Bocaasa

Meessaneeto seejjate yaa, ninkeneeto qeeꞌline akattankenna hedonke woyyeessiꞌrate yaate. Meessaneeto seejja kalaqamunni afiꞌnannire diꞌꞌikkino. Togo assate qajeelshu hasiisannonke. Annuwunna amuuwu oosonsa “mootichu amaalenni seejjitanni” ganyite cincatenni qajeelsitannonsaha ikkiro oosonsa umonsa seejjitannore ikkitannonna hayyo afidhanno gede kaaꞌlitannonsa. (Efe. 6:4) Yihoware jajjabbu heeꞌre rosino mannino konne xintu seera harunsa hasiissannonsa. Insa mito geeshshano ikkiro umonsa seejja dandiitannoha ikkara dandaanno. Ikkirono insa ayyaanaamittetenni gikki yaa hasiissannonsareeti. Togoo manni “haaro mannimma” uddirannonna Kiristoosite gedee hedo heedhannonsa gede sharramannoha ikkiro gikki yiino Kiristaana ikka dandaanno. (Efe. 4:23, 24) Mittu manchi ayyaanaamittetenni gikki yaanno wote heedhannosi akatta giddo mitte isonooto seejjiꞌrate. w18.03 29 guf. 3-4

Kiristaanu gambooshshiwa ayyaanaamittete sagale sagaꞌlate daggannore baala anga fane haaꞌneemmo. Gambooshshe koyissinonkeri Yihowanna dirijjitesiiti. (Rom. 15:7) Gambooshshenke daannoha haaro manna ninkeno wosinsa dandiineemmo. Kuni haaru manni uddiꞌrino woy seessino gari baxiha ikkirono, shiqqine hasaawisate mayira diwoꞌnaaltinanni? (Yai. 2:1-4) Ledosi wolu roduuwi nookkiha ikkiro, ledoꞌne ofollanno gede koyisa dandiitinanni. Mulesi ofoltine pirogiraame harunsanno gede kaaꞌlitinannisihanna nabbambanni qummeeshshuwa leellishshinannisiha ikkiro hagiidhara dandaanno. Konni garinni ‘wosinchimma daggannore haaꞌra’ dandiineemmo. Roduuwu lallawo shiqishate wole songonni dagganno wote, woradu aliidi laꞌꞌaanonna mito wote qole sinu biiro riqiwaano dagganno wote wosina adhineemmo faro afiꞌneemmo. Insa dagganno wote minenke wosinsa dandiineemmo. (3 Yoh. 5-8) Kuri roduuwira buna hayikkinse woy sagale koyinse wosinsa dandiineemmo. Ati togo assa dandaatto? w18.03 15 guf. 5, 7

Hanni Kiristaanaho darte iillishannohu mittu Yihudichi lawishsha laꞌno. Isi ilaminohu Maganu doodhino daga giddooti. Ikkirono, Yihudu daga Yihowa ledo noonsaha baxxino jaalooma huꞌnitino. Hakku manchi Yihudu ammaꞌno budira diinaggaawannoha ikkirono, yannate gedensaanni halaalu doogo rosino. Isira farciꞌrinohu, reyotenni kainohonna Maganu albaanni ayirrinye afiꞌrinoho Yesuusa Kiristoosaati. Isi maa assiyya? Kiristoosi rosaanchi Hanaaniya mare hasaawisisi yannara, isi kulinosire macciishshino. Qullaawu Maxaafi isi daafira kulanni “Isi kae cuuami” yaanno. (Soq. 9:17, 18, NW; Gal. 1:14) Kuni manchi yannate gedensaanni soqqamaasincho Phaawuloosi yinanniha ikkino. Phaawuloosi Yesuusi Maganu fajjo wonshannota ammane cuuamino. Isi keeshshikkinni cuuamino. (Soq. 22:12-16) Yannankerano Qullaawa Maxaafa xiinxallanno manni giddo batinyu yaano, ajuno akkaluno cuuamanno. w18.03 5-6 guf. 9-11

