Badheessa

Yoftahe Roduuwisi hinaassinohuranna iso gibbinohura bayira beetto ikkasinni afiꞌranno ragge hoꞌlite hatte gobbanni fule haꞌranno gede assitinosi. (Eje. 11:1-3) Ikkollana, insa kaaꞌlo hasidhe woxarattu yannara kaaꞌlinonsa. (Eje. 11:4-11) Yoftahera mannu ledo kawa kaꞌaa higino coyi nooha ikkirono, isi baalunku coyinni roorse Yihowa suꞌmira gaaramino. Isi Yihowara ammanaminoha ikkate murciꞌre kaino; tini qolte isirano wolu mannirano kaaꞌlitino. (Ibi. 11:32, 33) Ninke Yoftahe lawishshinni maa ronseemmo? Mittu rodii woy rodoo dadillisinonkeha ikkara dandaanno. Hatto ikkiro tini Kiristaanu gambooshshe haꞌra, Yihowara soqqamanna songonniwa gambo gimbeemmo gede assitankera wodha dihasiissannonke. Yoftahe lawishsha harunsine, dadillisanno coye qeele saꞌꞌate Maganu biddishsha harunsanna wolu mannira dancha lawishsha ikka dandiineemmo.—Rom. 12:20, 21; Qol. 3:13. w16.04 1:7, 9, 10

Cinca hasiissannonkehu yannate geeshsha calla ikkikkinni goofimarchu geeshshaati. Hanni mitto lawishsha laꞌno; mitte yowolo galchantinohu gede assite hedi. Yowolote giddo noo manni heeshshonsa gatisiꞌrate daahanni qaccera hige fula hasiissannonsa. Qaccera iilla rahe heeꞌre daaha aguranno manchino, shiima yanna calla daahe agurannohu lamunku itamansa digattanno. Hatteente gede ninkeno, haaro alame eꞌnammo geeshsha cincate murciꞌnoommo. Tenne heeshsho afiꞌneemmohu cincinummoro callaati. Ninkerano hawaariya Phaawuloosite gedee lao noonke; isi lame hige “Hexxo dimudhineemmo” yee coyiꞌrino. (2 Qor. 4:16) Yihowa goofimarchu geeshsha cincineemmo gede kaaꞌlannonketa horonta dihuluullammeemmo. Ninkeno Phaawuloosi Roomu Sokka 8:37-39 aana coyiꞌrinori ledo sumuu yineemmo; isi togo yiino: “Ninke baxinonkehu isi widoonni woꞌmunni woꞌma qeelle saꞌneemmo. Korkaatuno reyono ikkituro, heeshshono ikkituro, sokkaanono ikkituro, gashshooteno ikkiro, xa noo coyibbano ikkituro, albillitte dagganno coyibbano ikkituro, wolquwano ikkituro, gottinyeno ikkiro, xeichono ikkiro, woy wole aye kalaqono ikkituro Mootichinke Kiristoosi Yesuusi widoonni leellinohu Maganu baxilliwiinni baddankera dandiitannokkita seekke afoommo.” w16.04 2:17, 18

Poletiku hajora anga wodhatto gede assannohere badde affe qeelte saꞌꞌate kaaꞌlitannohe hayyo aannohe gede Yihowa huucciꞌra dandaatto. Ammanakki daafira usurrihero woy qorichinshihero ammanakkinni kainohunni kaajjite uurratenna baxi darti iilliherono cincite saꞌꞌate kaaꞌlitannohe jawaante afiꞌrate huucciꞌri. (Soq. 4:27-31) Yihowa Qaalisi widoonni jawaachishahera dandaanno. Fonqolu iillannohe yannara poletikaho anga wodhattokki gede kaaꞌlitannohe qummeeshshuwa hiinci. Qullaawa Maxaafa hoogatto yanna tuncu yitannohe wotira kaaꞌlitannohehura kuri qummeeshshuwa hedokkinni amadate woꞌnaali. Qullaawu Maxaafi albillitte Maganu Mangiste abbitanno atoote huluullammeemmokki gedeno kaaꞌlannonke. Darte iillinshanninke yannara cincate tini hexxo lowo geeshsha kaaꞌlitannonke. (Rom. 8:25) Ati afiꞌra hasiꞌratto atoote kultanno qummeeshshuwa doorte hiinci; Gannatete giddo konne atoote afiꞌroottohu gede assite hedi. w16.04 4:14, 15

Xaa yannara suꞌmu Kiristinni marooti Maganu Gashshooti daafira disabbakkanno. Tenne assituro nafa, Maganu Gashshooti mittu Kiristaanchi wodani giddo noo hedooti yite rosiissanno. (Luq. 17:21) Qoleno insa mannu Maganu Gashshooti Yesuusi Kiristoosi Moohinoha iimi gashshoote ikkinota, mannu ooso qarra baala tirannotanna muli yanna giddo uullate aaninni bunshe baala feye hoolannota huwatanno gede dikaaꞌlitanno. (Aju. 19:11-21) Hatteentenni, Yesuusa qaaga baxxannohu Gannunna Faasiku ayyaaniraati. Insa Yesuusi uullate aana Moote ikke assannore affinoha dilawanno. Sabbankanni gede assannori maa ikka hasiissannorono diaffino. Tenne assinannihu woxe gamba assiꞌrate woy hoola yinoonni mine miꞌnate hende ikka dihasiissanno. Maganu Qaale daddaꞌla dihasiissanno. (2 Qor. 2:17) Maganu Gashshooti sokka sabbakkannori assitannorira mitore baantansara agadha dihasiissannonsa.—Soq. 20:33-35. w16.05 2:7, 8

