harrichu ledo kowiicho agarre; qaaqqunna ani kayinni kaaira haꞌne magansiꞌne hingeemmo.” (Kal. 22:5) Abirahaami hatto yaasi mayyaate? Yisaaqi kakkalo ikkannota afanni heeꞌrenni higanno yee soqqamaanosi doganni no yaateni? Deeꞌni. Qullaawu Maxaafi Abirahaami hakkawote maa hedinoro huwatate kaaꞌlannonkere kulannonke. (Ibi. 11:19) Abirahaami “beettosi Maganu reyotenni nafa kayisara dandaannota wodanchino.” Ee, Abirahaami kao noota ammanino. Isi Yihowa isinna Saara geedhi gedensaanni nafa ila dandaanno gede kaaꞌlinonsata afino. (Ibi. 11:11, 12, 18) Abirahaami Yihowara hoogamannosiri mitturino nookkita huwatino. Hakko daafira, hakkoye kabbaade barra ikkiri ikkirono, Yihowa eino qaali baalunku woꞌmanno gede baxanno beettisi galagale heeshsho afiꞌrannota Abirahaami dihuluullamino. Ee, Abirahaami “ammana noonsarira baalaho [annaho]” yaamamasi garankolla!—Rom. 4:11. w16.02 1:3,13

Maganu Saaooli nugusa asse shoominoha ikkirono, Saaooli gedensoonni hajajamannokkiha ikkino daafira Yihowa iso facci asse agurino. (1 Sam. 15:17-23) Maganu Saaooli zuufaanetenni bayichonko hoolinokki daafira, isiti gariweelo ikkito gashshino mannira qarra kalaqqino. “Yihowa zuufaanera” ofollinohu kuni nugusi bushare assanno yannara hakko mannira Maganoho ammanama qarra ikkitino. (1 Dud. 29:23) Saaooli beetti Yoonaataani kayinni Yihowara ammanaminoha ikkino. Ninkeno Yoonaataani gede, mittu silxaanete aana noo manchi ayirrinyu hasiisannosikki gede ikkiro nafa, silxaane noonsarira Maganu yiinonke garinni deerrunni maahoyye yine galle Yihowara ammanammoommota leellisha dandiineemmo. Lawishshaho, mittu mangistete gashshaanchi danchu amanyooti nookkiha ikkara dandaanno; ikkirono, “aliidi gashshaanora” deerrunni maahoyye yine galleemmo daafira silxaanesi ayirrinseemmo. (Rom. 13:1, 2) Isinni Yihowa silxaane uyinonsare baalanka ayirrinse isira ammanammoommore ikkinoommota leellinsheemmo.—1 Qor. 11:3; Ibi. 13:17. w16.02 3:5, 6,8

Qullaawu Maxaafi Yihowa manni baalu isira soqqamate, ‘insaneeto fajjotenni shiqishshannota’ kulannonke. Konnira mittu cuuamate kaino manchi, togo assate kainohu isi umisi hasiꞌre ikkinotanna teꞌee buuxa hasiissannosi. Konnira ateneeto seekkite layiꞌra hasiissannohe. Mayira? Korkaatuno wedellu lophanno gari babbaxinoha ikkara dandaanno. Lawishshaho, ati lophoottohu halaalu mine ikkara dandaanno. Lowo diro, batinyu manni lawishshaho darawokkinna roduuwikki cuuamanna laoottoha ikkara dandaanno. Hatto ikkiro qoropha hasiissannohe coyi maati? Cuuamate iilla hasiissanno diri noohanna gale hose baalunku wedelli cuuamansa gattannokkita ikkitinokkihu gede assite hedattokki gede qorophi. Yihowa qixxeessinote cuuamate qixxaawora gara ikkitino lao noohetanna teꞌee buuxa dandaattohu hiittoonniiti? Cuuama lowo geeshsha hasiissannota ikkitinohu mayiraatiro ganyite hedi. w16.03 1:11, 12

Kiristaanu songo miilla ikkinoommohura konne koyishsha iillinshe dancha guma afiꞌra dandiineemmohu hiittoonniiti? ‘Ninke ninkeneewa sumuu yine mitteenni quraanyammummoro’ callaati. (Efe. 4:16) Dandaaminke deerrinni Maganu Mangisteha dancha duduwo batinyu mannira kulate, sabbakate looso qinaawino garinni loosa hasiissannonke. Konnira biddishsha uyinanninke. Alamete deerrinni songotenni afiꞌneemmo biddishshi tennera kaaꞌlannonkeho. Qanchu soqqansho gambooshshi gedensaanni Maganu Mangiste sokka mannaho duduwate fulleemmo. Afiinkenninna Qullaawu Maxaafi aana xintantinote lowo miliyoone ikkitanno borruwa widoonni tenne sokka dudumbeemmo. Baxxinohu sabbakate zamachi yannara uyinannihe biddishsha harunsate sharramatto? Hatto assattoha ikkiro, Ajuuja 14:6 aana kullihu ‘iimi mereero buuwanno sokkaanchinna’ Maganu Mangiste sokka duduwannohu lowo miliyoone manni ledo buusamatto. w16.03 3:4, 5