Yaiqoobira lowo fonqoli tuncu yiinosi. Yaiqoobi maalu coye calla illachishannoha rodoosi Eesawu dandee heeꞌrino, hattono Eesawu Yaiqoobi shaate hedino. Qoleno ballisi duucha hige yawaawulinosi. Hatte yannara maalu coye baxanno manni batiꞌrinoha ikkirono Yaiqoobi kayinni Maganu ayyaaninni massagamino. (1 Qor. 2:14-16) Isi Maganu Abirihaamira eino qaale wonshannota addaxxino, hattono Maganu hedinore wonshannohu maatesi widoonni ikkinota afino daafira insa towaatate sharramino. (Kal. 28:10-15) Yaiqoobi coyiꞌrinorinna assinori isi Maganu biddishsha wodanchinota leellishanno. Lawishshaho rodiisi Eesawu shaasira hedi yannara Yaiqoobi Magano togo yee huucciꞌrino: “Huuccattoꞌya macciishshie. Danchumma asseemmohena, ilamootto gobba higi; ayiddikkiwa higi yoottoe. . . . Waajjoommona, rodiiꞌya Eesawu anganni gatisie.” (Kal. 32:6-12) Yaiqoobi Yihowa eino qaale wonshannota ammanino, hattono Maganu hedonna fajjo ledo sumuu yaannore assino. w18.02 20 guf. 9-10

Iyyoobira addi addi fonqoli iillinosi. Qarru iillasira albaanni “jirotenninna jawaantetenni isi geeshsha ikkanno manchi soojjaati gobbara dino.” (Iyo. 1:3) Isi hoqino dureessaati, maccahonna ayirrado manchooti. (Iyo. 29:7-16) Iyyoobira kuni baaluri noosiha ikkirono, wole manna baala roorannohu, woy Maganu hasiisannosikkihu gede asse dihedino. Isinni Yihowa iso “soqqamaanchoꞌya” yee woshshinosi. Sheexaanu xagarrotenni Iyyoobira babbaxxinoha buutote qarra iillishe, Iyyoobi qarra abbinoehu Maganoho yee hedanno gede assate woꞌnaalino. (Iyo. 1:13-21) Hakkiinni sase jaallasi suꞌmira sheshifachinsheemmosi yite marte, Maganu qorichishanni noosihu gede assite coyidhe roore hexxo mudhanno gede assitino. (Iyo. 2:11; 22:1, 5-10) Iyyoobi kayinni ammaname heeꞌrino. Isi gara ikkinokkire coyiꞌrino woti nooha ikkirono, Yihowa Iyyoobi konni garinni coyiꞌrinohu lowo qarri iillinosihura ikkinota huwatino. Iyyoobira iillinosi qarri goofi gedensaanni, Yihowa alba noosirinni ero asse uyinosi, hattono hakkunni gedensaanni 140 diro heeꞌranno gede assinosi. (Yai. 5:11) Tenne yannarano Iyyoobi Maganoho hajajamanni heeꞌrino. w18.02 6 guf. 16; 7 guf. 18

Togoo akatta noonsari, woꞌmanka wote mannu naadansaranna jajansara hasidhanno. Mittu egennaami naaxxaleessu manchi “wodanisi giddo shiima kakkallanni bayicho seekkire isonooto magansiꞌranno” yee borreessino. Mitootu coyidhanno garinni, naaxxate akati busha ikkino daafira, naaxxaleeyye nafa togoo manna dibaxxanno. Yihowa naaxxinannita tiyyire giwanno. Isi “booꞌnaaleette ille” giwanno. (Law. 6:16, 17) Naaxxa Yihowawa shinqeemmokki gede guficho ikkitannonke. (Far. 10:4) Naaxxa Daawuloosi akataati. (1 Xim. 3:6) Ammanantinoti Maganu soqqamaano nafa naaxxitino woti no. Yihudu moote Ooziya lowo diro Yihowara ammaname soqqamino. Qullaawu Maxaafi togo yaanno: “Ooziya jawaante afiꞌrihu gedensaanni hajajamannokkiha ikkino. Hajajama giwasino uwanno gede assitinosi. Hixaana giirranni uduunnichi aana hixaana giirara Qullaawu Minira eatenni Kaaliiqa Maganosi seyatino.” Moote Hiziqiyaasino shiima yanna geeshsha booꞌnino woti no.—2 Dud. 26:16; 32:25, 26. w18.01 28 guf. 4-5

