Maaja

Yoftahe beetto kalaqamu hasattose yaano mine assiꞌranna ooso ila agurte addu magansiꞌra halashsha doodhitino. Ninke ise faale haꞌra dandiineemmohu hiittoonniiti? Lowo kume ikkannohu Kiristaanu wedelli, Yihowara woꞌmunni woꞌma soqqamate yee uminsa fajjonni yannate geeshsha mine kalaqira woy ooso ila hooga doodhino. Jajjabbu roduuwino oosonsanna oosonsa ooso ledo yanna sayisa baxisannonsaha ikkirono, insa kayinni yannansa Maganu mine minate, Maganu Mangiste Sawaakooti Rosi Minira eate, hattono sabbakkannori roore hasiissannowa haꞌre farciꞌrate horoonsiꞌranno. Wolootu qolte uminsa dilgo agurte zamachunni soqqantanno. Konni garinni Yihowara woꞌmu wodaninni soqqama iso hagiirsiissanno; isi qole insa loossanno loosonna iso baxxannota leellishate assitannore dihawanno. (Ibi. 6:10-12) Yihowara woꞌmunni woꞌma soqqamate albinni roore umikki horo agura dandaatto? w16.04 1:16, 17

Yesuusi umosi allaalaanchu gedenna harunsaanosi kayinni geꞌreewu hoshsha gede asse xawisino. Hanni konne lawishsha hedi: Lame geꞌrecho ilaalu aana, lame kayinni xeichoho heeꞌriro hattono mitte geꞌrecho wolewa hayisso xinqidhanni heedhuro ontenta geꞌrecho hoshshate yinanni? Duucha wote geꞌreewu hoshsha mitteenni allaalaanchonsa harunsitanno. Ninkeno roduuwinkewa gambo gimbeemmoha ikkiro Allaalaanchonke harunsa didandiineemmo. “Mitte hoshsha” wido ikkatenna ‘mittu allaalaanchi’ hunda heeꞌrate roduuwinke ledo mitteenni gamba yaa hasiissannonke. Gambooshshe haꞌneemmoha ikkiro roduuwu maamari mittimmara kaaꞌlineemmo. (Far. 133:1) Mito roduuwanke anninsanna amansa hattono roduuwinsa giwannonsa. Ikkirono Yesuusi, baxxannonsatanna insara heddannota ayyaanaamittete maate aansara qaale eino. (Maq. 10:29, 30) Gambooshshe ganyine haꞌneemmoha ikkiro, kuri muxxe roduuwira anna, ama woy rodoo ikka dandiineemmo. Tini gambooshshe ganyine haꞌrate dandiinummore baala assineemmo gede kakkaayissannonketa diꞌꞌikkitino? w16.04 3:9, 10

Wolu manni ledo salaame kalanqeemmokkiha ikkiro, Maganoho soqqamate sharrammeemmo sharro lawishshaho, huuccattonke, gambooshshe haꞌranke, soqqanshonkenna woluri magansiꞌrate assineemmori waagu nookkiha ikkanno. Wolu manni sao gatona yineemmokkiha ikkiro Maganu jaala ikka didandiineemmo. (Luq. 11:4; Efe. 4:32) Mittu mittunku Kiristaanchi gatona yaate daafira woy wolu ledo noosi aante daafira isonooto seekke layiꞌra hasiissannosi. Ammanate roduuwakki mulla gatona yaatto? Insa koffi assitinoheha ikkiro nafa ledonsa yanna sayisa baxisannohe? Yihowa, soqqamaanosi gatona yitannore ikkitara hasiꞌranno. Tenne haja laꞌinohunni tiiꞌꞌikki woyyeessiꞌra hasiissannohe coyi noota kulihero tenne assate Yihowa kaaꞌlahera huuccatto assiꞌri. Iimi Anninke togoota shooshanqetenni huucciꞌnanni huuccatto macciishshe dawaro qolanno.—1 Yoh. 5:14, 15. w16.05 1:6, 7

Masaalotenni kulloonniha sabbakate looso mamooti geeshsha loosa hasiissanno? Yesuusi kuni alamete doyichora loosamanno loosi goofimarchu barruwa geeshsha sabbakamannotanna hakkiinnino ‘goofimarchu daannota’ coyiꞌrino. Tenne goofimarchu barruwara dancha duduwo dudubbanni nooti wole ammaꞌnote gaamo nooni? Soqqammeemmo yannara xaandeemmo manni giddo mitu “qullaawu ayyaani noonkeri ninkeeti; looso loossinanni heedhinoonniri kayinni kiꞌneeti” yaara dandaanno. Kayinni konne looso agurrummokkinni loonsanni keeshshanke Maganu ayyaani noonketa leellishshannota diꞌꞌikkitino? (Soq. 1:8; 1 Phe. 4:14) Mite ammaꞌnote gaamo Yihowa Farciꞌraasine ganyite loossannoha sabbakate looso loosate woꞌnaaltino; ikkollana duucha wote coyi heddino gede diꞌꞌikkinonsa. Wolootu qolte boode yanna misiyoone ikkite sabbakate woꞌnaaltannoha ikkirono agurte albinsa heeshshowa higganno. Mitootu wole agurina minunni mine hadhe sabbakate woꞌnaaltino; kayinni mayi daafira sabbakkanno? Tenne xaꞌmo dawaro insa Kiristoosi hanafino looso loossanni nookkita buuxissanno. w16.05 2:13, 16

