Ammajje

“Cinca” umo fushshitanno loosi maati? Cinca ‘guuta, duuchante doogonni mitturino xeinonkekkirenna danchuulle ikkineemmo’ gede kaaꞌlitannonke. (Yai. 1:4) Duucha wote fonqolu mite akattanke woyyeesiꞌrate kaaꞌlannonke. Konne fonqolo cincine saꞌnummoro Kiristaanu akattanke guuta ikkitanno. Lawishshaho, cincineemmore, naandeemmorenna mararreemmore ikkinammora dandiineemmo. Cinca loosose umo fushshite qajeelloommo Kiristaana ikkineemmo gede assitannonkehura iillannonke fonqolo miliqate yine Qullaawa Borrota xintu seerubba didiingeemmo. Lawishshaho, gara ikkitinokki hedo ledo sharrantanni noottohalla ikki? Tini hedo fonqolu giddora eatto gede assitahera wodha agurte huuccatto assidhe tenne hedo wodanikki giddonni fushshite hunate woꞌnaali. Hatto assakki ateneeto qeeꞌlate akata lossiꞌrate kaaꞌlitannohe. Yihowa Farciꞌraasincho ikkinokkihu maatekki miili darte iillishanni noohe? Hatto ikkiro hexxo mudha agurte Yihowara woꞌmu wodanikkinni soqqamate murciꞌri. Yihowa hagiirsiisate cinca hasiissannonketa deꞌooti.—Rom. 5:3-5; Yai. 1:12. w16.04 2:15, 16

Uminke gaꞌre, bude, woy gobba kulle naaxxa Yihowa mannu gashshootiranna mannu oosora noosi lao ledo sumuu yineemmokki gede assitannonke. Maganu budenke woffi assine laꞌnammora hasiꞌrannokkiti egennantinote. Isinni babbaxxino budi heeꞌrasi mannu oosoha dhagge ikkanno badooshshe leellishanno. Ikkollana Maganu albaanni mannu baalu taalo ikkinota qaaga hasiissannonke. (Rom. 10:12) Ilammoommo bayicho kulle naaxxa ninke gobba woletewiinni roortannote yine hendeemmo gede assitannonke; tini qolte Maganu seera diigate widira qolte massitanno. Kiristaanahono togoo naaxxa qarra ikkitannonsaha ikkara dandaanno; wole agurina umi xibbi diri songo giddo nafa mitootu qansichimmansanni kainohunni roduuwansa mallaaddino. (Soq. 6:1) Giddonke naaxxate akati rumuxxanni noota mayinni anfeemmo? Hanni wole gobbanni dayino rodii woy rodoo mitte hedo coyiꞌrino yino. Tenne yannara hakkawontenni ‘Kowiicho ninkewa assinanniri rooranno’ yite insa yiinore adha giwatto? Hatteentenni, ayyaanunni borreessinoonnita techohu barru qummeeshshi aana noo amaale harunsa hasiissannonke. w16.04 4:12, 13

Yesuusi ‘Maganu Gashshootiha dancha duduwo’ duduwino; rosaanosino tenne assitara hasiꞌranno. Xaa yannara tenne sokka “gosa baalate” sabbakkanni noori ayeooti? (Mat. 28:19) Dawaro teeꞌlitinota diꞌꞌikkitino; tenne assitanni noori Yihowa Farciꞌraasine callate. Misiyoone ikke soqqamanno qeesichi, mittu Yihowa Farciꞌraasinchira isi babbaxxitino gobbara heeꞌrinotanna heeꞌrino gobba baalantera noore Yihowa Farciꞌraasine sabbakkanno sokka maatiro xaꞌminota coyiꞌrino. Insa qoltino dawaro maatiyya? Kuni qeesichi togo yiino: “Insa baalu gowwoota ikkitinohura ‘Maganu Gashshootiha dancha duduwo’ yite mitu gari dawaro qoltino.” Ikkollana tini Yihowa Farciꞌraasine “gowwoota” ikkitukkinni mittimmatenni sabbakkanni noore ikkitinota leellishshannote; qoleno addu Kiristaani tenne assa hasiissannonsa. (1 Qor. 1:10) Yihowa Mangiste Egensiissannota Agarooshshu Shae yinanni metseeteti qara sokka Maganu Gashshooteeti; insa tenne sokka dudubbanni no. Tenne metseete 254 afiinni qixxeessine mitte mittenta ittime mereerimunni 59 miliyoone meddi yitannota attammanni; alamete aana tenne metseete geeshsha halashshine attammanniti wole metseete dino. w16.05 2:6