Qullaawu Maxaafi albillitte haaro alamera heeꞌneemmo gara kulanno biddishsha uyinanninketi haaro xaaxo faꞌnantannota kulannonke. Reyotenni kaꞌannorino ikko mannu ooso baalanti tenne xaaxo xiinxallite Maganu fajjo maatiro affanno. Tini xaaxo Yihowa hedo daafira roore egenno afiꞌneemmo gede kaaꞌlitannonke. Hatte yannara mannu oosora Maganu ayyaaninni borreessamino Qaali daafira noonsa egenno lexxitanni hadhanno; qoleno xaaxo xiinxallitanno yannarano wole mashalaqqe afidhanno; konnira uulla gannate ikkitanno yannara mannu ooso roduuwansa baxillunninna ayirrinyunni amaddanno. (Isa. 26:9) Hanni Nugusu Yesuusi Kiristoosi biddishshi garinni ronseemmohanna wole rosiinseemmo rosi mageeshshiha ikkannoro hedi! Tenne “xaaxora borreessamino coye” seekkite harunsitannori hegere geeshsha heedhanno. Jeefote fonqoli yannara Maganoho ammanantinota leellishshannore Yihowa suꞌmansa “heeshshote xaaxo” giddo hegerera borreessanno. Ninkeno hegere heeshsho afiꞌra dandiineemmo! w16.03 4:19, 20

Temokkiro noonsa cimeeyye, labballo roduuwa dirinsa garinni songote giddo mito looso uyine shiimaaddu heedheenna qajeelsa jammara hasiissannota xawissino. Konni garinni anjenni qajeelsa, wedellootu hedonsa bebbeehantanno gede assannori batiꞌrannote qeedhimmate yannarano ikkiro ayyaanaamittete mixo harunsitanno gede kaaꞌlitannonsa. (Far. 71:5, 17) Cimeeyye mittu rodii songote giddo soqqamate kaꞌꞌanno gede assate, loosannore calla ikkikkinni hakku loosi mayira hasiisinorono kultanno. Cimeeyye loosu loosamanno korkaata kulte Bayiru Rosiisaanchiha Yesuusi lawishsha harunsa dandiitanno. Lawishshaho, Yesuusi hawaariyaatesi manna rosaano assitanno gede hajajara albaanni, hattee hajajo wonsha hasiissannonsahu mayiraatiro kulinonsa. Togo yiinonsa: “Silxaane baalanta iimanna uulla uyinoonnie.” Hakkiinni aanche togo yiino: “Konni daafira, hadhine duuchante daga manna . . . rosaano asse.”—Mat. 28:18, 19. w15 4/1 2:5, 6

Umi xibbi diro Roomaho Kiristaana ikkino mannira yanna kabbaadete. Hakkawaro Roomu daga, Kiristoosi harunsaano 64 M.D. katama giirtino yite duume illenni laꞌannonsa. Hawaariya Phaawuloosi Roomaho layinkimeeshsho usuraminohu hattee qarru yannaraati. Hakkawote kaaꞌlasira shiqino Kiristaani nookka? Phaawuloosi kaaꞌlasira daannohu heeꞌrannota huluullamikki digatino; korkaatuno isi hakkuyira albaanni tuncu yiinosire togo yee Ximootewosira kulino: “Kassanseennae umi gargarooshsheꞌya shiqishiꞌrummo yannara, baalunku agurte hadhinoe ikkinnina anera kaaꞌlinohu dino.” (2 Xim. 4:16) Ikkirono, Phaawuloosi kaaꞌlannoehu mittuno dino yee hedinokkita coyiꞌrino. Isi hakkawote iillanni noosi qarranna albillitte iillasira dandaanno coye Yihowa kaaꞌlonni dandee saꞌꞌannota addaxxino. Isinni bayichonko togo yiino: “Mootichu bushu loosi baalunkunni gatisannoe.” (2 Xim. 4:18) Ee, Phaawuloosi mannuwiinni gari kaaꞌlo afiꞌra hoogiro nafa, Yihowanna Beettisi uyitannosi kaaꞌlo addaxxino! w15 4/1 4:1-3

Yesuusi ilami yannara, Sheexaanu hakku qaaqqi lophe Maganu qaale eino Mesihicha ikkannota afino. Sheexaanu qaaqquulle shaa horo kaajjilleho yee hedakka? Isi assannori gara ikkirono ikka hoogirono tenne daafira dihedanno. Sheexaanu qaaqqo Yesuusa shiishiishate kaino. Hiittoonni? Nugusu Heroodiisi ayyaanto dagge “ilaminohu Yihudootu nugusi hiikko no?” yite xaꞌmitusita baasa masino; qoleno iso shaate mixiꞌre kaino. (Mat. 2:1-3, 13) Nugusu hedosi woꞌmitanno gede, Beeteleemetenna qooxeessaho heedhannore lame dironna hakkuyi woro noo qaaqquulle baalanka shine gundanni gede hajajino. (Mat. 2:13-18) Yesuusi hattee goofonni gatino; kayinni kuni assooti diininke Sheexaanu daafira maa kulannonke? Daawuloosi mannu lubbo horonta mararannokkita huwata dandiineemmo. Iso qaaqquullu nafa dimararsannosi. Sheexaane ‘ittananno doobbiichooti’ yaa garankolla. (1 Phe. 5:8) Isi urungicha ikkinota dea dihasiissannonke! w15 5/1 1:10,12, 13