Qullaawu Maxaafi hundinni kayise Maganu soqqamaano isi looso kaaꞌlate jajjansa uyitinota kulanno. Insa mitto baxxino looso loonsanni gede woxe fushshitino yanna no. (Ful. 35:5; 2 Mot. 12:4, 5; 1 Dud. 29:5-9) Umi xibbi diro heeꞌrino Kiristaanino hatte yannara ubbino hude Yihudaho heeꞌranno roduuwa amaddinota macciishshituti, “noonsa wolqanni woxe” fushshitino. (Soq. 11:27-30) Maganu daga fushsho fushshitinohu addi addi garinni afidhino woxinniiti. Umi xibbi dirono, mitu Kiristaani noonsa jajja lawishshaho baattonsanna minensa hire woxe soqqamaasinenniwa massino. Soqqamaasine konne woxe kaaꞌlo hasiissannonsarira uyitanno. (Soq. 4:34, 35) Wolootu qolte Maganu looso kaaꞌlate woxinsa aaninni kayisse uyitanno. Konni garinni buxichuno dureessuno Maganu looso kaaꞌla dandaanno.—Luq. 21:1-4. w18.01 18 guf. 7; 19 guf. 9

Aye geeshshi dandoo heedhunkerono, uminke wolqanni assine anfeemmori shiimareetilla. Ninke baalunku tenne huwata hasiissannonke. Soqqaamaasinchu Phaawuloosira duucha dandoo noosiha ikkirono, isi hasiꞌranno coye baala umisi wolqanni assa didandiino. Isi yaachishinosire Maganoho kuꞌli gedensaanni, Yihowa togo yiinosi: “Ane wolqa guutte leeltannohu ate wolqiweelle [aanaati].” Phaawuloosira tini mayyaatero leeltinosi. Isi ‘Wolqa afiꞌreemmohu wolqiweeleemmo woyiteeti’ yiino. (2 Qor. 12:7-10) Phaawuloosi togo yaasi mayyaate? Phaawuloosi umisi wolqanni assannori shiimare ikkinota buuxino. Maganunnihu qullaawu ayyaani Phaawuloosira noosikki wolqa uyinosi. Qoleno, Maganu ayyaani Phaawuloosi umisi wolqanni asse dandaannokkire assanno gede kaaꞌlinosi. Yihowa ninkerano togoo wolqa aannonke. Yihowa ayyaanasi aannonke wote wolqa afiꞌneemmo. w18.01 9 guf. 8-9

Oosoꞌne cuuama hasidhanno woyite, Yihowa dirijjite annuwahonna amuuwaho qixxeessitino uduunne seekkitine horoonsidhe. Hatto assaꞌne, heeshshonke Yihowara sayise aanna cuuame Kiristaancho ikka ajinshe laꞌnannire ikkinokkitanna togo assa atoote afiꞌnanni gede assitannota xawissine kultinanni gede kaaꞌlitannoꞌne. Annuwanna amuuwa, oosoꞌne “Mootichu amaalenni seejjitinanni” lossate qeechinna qoosso nooꞌne. (Efe. 6:4) Oosote Qullaawu Maxaafi yaannore rosiisa calla diguddanno; hatteentenni rossinore ammante adhitanno gede kaaꞌlensa. Insa heeshshonsa Yihowara sayise aatenna isira woꞌmu wodaninni soqqamate kaajjado ammana hasiissannonsa. Yihowa Qaali, qullaawu ayyaanisinna kiꞌne sharrantinanni sharro, oosoꞌnera gato afiꞌrate kaaꞌlitanno hayyo heedhannonsa gede assitannonsa. w17.12 22 guf. 17, 19