Maganu Mangiste halashshaano ikkinoommohura woꞌma yanna suwisaano ikka hasiꞌneemmoha ikkara dandaanno. Tennera, heeshshonke bikkunnita assiꞌra hananfeemmo. Ikkirono, maalaamittete coyi albi geeshsha ikka hooganno wote hagiidha hoongeemmo yine yaandeemmoha ikkara dandaanno. Qullaawu Maxaafi giddo suwisaano ikke yitanno higge dino; hakko daafira halashshaano ikkine Yihowara ammanamme soqqammanni heeꞌra dandiineemmo. Ikkirono, Yesuusi Maganu Gashshootira yite uminsa horo agurtannori lowo atoote afidhannota buuxisino. (Luq. 18:29, 30) Qoleno Qullaawa Borro ‘banxe uyiꞌneemmoti galatu kakkalonna’ addu magansiꞌra halashshate assineemmori baalu Yihowa hagiirsiisannota kultannonke. (Far. 119:108) Tenne Qullaawa Borro giddo noo hedo nabbambenna biddishsha afiꞌrate huuccatto assiꞌne Yihowa hedo wodancha didandiineemmo? Tenne hedo hiincanke ninkerano kaaꞌlannohanna iimi Anninkewiinni atoote afiꞌneemmo gede assanno doorsha doodhate kaaꞌlitannonke. w16.05 3:13

Wedella hende qixxeessinanni borruwa giddo qummi assinoonni fonqoli tuncu yaannohu insara calla diꞌꞌikkino. Ninke baalinke ammananke daafira sharrama, hedonke qeeꞌla, darawonke gara ikkinokkire assineemmo gede xixxiibbannonke yannara dandee saꞌꞌanna gara ikkitinokki hoshshanna boohaarsha qoropha hasiissannonke. Aleenni kullita woy wole hattoo birxichuwa qixxeessinannihu wedella hendeeti. Ikkina, jajjabbu Kiristaani wedellaho qixxaabbino borruwa nabbawa woffi assannori gede assite heda hasiissannonsa? Dihasiissannonsa! Kuri borruwa qixxeessinoonnihu wedella hende ikkirono, rosu xintaminohu yanna saꞌannokkite Qullaawa Borro aanaati; konnira tini ayyaanaamittete qixxaawo baalanka kaaꞌlitankera dandiitanno. Wedella hende qixxeessinanni borruwa insa tuncu yaannonsa fonqolo dandiite saꞌanno gede kaaꞌlitannonsatano agurranna, ayyaanaamittetenni lophitannonna Yihowawa shiqqanno gedeno kaaꞌlitannonsa. Tini borruwa jajjabba Kiristaanano kaaꞌlitanno.—Ros. 12:13. w16.05 5:15, 16

Yihowa Maganinke mitto Yihowaati. Tini kaajja yaattooti! Israeele Yihowa Maganinsa mitto Yihowa ikkinota qaagansa Hexxote Gobba eꞌe ragidhu yannara tuncu yiinonsa qarra dandee heeꞌrate kaaꞌlitinonsa. Ninkeno tenne qaalla qaaganke albillitte bayiru qarri yannara jawaante afiꞌneemmonna Gannatete giddo heeꞌneemmo heeshshora kaaꞌlitannonke. Yihowa woꞌma lubbonkenni banxenna soqqamme iso calla magansiꞌranna Kiristaanu mittimmanke baꞌannokki gede sharrama agurroonke. Tenne assanke agura hoongummoro, Yesuusi albillitte geꞌreewoho yine yoo yinanninsari daafira coyiꞌrinori woꞌmanna laꞌneemmo; isi togo yiino: “Kiꞌne Anniꞌya maassiꞌrinoꞌneri! Amme! Alame kalaqantuhunni kayise qixxaawinoꞌneha Gordu Gashshoote ragidhe!”—Mat. 25:34. w16.06 3:2, 20

Naaxxa ninke assineemmori gara ikkinohu gede assine hende kaajjadu dori gede ikkineemmo gede assitannonke. Ayyaanaamittete rodiikki koffi asseennahe woy alba songote giddo noohe qoosso hoogge dadillootto woti no? Ikkina, hatte yannara maa assitto? Naaxxa qeeltuhenso, rodiikki ledo salaame kalaqqe Yihowara ammanante heeꞌra hasiꞌrattota leellishitto? (Far. 119:165; Efe. 4:32) Cubbo loosa roso assiꞌra woy mannu afikkinni cubbo loosa Maganu aannonke amaale macciishsha gimbeemmo gede assitankera dandiitanno. Hakkunni gedensaanni cubbo loosa shoturi gede assine laꞌneemmo. (Ros. 8:11) Alba teeda baꞌino misilla laꞌꞌate rosichi noosi rodii gedensoonni togo yee coyiꞌrino: “Songote cimeeyye loossanno soꞌro xinqisiisireemmoha ikkummo.” Kuni assooti ayyaanaamittesi gawajjino. Yannate gedensaanni, assootisi xawo fulino; hattono cimeeyye baasa kaaꞌlitinosi. Ninke baalinkera guuntete xeꞌne noonketi egennantinote. Ikkollana, soꞌro xinqisiisiꞌneemmoha woy Yihowa maaro xaꞌmira agurre assinoommori gara ikkinota leellishate sharrammeemmoha ikkiro, wodaninke hajajama giwa hanafino yaate. w16.06 2:5, 6