Laꞌnoommokki coye ikkanni noohu gede assine hedate dandoo Maganu uyinonke aamamooshsheeti. Tini dandoo dancha soma fushshiꞌne qarrunni gatatenna danchare quqquxamme agadhate kaaꞌlitannonke. Yihowara albillitte ikkannore balaxe afate dandoo noosi; isi Qullaawu Maxaafi giddo albillitte ikkannore balaxe kulinonke. Ninke albillitte afiꞌneemmo coyibba ikkitanni noohu gede assine heda dandiineemmo. Laꞌnoommokki coyibba ikkitanni noohu gede assine hedate dandoonke ammana heedhannonke gede kaaꞌlitannonke. (2 Qor. 4:18) Haanna qaaqqose Saamueeli xaadooshshu dunkaanira soqqamara hakkira massitanno yanna ikkanni noori gede assite hedase haaqete hagiirre diꞌꞌikkitino. Tini hedose wonanni assitara murcidhe kaꞌinoreeti; konni garinni hedase xanose wonshitanno gede jawaante ikkitinose. (1 Sam. 1:22) Maganu uyinonke hexxo woꞌmitanni noohu gede assine hendeemmoha ikkiro, hendoommori woꞌmikki gatannore diꞌꞌikkino. (2 Phe. 1:19-21) Hundi waro heeꞌrinohu batinyu ammanamino manni Maganu uyinonsa hexxo woꞌmitanni noohu gede asse hedinoti dihuluullissannote. w15 5/1 3:1-3

Magano lashshi assine agurre dureessa ikkate haaqiiꞌra qoropha hasiissannonke. Yesuusi “umisira jiro duuꞌnannohu Maganu albaanni kayinni dureessa ikkinokki” manchi gowwa ikkinota lawishshunni coyiꞌrino. (Luq. 12:16-21) Yihowara iso hagiirsiisannore assineemmo wote tashshi yaannosi. (Law. 27:11) ‘Iima jiro duuꞌnine’ iso hagiirsiisa dandaanke lowo geeshsha hagiirsiissannonke! (Mat. 6:20) Addaho, wolu coyi baalunkunni roore muxxe jironke Yihowa ledo noonke jaaloomaati. ‘Uullate aana jiro duuꞌnate’ sharrammeemmoha ikkiro, roore yaandeemmo. (Mat. 6:19) Yesuusi “tenne alame yaaddonna jironniti dogate wolqa Maganu Mangiste qaale” qalxite amaddannota coyiꞌrino.—Mat. 13:18, 19, 22. w15 5/1 4:15, 16

Maganu wolqa Yesuusi Kiristoosi lowo maalale loosanno gede assitinosi. Isi dhiiga calla ikkikkinni duuchu dani dhibbanna addi additi bisu xeꞌne noonsa manna hursino. Yesuusi manna hursi wote gawajjamino biso riqiwate wolu manchi biso horoonsiꞌra dihasiissinosi. Isi gawajjamino biso umosi huranno gede assino! Qoleno, isi xiwantinore bayichonko hursino; wole agurina fafowa heeꞌre nafa hursino woti no. (Yoh. 4:46-54) Tini dhagge ikkitanno maalale maa rosiissannonke? Xa iima Nugusa ikke noohu Yesuusi, mannu oosora geeddanno hurre abbate wolqa calla ikkikkinni hasattono noosita rosiissannonke. Yesuusi manna shaqqillunni amadino gara huwatanke albillitte haaro alamera, “Isi mishantinorenna buxane mararanno” yitannoti Qullaawu Maxaafi masaalo woꞌmitanno yine addaxxineemmo gede assitannonke. (Far. 72:13) Ee, Yesuusi hakkawote huwantinore baala kaaꞌle wodanisi hasatto wonshanno. w15 6/1 2:6

Batinyu manni Mootichu rosiisino huuccatto seekke afino. Minunni mine haꞌne soqqammeemmo wote qaete annira Maganu Mangiste addinta noo gashshoote ikkitinotanna albillitte uulla gannate assitannota kulate duucha wote tenne huuccatto horoonsiꞌneemmo. Woy tenne huuccattora hanafote noo hedo horoonsiꞌne Maganoho ‘qullaawa’ woy xalala ikka hasiissannosihu umisi suꞌmi noosita kula dandiineemmo. (Mat. 6:9) Yesuusi tenne huuccatto Suꞌmu Kiristinna harunsitannori assitannohu gede wirro wirro qoltine huuccidhe yiinoni? Diyiino. Yesuusi tenne huuccatto rosiisara albaanni togo yiino: “Huuccidhinanni wote, yitinoonnire calla yitinoonte.” (Mat. 6:7) Isi gedensaanni hige tenne huuccatto wirro qummi assinoha ikkirono, mittu gari qaalla dihoroonsiꞌrino. (Luq. 11:1-4) Tini huuccatto mayi daafira huucciꞌranna huuccattonke giddo maa balaxisiisa hasiissannonkero afate kaaꞌlitannonke. Konni daafira, tenne huuccatto lawishshu huuccatto yaa garaho. w15 6/1 4:1, 2

