Birra

Yihowa buurantinore doora hanafinohu Yesuusi reye kaihu gedensaanniiti; qoleno umi xibbi diro Kiristaanu songo giddo noori baalunku buurantinoreeti yaa dandiinanni. Umi xibbi dirinni kayise goofimarchu barruwa hanafo geeshsha, Kiristoosi harunsineemmo yaannohu rooru manni kaphu Kiristaanaati; Yesuusi insa “boddoonoho” yiino. Ikkirono, Yihowa tenne baalante dirra giddo mito ammanamino manna buuranni keeshshino; insano Yesuusi yii “sinde” gede ikkansa leellishshino. (Mat. 13:24-30) Yihowa goofimarchu barruwarano 144,000 wido ikkitannore doora diagurino. Isi mito manna goofimarchu barruwa giddo gedensiise doora hasiꞌrannoha ikkiro, isi assinori gara ikkasi huluullamate geeshsha ninke mayi massinke? (Isa. 45:9; Dan. 4:35; Rom. 9:11, 16) Mootichinsa 11 saatenni qaxarino mannira assinore laꞌe gunguntu loosaasine gede ikkineemmokki gede qoropha hasiissannonke.—Mat. 20:8-15 w16.01 4:15

Xaa yannara, Maganu Abirahaami assi yiire asse yaannonkekkiti egennantinote. Ikkirono, isi hajajosi wonshate shota ikkitannonkekki woteno woy mitto coye mayira asse yiinonkero anfeemmokki woteno hajajammammora hasiꞌranno. Maganu hajajo giddo wonshate qarrissinoheti no? Mitu roduuwira, sabbaka qarrissansara dandiitanno. Togoo roduuwi miteekkite manna ille qasse laꞌꞌa waajjitannohura affinokki manna coyishiishshe dancha duduwo kula kabbaade ikkitansara dandiitanno. Wolu roduuwi kayinni rosu mine woy loosu bayicho wolootuwiinni baxxite leella qarra ikkitansara dandiitanno. (Ful. 23:2; 1 Tes. 2:2) Aterano Abirahaami gede Mooriyaho ilaala gooddidhanni noottoha woy wolqakkira aleenni ikkinore assate woꞌnaaltanni noottoha lawannohe woti no? Hatto ikkiro, Abirahaaminna ammanasi hedde jawaati. Ammanamino manni lawishsha hiincanke insa faale haꞌneemmo gedenna Yihowa Jaalanke assiꞌne isiwa shinqeemmo gede kaaꞌlitannonke.―Ibi. 12:1, 2. w16.02 1:3,14

Saaooli Daawiti shaate murciꞌre kaino daafira, Yoonaataani lamunku giddo hiikkunnira ammanamannoro doodha qarra ikkitinosi. Isi Daawiti ledo gondooro einoha ikkirono, annisira maahoyye yee galannoho. Ikkollana, Yoonaataani Maganu Saaooli ledo ikkikkinni Daawiti ledo noota afino. Hakko daafira, Saaoolinni roorse Daawitira ammanamino. Isi Daawitira maaxamanno gede kulinosi, hattono Saaoolira isi daafira danchare coyiꞌrino. (1 Sam. 19:1-6) Qoropha hoongummoro, gobbate, rosu minira, woy ispoortete gaamora ammanamate yine sunu sununni Maganoho ammanama agurrammora dandiineemmo. Lawishshaho Henirii yinanni rodii daamu godoꞌle (cheeze) baxanno. Insa rosi mini shaampiyoona duucha wote qeelanno; hakko daafira isi tenne godoꞌle woꞌma wolqasinni kaaꞌla hasiꞌrino. Kayinni isi togo yee noore coyiꞌrino: “Gale hosanni Maganoho ammanamatenni roorse rosu minira ammanama hanafummo. Qidaamenna Sambata heedhannoti daamu godoꞌle soqqanshote yanna hoogeemmo gede assitue. Hakko daafira, daamu godoꞌle gaamo agure fulummo.”—Mat. 6:33. w16.02 3:10,12

Wedellicha ikkittoro, cuuamate doodhoottohu wodanikkinni ikkinotanna teꞌee afate kaaꞌlitannoheti duucha doogga no. Lawishshaho Yihowara soqqama hasiꞌrattohu wodanikkinni ikkinota huucciꞌratto huuccattonni afa dandiinanni. Ganyite Yihowa huucciꞌrakkinna huucciꞌratto yannara hasiꞌrootto coye badde kulakki isi ledo noohe jaaloomi mageeshshi geeshsha muliha ikkinoro leellishshara dandiitanno. (Far. 25:4) Yihowa huuccattonkera dawaro qolannoti qara doogo Qullaawu Maxaafi widoonniiti. Konni daafira, Qullaawa Maxaafa xiinxallate sharramanke, addinta Yihowawa shiqa hasiꞌneemmotanna isira woꞌmu wodaninkenni soqqammeemmota leellinsheemmote wole doogooti. (Iya. 1:8) Konnira ateneeto togo yite xaꞌmi: ‘Huucciꞌreemmo yannara mito coye bade kuleemmo? Qullaawa Maxaafa ganye xiinxalleemmo?’ Maatete magansiꞌraꞌne lainohunni, ‘Tenne maatenke fushshidhino pirogiraame maahoyye yee harunseemmo?’ yite ateneeto xaꞌmi. Kuri xaꞌmuwara qolatto dawaro, cuuamate kaoottohu umikki hasidhe ikkinoronna teꞌee afate kaaꞌlitannohe. w16.03 1:11,13