‘Heeshshonke biddi assiꞌratenna’ “haaro mannimma” uddiꞌrate agurrummokki sharrama hasiissanno. Phaawuloosi ammanate roduuwisira togo yee qaagiissino: “Xagarrote yortonni doofaartinota albita akkala mannimma kiꞌnewiinni fushshitine hooltinanni gede rosiinsoonniꞌne. Wodaniꞌnenna hedoꞌne haarooꞌmito [“haarooꞌmitanni hadho,” NW]. Magano lawate kalaqantinota, halaalaancho qullaawanna keeraanchimmannita haaro mannimma uddidhe.” (Efe. 4:22-24) “Haarooꞌmitanni hadho” yaanno xawishshi haaro mannimma uddiꞌra mitte hinge assine agurrannire ikkinokkita leellishanno. Tenne afanke jawaachishshannonke; korkaatuno Yihowara soqqammanni sayinsoommo yanna ikkitu geeshshitano ikkituro, haaro mannimma uddiꞌrate kaaꞌlitannota Kiristaanu akatta ayewoteno lossiꞌranna woyyeessiꞌra hasiissannota buuxissannonke. Ee, Qullaawu Maxaafi ayewoteno heeshshonke soorrara dandaanno. w16.05 4:8, 9

Yihowa xaa yannara seekkanni noonkehu ayyaanaamittete gannate giddooti; isi tenne ayyaanaamittete gannate seekke biddi assanni no. (Isa. 64:8) Heeꞌnoommo alame busha ikkiturono dimanseemmo, hattono beꞌe yinummokkinni heeꞌneemmo. Yihowa daafira anfoommo, hattono xa isi annu gede asse baxannonketa huwantoommo. (Yai. 4:8) Haaro alame giddo, ayyaanaamittete gannatera heeꞌranno atoote woꞌmunni woꞌma afiꞌneemmo. Hattono, Maganu Gashshooti uulla gannate ikkitanno gede assanno. Uulla woꞌma gannate ikkitanno yannarano, Yihowa hakkiicho heeꞌranno manna rosiise seekke biddi assa diaguranno; xaa yannara tenne assannohu hiittoonniitiro xawe leella hoogankera dandaanno. (Isa. 11:9) Qoleno, hatte yannara Maganu surrenkenna manninaatenke guuta assannohura, rosiisannonke roso adhineemmokkinna fajjosi assineemmokki gede guficho ikkannonkeri diheeꞌranno. Konnira, Yihowara maahoyye yine gala agurroonke; tenne assineemmoha ikkiro, isi seekke biddi assannonkehu baxannonkehura ikkinota huwantoommota leellinsheemmo. w16.06 1:8, 9

Tini, Muse 1473 K.A. Moaabi xawira gamba yiinohu Israeelete mannira coyiꞌrinote jeefote qaallaati. Hatte yannara, Israeelete daga Hexxote Gobba ragiꞌrate Yordaanosi laga tayisse saꞌara rakke no. (Mar. 6:1) Insa 40 diro massaganni keeshshinohu Muse tuncu yaannonsa qarra tayisse saꞌꞌate jawaata ikkitara hasiꞌrino. Insa Yihowa addaxxanna Maganonsa ikkinohura isira ammanama hasiissinonsa. Muse jeefote coyiꞌrinoti tini qaalla Israeelete manni tenne assanno gede kaaꞌlitinonsati dihuluullissannote. Muse, Yihowa mannisira uyinota Tonne Hajajonna wole biddishshuwa qummi assihu gedensaanni, Marro 6:4, 5 aana noota tenne lowo sokka amaddino qaalla coyiꞌrino. Muse ledo hakko gamba yiinohu Israeelete manni Maganinsa Kaaliiqi “mitto Kaaliiqa” ikkinota diafino? Afinoti egennantinote. Ammanantino Israeele mitto Magano yaanno annuwansa Abirihaami, Yisihaaqinna Yaiqoobi Magano egentino; qoleno iso calla magansidhanno. w16.06 3:2, 3

Yesuusi togo yee coyiꞌrinohu uullate aana noo warooti. Ikkirono, Kiristoosi Sheexaanu alame ledo olamanno gede, iimira haꞌrihu gedensaanni silxaane uyinoonnisi. (Aju. 19:11-16) Konni daafira, Yesuusi Armagedooni oli hanafanno yanna xa afino yine heda gara labbanno. Ninke kayinni kuni oli hanafanno yanna dianfoommo. Hakko daafira bayiru qarri hanafanno yanna iillita geeshsha baqqi yine heeꞌra hasiissannonke. Yihowa kayinni bayiru qarri hanafanno yanna bade afino. Isi goofimarchu barri daanno yanna murino. Konni daafira bayiru qarri hanafanno yanna gambissino; qoleno ‘kuni barri dayikkinni digatanno.’ (Imb. 2:1-3) Tenne afa dandiineemmohu hiittoonniiti? Yihowa coyiꞌrino masaalo aye woteno yannasera woꞌmitanno! Yihowa ninke bayiru qarrinni gatise sayisate eino qaalino woꞌmannota ammanneemmo. Ikkirono, tini alame baꞌanno yannara gate saꞌꞌa hasiꞌnummoro, baqqi yine agadha hasiissannonke. w16.07 2:4-6