Hatte yannara Daanieelira 100 diri balla ikke noosi, hattono reyara shiima yanna calla gatte no. Isi reyotenni kaeemmo yee hexxa dandaanno? Ee dandaanno! Daanieeli maxaafi jeefora Maganu iso togo yiinosi: “Ati Daanieeli goofimarchu geeshsha ammanamatenni heeꞌri. Hakkunni gedensaanni fooliishshiꞌratto.” Daanieeli reyo fooliishsho ikkitinotanna waammate giddo “hedo, egennonna hayyo” nookkita afino. Shiima yanna gedensaanni isi hakkira haꞌrino. (Ros. 9:10) Ikkollana xaate isiri kaino yaa diꞌꞌikkino. Maganu reyotenni kayisannosita kule qaale einosi. Sokkaasinchu hakkiinni aanche Daanieelira techohu barru qummeeshshi aana noo hexxo kulinosi. Daanieeli kaꞌꞌanno barra woy waammate giddo mageeshshi yanna keeshshannoro dikulloonnisi. Isi reyannota afino. Ikkollana, isi albillitte ‘qeecha adhannota’ kulloonnisi; tini qolte isi reyihunni lowo yanna gedensaanni reyotenni kaꞌꞌannota leellishshannote. Kuni ikkannohu ‘goofimarchu barraati.’ w17.12 7 guf. 17-18

Yihowa Israeelete cimeeyye isi gede taashshitannore ikkitara hajajino. Umihunni, cimeeyye halaale ikkinore afa hasiissannonsa. Insa maaro hasiissannosironna teꞌee murate, lubbo shiino manchi giddota, reyi manchira noosi laonna isi alba assinore afate woꞌnaala hasiissannonsa. Yihowa gede taashshitannore ikkate, isi hakkonne mancho shiinohu “afanni heeꞌrenni giwinosi daafira” ikkinoronna teꞌee buuxa hasiissannonsa. (Kir. 35:20-24) Naqaashshe hasiissannoha ikkiro qole, hedeweelcho lubbo shiino manchira yoo yinara albaanni ajayi ajeenna lamu manchi farcidhanno. Konni daafira cimeeyye hakku manchi assinore calla ikkikkinni isi daafirano heda hasiissannonsa. Insa isi loosino soꞌro calla laꞌꞌa agurte hattenne soꞌro loosinohu mayiraatiro wodanchate woꞌnaala hasiissannonsa. Baalunkunni roore, insa Yihowa gede hayyoota, maartannorenna taashshitannore ikkitanno gede qullaawu ayyaani hasiisannonsa.—Ful. 34:6, 7. w17.11 16 guf. 13-14

Mito muxxe ikkino halaale ronsoommohu Maganu manni ledo mite yine gamba yaa hananfummo yannaraati. Yihowa Kalaqaanchonkenna heeshsho uyinonkeha ikkinota hattono mannu oosora hedinori noota ronsoommo. Qoleno Maganu baxillisinni kae Beettosi wodote kakkalo asse shiqishe cubbunninna reyotenni keere fulleemmo gede assinonketa ronsoommo. Hattono, albillittete Maganu Mangiste qarra baala huntannotanna Maganu Mangiste hunda salaametenni hagiidhinanni hegerera heeꞌrate hexxo afiꞌnoommota ronsoommo. (Yoh. 3:16; Aju. 4:11; 21:3, 4) Yannate kiiro Qullaawu Maxaafi masaalo woy Qullaawa Borro huwantoommo gara biddi assinanniha ikkara dandaanno. Biddi assinoonni coye kullanninke wote yanna gaaꞌmine taje xiinxallanna hiinca hasiissannonke. (Soq. 17:11) Hattoo yannara biddi assinoonniha qara coye calla ikkikkinni, albanna xa noonke hedo mereero noo badooshshe xinqisiinse huwata hasiissannonke. Konni garinni haaro halaale miinju mininke giddo duuꞌna dandiineemmo. w17.06 12-13 guf. 15-16