Hanni songote giddo mito roduuwa hagiirsiisa hooggara dandiitanno uddano baxisinohehu gede assite hedi. Qullaawu Maxaafi giddo konni garinni uddidhinoonte yitanno higge dino. Tenne hajo daafira Yihowara mayi macciishshamannosi? Hawaariya Phaawuloosi tenne lainohunni ayyaanunni togo yee amaalino: “Meentuno umo biifisire, culka woy irra woy lowo woxinni hirranni imaana uddiratenni seesa agure, arshimmatenninna kawajjotenni seesona. Magano magansiꞌneemmo yaanno meenti dancha looso loosatenni seesona.” (1 Xim. 2:9, 10) Tini amaale Kiristaanu labballino harunsa hasiissannote. Yihowara ammanamme soqqammeemmore ikkinoommohura, ninke injo daafira calla heda agurre uddiꞌneemmonna seenseemmo gari wole manna kaaꞌlanno woy gawajjanno gara heda hasiissannonke. Bikkunnire ikkankenna baxillu, ammanate roduuwinkera mayi macciishshamannonsa yine hendeemmo gede kakkayisannonke; tini hagiirrinsa baꞌꞌannokkinna koffi yitannokki gede assitanno.—1 Qor. 10:23; Fil. 3:17. w16.05 3:14

Addaami Kalaqaanchisira finqile Maganu beetto ikkate qoossosi huꞌnino. Ikkirono, hundinni kayise Addaami sircho ikkinohu “batiꞌru gomichi” yaano ammanamino manni Maganu aliidimma irkisa doodhino. (Ibi. 12:1) Insa umonsa heeshshi asse Kalaqaanchinsara maahoyye yee gale, Annansanna Seekkaanchonsa ikkara hasiꞌrannohu Sheexaane ikkikkinni Magano ikkinota leellishino. (Yoh. 8:44) Insa konni garinni Maganoho ammanamansa, techohu barru qummeeshshira kulloonni hedo qaagiissitannonke. Yannankerano Yihowa ayyaanunninna halaalunni magansiꞌranno manni baalu umonsa heeshshi assatenna isira maahoyye yee galate sharramanno. Insa Yihowa Annanke yite woshshanna iso Seekkaanchonsa assidhe isira maahoyye yite gala lowo ayirrinyi gede assite laꞌanno. Ikkina ateneeto, Yihowa dancha uduunnicho asse seekkannohu shaqqadu dori gede assite laꞌꞌatto? Ayyaanaamittete roduuwakkino Maganu seekkanni noori gede assite laꞌꞌatto? w16.06 1:2, 3

Haaro alame gambisse noote tenne yannara ammananke fonqolanno coyi tuncu yaannonke. Hakko daafira jawaata ammana noonkeronna teꞌee layiꞌra hasiissannonke. Lawishshaho, Yesuusi Maatewoosi 6:33 aana coyiꞌrinore ma garinni laꞌneemmoro heda dandiineemmo. Ateneeto togo yite xaꞌmi: ‘Heeshshoꞌya giddo balaxisiiseemmo coyinna doodheemmo doorshi Yesuusi coyiꞌrinori halaale ikkinota ammaneemmota leellishannoho? Woxe lexxate yee gambooshshe woy qanchu soqqansho hoseemmo? Looseemmo loosi lowo yanna adhanni nooeta afummoro maa asseemmo? Alame faalese haꞌreemmo gede assitaera woy halaalu mininni fushshitaera wodheemmo?’ Hanni Qullaawu Maxaafi hoshshate daafira, bohate daafiranna boohaarshu daafira aanno biddishsha lashshi assinohu Yihowa soqqamaanchire hedi. Ateneeto, ‘Anera togoo coyi tuncu yiiero ma asseemmo?’ yite xaꞌmi. Hajajama giwate akati giddonke rumuxxanni noota anfummoro ranke ammananke layiꞌra hasiissannonke. Maganu Qaale horoonsiꞌne hendeemmo gara ganyine layiꞌra hasiissannonke. w16.06 2:8, 9

Uullate aana nooti Yihowati ammanantino soqqamaano, addinta baxxitino dirijjiteeti. Ikkollana, tini dirijjite guuntete xeꞌnenna laanfe noonsa manni gamba yiinote. Ikkirono, Maganunnihu qullaawu ayyaani alamete doyichora noo songo lophitannonna harditanno gede assanni no. Tenne alame goofimarchi 1914nni hanafi yannara, uullate aana nooti Yihowa soqqamaano kiiro shiimatella. Ikkollana, Yihowa insa loossinoha sabbakate looso maassiꞌrino. Hatte yanna gedensaanni, lowo miliyoone ikkanno manni Qullaawa Maxaafa xiinxalle Yihowa Farciꞌraasine ikkino. Yihowa tenne lopho daafira kulanni techohu barru qummeeshshira noo hedo coyiꞌrino; isi lede togo yiino: “Ani Kaaliiqi kuni coyi yannasinni rahe woꞌmanno gede asseemmo.” Ee, tini masaalo tenne heeꞌnoommote goofimarchu yannara woꞌmitanni no. Xaa yannara uullate aana noori Maganu soqqamaano kiiro, mite mite gobbata mannu kiiro roortanno. w16.06 4:1, 2