Yihowa jawaante ikkannonkeha hattono fonqolo qeelate kaaꞌlannonkeha wolqaataamo qullaawa ayyaanasi aannonke. Qoleno, Maganu Qaalesinna songo horoonsiꞌre xeertiꞌra hasiissannonke coye lawishshaho, gari geeshsha hasiisannokkihu maalaamittete coyira lowo yanna, woxenna wolqa guda qorophineemmo gede amaalannonke. Alba suwisaano ikke soqqaminori Ispeninna Yaani lame qaaqquulle afiꞌrino. Ispeni togo yiino: “Xa albi gede ayyaanaamittete loosira lowo yanna sayinseemmokki daafira fonqolu giddora eꞌneemmokki gede ganyine Yihowa huucciꞌneemmo. Yihowa ayyaanaamittenke agadhineemmo gedenna soqqanshote diinaggaawa agurreemmokki gede kaaꞌlankera huucciꞌneemmo.” Yannankera lowo fonqolo ikkinohu wolu coyi teeda baꞌino misilla laꞌꞌate. Mitootu konni fonqoli giddora eꞌinohu surrensa bushare hiincitanno gede assidhino daafiraati. Ikkirono, lowo kume ikkitanno roduuwinke assitinonte gede ninkeno togoo coyiwiinni xeertiꞌra dandiineemmo.—1 Qor. 10:13. w15 6/1 5:15, 16

Kaphu ammaꞌno dirijjitta baꞌu gedensaanni mayi ikkanno? Hatti yanna wodaninke hiittoohoro bande anfannita ikkitanno. Hakkawote rooru manni “ilaallate aana noota jajjabba kinna” yaano mannu dirijjitta golonsa assiꞌrate woꞌnaalanno. Yihowa soqqamaano kayinni lawishshu yaattonni, isi qixxeessinonsawa xooqqanno. Umi xibbi diro, qarru haraꞌmiti shiima yanna Yihudootu gudisidhe Kiristaana ikkitannota diꞌꞌikkitino. Hatti yanna wonanni Kiristaana ikkite noori Yesuusi biddishshira hajajante ilaalla xooqqannote. Hatteente gede, albillitte bayiru qarri yannara heedhannote qaxaqaꞌa yitino woggara lowohu haaru manni halaalu magansiꞌrawa lolahanno yine dihendeemmo. Hatteentenni, hatti yanna halaalunni Magano magansidhannori baalunku iso baxxannotanna Kiristoosi roduuwa irkissannota leellishshanno faro ikkitanno.—Mat. 25:34-40. w15 7/1 2:7

Lophootto gari woy heeꞌrootto qooxeessi ilamootto gobba woy qooxeessa woluwiinni roorsite laꞌꞌatto gede assinohe? Togoo hedo xaano giddokki no? Kiristaanu mitte gobba woy qooxeessa woluwiinni roorse laꞌꞌa dihasiissannonsa. Ikkirono, ati xaano wole gobba manna, bude, afoo woy sircho dancha illenni laꞌꞌattokkihalla ikki? Hatto ikkiro, meessi gobba woletewiinni roorse baxanna woloota mulla kaꞌne giwa Yihowa ma garinni laꞌꞌannoro hiincakki lowore kaaꞌlitannohe. Tenne hajo daafira haja assite xiinxalli. Hakkiinni Yihowa wole manna isi laꞌꞌanno garinni laꞌꞌate kaaꞌlannohe gede huucciꞌri. (Rom. 12:2) Konne assanke hasiissinote; korkaatuno Yihowa soqqamaano woꞌmantera ledonsa loossannoriwiinni, ledonsa rossannoriwiinni, olliichinsawiinni, fiixinsawiinni woy wolootuwiinni baxxite fula gidde ikkitannonsa gede assannori mito wote tuncu yaansara dandaanno. Ikkirono, hattoo wote baxxine fula hasiissannonke! w15 7/1 3:14, 15