Yesuusi macciishshaano yaada hasiissannonsakki coyiꞌra yaaddanno. Yesuusi yaada agurre yiinohu dimullaati. Hasiisannokkirira yaada, wole agurina hasiisannorira nafa yaada, hedo billaallitanno gede assitanno; tini ayyaanaamittete coye lashshi assinanni gede assitara dandiitanno. Yesuusi rosaanosira hedanno daafira, ilaalaho rosiisi yannara insa yaaddannokki gede shoole hige qorowisiisino. (Mat. 6:27, 28, 31, 34) Yesuusi mannaho barru barrunkunni heeꞌrate hasiisannonsari maatiro seekke afino. Qoleno, isi yannate gedensaanni rosaanosira, ‘qarrissannote goofimarchu yannara’ addi addihu mitiinsanno coyi tuncu yaannonsata afino. (2 Xim. 3:1) Mitiinsitanno coyibba giddo mitu, looso hoogate, hidhinanniri waaga iibbate, sagalete anjeetinna buluulle buxate. Ikkirono, Yesuusi ‘sagale lubbo, uddano mannimma roortannota’ huwatino. w16.07 1:8, 9

Yihowa assinammora hasiꞌrannore baala assine anfeemmoha ikkoommero, isi aannonke elto afiꞌra hasiissannonkete yaate. Kayinni hatto assa didandiineemmo. Hayyichu Moote Selemooni togo yee borreessino: “Mitte soꞌrono assikkinni, woꞌmanka woyite dancha looso calla loosannohu baattote aana mittuno dino.” (Ros. 7:20) Soqqamaasinchu Phaawuloosino togo yiino: “Mannu baalu cubbo loosino; Maganu ayirrinyeno hoogino”; isi lede, “Cubbu laalchi reyote” yee borreessino. (Rom. 3:23; 6:23a) Woleteemmero ninke reya hasiissannonkereeti. Yihowa kayinni, guuntete xeꞌne noonsate mannu oosora taalle afidhinokki elto oye baxannonsata leellishino. Isi “mitto Beettosi” uullara daye ninke daafira reyanno gede asse elto baalanta roortino elto uyinonke. (Yoh. 3:16) Konni daafira Phaawuloosi Yesuusi daafira coyiꞌranni, isi “Xa . . . reyote qarra adhino daafira, ayirrinyunna galatu baꞌlatto worroonnisi . . . ; isi Maganu eltonni baalunku daafira reyino” yiino. (Ibi. 2:9) Addaho, “Maganuwiinni afiꞌnanni baꞌraaꞌri . . . , Mootichinke Kiristoosi Yesuusi widoonni hegere heeshshooti.”—Rom. 6:23b. w16.07 3:3, 4

Adhanna adhama nooreeti. Maganu adhanna adhama xintinohu mayiraatiro afanke, tenne qixxaawora gara ikkitino lao heedhannonke gedenna adhamatenni afiꞌnanni atoote albinni roore afiꞌneemmo gede kaaꞌlitannonke. Maganu umi mancho Addaami kalaqihu gedensaanni, saadate suꞌma fushshanno gede insa isiwa abbino. “Addaamira kayinni labbannositanna kaaꞌlitannosita dianfoonnisi.” Konni daafira Maganu, Addaami lowo goxicho goxanno gede asse midaadisinni mitto miqicho haaꞌre meyata kalaqino; hakkiinnino hatte mancho isiwa abbino. (Kal. 2:20-24) Konni daafira, adhanna adhama xintinohu Maganoho.Yesuusi, “Kunnira manchu annasinna amasi agure galtesi ledo” quraanyamanno; “lamunku mitto biso ikkanno” yiinohu Yihowa ikkinota coyiꞌrino. (Mat. 19:4, 5) Maganu Heewani kalaqate Addaami midashsho horoonsiꞌrasi, lamunku mittimmansa huwatanno gede assitinonsa. Adhanna adhama diiga woy galtete aana galte lexxa dandiinannita leellishannori dino. w16.08 1:1, 2