Yesuusi qarru giddo heeꞌreenna soqqamaasinchu Pheexiroosi iso hune haꞌrino. Pheexiroosi hakkuyira albaanni wolootu Yesuusa hunte hadhuro nafa isi kayinni hune haꞌrannosikkita coyiꞌrino. (Maq. 14:27-31, 50) Ikkollana, Yesuusa amande haaꞌne haꞌni yannara Pheexiroosinna wole baala soqqamaasinesi hunte hadhinosi. Pheexiroosi Yesuusa egenninoha ikkirono, iso diegennoommo yee hige hige moromino. (Maq. 14:53, 54, 66-72) Ikkollana Pheexiroosi gaabbino; konnira Yihowa iso horoonsiꞌra diagurino. Ati hatte yannara Yesuusi rosaancho ikkoottoro, Pheexiroosi loosino soꞌro Yihowara ammanamattokki gede assitahera wodhatto? Yihowa soꞌro loosino manchi maaro eanno gede yanna aannositanna isi gara ikkinokki coye taashshotenni biddi assannota ammanatto? Mitu kabbaade cubbo loosino manni Yihowa maaro xaꞌmira giwanno. Togoori ikkanno yannara, Yihowa kuni manni songotenni bohamanno gede asse yoo yaannota ammanatto? w16.06 4:8, 9

Yihowa eltonni afiꞌneemmohu wolu dhagge ikkanno coyi, dadillisannori iillannonke wote afiꞌneemmo sheshooti. (Far. 51:17) Phaawuloosi dartu iillanni noonsahu Teselonqe Kiristaanira techohu barru qummeeshshira noo hedo borreessino. Yihowa shaqqillunni elannoha ikkinohura towaatannonketa afanke lowo geeshsha sheshifachishshannote! Cubbaataamma ikkinoommo daafira, uminkenni hexxo dinoonkereeti. (Far. 49:7, 8) Yihowa kayinni kaajja hexxo uyinonke. Yesuusi harunsaanosira togo yee qaale eino: “Anniꞌya hedo, Beettisi widira laꞌꞌannohunna Beettosi ammanannohu baalu hegere heeshsho afiꞌranno gedeeti.” (Yoh. 6:40) Addaho, hegerera heeꞌrate hexxo Maganu eltosinni uyinonkete dhagge ikkitanno eltooti. Phaawuloosi togo yiino: “Maganu manna gatisannota eltosi baalunkura leellishino.”—Tit. 2:11. w16.07 3:14, 15

Xaa yannara Yihowa manni mereero galtesi kaadanno mancho lashshi assine dilaꞌnanni. Hanni mittu cuuaminohu adhamino rodii wolu manni galte ledo foore, adhamasi diigihu gedensaanni ledosi foortuta adhino yine hendo. Kuni manchi maaro ea hoogiro, songo ayyaanaamittetenni battaabbannokki gede assate togoore assinoha bonkanni. (1 Qor. 5:11-13) Kuni manchi galagale songote miila ikkara albaanni ‘aagintaawinota’ woy maaro einota ‘leellishanno looso loosa’ hasiissannosi. (Luq. 3:8; 2 Qor. 2:5-10) Konni garinni galtesi kaadino manchi songo higate kageeshshi yanna keeshsha hasiissannosi yine mura hoongirono, Maganu manni mereero sae sae calla ikkannohu togoo coyi shotinse laꞌnanniha diꞌꞌikkino. Kuni manchi addinta maaro einota leellishate, gari yanna yaano mitto diro woy hakkiinni saꞌino yanna keeshsha hasiissannosiha ikkara dandaanno. Cubbo loosino manchi songo higiro nafa, addinta maaro einoronna teꞌee leellishate “Maganu yoo barcimi albaanni” uurrasi digattanno.—Rom. 14:10-12. w16.08 1:12, 13

‘Hasiꞌra’ yine tirroonnihu Giriikete qaali mittoricho marre iillate hiixata xawisannoho; hiixantannihu iille adhate qarrisannorira ikkara dandaanno. Soqqamaasinchu Phaawuloosi konne qaale horoonsiꞌre ayyaanaamittetenni lophate sharrama hasiissannota xawisino. Hanni mittu rodii albillitte songote afiꞌranno qoosso daafira hedanni noohu gede assite hedi. Isi songote soqqamaancho ikka hoogirono, Kiristaanu akatta lossiꞌra hasiissannosita afino. Isi balaxe songote soqqamaancho ikkate sharramanno. Hakkiinnino, cimeessa ikke soqqamara ayyaanaamittetenni gikki yaate mixo fushshiꞌranno. Qoleno, songote giddo wole loosu qeecha afiꞌrate ikkado ikkate sharrama hasiissannosi. Hatteente gede roduuwu, suwisaano, Beeteelete soqqamatenna Mangistete Addaraashe minate mixo fushshidhuro hattenne mixo wonshiꞌrate sharrama hasiissannonsa. w16.08 3:3, 4