Diru Maxaafi giddo sibikatu loosinke abbino guma nabbawa lowo geeshsha hagiirsiissanno! Qoqqowu, baxxinonna daga dagiyyote gambooshshiwa gamba yine, jawaachishshannota Qullaawa Borro aana xintantino lallawo, diraamanna loonse leellinshanni ikkito macciishshineemmo woteno mittimmanke leeltanno. Tini kifilla Maganoho woꞌma lubbonkenni soqqammeemmo gede jawaachishshannonkete. Yesuusi reyo qaagooshshi ayyaanino mittimma noonketa leellishannoho. Maganu eltora diniqo noonkehuranna Yesuusi hajajo ayirrinseemmohura, diru kiiro Niisaani 14nni arrishsho eꞌuhu gedensaanni konne ayyaana ayirrisate gamba yineemmo. (1 Qor. 11:23-26) Qaagooshshu Ayyaani hanafara shiima lamala gatte heedheenna, wolu mannino konne lowo geeshsha hasiisanno ayyaana ninke ledo ayirrisanno gede dandaamannoha ikkiro baalunku songonke qoqqowira koyishshu woraqata iillinsheemmo. Ninke callootinke assineemmori gari guma abba hoogannoha ikkara dandaanno. Mitteenni buusamme sabbankeemmoha ikkiro kayinni, lowo miliyoone ikkanno manni guweenyunna ayirrinyu hasiisannosi Magani Yihowawa daanno gede assa dandiineemmo! w16.03 3:4,6, 7

Songote giddo soqqamate qajeeltanno roduuwa Qullaawu Maxaafihu xintu seeri garinni assaabbanno gede rosiisa hasiissanno. Lawishshaho, mittu cimeessi mittu rodiira Mangistete Addaraashe nafara feyannonna kaxxine saꞌꞌate injaanno gede assara kulinosi yine hendo. Tiito 2:10 horoonsiꞌre, roduu Addaraashe feyasinna eꞌnanniwa seekkasi “Gatisaanchonke ikkino Magani roso gaamaarsate” kaaꞌlitannota xawisasira dandaanno. Qoleno, roduu songote giddo noo geerri daafira assaawanno gedenna loosisi insa kaaꞌlanno gara hedanno gede kulasira dandaanno. Togoo hasaawi rosaanchu hajajo calla heda agure roorenka mannu daafira assaawanno gede qajeelsannosi. Isi loosino loosi songote giddo noo roduuwa kaaꞌlanni noo gara laꞌꞌasi hagiidhanno gede assitannosi. Hakkiinni saeno, cimeessu rosaanchu yinoonnisire assate sharramanno sharrora galata hasiissannosi. Wayi muꞌro seekke lophitanno gede assannonte gede, galatuno rosaanchu ayyaanaamittetenni roore lophanno gede kaaꞌlanno. w15 4/1 2:7, 8

Qarru iilleennahe shiqe kaaꞌlannoheha hoogge callatootto woti no? Iillinohe qarri angate anje, rosu mine iillanno fatana, ordu keere hooga woy wole yaachishanno coye ikkara dandaanno. Miteekkite wole manna kaaꞌlo xaꞌmiꞌroottohanna hasiissinohe kaaꞌlo afiꞌra hoogge koffi yoottoha ikkara dandaanno. Hige mitu qarri mannu tire afannokkiho. Ikkina togoo yannara “Yihowa addaxxi” yitannota Qullaawu Maxaafi amaale harunsa kaaꞌlitannori dinoni? (Law. 3:5, 6) Togoo wote iso addaxxa beebbate? Deeꞌni! Batinye Qullaawu Maxaafi xaggenni huwata dandiineemmonte gede, Maganu aanno kaaꞌlo addaxxinannite. Hakko daafira, mannu kaaꞌlo afiꞌra hoogatto wote hattee godowaho amaxxantenni, hattoo yanna Phaawuloosi laino garinni laꞌꞌate woꞌnaali; yaano, Yihowa woꞌmunni woꞌma addaxxatenna baxillu towaanyosi heeshshokkinni laꞌꞌate kaaꞌlitanno faro gede assite lai. Tini qolte iso albinni roore addaxxatto gedenna isi ledo noohe jaaloomi roore kaajjado ikkanno gede kaaꞌlitannohe. w15 4/1 4:3-5

Sheexaanu dogannoha ikkasi calla nafa mannu baxillaanchu Magani Yihowawiinni xeertiꞌranno gede assitanno. (1 Yoh. 4:8) Sheexaanu doge mannu ‘ayyaanaamittete coye gooꞌrannokki’ gede assanno. (Mat. 5:3) Konni garinni isi, “Maganu lawishsha ikkinohu Kiristoosire kulannohu ayirradu danchu duduwi xawaabbi xawannonsakki gede ammaninokki manni surre ballisino.” Sheexaanu manna dogate woy soꞌrisiisate horoonsiꞌranno doogga giddo qara ikkitinoti kaphu ammaꞌnooti. Daawuloosi mannu ‘iso calla magansiꞌnasira hasiꞌrannoha’ Yihowa agure albi annuwansa, woy kalaqama, woy saada woy wole togoore magansiꞌranna laꞌꞌanno wote hagiidhannoti egennantinote! (Ful. 20:5) Magano garunni magansiꞌnanni heeꞌnoommo yite heddannori nafa kaphu ammananninna haafu budinni sakaalantino. Kuni manni biꞌre Yihowa togo yii manni gede mararsannoho: “Hagiirsiisannokki coyira damoozaꞌne mayira huꞌnitinanni? Seekkitine ani yeemmore macciishshe; . . . hakko garinni doorantino sagale ittine hagiidhitinanni.”—Isa. 55:2. w15 5/1 1:14, 15