Yihowa eeggifante huucciꞌneemmo huuccatto macciishshanno; qoleno woleho leeltannokkiti giddonke hedo isira leeltannosi. Isi huuccattonkera dawaro qolanno gari ninkera baꞌꞌannokki baxilli noosita leellishanno. Maganu Qaali giddo borreessantino huuccattonni lowore rosa dandiineemmo. Konni daafira, saꞌne saꞌne maatete magansiꞌranke yannara tenne huuccatto xiinxalla kaaꞌlitankera dandiitanno. Hundiri Yihowa soqqamaano giddonsa hedo isira hasaaphitino gara hiincanke huuccattonke woyyeessiꞌrate kaaꞌlitannonke. Lawishshaho, Yoonaasi jawa qulxuꞌmicho godowira heeꞌre eeggifate huucciꞌrino huuccatto hedde. (Yon. 1:17–2:10) Salamooni beetemeqidesete maasso yannara woꞌmu wodanisinni Yihowara shiqishino huuccatto laꞌe. (1 Mot. 8:22-53) Yesuusi rosiisinota lawishshu huuccatto hiince. (Mat. 6:9-13) Roorenka kayinni, ganyitine “dhiwinoꞌne coye Maganoho kulle.” Hatto assitinoro, “wodancha baalanta roortannoti Maganu salaame, wodanaꞌnenna surreꞌne . . . agartanno.”—Fil. 4:6, 7. w15 8/1 1:11, 12

Haaro alamera, uulla gannate assate, reyotenni kaino manna rosiisatenna Yihowara mannu oosora noosi alaami ledo sumuu yaannore assate kaaꞌlannonke biddishsha dirijjitesiwiinni afiꞌneemmo wote tashshi yaannonke. Ikkina hatte yannara hakkeeshshi geeshsha baxisannonkekki loosolla uyininke? Uyinanninke biddishsha harunsine asse yinanninkere assineemmo? Hakkiinni saꞌneno loosonke hagiirrunni loonseemmo? Ninke giddo rooriidi ee yine qolleemmoti dihulullissannote! Ikkina, xaa yannara tiokiraasete biddishshira ayewoteno hajajammanni heeꞌnoommo? Konne assineemmoha ikkiro, Yihowa gashshooti hunda afiꞌneemmote hegere heeshshora qixxaambanni heeꞌnoommo yaate. Haaro alamera afiꞌneemmo heeshshora qixxaawate, xaa yannara Yihowa dirijjite uyitannonke biddishshira maahoyye yine gala calla ikkikkinni afiꞌnummo coyinni kassi yaanna sumuu yine loosa rosa hasiissannonke. Yannankera albisa ikkite loossannori ledo buusammeemmoha ikkiro, lawishshaho dirijjitete giddo haaro loosu qeecha uyinanninke wote kassi yineemmohanna hagiidhineemmoha ikkiro, haaro alamerano hattoo akati heeꞌrannonketa heda dandiineemmo. w15 8/1 3:6, 7

Bushu jaaloomi Selemoonira hayyosi baꞌanno gedenna halaalu magansiꞌra giddonni fulanno gede assinosi. (1 Mot. 11:1-6) Ee, Yihowa magansiꞌrannokki manchi ledo adhamate hedo noonsa Kiristaani tenne lae qoropha hasiissannonsa! Adhami gedensaanni Maganu soqqamaancho ikkinohuna? Qullaawu Maxaafi togo yaanno: “Minaamuwa, qaaleho hajajamannokki minaanni heeꞌriro mitto qaaleno coyiꞌnikki minaamuwinsa amanyootinni qeelamanno gede, minaanniꞌnera maahoyye yitine galle.” (1 Phe. 3:1) Tenne yinoonnihu Kiristaana ikkino minaamuwira ikkirono, tini amaale ammantinokkita adhe heeꞌre Yihowa soqqamaancho ikkino minaannirano kaaꞌlitannote. Qullaawu Maxaafi yaanni noori goꞌlinore diꞌꞌikkino: Dancha minaanna woy minaama ikki; qoleno Maganu adhanna adhama lainohunni fushshino seeri garinni heeꞌri. Ammantinokkiri batinyu minaannuwi woy minaamuwi, galtensa Maganu seera rossu gedensaanni woyyaabbino gara laꞌe halaalu minira daggino. w15 8/1 4:15, 16

Mitu xibbira xagichu nookkiha ikkara dandaanno. Konni daafira mannu tini xagga dhibba hursitannote yiino daafira calla adhineemmokki gede qoropha hasiissannonke. Phaawuloosi ayyaanunni togo yee borreessino: “Quwa saꞌinannikkire ikkitinoonniti manna baalaho leeltona.” (Fil. 4:5) Quwa saꞌneemmokkire ikkanke fayyimmanke agadhate yannanke gudinse uyine ayyaanaamittete coye mulaaginse agurreemmokki gede kaaꞌlitannonke. Heeshshonke giddo qaru coyi fayyimmanke agadha ikkituro, uminke daafira calla hendeemmore ikkineemmo. (Fil. 2:4) Wolu baalunku coyinni roore hasiisannohu ayyaanaamittete coyeeti; konni daafira quwa saꞌne fayyimmanke daafira yaada dihasiissannonke. (Fil. 1:10) Fayyimma agadhanna wole hattoo hajo lainohunni woyyannonkere uminke doodhanna doorshinke abbannore dandaa hasiissannonke. w15 9/1 2:8,10