Hakko iso Yihowa fushshinoha amanyootu seera diingeemmo gede fonqolannonke coyi iillannonke wote qoropha hasiissannonke. Lawishshaho, adhamate hede mitteenni yanna sayisanno Kiristaani, hanafotenni kayise mimmito anga amada, sunqamanna mannu nookkiwa callootinsa heeꞌra lainohunni insaneeto qeeꞌla hasiissannonsa. (Law. 22:3) Mittu Kiristaanchi loosoho xeertowa haꞌranno wote woy meyate woy labbaahu ledo loosanno wote fonqolo ikkannori iillasira dandaanno. (Law. 2:10-12, 16) Dadillineemmonna callanteemmo woteno fonqolammammora dandiineemmo. Kaaꞌlannonkeha lowo geeshsha hasiꞌnoommo daafira calla, baxihano ikkiro, kaaꞌlannonkeha lawanno manchiwa shinqeemmoha ikkara dandaanno. Atera hattoori iillinoheha ikkiro, Yihowanna dagasi kaaꞌlo xaꞌmiri.—Far. 34:18; Law. 13:20. w17.11 26 guf. 4-5

Yihowa manna shinannita effire giwanno. Hundi Isiraeele waro, mittu manchi afanni heeꞌre mannu lubbo shiiro, reyi manchira muli fiixa ikkannohu shii mancho shee “rabbisiꞌranno.” (Kir. 35:19; Mar. 19:6) Konni garinni lubbo shii manchi, beebbate baꞌino lubbora umisi lubbo baatanno. Lubbo shiino mancho bayichonko shaa, Hexxote Gobba battaabbannokki gede assitanno; korkaatuno Yihowa togo yee hajajjino: “Heedhinanni baatto [batteessitinoonte]. Manna shaannohu baatto batteessanno daafira, shiinoha shaa agurranna baatto keereensitinanniti wole doogo dino.” (Kir. 35:33, 34) Israeele mittu manchi afikki mannu lubbo shiiro maa assitanno? Hakku manchi lubbo shiinohu afikki ikkirono, beebbaataame lubbo shiino daafira xaꞌmamasi digattanno. (Kal. 9:5) Ikkirono, kuni manchi rabbisirannohu shaannosikki gede lee eeggote katamma giddo mittenniwa xooqa dandaanno. Hakkiicho isi agarooshshe afiꞌranno. Afikkinni mannu lubbo shiino manchi, kakkalaanote biili reya geeshsha eeggote katamira keeshsha hasiissannosi.—Kir. 35:15, 28. w17.11 9 guf. 3-5

Mitte Awustiraaliyaho heedhanno rodoo togo yitino: “Balliꞌya halaale effire giwanno. Isira silke bilbillammora albaanni, minaanniꞌyanna ani isi hanqe coyiꞌranno wote ninkeno hanqine qolleemmokki gede kaaꞌlankera Yihowa huucciꞌneemmo. Lowo yanna hasaambanni ammaꞌnote haja kayinse heewisammeemmokki gede, isi ledo hasaambeemmo yanna dibatinseemmo.” Mereeroꞌne gibbo kaꞌanno wote, fiixakki baxatto daafiranna woꞌmanka wote insa hagiirsiisa hasiꞌratto daafira, bushu ate ikkoottohu gede assite hedattoha ikkara dandaanno. Ikkollana Yihowara noohe baxilli maatekkira noohe baxille roora hasiissannosita deꞌooti. Fiixikki tenne laꞌꞌanno wote, Qullaawu Maxaafi biddishsha harunsa lowo geeshsha hasiissannota ikkitinota huwatara dandaanno. Mittu manchino halaale macciishshe adhanno gede giddeessa didandaatto. Kayinni wolootu Yihowa biddishsha harunsa kaaꞌlitinohe gara huwattanno gede assa dandaatto. Baxillaanchu Maganinke ninkera assinonte gede, insarano isira soqqama doodhitanno gede faro faninonsa.—Isa. 48:17, 18. w17.10 15-16 guf. 15-16