Yesuusi duucha wote mannaho Maganu Mangiste daafira kulanno. Lawishshaho, Sikaari katami mule noote Yaiqoobi buicho qooxeessira mitte mancho ledo dancha hasaawa hasaawino. (Yoh. 4:5-30) Isi Leewi yinanniha qaraxaasincho Maatewoosi hasaawisino. Maatewoosi koyinsoonnisi koyishsha adhe Yesuusi harunsaancho ikkino. Maatewoosinna wolu manni Maatewoosi minesi jila qixxeessi yannara Yesuusi coyiꞌranna macciishshitino. (Mat. 9:9; Luq. 5:27-39) Wole yannarano, Yesuusi jaalu gede ikke shiqe Naatinaeeli hasaawisino; Naatinaeeli alba Naazireetete manni daafira gara ikkitinokki lao noosiho. Naatinaeeli kayinni gedensaanni hige hedosi biddi assiꞌrino. Isi Naaziretete Yesuusi rosiisannore lede rosate murciꞌre kaino. (Yoh. 1:46-51) Ninkeno haaruuddu halashshaano wolu manniwa jaalu gede ikkite shiqqe hasaawisa dandiitanno gede qajeelsa hasiissannonke. Suwashshu wodani noonsa manna awu afiinninna insara hendeemmota leellishanno garinni hasaawinseemmoha ikkiro halaale macciishshara dandaanno; haaruuddu tenne afansa lowo geeshsha hagiidhitanno gede assitansara dandiitanno. w16.08 4:7-9

Adhamino manni mereeronsa kalaqamannoha buutote qarra tira hoogiro, tini insa giddo mittu woy lamunku babbaxxate woy adhamansa diigate hedanno gede assitara dandiitanno. Minaanninna minaama babbaxxa shotinse laꞌnannita diꞌꞌikkitino. Buutote qarri kalaqamanno wote babbaxxa dancha mala labbannoha ikkirono, togo assa roore wote qarra leddanno. Maganu, manchu annasinna amasi agure galtesi ledo quraanyamannota coyiꞌrino; Yesuusino tenne lede coyiꞌrihu gedensaanni togo yiino: “Maganu mitto assinoha mannu badoonke.” (Mat. 19:3-6; Kal. 2:24) Togo yaa, “Maganu mitto assinoha” minaanni woy minaama nafa bada dihasiissannonsa yaate. Yihowa adhamino manni heeshshote noo geeshsha mitteenni heeꞌrara hasiꞌranno. (1 Qor. 7:39) Minaanninna minaama, baalunku manni Maganu albaanni xaꞌmamannota qaage, maatensa mereero kalaqamanno qarri batiꞌre lowo deerra iillikkinni rahe tirate sharrama hasiissannonsa. w16.08 2:10, 11

Diinnanke hendoommokkinna wolqa baꞌnoommo yannara gawajjitankera dandiitannohura ayewoteno baqqi yine agadha hasiissannonke. “Bushu coyinni qeelantooti” yitanno amaale busha coye qeela dandiineemmota leellishshannote. Busha coye qeelate agurrummokkinni sharrammeemmoha ikkiro, tenne assa dandiineemmo. Qorophanna sharrama agurrummoro kayinni, Sheexaanunna busha alamesi, hattono laanfenke qeeltankera dandiitanno. Konnira, Sheexaanu hexxo mudhite busha coye qeelate sharrama aguratto gede assahera horo wodhitooti! (1 Phe. 5:9) Busha coye sharramme qeelate, sharrammanni heeꞌnoommohu mayiraatiro qaaga hasiissannonke. Magano hagiirsiisatenna isi atoote afiꞌrate Ibiraawoota 11:6 te noo hedo qaaga hasiissannonke; qummeeshshu togo yaanno: “Maganunniwa shiqqi yaanno manchi Maganu nootanna iso hasiꞌranno mannirano baꞌraaꞌra aannota ammana hasiissannosi.” “Hasiꞌra” yine tirroonnihu Giriikete qaali mitto coye diinaggaawe hasiꞌranna hakkonne coye afiꞌrate sharrama yitanno tiro afiꞌrino.—Soq. 15:17. w16.09 2:4, 5

Qullaawu Maxaafi giddo Maganoho ayirrinye abbanno doorsha doodhate kaaꞌlannonkehu kaajju biddishshi no. Ikkirono, uddiꞌneemmo uddano doodha dandiineemmo. Miinjinke deerri babbaxxinonte gede doodhineemmorino babbaxxinoho. Ikkirono, uddanonke duuchanka wote doofaartinokkita, likkanya, heeꞌnoommo bayichira maltinotanna qooxeessinke manna giwissannokkita ikka hasiissannose. Kawajjaame, likkanyanna heeꞌnoommo bayichi ledo sumuu yitanno uddano doodha duucha wote shota ikkitannonkkekkiti egennantinote. Duucha suuqera faashine ikkitino uddano calla heedhanno; hakko daafira likkanyanna bisoho qaꞌmitannokki gurde, qamise, shamizenna bolaale afiꞌrate lowo yanna hasiꞌra hasiissannoha ikkara dandaanno. Ikkirono, roduuwinke danchanna kawajjaame uddano afiꞌrate sharrammeemmo sharro huwattaranna naaddara dandiitanno. Qoleno, baxillaancho ikkinohu iimi Anninke Yihowara ayirrinye abbitanno uddano afiꞌrate yine sharrammeemmo sharro gaabbissannota ikkitukkinni lowo geeshsha hagiidhineemmo gede assitannonkete. w16.09 3:15, 16