Yihowa “halaalu Maganooti.” (Far. 31:5) Isi oososi baxanno daafira, insa woyyaabbino heeshsho heeꞌra dandiitanno gede kaaꞌlannonsahu halaalu xawaabbi waraꞌa yee xawannonsa gede assanno; qoleno iso garunni magansiꞌra dandiineemmohu hiittoonniitiro rosiisannonke. Yihowa hiikkonne halaale xawisinonke? Tini baxannonketa leellishshannohu hiittoonniiti? Umihunni, Yihowa isi daafira halaale ikkinore kulinonke. Isi gillete suꞌmasi egensiisinonke; isinni suꞌmisi Qullaawu Maxaafi giddo wole baalante suꞌmuwanni roore duucha basera no. Konni garinni, isi anfeemmosi gede asse ninkewa shiqino. (Yai. 4:8) Qoleno, Yihowa akattasinna isi hiittoo Maganootiro anfeemmo gede assino. Illete leeltannoti kalqete alamera noo coyibba Yihowa wolqanna hayyosi leellishshannonte; Qullaawa Borro kayinni taashshosinna gawalo nookki baxillesi kultanno. (Rom. 1:20) Isi wolqaataamonna hayyicha Anna calla ikkikkinni, taashsho baxannohonna baxillaanchoho; tini qolte oososi isi ledo muli jaalooma kalaqidhara hasiꞌrannota leellishshannote. w15 9/1 4:8, 9

Batinyu manni, assineemmori Maganoho didhiwanno yee hedanno. Isinni mitu manni heeshshonsa giddo baxi coyino ikkiro Maganu hakkoye dilaꞌꞌanno yaanno. Lawishshaho, Bocaasa 2013nni buutote hambabalatte Filippiinsi gobba gantu gedensaanni mittu jawu katami kantiiba ikkino manchi, “Maganu wolewa maꞌlikki digatino” yiino. Wolootu qolte assitannore Maganu lae afannokkihu gede assite heddanno. (Isa. 26:10, 11; 3 Yoh. 11) Kuni manni hawaariya Phaawuloosi “Maganoho ayirrinye aa gara labbe [dileeltinonsa]” yii manni gedeeti. Togoo mannooti “finqille, cubbu, hafuurre, bunshe . . . woꞌmitinonsareeti.” (Rom. 1:28, 29) Ninkena? Aleenni kulli manni gede ikkikkinni, Yihowa assineemmo coye baalanka laꞌꞌannota anfoommo. Ikkina ninkeno heeshshonke giddo isi kaaꞌlonna wolqa huwantanni heeꞌnoommo? w15 10/1 1:1-3

Ammana noonketa leellinsheemmoti mitte kaajja doogo sabbakate looso loosate. Hatto yineemmohu mayiraati? Konne looso loosanke, Maganu yiino garinni tenne alame goofimarchi ‘keeshshikki’ rahe daanni noota ammanneemmota leellishshanno. (Imb. 2:3) Ammananke jilba bikka dandiineemmoti mitte doogo, soqqansho mageeshshi geeshsha soqqama hasiꞌneemmoro layiꞌrate. Wolqanke assitu deerrinni soqqammanni, hakkiinnino saꞌne soqqanshonke halashshiꞌrate faro hasiꞌnanni heeꞌnoommo? (2 Qor. 13:5) Ee, ‘gato’ afiꞌra dandiineemmo gede ammananke ‘faajjete duduwanke’ wodaninke giddo ammana noota leellishshanno. (Rom. 10:10) Heeshshonke giddo qarru iillannonke woteno ammana noonketa leellisha dandiineemmo. Iillinonke qarri dhibba, hexxo mudha, quwa saꞌino yaaddo, buxima woy wolere ikkirono, Yihowanna Beettisi “kaaꞌlo hasiissannonke yannara” kaaꞌlitannonketa addaxxineemmo. (Ibi. 4:16) Yihowa kaaꞌlannonke gede huucciꞌneemmoha ikkiro, togoo ammana noonketa leellinshanni heeꞌnoommo. w15 10/1 2:12-14

Qullaawa Maxaafakki haaꞌne hoollanniheha ikkiro nafa, wodanikkira wodhootto coye, lawishshaho baxatto qummeeshshuwanna Mangistete faarsonke hiincattota kayinni ayino hoolahera didandaanno. (Soq. 16:25) Maganu ayyaani alba rosoottoha dancha coye qaagatto gede kaaꞌlahera dandaanno. Konni daafira lamalate giddo Qullaawa Maxaafa nabbawattotanna hiincatto yanna gaaꞌmite xaanni qixxaawi. Qoleno Yesuusi coyiꞌrinorenna assinore hiincateno yanna hasiissannonke. Lowo geeshsha egennantinote Qullaawu Maxaafi maxaaffa giddo mitte Yesuusi heeshshorenna soqqanshore kultanno Wongeeluwa ikkitinoti egennantinote. (Rom. 10:17; Ibi. 12:2; 1 Phe. 2:21) Maganu manni Yesuusi uullate aana heeꞌre assinorenna heeꞌrino yanna aante aantesenni kultannota kaajja borro afiꞌrino. Hakko iso hatte borro giddo mitte mittente fooliishshora noota fiixoontanno xagge kultanno qummeeshshuwa seekkine nabbambe hiincineemmoha ikkiro lowore kaaꞌlitannonke.—Yoh. 14:6. w15 10/1 4:11, 12