Abeeli tenne hexxo daafira seekke hede manchu sirchi Addaaminna Heewani cubbo loossara albaanni afidhino guunte afiꞌranno gede assate ‘ginde madiꞌrannohu’ heeꞌrannota huwatikki digatino. Isi Maganu uyino hexxo woꞌmitannota ammanino; hakko daafira Yihowa kakkalosi hagiirrunni adhino. (Kal. 4:3-5; Ibi. 11:4) Nohi Baote Wayinni gate sainohu ammana noosi daafiraati. (Ibi. 11:7) Ammanasi Baote Wayi gedensaanni Maganoho saadate kakkalo shiqishanno gede assitinosi. (Kal. 8:20) Isino Abeeli gede, mannu ooso cubbunna reyote borojjimmanni fultanno yanna daggannota ammaninoti dihuluullissannote. Baote Wayi gedensaanni alame galagalte finqila ikkitu; Naamiruudi Yihowa hettise mannu Maganoho finqilara hasiꞌrino; hatte yannara nafa Nohira ammananna hexxo noosi. (Kal. 10:8-12) Nohi mannu ooso gadadissanno gashshaanonni, cubbunninna reyotenni gattanno yanna daafira hedikki digatino. Ninkeno xa lowonta gambisse dagginota hattee yanna heda dandiineemmo!—Rom. 6:23. w15 5/1 3:4,6

Lowo geeshsha yaandeemmoha ikkiro mannimmankenna ayyaanaamittenke gawajjantara dandiitanno. Konnira Yihowa addaxxino; hattono techohu barru qummeeshshi yaannore qaango. Hedonke huwatanno manchi coyiꞌrannohu danchu qaali wodananke tashshi assara dandaanno. Anninkeranna amankera, galtenkera woy Yihowate gedee hedo noosihura ammanamino jaalira giddonketa hasaaphanke quwa saꞌne yaandeemmokki gede kaaꞌlitankera dandiitanno. Yaachishannonkere Yihowa sae afannohu dino. Phaawuloosi togo yee borreessino: “Aye coyirano yaaddinoonte; hatteentenni baalunku coyira huuccattotenninna eeggifatatenni galatu ledo dhiwinoꞌne coye Maganoho kulle; wodancha baalanta roortannoti Maganu salaame, wodanaꞌnenna surreꞌne Kiristoosi Yesuusinni agartanno.” (Fil. 4:6, 7) Yaandeemmo wote ammanate roduuwinke, cimeeyye, ammanamino borojjichi, sokkaano, Yesuusi hattono Yihowa umisi ayyaanaamittete gawajjo iillitannonkekki gede kaaꞌlannonketa hendo. w15 5/1 4:16, 17

Yerusaalamete katamira Beetemeqidesete aliyye widoonni Beetezaata yinannihu wayi gandi no. Batinyu xiwaminohunna addi additi bisu xeꞌne noonsa manni hakkiicho gamba yaanno. Kuni manni hakkira haꞌrannohu maalaletenni hurreemmo yee hexxeeti. Yesuusi mararannoha ikkinohura, isi uullate aana heeꞌrino dirinni rooranno diro xiwame keeshshino manchiwa shiqqi yii. (Yoh. 5:6-9) Yesuusi konne mancho hura hasiꞌratto yee xaꞌmisi. Isi qarrasi bayichonko kulino. Isi hura hasiꞌrinoha ikkirono wayi gandi giddora eessannosihu nookki daafira hiitto ikke hurannoro diafino. Hakkiinnino Yesuusi, manchu asseemmo yee hedinokkire assanno gede yaano dadosi xaaxiꞌre haꞌranno gede hajajisi. Manchuno Yesuusi yiinore ammane dadosi xaaxiꞌre haꞌra hanafi. Tini hagiirsiisanno ikkito Yesuusi haaro alame giddo loosannote roore maalalera caaleho! Tini maalale Yesuusi shooshaqa ikkinotano rosiissannonke. Isi qarrantinore hase mare kaaꞌlino. Yesuusi lawishshi ninkeno qoqqowinkera alamete aana noo bunshenni kainohunni dadillanni noo manna hanse kaaꞌlanke agureemmokki gede jawaachishannonke. w15 6/1 2:8-10