Yesuusi, iimi Annisi ceate sagale aanni heeꞌre mannu oosora hasiissannonsa coyibba aannota horo dihuluullamino. (1 Phe. 5:6, 7) Yihowa sagale abbe aannonkekkiti egennantinote; ikkirono sagale woy barru barrunkunni hasiisannonkere hidhineemmo woxe afiꞌrate sharrammeemmo sharro maassiꞌranno. Qoleno, qarrammeemmo yannara wolu manni noonsa coye aannonke gede kakkayisara dandaanno. Yesuusi iima buubbanno cea galtannowa afidhanno gara kulinokkiha ikkirono, Yihowa mine miꞌnitanno dandoo uyinonsa; hattono mine miꞌnate hasiisannore qixxeessinonsa. Hatteente gede Yihowa ninkenna maatenke galleemmo mine afiꞌneemmo gede kaaꞌlannonke.Yesuusi techohu barru qummeeshshira noo hedo coyiꞌri yannara muli yanna giddo heeshshosi mannu oosora yee sayise aannota hedinoti dihuluullissannote. (Luqaasi 12:6, 7 ledo heewisiisi.) Yesuusi reyinohu iima buubbanno ceara yee diꞌꞌikkino; isi reyinohu mannu ooso hegere heeshsho afidhanno gedeeti.—Mat. 20:28. w16.07 1:11-13

Mannu cubbo ragiꞌrinohunna reyannohu mayiraati? Qullaawu Maxaafi, “mittu manchi [Addaami] cubbinni reyo” Addaami sirchi aana ‘wolqissinota’ woy mookkinota kulannonke. (Rom. 5:12, 14, 17) Ikkirono, cubbu moohannonkekki woy illaallisannonkekki gede assiꞌra dandiineemmo; tini hagiirsiissannote. Kiristoosita wodote kakkalo ammanneemmota leellinsheemmoha ikkiro, Yihowa elto mookkannonke gede assiꞌneemmo. (Rom. 5:20, 21) Cubbaataamma ikkinummorono, cubbu moohannonkekki gede assiꞌra dandiineemmo. Miteekkine cubbo loonsummoro, Yihowa maarannonke gede huucciꞌra dandiineemmo. Konni daafira, Maganu elto gashshitannonke woy mookkannonke gede assiꞌra dandiineemmo. Tini maaho kaaꞌlitannonke? Phaawuloosi “Maganu . . . [elto] ammana giwanna maalu yorto agurre umo qeeꞌline, sumbetenninna ayyaanaame heeshshonni tenne gobbara heeꞌneemmo gede rosiissannonke” yee borreessino.—Tit. 2:11, 12. w16.07 3:5, 6

Addaaminna Heewani Maganoho hajajama giwe doodhate dandoonsa doogimale horoonsiꞌrino daafira, umi adhama daafantino. “Albi hamashshi” Sheexaanu Daawuloosi, Heewani “danchanna busha badde leellishshanno haqqicho” guma itturo baxxitino egenno afidhannota kule doginose. Ise tenne hajo daafira minaannase xaꞌmitinokkihura minaannise umimma ayirrissukki gattino. Addaamino Maganoho hajajama agure, Heewani uyitinosi guma sammi yee itino. (Aju. 12:9; Kal. 2:9, 16, 17; 3:1-6) Maganu tennera Addaami xaꞌmita, isi galtesi bushiishe coyiꞌrano. Heewanino hamashshu doginoe yite hamashsho bushiishshino. (Kal. 3:12, 13) Insa hajajama hoogansara shiqishino korkaati ditidhinoho! Umi minaanninna minaama Yihowara hajajama hoogino daafira, rumantino finqilaasine ikkitino. Kuni ninkera kaajja qorowishshaati! Minaanninna minaama galtensa qinaabbinota assiꞌrate, lamunku assinore ammane adhanna Yihowara hajajama hasiissannonsa. w16.08 1:1, 4, 5