Ooso mitto coye ikkinohu gede assite hedate dandoo noonsa. Konni daafira annuwanna amuuwa, oosoꞌne rosiissinanni wote lawishsha horoonsidhe. Lawishshunni rosiisa qaaqquulleho Qullaawu Maxaafi gara ikkinota rosiisateno kaaꞌlitanno. Lawishshaho techohu barru qummeeshshi aana noo hedo laꞌno. Konne qummeeshsha Maganu ayyaaninni borreessinoonnita xawisa dandiitinannihu hiittoonniiti? Tenne hedo borreessiisinohu Magano ikkinota kultine calla agurtinanniha ikkara dandaanno. Kayinni hatto assantenni, qaaqqiꞌne hedanno gede assate mayira diwoꞌnaaltinanni? Iyyoobi heeꞌrinohu xeertote noore leellishannohu teleskoppe woy wolu hattoo uduunni nookki yannara ikkinota qaaqqiꞌnera kullesi. Qaaqqiꞌne hatte yannara uulla mullawa rarraꞌino yee heda, ammanate qarrissannota xawisanno gede assa dandiitinanni. Qaaqqiꞌne tenne lawishshunni xawisate kaase woy kinchu irkisinori nookkiha mullawa uurra dandaannokkita horoonsiꞌra dandaanno. Konni garinni rosiisa, qaaqqiꞌne uulla irkisinori nookkiha rarraꞌanno gede assinoricho mannu ooso buuxxara lowo yanna albaanni Yihowa Qullaawu Maxaafi giddo borreessamanno gede assinota huwatanno gede kaaꞌlitasira dandiitanno.—Neh. 9:6. w16.09 5:9, 12

Mittu manchi Maganu assate hedinore afino daafira calla ammana noosi yaa didandiinanni. Ammana mittu manchi Maganu fajjo ledo sumuu yee heeꞌranno gede wolqa ikkannosi akataati. Hakku manchi Maganu mannu ooso gatisate qixxeessino qixxaawo ammanannoha ikkiro, mannaho dancha duduwo kulate kakkaꞌꞌanno. Maganu abbannote haaro alame giddo hegerera heeꞌrate, ammana afiꞌranna ammananke kaajjite heedhanno gede assiꞌra hasiissannonketi egennantinote. Ammananke kaajjite heedhanno gede assiꞌra muꞌrote waa hayikkisate gedeeti. Lubbote noo muꞌro mannu loosino muro gede ikkitukkinni, duuchanka wote soorrantannote. Lubbote noo muꞌro waa afiꞌra hoogguro qoortanno; duucha wote quficho afidhuro kayinni lattanni hadhanno. Lattino muꞌro nafa, waa afiꞌra hoogguro sunu sununni moolte baꞌara dandiitanno. Ammanankeno lashshi assine agurrummoro qoortaranna moolte baꞌara dandiitanno. (Luq. 22:32; Ibi. 3:12) Kayinni ammananke towaaxxineemmoha ikkiro, baꞌukkinni “lophitanni” hadhanno; hattono ‘ammanatenni fayyaaleeyye’ ikkine heeꞌneemmo.—2 Tes. 1:3; Tit. 2:2. w16.10 4:4, 5

Daanieelinna miillasi qafadante Baabiloone hadhu yannara, hatte gobba manni insara “Baabiloonootu afoo” rosiise budensa harunsanno gede assate woꞌnaalino. Qoleno, insa qajeelsitara shoommoonniri Baabiloonete suꞌma fushshitinonsa. (Dan. 1:3-7) Daanieelira fushshinoonni suꞌmi Beeli yinannihu Baabiloonennihu kaphu magani ledo xaado afiꞌrinoho. Moote Nabukedenetsoori, Daanieeli Baabiloonete magani Yihowanni roore wolqaataamoho yee hedanno gede assa hasiꞌrinoha ikkara dandaanno. (Dan. 4:8) Daanieeli Moote Nabukedenetsoori itanno sagale itannoha ikkirono, isi ‘battaawannokki gede agadhino’ woy qorophino. (Dan. 1:8) Isi “qullaawa maxaaffa” afoo dadhino afiinni ganye xiinxallannohura manni gobbara noo yannara ayyaanaamittesi gawajjantukkinni heeꞌrino. (Dan. 9:2) Hakko daafira, isi Baabiloone haꞌrihunni 70 diri gedensaannino, mannu woshshannosihu Ibiraawootu Afiinni fushshinoonnisi suꞌminniiti.—Dan. 5:13. w16.10 2:7, 8