Yesuusi tenne huuccattora hanafote “Annanke” yiino ikkinnina “Annaꞌya” diyiino; tini yaatto mimmito addinta baxannohu “roduuwu maamari” wido ikkinoommota qaagiissitannonke. (1 Phe. 2:17) Tini qolte shaaꞌꞌa qoosso diꞌꞌikkitino! Iimi heeshsho ragiꞌrate hexxo noonsari Maganu ooso ikkite kiirantino buuramaasine, Yihowa woꞌmunni woꞌma “Anna” yite woshshansa garaho. (Rom. 8:15-17) Uullate aana hegerera heeꞌrate hexxo noonsarino Yihowa “Anna” yite woshsha dandiitanno. Heeshsho uyinonsahu isooti; qoleno isi halaalunni magansidhannosirira baalaho hasiissannonsare baxillunni aannonsa. Uulla ragiꞌrate hexxo noonsari woꞌmunni woꞌma Maganu ooso yaamantannohu albillitte guuntete deerra martunna jeefote fonqolo ammanante saꞌu gedensaanniiti. (Rom. 8:21; Aju. 20:7, 8) Annunna ama oosonsara huuccidhanno gede rosiissuronna Yihowa shaqqado iimi Annansa ikkinota affanno gede kaaꞌlituro lowo waaga afiꞌrinore uyitinonsa yaate. Annunna ama oosonsara uyitanno coyi baalunku giddo roorinohu oosonsara Yihowa ledo gamba yiinohunna danchu fiixoomi heeꞌrannonsa gede kaaꞌlate. w15 6/1 4:4-6

Bushuwiinni gatisinke” yitanno huuccatto ledo sumuu yine heeꞌrate, ‘Sheexaanu alame wido ikkineemmokki’ gede sharrama hasiissannonke. “[Sheexaanu] alame woy alamete noo coyibba” baxa dihasiissannonke. (Yoh. 15:19; 1 Yoh. 2:15-17) Kuni duuchanka wote sharrama hasiissannonke coyeeti. Yihowa Sheexaanenna busha alamesi hune tenne huuccattonkera dawaro qolanno wote lowo fooliishsho afiꞌneemmo! Ikkollana, Sheexaanu iiminni tugami wote shiima yanna calla gattinosita afinota qaaga hasiissannonke. Baasa hanqino daafira, Maganoho ammanammoommokkire ikkineemmo gede assate dandaamisire baala assanno. Konni daafira, isiwiinni gatate Yihowa ganyine huucciꞌra hasiissannonke. (Aju. 12:12, 17) Sheexaanu nookki alamera heeꞌra hasiꞌratto? Hatto ikkiro, Maganu Mangiste Maganu suꞌma qullaawa assitanno gedenna fajjosi uullate aana woꞌmitanno gede assitara huucciꞌra agurtooti. Qoleno, Yihowa ayyaanaamittetenna maalaamittete hasiissannohere aannohe gede huucciꞌri. Ee, lawishshu huuccatto ledo sumuu yaanno garinni heeꞌrate murcidhe kai.—Mat. 6:9-13. w15 6/1 5:12,17, 18

Hattee fonqolu yannara ikkannoha baalanka coye gudinse afano hoongummoro, hakkawote facci assine agurreemmo coyi heeꞌrannota heda dandiineemmo. Umi xibbi diro, Kiristaanu heeshshonsa gatisiꞌrate miinjansa agure xooqanna mitiinsannonsare dandee heeꞌra hasiissinonsa. (Maq. 13:15-18) Albillitte ammananke agadhate yine noonkeha maalaamittete coye facci assine agurreemmo? Yihowara ammanammoommore ikkate assa hasiissannonke coye baala assineemmo? Hanni konne coye hedi! Hattee yannara, hundi masaalaanchi Daanieeli lawishsha harunsine baxi coyi dayirono Magano magansiꞌneemmori ninke calla ikkineemmo. (Dan. 6:10, 11) Hatti yanna ‘Mangistenniha dancha duduwo’ sabbankannita diꞌꞌikkitino. Hakkawote hakku loosi uurre kaino. Hatte yannara “goofimarchu” daye kaino yaate! (Mat. 24:14) Hakkawote, Maganu soqqamaano waajjitukki yoote sokka dudubbanno. Hatti sokka Sheexaanunniti busha alame woꞌmunni woꞌma baꞌara kaꞌinotano kultannote. w15 7/1 2:3,8, 9

Baxxine fulankenni alame gibbunkero dhagge diassiꞌneemmo; korkaatuno Yesuusi kuni ikkannota balaxe coyiꞌrino. Giwannonkehu lowo mannira Kiristaanu mittu widira hige tuqqa dihasiissannonsa yinanniti diadhantannonsa. Ninkera kayinni tini hajo loworeeti. Mannu waajjishiishinkerono Yihowara ammanammoommore ikkate kaajjine uurra hasiissannonke. (Dan. 3:16-18) Manna waajja ajano akkalano qeeltara dandiitannoha ikkirono, rooru manni ikkannota ikka giwa roorenka wedellootaho qarra ikkitara dandiitanno. Oosoꞌnera baandiiraho faarsate woy gobbate ayyaanna ayirrisate ledo xaado afiꞌrino fonqoli iillanni noonsaha ikkiro, kiꞌne kaaꞌlo hasiissannonsa. Maatete Magansiꞌraꞌne yannara Yihowa tenne hajo ma garinni laꞌꞌannoro xiinxalle. Oosoꞌne ammanansa ayirrinyunni xawisse kula dandiitanno gede rosiissensa. (Rom. 1:16) Hasiisannoha ikkiro, tenne hajo daafira rosiisaanonsa martine coyishiishshe. w15 7/1 3:15, 16