Hanni Nehimiya Yerusaalame haꞌri yannara mayi tuncu yiinosiro hedi. Isi maranno wote katamu huxxi diigamino; hattono Yihudu manni hexxo mudhe no. Yihudu manna gibbannori insa angansa shaqqiteenna woy hexxo mudhite Yerusaalamete katami huxxa galagalte huxxitannokki gede waajjishiishshinonsa. Ikkina Nehimiya kuni coyi angasi shaqqitanno gede woy hexxo mudhanno gede assasira wodhiyya? Diwodhino! Isi Muse, Aasanna wole ammanantinote Yihowa soqqamaanonte gede ayewoteno Yihowa addaxxanno. (Ful. 17:8-13; 2 Dud. 14:8-13) Tenne yannarano, Nehimiya Magano huucciꞌrino. Yihudu mannira wolqansara aleenni ikkinoha lawanno qarri tuncu yiinsa yannara, Yihowa Nehimiya huucciꞌrino huuccatto macciishshe dawarino. Maganu ‘jawa wolqasinninna’ ‘jawaata cigilesinni’ shaqqitinota Yihudu manni anga kaajjishino. (Neh. 2:17-20; 6:9) Yihowa xaa yannarano ‘jawa wolqasinninna’ ‘jawaata cigilesinni’ soqqamaanosi kaajjishannota ammanatto? w16.09 1:9

Mittu Dachete gaazeexi ammaꞌnote sooreeyye assidhino gambooshshi daafira kulanni togo yiino: “Mannu hakko iso iibbillu batiꞌri yannara garimale uddano uddiꞌrino. Yihowa Farciꞌraasine kayinni gambooshshinsa yannara konni garinni diuddidhanno.” Yihowa Farciꞌraasine ‘lowo woxinni hirranni imaana uddiꞌratenni seesa agurte, arshimmatenninna kawajjotenni . . . Magano magansiꞌneemmo yaanno’ mannira malino garinni seessannohura duucha wote mannu naadannonsa. (1 Xim. 2:9, 10) Soqqamaanchu Phaawuloosi tenne kulinohu meentoho ikkirono kuni xintu seeri labballuno harunsa hasiissannonsaho. Ninke Yihowa soqqamaano ikkinoommohura danchu garinni uddiꞌra hasiissannonke; qoleno soqqammeemmo Magani tenne assinammora hasiꞌranno. (Kal. 3:21) Qullaawu Maxaafi uddiꞌratenna seesate daafira kulannori, kalqete alame woꞌmate Aliidiha ikkino Magani iso halaalunni magansiꞌranno manni kawajjaame uddano uddiꞌrara hasiꞌrannota leellishanno. Hakko daafira, uddiꞌratenna seesate daafira mitto doorsha doodhineemmo yannara Yihowa hagiirsiisannori maatiro afate woꞌnaala hasiissannonke. w16.09 3:1, 2

Mitu manni Qullaawu Maxaafi masaalo woy Qullaawu Maxaafi xaggete, arkiyolojete xiinxallonna sayinsete ledo sumuu yaanno gara xiinxalla baxanno. Xiinxalla dandiinannite dhagge ikkitanno masaalo giddo mitte Kalaqama 3:15 te noo masaalooti. Kuni qummeeshshi Qullaawu Maxaafi cuꞌmo yaano, Maganu Mangiste Yihowa aliidimma xabbe leeltannonna suꞌmisi qullaawanno gede assitannota kulanno. Lawishshu garinni borreessinoonnihu kuni qummeeshshi, Yihowa Edenete kaashshu basera mannu qarrama hanafi yannanni kayisse noo mitiimma baala hunanno gara kulanno. Ikkina ati Kalaqama 3:15 xiinxalla dandaattohu hiittoonniiti? Tenne assa dandaatto doogga giddo mitte, tenne masaalo yannate dirimi garinni xiinxallate. Konni qummeeshshi giddo qummi assinoonniri daafira Maganu dirimu dirimunni coyi xawe leellanno gede assino garanna tini masaalo woꞌmitanno gara kultannota qara qara qummeeshshuwa borreessite amaxxa dandaatto. Kuri qummeeshshuwa insa insanaawa sumuu yitanno gara laꞌꞌatto wote, Qullaawu Maxaafi giddo kulloonni masaalaanonna Qullaawa Maxaafa borreessino manna ‘Qullaawu Ayyaani massaginota’ huwatatto. w16.09 4:8

Soqqamaasinchu Pheexiroosira Ayihude ikkinokki mannira gara ikkitinokki lao noosi woti nooha ikkirono, gale hose isi tenne hedo wodanisi giddonni fushshe hooꞌlino. (Soq. 10:28, 34, 35; Gal. 2:11-14) Hatteente gede, ninkeno manna mulla kaꞌne gimbeemmota woy ninke sircho woluwiinni roorsine laꞌneemmota huwantummoro tenne hedo wodaninke giddonni fushshe hooꞌlate sharrama hasiissannonke. (1 Phe. 1:22) Gobbanke ikkitutano ikkituro, baalunku guuntete xeꞌne noonkehura gato afiꞌra hasiissannonke yineemmore ikkinoommokkita heda hasiissannonke. (Rom. 3:9, 10, 21-24) Ikkina, ninkeneeto woluwiinni roorsine laꞌneemmo gede assannonkeri mayi no? Ninkeno soqqamaasinchu Phaawuloosite gedee hedo heedhannonke gede assiꞌra hasiissannonke; isi buuramino Kiristaana xaate “Kiꞌne . . . Maganu fiixaati ikkinnina, wosinanna manni gobba manna diꞌꞌikkitinoonni” yee amaalinonsa. (Efe. 2:19) Wole gobba manna mulla kaꞌne gimbeemmokki gede qorophate sharramanke, haaro mannimma uddiꞌrate kaaꞌlitannonke.—Qol. 3:10, 11. w16.10 1:9