Adhamino manni mereero qarru kalaqamannohu, insa ikkannokki coye hexxino daafira ikkara dandaanno. Mittu manchi adhame hagiirrunni heeꞌrate halchino halcho woꞌmitukkinni gattanno wote dadillara, dogaminoha lawasiranna hanqe keeshshara dandaanno. Qoleno, akatinsa woy lophino gari babbaxxara dandaanno; hattono woxe amaxxate, balluwu ledo noonsa aante woy ooso ilate hajo mereeronsa coye kalaqqara dandiitanno. Ikkirono, rooru adhamino Kiristaani Maganu uyino biddishsha harunsanno daafira, togoo coye lamunku sumuu yee tiranno; tini galantanninsa gede assitannote. Adhamino Kiristaani mereeronsa buutote qarri kalaqamanno wote cimeeyye kaaꞌlitannonsa gede insara hasaapha hasiissannonsa. Kuri gikki yitino roduuwi, minaanninna minaama Maganu Qaali giddo noo amaale harunsanno gara kultannonsa. Maatete giddo kalaqamanno qarra tirate, Yihowa ayyaanasi aannonke gede, Qullaawu Maxaafi amaale harunsineemmo gedenna ayyaanu guma woy laalo ikkitino akatta leellinsheemmo gede kaaꞌlankera huuccatto assiꞌra hasiissannonke.—Gal. 5:22, 23. w16.08 2:11-13

Yesuusi uullate aana noo waro loosannohu lowo loosi noosi. Ikkirono, danchu duduwira hasatto noonsa mannira hasattonsa lexxitanno gede assino. Lawishshaho, isi baaru qaccera nooha lowo manna rosiisino. Hatte yannara, soqqamaasinchu Pheexiroosi maalaletenni lowo qulxuꞌme woshshaaxxanno gede assihu gedensaanni, techohu barru qummeeshshi aana noo hedo coyiꞌrino.Yesuusi coyiꞌrinorinna assinori mayi guma abbiyya? Pheexiroosinna ledosi noori “woꞌmanka coye agurte Yesuusi hoode hadhu.” (Luq. 5:1-11) Sanihediriini shongo miila ikkinoha Niqoodimoosi Yesuusi rosiisanno rosi baasa baxisinosi. Isi roore rosara hasiꞌrinoha ikkirono, mannu Yesuusi ledo hasaawanna afiero mayyaannoe yee waajjino. Yesuusi mannaho injiitannonsa yannara hasaawisannohanna yannasi mararannokkiha ikkinohura, Niqoodimoosi hashsha mare rosiisinosi. (Yoh. 3:1, 2) Maganu Beetti wolootu ammana jawaachishate yanna gaaꞌmino. Ikkina, ninkeno hasatto noonsa manna galagalle marre xaꞌmatenna Qullaawa Maxaafa xiinxallisate sharrama dihasiissannonke? w16.08 4:10, 11

Yihowa qullaawanna keeraancho ikkinota bande anfe isi biddishsha harunsine quwa saꞌneemmokkire ikkinoommota leellisha dandiineemmo; qoleno Yihowa biddishshi nookkiha heeꞌne dianfeemmo. Hattono quwa saꞌneemmokkire ikkinoommota leellishate wolu manni hedo ayirrisa hasiissannonke. Konni daafira, heeshshonke giddo Yihowa biddishsha harunsinenna wolu manni hedo ayirrinse quwa saꞌnummokkinni heeꞌra dandiineemmo. Uddiꞌneemmo uddano mannu Yihowa Farciꞌraasine ikkinoommota huluullamanno gede assitannota ikka dihasiissannose. Roduuwinkeno ikko wolu manni qullaawu Magani soqqamaano ikkanke afa hasiissannonsa. Isi kaajja seera fushshino; ninkeno konne seera hagiidhinanni harunsineemmo. Kawajjaamu garinni uddiꞌrannonna seesanno roduuwi suwashshu wodani noonsa manni heeshsho gatissannota Qullaawu Maxaafi sokka macciishshanno gede, hattono Yihowa ayirrannonna hagiidhanno gede assannohura galantanninsa. w16.09 3:18-20

Yaaqoobi sokkaanchu ledo sharramate murciꞌrino; qoleno Yihowa atoote afiꞌrate diinaggaawannoha ikkinota leellishino. (Kal. 32:24-26) Yaaqoobi agurikkinni sharramasi kiissinosi. Yaaqoobira Israeeli yaannoha isira malino suꞌma uyinoonnisi; Israeeli yaa “Maganu ledo sharramanno”, woy “Maganu sharramanno” yaate. Ee, Yaaqoobi Yihowa hagiirsiisino, hattono isi atoote afiꞌrino; ninkeno konne atoote afiꞌra hasiꞌneemmo. Yaaqoobiti muxxe minaama Raaheeli, Yihowa minaannise sircho maassireemmo yee eino qaale wonshanna laꞌꞌate baasa quqquxantino. Ikkollana ise ila diafidhino. Hatte yannara ila hooga lowo geeshsha dadillisannori gede assine laꞌnanni. Ikkina, Raaheeli hexxo mudhitanno gede assannohunna wolqasera aleenni ikkino coyi tuncu yiise yannara, Maganu atoote afiꞌrate agurtukkinni sharrantanno gede jawaante ikkinoseri maati? Ise horo hexxo dimudhitino. Hatteentenni, ise huuccattotenni ganyite giddoseta Maganoho kuꞌlite agurtukkinni sharrantino. Yihowa Raaheeli laalaatte huuccidhino huuccatto macciishshino; ise yannate gedensaanni ooso iltino.—Kal. 30:8, 20-24. w16.09 2:6, 7