Elto ikkitinoti Yesuusiti wodote kakkalo qixxaabbinohu ninke “heeshsho afiꞌneemmo gedeeti.” (1 Yoh. 4:9) Hawaariya Phaawuloosi Maganu baxille leellishshannote tenne kaajja elto daafira togo yee borreessino: “Kiristoosi dinyinoonni yannara cubbaataamu mannira reyino. Keeraanchu manchi daafira reyannoha afiꞌra qarraho; danchu manchi daafira reyannohu kayinni miteekke heeꞌrara dandaanno. Ikkirono, Maganu cubbaataamma ikkine heeꞌneenna Kiristoosi ninke daafira reyanno gede asse baxannonketa leellishino.” (Rom. 5:6-8) Maganu baxillesi leellishinoti wole baalantenni roortannoti tini elto, mannu oosora Yihowa ledo muli jaaloomi heeꞌrannonsa gede faro fantino. Yihowa wodote kakkalo widoonni mannu oosora baxillesi leellishino. Uullate aana hegerera heeꞌrate hexxo noonkeha ikkironna Yihowara ammanamme soqqammeemmoha ikkiro, haaro alamera heeshsho baxissannota ikkitannota dihuluullammeemmo. Ee, wodote kakkalo Maganunniha baꞌꞌannokki baxille leellishshannote wole baalantenni roortanno tajeeti yaa garankolla! w15 8/1 1:13,15

Maganu Mangiste gashshooti hunda heeꞌra lowo ayirrinye ikkitinota anfoommo daafira, Yihowa dirijjite ledo buusamatenna uyinanninke looso baalanka loosate murciꞌneemmo. Hige loonseemmo loosi soorramara dandaanno. Lawishshaho, alba Ameerikaho Beeteelete soqqantannori mitu roduuwi qanchoho soqqantanno gede assineenna xaa yannara wolu garite woꞌma yanna soqqansho giddo bae atoote afidhe hagiidhitanni no. Alba addi addi bayicho hadhanni songuwa towaattanno roduuwi qolte, diru akkallenni woy wolu korkaatinni kainohunni xa baxxitino suwisaano ikkite soqqantanno gede gaamantino. Kassi yaa ronseemmoha, kaaꞌlo afiꞌrate Magano huucciꞌneemmoha, hattono isira soqqamate dandiinummore baala assineemmoha ikkiro, tenne qarrissannote goofimarchu yannara nafa hagiirrenna lowo atoote afiꞌneemmo. (Law. 10:22) Albillittena? Haaro alamera hiittoo qooxeessira heeꞌneemmoro xa hendoommoha ikkara dandaanno; ikkollana, ninke hendoommowa ikkikkinni wolewa heeꞌnammora gaammankera dandiinanni. Hakkawote heeꞌnummowano heeꞌnummoro, qoleno uyinanninke loosi ikkihano ikkiro, hagiirrinke lowoha ikkannotanna kassi yineemmota dihuluullammeemmo. w15 8/1 3:8

Nohi busha alamera heeꞌrinoha ikkirono, hatte alame manna muli jaallasi assiꞌra dihasiꞌrino. Isi Magano baxannokki manni ledo dijaalooꞌmino. Isinna lamala ikkitannoti maatesi miilla Maganu uyino looso diinaggaabbe loossino; hakkuyi loosi giddo mittu markaawe seekkate. Qoleno Nohi “keeraanchimmate daafira sabbakannoho.” (2 Phe. 2:5) Nohi wolu mannira sabbakasi, markaawe seekkasinna maatesi ledo gamba yee heeꞌrasi Magano hagiirsiisannoha dancha coye assanni heeꞌranno gede kaaꞌlitinosi. Konni garinni, Nohinna maatesi Baote Waa gatte saꞌino. Ninke baalunku insa oosooti; konni daafira, Nohinna maatesi Yihowara hajajante busha jaalooma qorophitino daafira galata hasiissannonke. Ammanaminohunna hajajamannohu umi xibbi diri Kiristaanino Maganiweelu manniwiinni xeertiꞌransanni 70 M.D. Yerusaalame baꞌu yannara keere saino.—Luq. 21:20-22. w15 8/1 4:17, 18

Baalunku boohaarshi danchaho, hagiirsiisannoho woy mannimma haaroonsannoho yaa diꞌꞌikkino. Qoleno boohaarranni lowo yanna huna hasiissannonke woy ganyine boohaara hasiissannonke yaano diꞌꞌikkino. Tiiꞌꞌinke dancha boohaarsha doodhineemmo gedenna konni boohaarshinni horo afiꞌneemmo gede kaaꞌlannonkehu hiittoonniiti? Qullaawa Borro “maalu looso” yaamantanno akattawiinni xeertiꞌra hasiissannonketa kultanno. Kuri giddo mitu “foorre, batte, mancaꞌꞌa amanyoote, kaphu maganna magansiꞌra, agaanintete looso, gibbo, gaance, hinaaso, hanqe boolaqiꞌra, heewisama, babbadama, halaaluwiinni baxxe fula, dhiibbe, dimba, quwa saino qeexaalanna woleno kuri labbannoreeti.” Phaawuloosi “togoo coyibba assitannori Maganu Mangiste diragidhanno” yee borreessino. (Gal. 5:19-21) Konni daafira ninkeneeto togo yine xaꞌma hasiissannonke: ‘Tiiꞌꞌiꞌya gibbo, heewo, sircho bade giwa woy finqille woꞌmitino ispoortewiinni xeertiꞌreemmo gede kulannoe? Teeda bainore leellishshanno, woy foorre, dimbanna agaanintete looso mitto qarrano afidhinokkihu gede assite shiqishshanno filme laeemmokki gede hoolannoe?’ w15 9/1 2:11, 12