Yihowa ammananke kaajjishiꞌne heeꞌneemmo gede Qaalesi Qullaawa Maxaafa uyinonke. ‘Baꞌraaꞌra’ woy hagiirre afiꞌratenna ‘assiꞌneemmori qinaannonke’ gede dandaaminke deerrinni Maganu Qaale barru baala nabbawa hasiissannonke. (Far. 1:1-3; Soq. 17:11) Kiristinnu yannara albaanni heedhinote Yihowa soqqamaano gede, ninkeno Maganu eino qaale ganyine hiincanna biddishshasi harunsa hasiissannonke. Qoleno, Yihowa “ammanaminohunna wodanaamu borojjichi” widoonni falakkinota ayyaanaamittete sagale aanni noonke. (Mat. 24:45, NW) Konni daafira, Yihowa qixxeessinonkete ayyaanaamittete qixxaawonni ronseemmo rosi aana illachinsheemmoha ikkiro, Maganu Mangiste ‘hawaqiꞌrinohu’ woy hexxo assiꞌrinohu hundi manni faale haꞌneemmo. (Ibi. 11:1) Kiristinnu yannara albaanni heeꞌrino manni ammanansa kaajjishiꞌre heeꞌranno gede kaaꞌlinonsahu wolu coyi huuccattote. Insa Maganu huuccattonsara dawaro qolinota afansa ammanansa kaajjado ikkitanno gede kaaꞌlitinonsa.—Neh. 1:4, 11; Far. 34:4, 15, 17; Dan. 9:19-21. w16.10 3:7, 8

Yesuusi mittu manchi “Baalanta roortino hajajo hiittenneeti?” yee xaꞌmisi yannara, Magano baxa ikkitinota kulasi baxillu baalanka rooranno akata ikkinota leellishshanno. (Mat. 22:35-40) Ammanano baxilluno lowo geeshsha hasiisannoha ikkinohura, Giriikete Afiita Qullaawa Borro borreessituri batinye basera lamenka akata mitte coyi fooliishsho woy handaari giddo mitteenni qummi assitino. Phaawuloosi roduuwisira “ammanannitanna baxillunnita siwiilu uddano” uddidhanno gede kulinonsa. (1 Tes. 5:8) Yohaannisi togo yee borreessino: “Maganu hajajo Beettisi Yesuusi suꞌminni ammanneemmonna hajajosi garinni mimmitinke ledo baxammeemmo gedeeti.” (1 Yoh. 3:23) Ammana lowo geeshsha hasiissannota ikkiturono, Maganu eino qaale wonshinna Kiristaanu hexxo woꞌmitu gedensaanni hakkonni coyira noonke ammana gattanno. Ikkollana Maganohonna mannaho baxille leellisha horo gatannokki coyeeti. Hakko daafira Phaawuloosi togo yee borreessino: “Ammana, hexxonna baxillu sasunku darginni milli yitukkinni heedhanno. Ikkollana, kuri sasunku giddo rooru baxilleho.”—1 Qor. 13:13. w16.10 4:15-17

Aliidi biso riqibbe hadhino roduuwi, “Yerusaalamete noo soqqamaasinenna cimeeyye murtino coye” songuwate kultino. (Soq. 16:4) Songuwa konne biddishsha harunsansa, ‘ammanatenni lophitanninna barru barrunkunni kiironsa lexxanni hadhanno’ gede assitino. Yannankera Yihowa dirijjite biddishsha uyitanno wote, maa assa hasiissannonke? Maganu Qaali baalunku hajajammeemmonna maahoyye yine galleemmo gede biddishsha aannonke. (Mar. 30:16; Ibi. 13:7, 17) Woloota mishanna hajajama giwa Maganu dirijjite giddo horo heeꞌra hasiisannokki akataati; korkaatuno togoo akati songote giddo noo baxille, salaamenna mittimma hunanno. Ammanamino Kiristaani baalu, albisa ikkitinore ayirrisannokkihunna ammanaminokkihu Diyoxiraafiisi gede ikka dihasiꞌranno. (3 Yoh. 9, 10) Ninkeneeto togo yine xaꞌma danchate: ‘Qooxeessiꞌyara heedhannori ayyaanaamittensa kaajjishidhanno gede kaaꞌleemmo? Albisa ikkitino roduuwi uyitanno biddishshira rahe hajajameemmo?’ w16.11 2:10, 11

Woꞌmunni woꞌma ikka hoogirono, qafadame Baabiloone haꞌrino manni giddo, Maganu uyino amaale adhitinori hakkiicho dancha heeshsho heedhino. Baabiloonete manni Yihudu manni uminsa hajo uminsa layidhanno gede mito geeshshi silxaane uyinonsa. Qafadame harino manni hatte gobba giddo mittu bayichinni wole bayicho haꞌra dandaanno. Hatte yannara Baabiloone daddaloho mereerima bayichooti; qoleno Yihudu manni giddo mitu hakko daddaꞌlinanni gara rosinotanna wolootu angate ogimmara fultinore ikkinota kultanno tajubba anfoonni. Mitu Yihudu manni isinni dureeyye ikkino. Yihudu manni Baabiloonete qafadame heeꞌrino heeshsho, lowo diri albaanni Israeele Gibitse borojje ikkite heedhino heeshsho gedeeta diꞌꞌikkitino. (Ful. 2:23-25) Israeelete manni Magano woꞌmunni woꞌma magansiꞌranno yanna dagga ikka? Hakka wotira, kuni ikkannokkire lawanno. Baabiloonete mannooti qafaddino manna wirro gobbansa higara difajjitanno. Ikkollana, Yihowa mannasi qafadame haꞌrino gobbanni gobbansa higanno gede assate qaale eino; isi yiinonte gede mannisi qafadame haꞌrino gobbanni higino. Maganu coyiꞌrinori woꞌmikkinni digatanno.—Isa. 55:11. w16.11 4:3, 5