Oosoꞌne Qullaawu Maxaafi seeri afiꞌrino horo huwattanno gede assa lowo geeshsha hasiissanno. (Far. 1:1-3) Tenne babbaxxitino doogganni assa dandiitinanni. Lawishshaho oosoꞌne, maateꞌne mitte giddicho haꞌrate kaꞌinohu gede assite heddanno gede asse; insa hakko ledonsa heeꞌrannoha boode manna doodha hasiissannonsa. Hakkiinnino togo yitine xaꞌme: “Baalunku mitteenni sumuu yee heeꞌrate hiittoo akatta noonsare ikka hasiissannonsa?” Qoleno, Galatiyu Sokka 5:19-23 giddo qummi assinoonni akatta oosoꞌne ledo hasaawa dandiitinanni. Konni garinni lame lowo geeshsha hasiisanno coye rosiisa dandiitinanni. Umihunni, Maganu sumuu yinenna salaametenni heeꞌnammora hasiꞌranno. Layinkihunni, Yihowa xa salaametenni heeꞌneemmo gede rosiise, haaro alamera qixxaambeemmo gede assanni noonke. (Isa. 54:13; Yoh. 17:3) Oosoꞌne tenne huwattanno gede assate, borruwanke giddonni mitto woꞌnaalsha doortine horoonsiꞌra dandiitinanni. Tennera kaaꞌlanno woꞌnaalsha Agarooshshu Shaera fulannohu, “Qullaawu Maxaafi Mannu Heeshsho Soorre Biddi Assanno” yaanno birxichi giddo afiꞌra dandiitinanni. w16.09 5:13, 14

Loosu batiꞌrinonkeha ikkiro nafa, baalunku hojju xiinxallonna maatete magansiꞌra assiꞌrate yanna gaaꞌma hasiissannonke. (Efe. 5:15) Kayinni haammata qoola nabbawate woy gambooshshu yannara dawaro qolate geeshshira calla nabbawa dancha diꞌꞌikkitino. Maganu Qaali wodaninkera coannonna ammananke jawaachishanno gede assiꞌra hasiissannonke. Xiinxallineemmo wote wolu mannita ayyaanaamittete hasatto wonshineemmo gara calla ikkikkinni, ninketano wonshiꞌneemmo gara heda hasiissannonke. (Fil. 1: 9, 10) Soqqanshonniwa, gambooshshunniwa, woy lallawo shiqinsheemmo wote wolu mannira kulleemmore ninke uminke assa deꞌneemmoha ikkara dandaanno. Lawishshaho, sagale qishannohu, sagale mannu albira shiqishara albaanni maxine laꞌꞌate qamasannoha ikkirono, qamasinohunni calla heeꞌra didandaanno. Isi fayyaaleessa ikke heeꞌrate, unto ikkitanno sagale qishiꞌra hasiissannosi. Hatteente gede, ninkeno uminke hasatto wonshitannota ayyaanaamittete sagale itate sharrama hasiissannonke. w16.10 2:10, 11

Qullaawu Maxaafi Ibiraawoota 11:1 giddo ammana maatiro xawisanno. Ammana illetenni laꞌꞌa dandiinannikkihu lamu coyi aana illachishanno akataati; insano: (1) ‘Hexxotenni agadhinoonni coyeeti’; kunni coyi giddo mittu Maganu qaale einore kayinni xaa geeshsha woꞌminokkireeti; lawishshaho Maganu tenne busha alame hunatenna haaro alame abbate qaale eino. (2) ‘Illete leellinokki coyeeti’ woy konne coye leellishshanno tajeeti. Tenne basera taje yine tirroonnihu Giriikete qaali illete leellannokkire addinta nooha ikkinota ammansiisanno coye yitanno tiro afiꞌrino; lawishshaho, Maganu Yihowa, Yesuusi Kiristoosi, sokkaanonna Maganu Mangiste illete anfoommokkiha ikkirono addanka noota kayinni ammanneemmo. Ikkina Maganu uyinonke hexxo huluullammeemmokkitanna Maganu Qaali giddo kulloonnihu illete leellannokki coyi addanka nooha ikkinota ammanneemmota leellisha dandiineemmohu hiittoonniiti? Coyiꞌneemmo coyinninna assineemmo assootinniiti; tenne assa hoongummoro ammananke guuta diꞌꞌikkitanno. w16.10 4:6

Yihowanna Yesuusi, Maganu Mangiste loosira loonseemmore baala baasa naaddanno; insa heeshshonke garinni kainohunni assineemmori shiimare ikkiro nafa ajishe dilaꞌanno. (Luq. 21:1-4; 2 Qor. 8:12) Lawishshaho, mitu geedhino roduuwinke ganye gambooshshe daatenna soqqansho fulate baasa sharramanno. Tennera insa galatanna jawaachisha dihasiissannonke? Woloota jawaachishshinanni faro saꞌe baꞌoonkeꞌne. Roduuwinke galantanninsa gede assannore assitanna laꞌnummoro sammi yaa dihasiissannonke. Phaawuloosinna Baarnaabaasi Phisidiyu giddo Antsookiyaho soqqantu yannara ikkinore laꞌno. Mukuraabete sooreeyye insa togo yitinonsa: “Roduuwa, jawaachishshanno seejjo nooꞌnero, mannaho kulle!” Phaawuloosi tenne faro horoonsiꞌre dancha gede rosiisino. (Soq. 13:13-16, 42-44) Ninkeno manna galanteemmo gede assannore laꞌnummoro, tini faro saꞌe baꞌankera wodha hasiissannonkeni? Woloota ganyine jawaachinsheemmoha ikkiro, insano ninke jawaachishshanno.—Luq. 6:38. w16.11 1:3, 15, 16