Mannu ooso uminsanni bushanna dancha wossaꞌna dandiitannokkita, gibbe togo assituro kayinni qarru kalaqamannota Qullaawu Maxaafi xawise kulanno. Ninkera woyyinore afinohu Yihowaati. Salaamenna mittimma heedhannonkehu, Maganu silxaane ammanne adhinummoro callaati. Yihowa konne hasiisannonke halaale kulinonkehu baxannonkehuraati. Baxillaanchu anni, oososi danchanna alaamu noo heeshsho heedhara hasiꞌrannohura albillitte insa heedhanno heeshsho daafira hedanno. Ikkollana, yannankera rooru manni albillittete yanna daafira mitiiꞌmannotinna geedannokki coye harunsanni yannansa hunannoti dadillissannote. (Far. 90:10) Ninke kayinni Maganu ooso ikkinoommohura, Yihowa albillitte dancha yanna abbara qaale einonke daafira isi addinta baxannonketa huwantoommo. Tini qolte, alaamu noo heeshsho heeꞌneemmo gede assitannonke. w15 9/1 4:10, 11

Hundi waro, addi addi daga Maganu Isiraeelete mannira assinore laꞌino hattono macciishshitino. Yihowa maalaletenni mannasi Gibitsete gobbanni fushshino; qoleno batinye gobba nugussa qeeltanno gede kaaꞌlinonsa. (Iya. 9:3, 9, 10) Isiraeelete baarigaarra Maganu Isiraeelete mannira olamanni noota ammante adha gibbino daafira qeelantino. Gedensaanni, bushu Nugusi Akiaabi Maganu wolqa huwatate kaaꞌlannore duuchare laino. Akiaabi Eeliyaasi huuccatto asseenna giira iiminni dirrite kakkalo ittanna laino. Hakkiinni Eeliyaasi Yihowa gobbate aana noo moolle baꞌanno gede assannota kulanni Akiaabira togo yiino: “Xeenu daye amadannohekki gede eela dirri!” (1 Mot. 18:22-45) Akiaabi kuni baalunkuri ikkanna lainoha ikkirono, konne assitanni nooti Maganu wolqa ikkitinota diammanino. Konninna wole lawishshuwanni maa ronseemmo? Yihowa wolqa loossanno yannara huwatate baqqi yinoommore ikka hasiissannonke. w15 10/1 1:4, 5

Maganu biddishsha harunsinummoro, uminkera horo afiꞌneemmota huluullama dihasiissannonke. Addinta kaaꞌla dandaanno Magano addaxxa hasiissannonke. Phaawuloosi Maganu “giddonke loossanni noo wolqasi ledo sumuu yaanno garinni, huucciꞌneemmo woy hendeemmo coyi baalunkura aleenni ikkinore assa [dandaannota]” coyiꞌrino. (Efe. 3:20) Yihowa soqqamaano fajjosi assate dandaaminsare baala assitanno; ikkirono, dhukinsa deerra affino daafira Yihowa sharronsa maassiꞌrannota addaxxitanno. Maganinke ledonke noota afanke tashshi diassitannonke? Ninkena, ammana ledinke yine huucciꞌneemmo huuccattora dawaro afiꞌneemmo? Ee, korkaatuno Qullaawu Maxaafi Maganu “fajjosi garinni huucciꞌneemmo” huuccatto macciishshannota buuxisannonke. (1 Yoh. 5:14) Kageeshsha laꞌnummonte gede, Yihowa woꞌmunni woꞌma addaxxanno manni iso hagiirsiisanno. Yihowa ammana ledankera huucciꞌneemmo huuccatto macciishshanno; hakko garinni ammananke baasa lophiteenna ‘Maganu Mangiste ragidhannori widira kiirammeemmo.’—2 Tes. 1:3, 5. w15 10/1 2:16-18

Ayyaanaamittete coyibba hiinca mittu manchi gikki yiino Kiristaancho ikkanno gede kaaꞌlitannosi. (Ibi. 5:14; 6:1) Yihowanna Yesuusi daafira hakkeeshshi geeshsha hiincannokki manchi ammanatenni kaajje uurre diafanno. Togoo manchi halaaluwiinni sunu sununni xeertiꞌrara woy lekka badhera qolara dandaanno. (Ibi. 3:12) Yesuusi, Maganu Qaale “kaajjunna danchu wodaninni” macciishshineemmokkiha woy adhineemmokkiha ikkiro, ‘giddonke keeshshannokkita’ coyiꞌrino. Hatto ikkiro, “yaachishanno coyi, jironna maalaamittete hagiirri” ‘hedonke billaallitanno gede asseenna guma laalleemmokkire ikkineemmo.’ (Luq. 8:14, 15) Hakko daafira, Maganu Qaale hiincanke agurroonke. Hatto assanke, Qullaawu Maxaafi giddo kulloonniha Yihowa ayirrinye, akattasinna ayimmasi heeshshonkenni leellinsheemmo gede kaaꞌlitannonke. (2 Qor. 3:18) Kawiinni saꞌne hasiꞌneemmori mayi no? Magano anfanni haꞌranna ayirrinyesi heeshshonkenni leellisha kaajja qoossooti; qoleno hegere geeshsha isire rosanna isi faale haꞌra dandiineemmo.—Ros. 3:11. w15 10/1 4:13, 14