Yesuusi baxillaanchohonna ammanamino jaalaati. Biꞌree waro, roore wote mootichu borojjootisira giddiidi hedosinna godowisita fushshe dikulanno. Ikkollana, Yesuusi ammanantino hawaariyaatesira mootichano jaalano ikkinota leellishino. Isi insa ledo yanna sayisino, godowisita fushshe kulinonsa, qoleno insa wodaninsara noo hedo kultusi yannara macca wore macciishshino. (Maq. 6:30-32) Konni garinni baxillunni hasaawansa Yesuusinna hawaariyaatesi mereero muli jaaloomi heeꞌranno gedenna insa albillitte uyinanninsa loosira qixxaabbanno gede kaaꞌlitinonsa. Yesuusi muxxe rosaanosinna jaallasi Yihowara diinaggaambe soqqamme afiꞌnanni hagiirre afidhara halchino. Hakko daafira, isi rosaanosi ayyaanaamittete loosi batiꞌrinonsare ikkitara hasiꞌrino. Ee, Yesuusi rosaanosi diinaggaabbe manna rosaano assitanno gede jawaachishinonsa! Qoleno, loosinsa qinaawanno gede kaaꞌlansara qaale einonsa.—Mat. 28:19, 20. w15 11/1 2:3,5

Yihowa akatta giddo roorannohu baxilleho. (1 Yoh. 4:16) Isi kalaqo giddo umihu Yesuusaati; Yesuusi iima isi ledo kiirre tunqannikki diro heeꞌrino, hattono Maganunnita baxillu doogo rosino. (Qol. 1:15) Yesuusi uulla noo waro calla ikkikkinni heeshshosi woꞌmantenni baxillaanchu Magani Yihowa hiittoohoro seekke huwatinota leellishino; qoleno, Maganu baxille harunsino. Konni daafira, Yihowanna Yesuusi anga noo gashshooti hegerera baxillu nooha ikkannota addaxxa dandiineemmo. Yesuusi Higgete giddo baalantenni roortanno hajajo hiitteetiro xaꞌminosi manchira togo yee qolino: “‘Maganokki Yihowa woꞌmu wodanikkinni, woꞌma lubbokkinninna woꞌma surrekkinni baxi.’ Baalanta roortannotinna umi hajajo tenneeti. Layinkitino tenne labbannotenna togo yitannote: ‘Jaalakki umikki gede assite baxi.’” (Mat. 22:37-39) Yesuusi, Yihowa baxatenni aantinoti jaalanke baxa ikkitinota kulinota wodanchi. Tini qolte mannu baalunku ledo noonke aantera baxillu lowo geeshsha hasiisannoha ikkinota leellishshanno. w15 11/1 4:1-3

Maganu ayewoteno manna hasaawisinohu Ibirayisxete afiinni calla diꞌꞌikkino. Baabiloonete qafado gedensaanni, mitu mitu Maganu manni barru baala coyiꞌrannohu Aramayikete afiinniiti. Masaalaano Daanieelinna Ermiyaasi hattono kakkalaanchu Izira Qullaawu Maxaafi maxaaffansaha gama gafa Aramayikete afiinni borreessitanno gede Yihowa ayyaanasi uyinonsa; isi konne assinohu albillitte ikkannore hede ikkara dandaanno. Bayiru Iskindiri rooriidita hundi alame horre amadita, Koyine yinannihu Girikete afii alamete doyichora coyiꞌnanni afoo ikki. Hakkiinni batinyu Yihudooti hakkonne afoo coyiꞌra hanaffu; tini qolte Ibirayisxete Afiita Qullaawa Borro Girikete afiira qolle tirranni gede assitino. Hattenne tiro Septujente yine suꞌminoonni; tenne tiro 72 manni qixxeessino yine hendanni. Umiti Qullaawu Maxaafi tiro tenneeti; qoleno lowore kaaꞌlitino tiro giddo mitte iseeti. Batinyu manni qixxeessino tiro ikkitino daafira, borreessantino gari mitto diꞌꞌikkino. Ikkirono, Girikete afoo coyidhanno Yihudootinna hundi Kiristaani Septujente Maganu Qaale ikkitinota ammantanno. w15 12/1 1:4-6