Hakku Kiristaanu uullate aana heeshshote heeꞌrenni “cubbuwiinni reyinohu gede” ikke baxxino yaa dandiinannihu hiittoonniiti? Maganu wodote kakkalo widoonni Phaawuloosinna hatte yannara nooha wole Kiristaana maarinonsa. Konni daafira, Yihowa cubbonsa gatona yiinonsa, qullaawu ayyaaninni buurinonsa, hattono ayyaanaamittete oososi assinonsa. Konni garinni insa iimira haꞌrate hexxo afidhino. Insa ammanante heedhannoha ikkiro, Kiristoosi ledo iima heedhanno hattono gashshitanno. Ikkirono, Phaawuloosi insa heeshshote noohanna uullate aana Maganoho soqqantanni nooha ikkirono, ‘cubbuwiinni reyitinohu gede’ asse coyiꞌrino. Phaawuloosi, mancho ikke heeꞌre reyinohunna layinkimeeshsho reyannokkiha ayyaanu kalaqo ikke kainohu Yesuusi lawishsha horoonsiꞌrino. Reyo Yesuusi aana dimookkino. Hatteente gede, buuramino Kiristaanino “cubbuwiinni reyinohu gede” ikke, “Kiristoosi Yesuusinni Maganoho” heeꞌrannohu gede asse heda dandaanno. (Rom. 6:9, 11) Heeshshonsa woꞌmunni woꞌma soorrantino. Insa cubbu widira qolte xixxiibbannonsata busha hasatto woy yorto wonshiꞌra agurtino. Insa albi heeshshonsara reyitinohu gedeeti. w16.12 1:9, 10

Togo yaa mittu manchi eꞌꞌe fuli kiiro Qullaawu Maxaafire, Maganoho noosi baxillire woy albillittete hexxosire calla heda hasiissannosi yaa diꞌꞌikkino. Phaawuloosinna umi xibbi diro heeꞌrinohu wolu Kiristaani Magano hagiirsiisinoha ikkirono, babbaxxitino doogonni wolu manni heeꞌranno gedee heeshsho heeꞌrino. Insa sagale itino hattono agino. Insa giddo batinyu mine kalaqiꞌre maatete heeshsho heeꞌrinoho; hattono heeꞌrate hasiissannonsare afiꞌrate looso loosino. (Maq. 6:3; 1 Tes. 2:9) Ikkollana, kuri Maganu soqqamaasine togoo coyi xaaxe amadansara diwodhitino. Qullaawu Maxaafi Phaawuloosi dunkaana gowannoha ikkinota kulihu gedensaanni, isi roore assanno coyi maatiro qummi assino: Isi ganye sabbakatenna rosiisate looso loosanno. (Soq. 18:2-4; 20:20, 21, 34, 35) Qoleno, Phaawuloosi Roomaho heeꞌrannohu ayyaanaamittete roduuwisi konne looso loosara amaalino. Ee, Phaawuloosi ayyaanaamittete qixxaawonna loosi aana illachishino. Roomu Kiristaanino isi lawishsha harunsa hasiissinonsa; ninkeno hatto assa hasiissannonke.—Rom. 15:15, 16. w16.12 2:5, 15, 16

Yihowa isira soqqamate assineemmore baala naadanno. Mittore assate dandoo dinoe yine wolqa baꞌnammora dandiineemmota afino. Isi angate anje qarrissannonke wote, hattono fayyimmankenna yaachishanno coyi qullaawa soqqanshonke ajjanno gede assanno wote mararannonke. Konni daafira Yihowa soqqamaanosi isira ammanante heeꞌrate assitannore naadannota woꞌmunni woꞌma ammana dandiineemmo. (Ibi. 6:10, 11) Qoleno, Yihowa ‘huuccattonke macciishshannoha’ ikkinota qaagi. Isi yaachishinonke coye kulle huucciꞌneemmo wote, huuccattonke macciishshe dawaro qolannota dihuluullammeemmo. (Far. 65:2, 3) ‘Maarote Anninna jawaante baalate Magani’ yaachishannonkeri iillannonke wote irkisannonke; qoleno ayyaanaamittete kaaꞌlo batise aannonke; isi tenne assannohu ammanate roduuwinke widoonni ikkara dandaanno. (2 Qor. 1:3) Mannaho shaqqille leellinsheemmo wote Yihowa hagiidhanno. (Mat. 6:3, 4) Isi danchumma assitannore kiisate qaale eino. w16.12 4:13, 14