Yesuusi ‘ammanaminohanna wodanaamo borojjicho’ shoomino; ayyaanaamittete coye xawisannohu konne borojjicho callaati. (Mat. 24:45-47, NW) Ayirrinye adhinohu Yesuusi Kiristoosi, 1919 kayise konni borojjichi widoonni mannu Maganu Qaale huwatanno gedenna giddosi noo biddishshuwa harunsanno gede kaaꞌlanni keeshshino. Qullaawu Maxaafi giddo noo biddishshuwa harunsineemmoha ikkiro, songo xuru nookkita, hattono salaamenna mittimma noota ikkitanno gede assineemmo. Baalunku ninkeneeto togo yine xaꞌma hasiissannonke: ‘Ammanaminohunna wodanaamu borojjichi aanno biddishsha harunse Yesuusira ammanameemmota leellisheemmo?’ Borreessinoonnihu Maganu Qaali, Yihowa dirijjiteta iimiidi kifile anfeemmo gede kaaꞌlannonke. Lawishshaho masaalaanchu Hiziqeeli, Maganu dirijjiteta iimiidi kifile riqibbannota farashshu gaare woy saragalla ajuujatenni laino. (Hiz. 1:4-28) Kiristoosinna qullaawa sokkaano tenne busha alame hunate qixxaabbe noote tenne yannara, Yihowa sagaralli Suꞌmisi qullaawannonna aliidimma gara ikkase xabbe leeltanno gede assate wiiname haꞌranni no. w16.11 3:9, 10

Albiti Yesuusi harunsaano assitunte gede, ninkeno gamba yineemmohu rosateetinna mimmitonke jawaachishateeti. (1 Qor. 14:31) Ayyaanaamittetenni gikki yitinota Maganu soqqamaano nafa jawaachisha hasiissanno. Hanni Iyyaasure laꞌno. Isi lowo diro Maganoho ammaname soqqamino. Ikkirono, Yihowa Muse Iyyaasu jawaachishanno gede kulino; togo yiino: “Mannaho albisanni tenne laꞌꞌatto baatto ragidhanno gede assannonsaha ikkino daafira, Iyyaasura assannore kulisi; jawaatannonna kaajjanno gede irkisisi.” (Mar. 3:27, 28) Yihowa, Iyyaasu Israeele massaganni Hexxote Gobba eessanno gede doore lowo looso uyinosi. Isira hexxo mudhanno gede assannori iillannosi; hattono ajayi ajeenna mitte higge olunniwa qeelantanno. (Iya. 7:1-9) Hatte yannara Iyyaasura jawaantenna irko hasiissinositi dihuluullissannote! Konni daafira, Maganu hoshsha agarate jawaatte loossanno cimeeyyenna woradu aliidi laꞌꞌaasine jawaachisha hasiissannonke.—1 Tes. 5:12, 13. w16.11 1:12, 13

Qullaawu Maxaafi Rosaano kaphu ammaꞌnora noonsa lao fiixinsara, jaallansaranna alba eꞌanno beetekiristaane miillara calla kulte diagurtino. Bayira Baabiloone Qullaawa Borro yitanno garinni fotaancho ikkitinota gobba gosa affanno gede assa hasiissino! Konnira, boode kume ikkitannoti Qullaawu Maxaafi Rosaano Suꞌmu Kiristinni looso xawo fushshitannota, “Baabiloone Ubbu” yaanno gafa afidhino tiraakte Sadaasa 1917 kayise 1918 hanafo geeshsha 10,000,000 ikkitannota tuqissino. Tini qeesootu baasa giirantanno gede assitino; Qullaawu Maxaafi Rosaano kayinni insa waajjite sheke yaa agurte konne lowo geeshsha hasiisanno looso loossino. Insa ‘Mannaho hajajamantenni Maganoho hajajamate’ murcidhe kaꞌino. (Soq. 5:29) Tini maa leellishshanno? Hatti olu yanna, kuri Kiristaana ikkino meentinna labballi Bayira Baabiloone giddo qafadame noota ikkitukkinni, hakkiinni fulanni nootenna wolootuno fultanno gede kaaꞌlanni noo yannaati. w16.11 5:2, 4

Mitu mannira kuni qummeeshshi halaalu mine noohunna halaalu mine nookkihu, yaano Kiristaana ikkinonna Kiristaana ikkino manni mereero noo badooshshire kulannoha lawansara dandaanno. Ikkollana, Phaawuloosi tenne sokka borreessinohu ‘Maganu baxinonsariranna qullaawoota ikkitara woshshinonsarira Roomaho heeꞌranno’ Kiristaaniraati. (Rom. 1:7) Konni daafira, Phaawuloosi maalu coye assanno Kiristaana ayyaanu coye assanno Kiristaani ledo heewisiisanni no. Isi ‘maalu garinni heeꞌra’, hakko heeꞌranno Kiristaani “mannimma giddo loossanni” noote “busha yorto” ledo xaadise kulino. (Rom. 7:5) Phaawuloosi “maalu garinni heedhannori” yaasi, guuntete xeꞌnensanni kainohunni yortonsa woy afiꞌrate halchanno coyi aana illachishanno manna kulateeti. Kuni manni halchonsa, afiꞌrate hasiꞌrannore woy laalaattanno coye wonshiꞌrate hedanno mannaati; insa wonshiꞌra hasiꞌranno hasattonsa siimu xaadooshshi hasatto woy wole hasatto ikkitara dandiitanno. w16.12 2:5, 7