Annuwunna amuuwu, wedellu oosoꞌne ayyaanaamittetenni jawaattinore ikkitara hasidhinanniti egennantinote. Maganuno kiꞌne oosoꞌne “Yihowa seejjonninna biddishshinni” lossidhinara hasiꞌranno. (Efe. 6:4) Konni daafira, Maganu uyinoꞌneha konne loosu qeechaꞌne horoonsidhine oosoꞌne ganyitine qajeelse. Lawishshaho, oosoꞌnera rosu hasiisannota affinoonni daafiranna haarore rossara hasidhinanni daafira, rosu minira eessitinanninsa. Oosonsa baxanno anninna amano, oosonsa songote gambooshshiwanna wole ayyaanaamitte pirogiraamewa shiqqannote “Yihowa seejjonni” horo afidhanno gede assitanno. Maganittete rosi lowo geeshsha hasiisannoha ikkino daafira, oosoꞌne ayyaanaamittete coyibba baxxanno gedenna hayyo naaddannore ikkitanno gede assate woꞌnaaltinanni. Yesuusi rosaanosi kaaꞌlinonte gede, wedella oosoꞌne Maganu Qaale rosiisa baxxanno gedenna ganyite qanchu soqqansho fula rossanno gede assitine soqqanshote dancha guma afidhanno gede kaaꞌla dandiitinanni gara hedde. w15 11/1 2:6

Hakko iso Maganu umimmate seeri heeꞌranno gede assinohura, baxillu lowo geeshsha hasiisanno. Ikkirono umimmate silxaane annante woy gadadisanno garinni horoonsiꞌra dihasiissanno. Minaanni minaamasira umo ikkinoha ikkirono, Qullaawu Maxaafi ise ‘ayirrisanno’ gede kulanno. (1 Phe. 3:7) Minaanni minaamasi ayirrisanno doogga giddo mitte, hasiisannose coye huwatatenna mito wote ise doorsha balaxisiisate. Maganu Qaali togo yaanno: “Minaannuwa, Kiristoosi songo baxinonna isonooto isera sayise uyinonte gede, kiꞌneno minaamuwaꞌne baxaꞌne agurtinoonte.” (Efe. 5:25) Ee, Yesuusi harunsaanosira heeshshosi nafa sayise uyino. Minaanni Yesuusi umimmate silxaanesi baxillunni horoonsiꞌranno gara harunsannoha ikkiro, iso baxanna ayirrisa hattono isira maahoyye yee gala minaamasira shota ikkitannose.—Tit. 2:3-5. w15 11/1 4:6, 7

Kiristaanu roore anga coyiꞌrannohu Girikete afoo ikkino. Isinni Yesuusi rosiisinorenna assinore kultannoti Maatewoosi, Marqoosi, Luqaasinna Yohaannisi Wongeeluwa ayyaanunni borreessante duuchawa iillitinohu Girikete afiinniiti. Hakko daafira, batinye rosaano coyidhannohu Ibirayisxe ikkikkinni Girikete afooti. Hawaariya Phaawuloosi borreessino sokkanna wole qullaawu ayyaaninni borreessantino maxaaffa borreessantinohu Girikete afiinniiti. Girikete Afiita Qullaawa Borro borreessituri, Ibirayisxete Afiita Qullaawa Borro qummeeshshuwa qummi assitanno yannara, konne assitannohu Septujentete giddonni ikkinota wodanchi. Hatte qummeeshshuwa giddo mite Ibirayisxete borro aana nootenni shiima geeshsha baxxitanno; xaa yannara tini qummeeshshuwa ayyaanunni borreessantinote Qullaawa Borro kifileeti. Konni garinni, guuntete xeꞌne noonsa manni qixxeessino tironni haaꞌnoonni qummeeshshuwa ayyaanunni borreessaminohu Maganu Qaali wido ikkitino; Maganu qole mitto bude woy afoo woluwiinni roorse dilaꞌꞌanno.—Soq. 10:34. w15 12/1 1:8, 9

Kuꞌu kuꞌuyi ledo coyiꞌra barru baala assineemmoreeti; ikkirono woꞌmanka wote coyiꞌra hasiissannonke yaa diꞌꞌikkino. Isinni Qullaawu Maxaafi “sammi yaate yanna no” yaanno. (Ros. 3:7) Lawishshaho, mannu coyiꞌranno wote sammi yaanke insa ayirrinseemmota leellishshanno. (Iyo. 6:24) Fojo woy mittu manchi afa hasiissannosikki coye fushshine coyiꞌneemmokki gede arrawonke eemadhanke wodancha noonketa leellishshanno. (Law. 20:19) Hanqisanno coyi tuncu yaannonke wote sammi yaanke hayyoota ikkinoommota buuxissanno. (Far. 4:4) Qullaawu Maxaafi ‘coyiꞌrateno yanna noota’ kulanno. (Ros. 3:7) Jaalikki mitto laꞌꞌate baxisanno uduunnicho uyihero, haadhe leellannokkiwa maaxxe agurattokkiti egennantinote. Hatteentenni, hakkoye uduunnicho naadattota leellishate dancha gede assite horoonsiꞌratto. Hatteente gede, Yihowa uyinonkete coyiꞌrate eltora diniqo noonketa leellishate hayyotenni horoonsiꞌneemmo. Konnira giddiidinke hedo fushshine coyiꞌneemmo, hasiisinonke coye kuꞌlineemmo, jawaachishanno qaale coyiꞌneemmo, hattono Magano guwisiꞌneemmo. w15 12/1 3:4, 5