Yesuusi uullate aana badda Diini yaano Sheexaanu fonqolisi yannara fonqolo qeelate doodhate dandoosi horoonsiꞌrino. (Mat. 4:10) Yesuusi reyara albaanni noo hashsha giddosinni huucciꞌri yannara, Maganu fajjo assate murciꞌrinota coyiꞌrino. Isi togo yiino: “Annaꞌya! Ati baxittoro konne qarru finiincho anewiinni hoolie; kayinnilla, ati baxoottori ikkinnina, ani baxoommori ikkoonke.” (Luq. 22:42) Konnira ninkeno, Yesuusi lawishsha harunsine doodhate dandoonke Yihowara ayirrinye abbannore assatenna fajjosi wonshate horoonsiꞌno! Ikkina, addinta tenne assa dandiineemmo? Ee, ninkeno Maganu daninna suudinni kalaqammoommo daafira, Yesuusi lawishsha harunsa dandiineemmo. (Kal. 1:26) Ikkollana, ninkera noonketi doodhate dandoo danna afidhinote. Yihowa gede hasiꞌnummore baala assa didandiineemmo. Maganu Qaali, doodhate dandoonke danna afidhinotanna konne Yihowa worinoha hasiisanno danna saꞌnummokki heeꞌra hasiissannonketa kulanno. Lawishshaho, minaama minaannisera, hattono ooso annuwansaranna amuuwinsara maahoyye yite gala hasiissannonsa.—Efe. 5:22; 6:1. w17.01 2:4, 5

Heeꞌnoommohu hagiirsiissanno yannaraati. Yihowa dirijjiteti uullayidi kifile duuchante doogonni harditanni no; ikkollana tini lopho mitore soorrinanni gede assitanno. Kuni biddi assinanni coyi ninke heeshsho ledo xaadanno wote, umonke heeshshi assine meessi dilgonni roore Yihowa loosi aana illachinsho. Togo assanke mereeronke mittimma heedhanno gede assitanno. Phaawuloosi Roomaho heeꞌranno Kiristaanira togo yee borreessino: “Mitte mannimmara duuchu bisi no. Mittu mittunku bisi addi addi looso afiꞌrino. Ninkeno haammante heeꞌnenni, Kiristoosinni mitto bisooti. Mitte mannimma aana heeꞌnoommo.” (Rom. 12:4, 5) Heeshshonke gari baxiha ikkirono, baalunku taalle afidhinokkite Yihowa Mangiste loosi halaꞌlanno gede assate aanna illachisha hasiissannonke. Jajjabba roduuwa, ajuullu roduuwi kiꞌne loossinanni looso loosa rossanno gede rosiissensa. Ajuulle roduuwa, uyinanniꞌne looso adhe, dhukaꞌne affine heedhe; hattono jajjabba roduuwa ayirrisse. Minaamuwa, Aqiila minaama Phirisqilla lawishsha harunse; ise, heeshshonsa gari soorrami yannara minaannise Aqiilara ammanante kaaꞌlitino.—Soq. 18:2. w17.01 5:15, 16

Gedewooni deerrasi afinoha ikkinota leellishino. Isi Yihowa uyinosi looso adhihu gedensaanni nafa, assa hasiissannosire seekke buuxino; qoleno Yihowa biddishsha hasiꞌrino. (Eje. 6:36-40) Gedewooni waajjannokkihonna worba manchooti. Ikkirono, assannore seekke qorophenna alba badhe layiꞌre assannoho. (Eje. 6:11, 27) Isi uyinoonnisi looso irkiꞌre maccaha ikkate diwoꞌnaalino. Hatteentenni, isi Yihowa uyinosi looso loosihu gedensaanni qaesi harino. (Eje. 8:22, 23, 29) Dhukanke afate yaa, haaro looso adhe loosate woy albinni roore soqqamate sharrama agurate yaa diꞌꞌikkitino. Qullaawa Borro, ninke baalunku ayyaanaamittetenni lophate sharrammeemmo gede jawaachishshannonke. (1 Xim. 4:13-15) Ikkina ayyaanaamittetenni lophate loonseemmo loosi aye woteno soorrama hasiissannosi yaateni? Deeꞌni. Xa loonsanni heeꞌnoommo loosi baxiha ikkirono, Yihowa kaaꞌlonni ayyaanaamittetenni lopha dandiineemmo. Maganu uyinonke akattankenna dandoonke woyyeessiꞌnanni albinni roore soqqamanna danchare assa dandiineemmo. w17.01 3:15, 16

Yihowa wodote kakkalo qixxeessate lowore baatino. (1 Phe. 1:19) Isi mannu ooso lowo geeshsha baxanno daaafira, mitto Beettosi ninkera reyanno gede assino. Konni daafira, Yesuusi Addaami darga mannu oosora anna ikkinohu gedeeti. (1 Qor. 15:45) Yesuusi heeshsho afiꞌneemmo gede calla ikkikkinni, jeefote galagalle Maganu maate miilla ikkineemmo faro faninonke. Ee, Yihowa xalala higgesi diigikkinni Yesuusite wodote kakkalo widoonni mannu ooso galagalte maatesiwa higganno gede assa dandaanno. Mannu ooso baala guuta ikkitanno yanna heda lowo geeshsha hagiirsiissanno! Hatte yannara iimanna uulla heedhannoti Maganu maate miilla woꞌma mittimma afidhanno. Hatte yannara woꞌmunni woꞌma Maganu ooso ikkineemmo. (Rom. 8:21) Wodote kakkalora Magano galanteemmoha ikkiro, mannu tenne qixxaawonni horo afiꞌra dandaannota kulate dandiinummore baala assineemmo. w17.02 1:17, 19