Yihowa dirijjite miilla ikkanke lowo qoossooti! Maganu assinammora hasiꞌrannorenna seerasi anfoommohura gara ikkinore assanna aliidimmasi irkisa hasiissannonke. Tini alame amanyootunni roore maaeeltanni hadhanni noote tenne yannara, Yihowa gede ‘bunshe giwa’ hasiissannonke. (Far. 97:10) Qoleno, ‘busha danchaho dancha bushaho’ yaannohu maganiweelu manni gede ikka dihasiꞌneemmo. (Isa. 5:20) Magano hagiirsiisa hasiꞌneemmo daafira, maalaamittete, amanyootunna ayyaanaamittete xuri heeꞌrannonkekki gede sharrammeemmo. (1 Qor. 6:9-11) Yihowa banxeemmo, hattono iso addaxxineemmo; qoleno isi Qaalisi giddo worino seeruwasi harunsine isira ammanamme heeꞌra hasiꞌneemmota leellinsheemmo. Tenne seeruwasi base baalate, lawishshaho, mine, songote giddo, loosu bayichonna rosu mine harunsate sharrammeemmo. w16.11 3:13

Qullaawu Maxaafi Rosaano 1914 kayisse 1919 geeshsha noo yanna giddo assitinori baalunku Qullaawa Borro giddo noohu xintu seeri ledo sumuu yaannoho yaa didandiinanni. Insa, Yihowa mannu gashshootira maahoyye yine gallanni gede uyino hajajo gudde dibuuxxino. Hakko daafira, insa gaamote deerrinni olaho karsantino yanna no. Lawishshaho, Ameeriku moote Onkoleessa 30, 1918 gobba salaame afidhanno gede huuccinanni barra asse muri yannara, Agarooshshu Shae Qullaawu Maxaafi Rosaanono tenne irkissanno gede jawaachishshino. Mitu roduuwi ola woxunni kaaꞌlitino; kiiro shiima ikkitinori wolootu kayinni qawwenna saanja adhite olaho hadhino. Ikkirono, Qullaawu Maxaafi Rosaano umo Bayira Baabiloone qafaddinonsahu seejjo hasiissinonsahuraati yine hede soꞌrote. Insa kaphu ammaꞌno giddonni fula hasiissannonsata buuxxino; qoleno, insa Umihu Alamete Oli yannara, alame woꞌmate noote kaphu ammaꞌno giddonni gudisidhe fultinohu gedeeti yaa dandiinanni.—Luq. 12:47, 48. w16.11 5:9

Phaawuloosi buuramino Kiristaanira “maalu garinni” heeꞌra gawajjitannota xawise kulinohu mayiraati yitine heddinanniha ikkara dandaanno. Yannankera Maganu jaallasi assinonsariranna keeraano ikkitinohu gede asse laꞌꞌannonsarira togoo coyi iillara dandaanno? Aye Kiristaanchino cubbaataamu maalisi hasatto garinni heeꞌra hanafara dandaanno. Lawishshaho, Phaawuloosi Roomaho heeꞌranno roduuwi giddo mitu “kokkensara” woy halchonsara borojje ikkinota borreessino; tini hasatto siimu xaadooshshi halcho hattono itatenna agate woy wole hasatto ikkitara dandiitanno. Insa giddo mitootu “beebbaataamo manna dogganno.” (Rom. 16:17, 18; Fil. 3:18, 19; Yih. 4, 8, 12) Qoleno, Qorontoosi heeꞌranno mittu rodii boode yanna geeshsha ‘annisi galte adhinota’ qaagge. (1 Qor. 5:1) Konni daafira Maganu, Kiristaanu ‘maalu garinni heeꞌrannokki’ gede Phaawuloosi widoonni qorowisiisinohu dimullaati. (Rom. 8:5, 6) Kuni qorowishshi yannankerano kaaꞌlannoho. w16.12 2:5, 8, 9

Yaachishannohe coye addaxxatto manchira hasaapha yaaddokki dandiite heeꞌrate kaaꞌlitannohe. Galtekki, muli jaalikki, woy mittu songote cimeessi qarrisinohe coyi yaachishanno geeshsha ikkinoronna teꞌee huwatatto gede kaaꞌlahera dandaanno. Giddokkita maaxittokki hasaawa yaadatto gede assinohe coye badde afattonna dandiite heeꞌratto gede kaaꞌlitannohe. Qullaawu Maxaafi togo yaanno: “Malu hoogiro hendoonniri ikkikkinni gatanno; malu seyiro kayinni halchinoonniri woꞌmanno.” (Law. 15:22) Yihowa lamalate kiiro assiꞌnannihu songote gambooshshuwa widoonnino Kiristaanu yaachishannonsare dandee heeꞌranno gede kaaꞌlanno. Songote gambooshshiwa atera hedannonna mimmito jawaachisha hasiꞌrannohu ammanate roduuwikki ledo xaadatto. (Ibi. 10:24, 25) Ammanate roduuwikki coyiꞌrannohu ‘jawaachishanno’ qaali, ayyaanaamittetenni jawaatatto gede assannohe daafira yaaddo qeela shota ikkitannohe.—Rom. 1:12. w16.12 3:17, 18