Baxillinke afuunni coyiꞌne agurranniha calla ikka dihasiissannosi; hakko iso kaaꞌlo hasiissinonsarira mitore assine kaaꞌla hasiissanno. Lawishshaho, ammanate rodiinkera heeshshote hasiisannosiri xeinosiha ikkiro, afuunni coyiꞌneemmorinni sainori hasiisannosi. (Yai. 2:15, 16) Qoleno, Yihowanna manna banxeemmoha ikkiro Maganu midote loosira loosaasine soyanno gede huucciꞌneemmoha calla ikkikkinni, ninkeno sabbakate looso diinaggaambe loosa hasiissannonke. (Mat. 9:38) Soqqamaasinchu Yohaannisi ‘halaalunninna loosunni’ baxamme yee borreessino. Konni daafira baxillinke “goowi aliha” woy ‘doganniha’ ikka dihasiissannosi. (Rom. 12:9; 2 Qor. 6:6) Mitto mancho goowi alita calla banxeemmoha ikkiro addu baxille leellinshoommo yaa didandiinanni. Ikkina, ‘goowi ali baxilli baxillehoni?’ Dibaxilleho. Kuni baxille ikkikkinni dogate. w17.10 8 guf. 5-6

Maganu qaali kaaꞌlankera hasiꞌnummoro ganyine xiinxalla hasiissannonke; konni daafira, Qullaawa Maxaafa barru baala nabbawate sharrama hasiissannonke. Ninke giddo rooriidi, loosu batiꞌrannonkere ikkinoommoti egennantinote. Ikkirono loonseemmo loosino ikko, wolu aye coyino, Qullaawa Maxaafa nabbambeemmota hoolankera wodha dihasiissannonke. (Efe. 5:15, 16) Batinye Yihowa Farciꞌraasine Qullaawa Maxaafa barru baala nabbawate hayyotenni yanna gaaꞌmitino; lawishshaho mitootu soodo, barra woy hashsha nabbabbanno. Insara faarsaasinchu gedee hedo noonsa; isi togo yiino: “Seerakki lowo geeshsha baxeemmo; barra woꞌma iso hedeemmo.” (Far. 119:97) Qullaawa Maxaafa nabbambeemmo wote nabbamboommo coye hiincano lowo geeshsha kaaꞌlitannonke. (Far. 1:1-3) Qullaawu Maxaafi giddo noo hayyonni horo afiꞌra dandiineemmohu hatto assinummoro callaati; Qullaawa Maxaafa borreessininku lowo diro ikkirono, konni maxaafinni afiꞌnanni hayyo woꞌmanka wote kaaꞌlitannote. Maganu Qaale nabbambeemmohu attammoonniha woy elektirooniksete uduunnichinni ikkirono, loosoho kakkayisanno garinni nabbawa hasiissannonke. w17.09 24 guf. 4-5

Kaꞌnummorira baalaho mararro leellinsheemmo yaa diꞌꞌikkino. Lawishshaho, Moote Saaooli mararro leellisheemmo yee Maganu hajajo diigino. Isi Maganu daga diina ikkinoha moote Agaagi shiikkinni gatise abbino. Konninni kainohunni Yihowa Saaooli Israeelete moote ikkannota giwino. (1 Sam. 15:3, 9, 15) Yihowa taashshote yoo yaanno Maganooti. Isi mannu wodanira noore afa dandaanno; qoleno isi mararro leellisha hasiissannonna hasiissannokki yanna afino. (Erq. 2:17; Hiz. 5:11) Yihowa isira hajajantannokkire baala hunanno yanna muleeti. (2 Tes. 1:6-10) Hatti yanna isi bushuulleho mararro leellishannota diꞌꞌikkitino. Isinni, Yihowa togoo manna hunasi, hatte yannara gatannoha keeraano manna mararannota leellishshannote. Hige mannu baꞌꞌa woy gata hasiissannonsa yine yoo yineemmori ninke diꞌꞌikkinoommo. Hatteentenni xa manna kaaꞌlate dandiinummore baala assa hasiissannonke. w17.09 10-11 guf. 10-12