Maaja 15, 2013 Agarooshshu Shaera, “Ammanaminohunna wodanaamu borojjichi” ayyaanunni buuramino Kiristaani miilla ikkinota shiima gaamo, yaano Aliidi Biso ikkitinota xawinsoonni. Aliidi Bisi coye murannohu mitteenniiti. Tenne assannohu hiittoonniiti? Aliidi Bisi miilla lamalate kiiro gambooshshe assidhanno; tini insa hasaabbannonna mereeronsa mittimma heedhanno gede assitanno. (Law. 20:18) Aliidi Bisi miilla giddo roorsine laꞌnannihu nookki daafira, insa giddo mittu mittunku mittu diri geeshsha gambooshshu liqambarticha ikkanno. (1 Phe. 5:1) Mitte mittenti komite gambooshshe assidhanno yannarano, diru dirunku addi addihu Aliidi Bisi miili liqambarticha ikkanno. Aliidi Bisihu mittu mittunku miili roduuwasi massagannoha ikkikkinni, ammanaminohunna wodanaamu borojjichi ayyaanaamittete sagale shiqanno “maate” miila ikkinohu gede asse laꞌꞌanno; qoleno kuni borojjichi aanno biddishshira hajajamanno. Aliidi Bisi ajuuja laꞌꞌannohanna horo soꞌrannokkiha diꞌꞌikkino. Konni daafira, rosiisanno rosiranna dirijjite massaganno garira soꞌro heedhara dandiitanno. w17.02 4:10-12

Wodote kakkalora galatu noonkete leellinsheemmo doogga giddo mitte, wodote kakkalo ammanne ninkeneeto Yihowara sayinse uyineenna cuuammeeti. Cuuamanke Yihoware ikkinoommota leellishshanno. (Rom. 14:8) Yihowa baalanka coye assannohu baxillunni ikkino daafira, magansiꞌrannosi manni baalu baxillunni heeꞌrara hasiꞌranno. (1 Yoh. 4:8-11) Jaalanke banxeemmoha ikkiro, ‘gordoho heeꞌranno Anninke ooso ikka’ hasiꞌneemmota leellinsheemmo. (Mat. 5:43-48) Yihowa banxeemmo gede kultanno hajajonni aanchine jaalanke banxeemmo gede hajanjoonninke. (Mat. 22:37-40) Maganu Mangisteha dancha duduwo dudumbeemmo gede uyinoonni hajajo wonshine jaalanke banxeemmota leellisha dandiineemmo. Manna baala banxeemmota leellinsheemmo wote, Maganu ayirrinye mannu afanno gede assineemmo. Isinni, Maganoho noonke baxilli ninke ‘giddo guuta ikkannohu’ jaallanke, roorenkanni roduuwanke banxeemmoha ikkirooti.—1 Yoh. 4:12, 20. w17.02 2:13, 14

Yihowara soqqama ayewoteno garanna woyyitannota ikkitino daafira, tini doodhate qarrissannota diꞌꞌikkitino yite hedattoha ikkara dandaanno. Qoleno xiinxallu manchi, Baꞌꞌaali magansiꞌrate hedannokkiti egennantinote. Ikkollana, hakku Israeelete manni, ‘lamu wodaninni dinanni no.’ Eeliyaasi kayinni, insa taalamannosihu nookki Magano Yihowa magansidhanno gede amaalinonsa; hatto yee amaalasi garaho. Ikkina, Israeelete gara ikkino doorsha doodha qarra ikkitinonsahu mayiraati? Umihunni, insa Yihowara noonsa ammana huꞌnitino; qoleno, isi yiinore macciishsha gibbino. Insa Yihowa aanno egenno woy hayyo afiꞌrate disharrantino; hattono Iso diaddaxxitino. Israeele Maganu aanno egenno garinni heedhoommero, dancha doorsha doodha dandiitanno. (Far. 25:12) Layinkihunni, insa, qooxeessinsara heeꞌrannohu Yihowa magansiꞌrannokki manni hedonsa soorranno gede assidhinohura, kaphu maganna magansiꞌranno manni faale haꞌra hanaffino. Yihowa hattoo coyi guficho ikkannonsata balaxe kule qorowisiisinonsa.—Ful. 23:2. w17.03 2:6, 7

Hiziqiyaasi lawishsha hiinca kaaꞌlitannonkehu hiittoonniiti? Mitu coyi Yihowa ledo noonke jaalooma hunara woy magansiꞌrankera guficho ikkankera dandaanno. Dagoomittete aante kalaqiꞌnanni webisayite widoonni mannaho hasiissannokki ayirrinye aannohu alamete manni faale haꞌra dihasiꞌneemmo. Mitu Kiristaani maatensa miilla woy jaallansa ledo hasaawate togoore horoonsiꞌranno. Ikkollana, alamete aana lowo manni togooha xaadooshshu buusa quwa sae horoonsiꞌranno; insa egenninokki manni faale nafa haꞌranno. Qoleno, insa hakko worroonni fotta laꞌꞌanni woy hakko manni daafira nabbawanni lowo yanna sayisanno. Togoohu lowo geeshsha hasiissannokki coyi yannanke gudannoho. Mitu Kiristaani insa hakko worino foto lowo manni baxinohura naaxxara woy wolu manni hatto assa hoogiro koffi yaara dandaanno. Ninkeneeto togo yine xaꞌma dandiineemmo: ‘Mannu assire asseemmokki gedenna yannaꞌya gumiweelu coyiꞌra huꞌneemmokki gede qoropheemmo?’—Efe. 5:15, 16. w17.03 3:14, 17