Yaaqoobi konne lawishsha horoonsiꞌrinohu mayiraatiro 6^ki kiiro kultannonke. “Arrawuno giirate” yiino. Koye kulli arrawi coyiꞌrate dandoonkeeti. Giirate gede, coyiꞌneemmo coyino lowore daafara dandaanno. Isinni Qullaawu Maxaafi “arrawoho heeshshotenna reyote wolqa [noosita]” kulanno. (Law. 18:21) Giira abbitara dandiitanno gawajjo waajjine giidha agurreemmokkinte gede, gawajjannore coyiꞌnammora dandiineemmo yine waajjine hige coyiꞌra diagurreemmo. Qaru coyi afoonke eemadhate. Giira qorophine horoonsiꞌneemmoha ikkiro, sagale raisiꞌrate, giwaarate, hattono mine xawisiꞌrate kaaꞌlitannonke. Arrawonke eemadhineemmoha ikkiro, Maganu ayirranno gede assatenna manna kaaꞌlate horoonsiꞌra dandiineemmo. (Far. 19:14) Afiinkenni coyiꞌneemmohano ikko angatenni malaatinseemmohano ikkiro, hedonke woleho fushshine kuꞌlate dandoo Maganu uyinonkete dhaggete eltooti. Tenne eltonke manna gawajjate ikkikkinni kiate horoonsiꞌra hasiissannonke.—Yai. 3:9, 10. w15 12/1 3:1-3

Luqaasi Phaawuloosira xaggate daafira amaale uyinotanna isonna ledosi misiyoone ikkite soqqantannore xagisino yine heda dandiineemmo. Luqaasi togoo kaaꞌlo aa hasiissinosihu mayiraati? Phaawuloosi umisi doogote aana heeꞌre xiwamino daafiraati. (Gal. 4:13) Yesuusi, “Akime hasiissannohu fayyu mannira ikkikkinni xiwantinoriraati” yiinonte gede, Luqaasi xagga aanni Phaawuloosinna miillasi kaaꞌlikki digatino. (Luq. 5:31) Luqaasi akimicha ikkate qajeelino yanna woy bayicho Qullaawu Maxaafi dikulanno. Phaawuloosi Qolasiyaasi heeꞌranno Kiristaanira Luqaasi akimicha ikkinota qummi assinohu insa iso egentino daafira ikkara dandaanno. Qoleno, Qolasiyaasira mule noohura Loodooqiyu katamira akime ikkitannori rossanno rosi mini no. Luqaasi mulla xaggate daafira amaala baxanno mancho ikkikkinni qajeelino akimichaati. Isi Wongeelisi giddonna Hawaariyaatete Loosi maxaafira akimete qaalla horoonsiꞌrasinna Yesuusi xiwantinore hursino gara hixamanye borreessasi tenne buuxissanno. w15 12/1 4:11, 12

Yihowa mitto Beettosi tenne uulla soyi yannara, taalle nookkita baxillu elto uyinonke! (Yoh. 3:16; 1 Yoh. 4:9, 10) Hawaariya Phaawuloosi tini elto ‘coyiꞌne kula dandiinannikkita Maganu mulla uyinonke elto’ ikkitinota coyiꞌrino. Phaawuloosi, guuta Kiristoosi kakkalo Maganu uyinonketi dhaggete hexxo baalanti woꞌmitannota buuxissanno taje ikkitinota afino. (2 Qor. 1:20) Yesuusi kakkalonna Yihowa aannonke atooti baalunku ‘coyiꞌne kula dandiinannikkite Maganu mulla uyinonke elto’ widira kiiramanno yaate. Addaho, hatti elto lowo geeshsha dhaggeeffantannita ikkitino daafira, mannu coyiꞌranno qaalinni kulle dianfannite. Maganu tenne baxxitino elto uyinkena ninke maa assa hasiissannonke? Tini elto, heeshshokki gara galagalte layiꞌratto gedenna heeꞌratto gara biddi assiꞌratto gede kakkayissannohe? Albinni roore shaqqadonna baxillaancho ikkatto gede, hattono baddalinoheha baala gatona yaatto gede assitannohe? Yihowa Kiristoosi widoonni uyinonke elto wole elto baalantenni roortannota habbooti.—1 Phe. 3:18. w16.01 2:1, 2,4, 5

Konne koyishsha adhitinori, ‘Yihowa wole manna agure ane doorinohu mayiraatikka?’ yite heddara dandiitanno. Insa, tenne qoosso afiꞌrate ikkado diꞌꞌikkoommo yite nafa heddara dandiitanno. Ikkirono, buurantinore ikkansa dihuluullantanno. Tenne qoosso afidhinohura wodaninsa baasa hagiidhanno. Insarano Pheexiroosi ayyaanunni togo yee borreessi yannara macciishshantinosi hedo macciishshantannonsa: “Mootichinke Yesuusi Kiristoosi Maganinna Anni galatamo; isi bayira maarosinni kainohunni, Yesuusi Kiristoosi reyotenni kayise baꞌannokki hexxora haaro asse ilinonke; qoleno, sholtannokki, battaabbannokkinna baꞌannokki raggera ilinonke. Tenne ragge iima worre agarre heeꞌnoonniꞌne.” (1 Phe. 1:3, 4) Buurantinori konne qaale nabbabbanno wote, iimi Anninsa insa gilletenni coyishiishanni noonsata mittoreno dihuluullantanno. w16.01 3:11, 12