Fayyimmate hoonge woy wolqankera aleenni ikkinohu wolu coyi ledo sharrammeemmo wote, Yihowa ninkera hedannota addaxxine yaaddonke isi aana tuqqa hasiissannonke. (1 Phe. 5:6, 7) Qoleno, Kiristaanu gambooshshinna wole ayyaanaamittete qixxaawonni horo afiꞌrate assa dandiineemmore assa hasiissannonke. (Ibi. 10:24, 25) Oosonsa Yihowara soqqama agurtino annuwanna amuuwa kaaꞌlannonsari maati? Lophimma amaddinohu Saamueeli, jajjabba ikkitino oososi isi rosiisinonsahu xalalu seeri garinni heedhanno gede giddeessa didandaanno. (1 Sam. 8:1-3) Isi tenne hajo Yihowa angara wore agura hasiissinosi. Ikkirono, Saamueeli Yihowara ammaname heeꞌranna Iso hagiirsiisannore assa dandaanno. (Law. 27:11) Yannankera ooso noonsahu lowo Kiristaanira togoo coyi iillannonsa. Insa cubbo loossinori maaro eꞌe higganno yanna Yihowa quqquxame agarannota addaxxa dandiitanno. (Luq. 15:20) Qoleno, togoo coyi iillinonsa anninna ama Yihowara ammaname heeꞌrate sharramanno; insa lawishsha ikkansa oosonsa hoshshanniwa higganno gede assitara dandiitanno. w17.01 1:15, 16

Umosi heeshshi assanno manchi deerrasi afino manchooti; kuni manchi dandoosinna assa dandaannore seekke hedannoho; qoleno isi soꞌrosi ammananno, hattono wolu manni yaannore macciishshannohonna albi garinni calla looseemmo yaannokkiho. Umo heeshshi assa Yihowa lowo geeshsha hagiirsiissanno. Qullaawu Maxaafi giddo, dhukanke anfe heeꞌra yitanno yaatto, ninkeneetira gara ikkitino hedo heedhannonke gede assiꞌranna assine anfeemmokkiri noota ammane adha yitanno tiro afidhinota kulloonni. Qullaawa Borro umo borreessini afiinni dhukanke anfe heeꞌra yitanno yaatto, assine anfeemmokkiri noota huwantoommota akatinkenni leellisha hasiissannonketa xawisate horoonsiꞌnoonniha lawanno. Dhukinkera aleenni ikkino coye heda woy assa hananfeemmohu mamoote ikkara dandaanno? Aane nooha qoropha hasiissannonketa leellishanno coye hedi. Ninkeneeto woy lonseemmo looso janjeemmoha ikkara dandaanno. (Rom. 12:16) Qoleno, mannu ninke aana illachishanno gede assineemmoha ikkara dandaanno. (1 Xim. 2:9, 10) Woy noonke qoossonna uminke hedonni kaꞌne, wolu manni assa hasiissannonsarenna hasiissannonsakkire kulleemmoha ikkara dandaanno. Togoore assineemmo wote deerranke hambe naaxxate geeshsha iillinoommoti leella hooggankera dandiitanno.—1 Qor. 4:6. w17.01 3:6-8

Muli yanna kawa Yihowa manni loosi duuchu garinni lexxino. Konne batiꞌra looso danchu garinni loosate, Yihowa dirijjite yanna abbitino tekinooloje horoonsidhanno. Mitu jajjabbu mannira hakko garinni loosa qarra ikkitansara dandiitanno. (Luq. 5:39) Tenneno agurranna, ajuulleho jajjabbunni roortino jawaantenna wolqa noonsa. (Law. 20:29) Konni daafira, jajjabbu roduuwi ajuullu roduuwi roore looso adhite loossanno gede qajeelsansa danchatenna hasiissannote. (Far. 71:18) Qoosso noonsa roduuwi, ajuulleho looso aa baxa hooggara dandiitanno. Tennera mitu baxxanno qoosso aaninni hoollanninsahu gede assite hedde waajjitanno. Woy ajuullu roduuwi danchu garinni loosa dandiitannokkiha lawannonsa. Wolootu kayinni qajeelsate yanna noonsakkihu gede assite heddanno. Ajuullu roduuwi kayinni, roore looso aa keeshshiniro cinca hoogge muddantannokki gede qoropha hasiissannonsa. w17.01 5:3, 4