Mitto mancho yaadanno gede assannosi coyi albaanni assinoreeti woy loosino soꞌrooti. Moote Daawiti loosino soꞌro, ‘lowo duhi gede ayirritinosita’ yaano qaagantanni qarrissannosita coyiꞌrino. Isi togo yiino: “Dhibbunni [“yaaddote”, NW] kainohunni hakankaroommo.” (Far. 38:3, 4, 8, 18) Daawiti hatte yannara maa assa woyyitannosi? Isi maa assiyya? Isi Yihowa mararannositanna maarannosita dihuluullamino. (Far. 32:2, 3, 5) Mito wote kayinni, xa iillanni noonsa coyi yaachishannonsaha ikkara dandaanno. Lawishshaho, Daawiti Faarso 55 borreessi yannara, heeshshosira yaade no. (Far. 55:2-5) Ikkirono isi yaaddo Yihowa addaxxannokki gede assitasira diwodhino. Daawiti yaaddosi Yihowara kule huucciꞌrinoha ikkirono, iillinosi qarra dandee saꞌꞌate isi umisi mitore assano hasiissannosita huwatino. (2 Sam. 15:30-34) Daawiti lawishshinni roso afiꞌra dandaatto. Yaaddo xaaxxe amaddannohe gede assiꞌrantenni, ati assa dandaattore assittohu gedensaanni Yihowa kaaꞌlannoheta addaxxite gattuta isi angara worte agure. w16.12 3:14, 15

Daawiti Yihowa masaalaanchu Naataani widoonni uyinoonnisi seejjo adhino. Qoleno Daawiti cubbosi kule, hattono Yihowa ledo noosi aante woyyeessiꞌra lowonta hasiꞌrannota coyiꞌre huuccatto assiꞌrino. (Far. 51:1-17) Daawiti umosi bushiishanni heeꞌra agure, loosino soꞌronni roso afiꞌrino. Ee, isi layinkimeeshsho hattooha shota ikkinokki cubbo diloosino. Lowo diri gedensaanni isi ammaname heeꞌre reyino; isi ammaname assinore Yihowa horo dihawanno. (Ibi. 11:32-34) Daawiti lawishshinni maa ronseemmo? Shota ikkinokki cubbo loonsummoro, addinta gaabbinoommota leellishannore assanna Yihowa maarannonke gede huucciꞌra hasiissannonke. Cubbonke maanxummokki Isira kula hasiissannonke. (1 Yoh. 1:9) Hattono, ninke ayyaanaamittetenni kaaꞌla dandiitannote songote cimeeyyera kula hasiissannonke. (Yai. 5:14-16) Yihowa qixxeessino qixxaawo horoonsiꞌne isi ayyaanaamittetenni hursatenna cubbonke maarate eino qaale ammanneemmota leellinsheemmo. Hakkiinni saeno, loonsoommo soꞌronni roso afiꞌra, Yihowara soqqamanna albillittete daafira yaandummokki heeꞌrate sharrama hasiissannonke.—Ibi. 12:12, 13. w17.01 1:13, 14

Booꞌna maati? Mittu manchi assi yinoonnisikki coye assate muddamannoha ikkiro, hakku manchi booꞌnaleessaho yaate. Ninke baalunku guuntete xeꞌne noonkere ikkinoommo daafira, mito wote booꞌnineemmo. Ikkollana, Moote Saaooli lawishshi leellishannonte gede booꞌna roso assiꞌneemmoha ikkiro, galle honsanni Maganu ledo noonke jaalooma huꞌnineemmo. Faarso 119:21 Yihowa ‘booꞌnaleeyye rufannota’ kultanno. Isi togo assannohu mayiraati? Booꞌna, hedeweelcho loonsanni soꞌronni saꞌino bunsheeti. Umihunni, booꞌnineemmoha ikkiro, Yihowa Aliidi Mootichanke assine adhineemmota leellinshummokki ganteemmo. Layinkihunni, assate qoosso noonkekki coye assineemmoha ikkiro, tini wolu manni ledo giwammeemmo gede assitannonkeha ikkara dandaanno. (Law. 13:10) Sayikkihunni, booꞌnanke xawo fultanno wote, saalfanteemmoha ikkara dandaanno. (Luq. 14:8, 9) Booꞌnatenni kaꞌne assinanniri dixuꞌmanno. Qullaawa Borro giddo kulloonninte gede, dhukanke anfe heeꞌra aye woteno dancha assooteeti. w17.01 3:4, 5