Heeꞌnoommo yanna ammanate roduuwinke “hursate aamamooshshe” afidhinota diꞌꞌikkitino. (1 Qor. 12:9) Ikkollana mitu roduuwinke kaaꞌlate hedde amaale xaꞌmininsakki xaggate daafira amaaltanno. Hige mitootu uyitanno amaale kaaꞌlitannota ikkitara dandiitanno. Phaawuloosi, Ximootewosi godowa xiwanni qarrisinosi daafira ma assa hasiissannosiro kulinosi; hakko qooxeessira noo wayi daafaminoha ikkara dandaanno. Ikkollana, mittu ammanate rodiinke kaaꞌla hooggara woy isinni gawajjitara dandiitannota baadi xagga, daro, woy mite sagale adhanno gede ammansiisate woꞌnaalanna Phaawuloosi assinori addi addiiti. Mitootu woloota togo yite amaaltanno: ‘Ewelono hatto asse xiweenna konne xagicho adhe hurino.’ Togoo amaale kaaꞌlate hende uyinannita ikkiturono, lowo manni horoonsiꞌranno xagga nafa gawajjo abbitara dandiitannota deꞌnoonke.—Law. 27:12. w15 12/1 4:13

Ninke baalunku cubbo ragiꞌnoommo daafira, reyote yoo yinoonninkereeti. (Rom. 5:12) Yihowa, Yesuusi uullara daanno gedenna “baalunkura yee reyo qamasanno” gede baxillunni qixxaawo assino. (Ibi. 2:9) Yihowa aleenni lawishshaho kulli manchi assinorinni sainore assinonke; isi reyo hegerera hunate xinta ikkannore qixxeessino. (Isa. 25:7, 8; 1 Qor. 15:22, 26) Yesuusa ammanannota leellishannohu baalunku Maganu Mangiste hunda uullate aana salaametenninna hagiirrunni hegerera heeꞌranno; woy buuraminoha ikkiro, iima hatte Mangistera moohanno. (Rom. 6:23; Aju. 5:9, 10) Yihowawiinni afiꞌnoommoti tini elto abbitannonkehu wolu atooti hiikkonneeti? Xibbu baalunkunni hura, uullanke gannatete soorramasenna reyino manni kaono Yihowa uyinonke elto widooti. (Isa. 33:24; 35:5, 6; Yoh. 5:28, 29) Ee, ‘coyiꞌne kula dandiinannikki elto’ uyinonke daafira Yihowanna muxxe Beettosi banxeemmoti egennantinote.—2 Qor. 9:15. w16.01 2:5, 6

Buurantinori Maganu iimira koyisansara albaanni, uullate aana heeꞌrate hexxo noonsareeti. Albaanni insa Yihowa uulla keereensanno yanna halchitanni keeshshitino, hattono hattee keeraaꞌmitino uullara heeꞌrate hasatto noonsareeti. Reyino manni reyotenni kaeenna xaaddanno yanna nafa heddinoha ikkara dandaanno. Mine miꞌnite heedhanno yannanna haqqe kaasidhe guma ittanno yanna quqquxante agadhitanni keeshshitino. (Isa. 65:21-23) Ikkina insa heddanno gari soorraminohu mayiraatiyya? Uullate aana heeꞌrate hexxo giwissinonsa daafira diꞌꞌikkino. Insa heddanno gari soorraminohu iillinonsa qarri caacceesseennansa diꞌꞌikkino. Uullate aana hegerera heeꞌra giwissannota woy ceeꞌmishshannota ikkitanno yite heddino daafirano diꞌꞌikkino; woy iimira hadhe haarore laꞌꞌate halcho heedheennansa diꞌꞌikkino. Hedonsa soorrantinohu Maganu ayyaani woshshinonsa woy koyisinonsa daafira calla ikkikkinni hedonsanna hexxonsa soorrantanno gede assinohuraati. w16.01 3:11,13

Yihowa duuchunkura Aliidiho, baalankare Kalaqinoho, hattono gawalo nookki hayyonna wolqa noosiho. Iyyoobino tenne huwatino. Yihowa kalaqote loosisi daafira xaꞌmisihu gedensaanni Iyyoobi togo yee qolino: “Ati baalanka coye assa dandaattotanna hedoottore baalankare assa hoogattokkita xa afummo.” (Iyo. 42:2) Yihowa hasiꞌrinore baala mittuno kaaꞌlisikki assa dandaannoha ikkirono, hedosi wonshate hanafotenni kayise wolootu ledosi loossanno gede koyise baxillesi leellishino. Maganu kalaqinohu umi kalaqami mitto Beettosiiti. Yihowa wole baalanka kalaqama yaano heeshsho noonsareno noonsakkireno kalaqi yannara Beettisi isi ledo loosanno gede fajjino. (Yoh. 1:1-3, 18) Konnira Yihowa Beettisi kalaqote looso isi ledo loosanno gede asse, hattono Yesuusiha kaajja loosu qeecha wolootu affanno gede asse Beettosi ayirrisannota leellishino.—Qol. 1:15-17. w16.01 5:1, 2