Yesuusi umi Addaaminte gede guuta ikkino. (Yoh. 1:14) Ikkollana, Yesuusi Yihowa guutu manchi assara hasiꞌrannore asse Addaaminni baxxinoha ikkinota leellishino. Yesuusira buutote qarri iillinosiha ikkirono horo cubbo diloosino, hattono Maganu higge giddo mitte nafa didiigino. Yesuusi guuta mancho ikkino daafira mannu oosora reye cubbunninna reyotenni gatisinonsa. Isi Addaami assikki gatinore assa, yaano guuta mancho ikka, Maganoho ammanamanna hajajama dandiino. (1 Xim. 2:6) Yesuusi wodote kakkalo ikke ‘lowo manni’ yaano labballu, meentunna qaaqquullu gawalo nookki heeshsho afiꞌranno faro fanino. (Mat. 20:28) Ee, wodote kakkalo Maganu umo uullatenna mannu oosora hedinori woꞌmanno gede faro fantino. (2 Qor. 1:19, 20) Wodote kakkalo ammanamino manni baalaho hegere heeshsho afiꞌranno faro fantanno. w17.02 1:15, 16

Hanni mittu tunsinohu seedu godi giddo noottohu gede assite hedi. Galagale xawaabbu noowa fuleemmokka? yite hedattora dandaanno. Hatteente gede, qarru iillannohe yannara konne qarra tayisse saꞌꞌattoha lawa hoogannohe woti heeꞌrara dandaanno. Yesuusira nafa togoori macciishshaminosi woti no. Isira ‘cubbaataammu busha qaale coyidhinosi,’ shollinshoonnisi hattono “qarru haqqi” aana sunte shinoonnisi; tini Yesuusi uullate aana noo waro tunsitinosi yannaati. (Ibi. 12:3) Ikkollana Yesuusi cincino. Isi cinciro afiꞌranno baraarshi aana illachishino; tini Maganu suꞌmi qullaawannonna Yihowa aliidimma xabbe leeltanno gede assitino. Yesuusira iillinosihu tunsichu gedee qarri yannate geeshshiholla; iima afiꞌrannohu kaajju baraarshi kayinni hegereho. Xaa yannara, iillannohe qarri dadillisannohanna hexxo mudhatto gede assannoheha ikkara dandaanno. Ikkirono hegere heeshshowa massitanno doogo aana heedheenna iillannohe qarri yannate geeshshiha calla ikkinota deꞌooti. w16.04 2:10

Tenne maaeeltino alamera mannu cubbo loosa soꞌro afiꞌrinokkiri gede asse laꞌꞌanno; hakko daafira batinyu mannira wodo hasiissannonsaha dilawannonsa. Kuni manni cubbu maatiro, manna gawajjannohu hiittoonniitironna cubbu borojjimmanni fulate maa assa hasiissannoro diafino. Suwashsho wodana afiꞌrino manni, Yihowa Beettisi uullara daye cubbunna reyote borojjimmanni wodannonke gede assinota rose, Yihowa baxillaanchonna elto aannoha ikkinota huwatino. (1 Yoh. 4:9, 10) Maganu, Kiristoosi ninkera yee reyanno gede assasi, Isi lowo geeshsha baxannonketanna eltosi lowota ikkitinota leellishshannote. Yesuusi ninkera yee reyinota ammannummoro cubbinkera maaro afiꞌneemmotanna keeraanchu tiiꞌꞌi heeꞌrannonketa afanke lowo geeshsha hagiirsiissannote! (Ibi. 9:14) Ee, kuni mannaho kula hasiissannonkeho dancha duduwooti! w16.07 4:6, 7

Wodote kakkalo ammanneemmota leellinsheemmo wote cubbinkera maaro afiꞌneemmo. Maganu Qaali cubbinke woꞌmunni woꞌma ‘aguramannonketa’ buuxisannonke. (Soq. 3:19-21) Wodote kakkalo widoonni Yihowa qullaawu ayyaaninni buurantino soqqamaasinesi oososi asse adhanno. (Rom. 8:15-17) “Wolu geꞌreewi” wido ikkinoommorira kayinni, Yihowa aanaho suꞌmanke borreessinoonnita oososi assiꞌrinonketa leellishshanno kaarde uyinonkehu gedeeti. Guuta ikkinummonna jeefote fonqolo qeelle saꞌneemmo wote, Yihowa hatte kaarde aana furma ganinohu gede asse uullate aana heedhanno oososi asse haaꞌrannonke. (Rom. 8:20, 21; Aju. 20:7-9) Yihowa muxxe oososi hegerera baxanno. Wodote kakkalonni afiꞌnanni atooti hegereho. Tini, elto ayewoteno muxxete. Tenne elto ninkewiinni haare hoolannohu woy hoolannorichi horo dino. w17.02 2:15, 16

Yihowa isi ledo jaalooꞌminammora koyisinke wote roore qarra ikkitinonke laanfe hiittenneetiro wodanchino. Qoleno isi, sao loonseemmo yanna heedhannota afino. Ikkollana, tini isi ninke ledo jaalooꞌmannokki gede diassitinosi. Maganu baxillunni kae muxxe ikkitino elto yaano baxanno Beettosi wodote kakkalo asse uyinonke. (Yoh. 3:16) Sao loonseemmo yannara muxxe ikkitinote tenne qixxaawo widoonni Yihowa gatona yaankera xamiꞌnummoro gatona yaannonke. Guuntete xeꞌne noonkere ikkinummorono isi ledo noonke jaaloomi dibaꞌꞌanno.—1 Xim. 1:15. w16.05 4:6, 7