Addaami guuntete xeꞌne noosiha ikkinohura, Maganu akatta guutu garinni leellisha didandiino. Isi geedo gedensosi huꞌninoha calla ikkikkinni, oososi guuntete xeꞌne, cubbonna reyo ragidhanno gede assino. (Rom. 5:12) Isi, sirchisi gawalo afidhinokki heeshsho heeꞌrate hexxo afiꞌrannokki gede assino. Qoleno, Addaaminna Heewani guuta ooso ila didandiitino; oosonsa giddono guuta ooso ila dandiinohu dino. Sheexaanu Daawuloosi Addaaminna Heewani Maganuwiinni xeertiꞌranno gede assi yannanni kayise soꞌrisiisa diagurino. (Yoh. 8:44) Maganu manna baxa kayinni diagurino. Addaaminna Heewani finqiltinoha ikkirono, Yihowa mannu ooso Isi ledo fiixoontanno gede assa hasiꞌranno. Isi ayino reyara dihasiꞌranno. (2 Phe. 3:9) Konni daafira, Addaaminna Heewani finqiltanni heedheennanni, Maganu xalala higgesi diigikkinni mannu ooso isi ledo fiixoomate kaaꞌlitannonsa qixxaawo qixxeessino.—Yoh. 3:16. w17.02 1:12-14

Maganinke faale haꞌne wolu mannihu danchu akati aana illachinsheemmoha ikkiro, Yihowara soqqammeemmo soqqansho naandeemmo. Hatto ikkiro, leellamantenni woy wolu mannira aleenni higate hedantenni, umonke heeshshi assine wolu manni aannonke amaale macciishshineemmo hattono insa hedo adhineemmo. Insara mitte qoosso uyinanninsa wote ledonsa hagiidhineemmo. Qoleno, Yihowa ‘gobba baalate noo roduuwanke’ maassiꞌranni noota laꞌneemmo wote iso galanteemmo. (1 Phe. 5:9) Mitto coye Yihowa laꞌꞌanno garinni laꞌꞌa ronsanni haꞌneemmo woteno dancha doorsha doodhineemmo. Ganyine xiinxallineemmoha, huuccatto assiꞌneemmohanna ronseemmore assineemmoha ikkiro, tiiꞌꞌinke albinni roore qajeelanno. (1 Xim. 1:5) Qoleno, wolu manni hasatto balaxisiisa ronseemmo. Dandiinummore assinummoro, Yihowa dhukanke anfe heeꞌneemmonna wole dancha akatta lossiꞌneemmo gede asse ‘kaajjishannonke.’—1 Phe. 5:10. w17.01 4:17, 18

Ammanate roduuwanke ayirrisa hasiissannonketi egennantinote. Roorenkanni, songote giddo albisa ikkitino cimeeyye ayirrisa hasiissannonke. Kore roduuwa gobbansa, rosu deerransanna qiniitensa laꞌnummokki ayirrinseemmo. Qullaawu maxaafi insa Maganu “elto” asse uyinore ikkitinota kulanno; kuri roduuwi Maganu manna towaatate lowore assitanno. (Efe. 4:8) Hanni songote cimeeyyere, woradu aliidi laꞌꞌaanore, Sinu Biiro Komitenna Aliidi Bisi miillare hedde. Umi xibbi diro heedhino roduuwinke, mereeronsa albisa ikkite shoomantinore ayirrissino; ninkeno hatto assineemmo. Songote giddo egennantinore togoo roduuwa quwa saꞌne diayirrinseemmo woy insa ledonke heedhuro, ledonke sokkaasine uurrite noohu gede assine dihendeemmo. Ikkollana, insa diinaggaabbe soqqantannohuranna umonsa heeshshi assitannore ikkitinohura ayirrinseemmonsa.—2 Qor. 1:24; Aju. 19:10. w17.03 1:13

Heeroodisi Agiripha Umihu, Yihudu moote ikkino. Isi horo Yesuusi gedeeha diꞌꞌikkino! Isi mitte hige “mootete uddano” uddiꞌre songo fulino. Hakko mannisi isi coyiꞌranna macciishshiti, togo yee canci: “Tini Maganu huurooti ikkinnina mannunnita diꞌꞌikkitino!” Tini, isi dhukasi hawanno gede assitusikkinni digattino. Isi “Maganoho ayirrinye aa hooginohura, hakkawoyintenni mootichu sokkaasinchi ganeenna daꞌmuule reyino.” (Soq. 12:21-23) Tenne laꞌꞌanni heeꞌre, Heeroodisi Yihowa mannasi massagara doorinoho yee hedanno manchi dino. Yesuusi kayinni, Maganu doorinosita leellishannore assino; qoleno, isi ayewoteno Bayiru Massagaanchi Yihowa ayirranno gede assino. Yesuusi massagaancho ikkinohu shiima diro calla diꞌꞌikkino. Isi reyotenni kaihu gedensaanni togo yiino: “Roorre baala gordohonna baattote uyinoonnie. . . . Kuneeti, gobbate goofimarchi geeshsha ani kiꞌne ledo noommo.”—Mat. 28:18-20. w17.02 3:20, 21