Meessaneeto qeeꞌla Magano hagiirsiisanno akataati. Woꞌmunni woꞌma isonooto qeeꞌla dandaannohu Yihowaati. Mannu ooso kayinni guuta ikkitinokki daafira, insaneeto qeeꞌla shota diꞌꞌikkitannonsa. Isinni xaa yannara alamete aana lowo qarri iillanni noohu mannu umonsa qeeꞌla hoogino daafiraati. Insaneeto qeeꞌlannokki manni xonamaano, dimbaaleeyye, kanca yaannore, adhamansa diigannore, asalunni amadamannorenna araadaasine ikkanno, hattono usuru minira earanna siimu xaadooshshinni saꞌꞌanno dhibbinni amadamara dandaanno; qoleno togoo mannira surrensa gawajjantaranna hasiꞌrikkinni godowu gatansara dandaanno; kuri insaneeto qeeꞌlannokki mannira iillannonsa qarri giddo gamaholla. (Far. 34:11-14) Yannankera mannu albinni roore umonsa qeeꞌlannokkiha ikkino. Alba 1940 balla xiinxallinoonni xiinxallo mannu insaneeto qeeꞌla hooginota leellishshanno; muli yannara assinoonni xiinxallono mannu albinni roore insaneeto qeeꞌlannokkiha ikkanni haꞌrinota leellishshannote. Maganu Qaale nabbawanno mannira tini dhagge diꞌꞌikkitannonsa; korkaatuno Qullaawu Maxaafi heeꞌnoommohu “goofimarchu barra” ikkinota leellishshanno taje giddo mitte mannu “umosi qeeꞌlannokkiha” ikkannota kulanno.—2 Xim. 3:1-3. w17.09 3 guf. 1-2

“Maganu keeri” wodaninkenna hedonke fooliishsho afidhanno gede assanno. Yihowa ninkera hedannotanna hagiidhinammora hasiꞌrannota anfoommo. (1 Phe. 5:10) Tini, quwa saꞌne yaandeemmokkinna hexxo mudhineemmokki gede agartannonke. Muli yannara mannu oosora konni albaanni ikke egenninokkihu bayiru qarri iillannonsa. (Mat. 24:21, 22) Hatte yannara ninke mittu mittunkura iillanno qarri hiittoohoro gunde diafoommo. Ikkirono deerra saꞌne yaada dihasiissannonke. Yihowa assannoha mitto mittonka coye afa hoongummorono, isi hiittoo Maganootiro kayinni anfoommo. Yihowa konni albaanni assinori, isi hedinore wonshannota hoolannori nookkitanna mito wote hendoommokkire assannota leellishanno. Yihowa barru baala assannonkeri, ‘mannu hedora aleenni ikkinohu Maganu keeri wodanankenna hedonke agarannota’ huwatate kaaꞌlannonke. w17.08 12 guf. 16-17

‘Mamooti geeshsha?’ Togo yite xaꞌmitinori ammanantino masaalaano Isayaasinna Imbaaqoomiiti. (Isa. 6:11; Imb. 1:2) Mootichinke Yesuusi Kiristoosino ammana nookki manni qarrisisi yannara tenne xaꞌmo xaꞌmino. (Mat. 17:17) Hakko daafira, ninkeno hatto yine xaꞌmineemmo yanna heedhara dandiitanno. Ninkerano taashsho xeꞌino coyi iillankera dandaanno. Qoleno, geedhimma woy fayyimmate hoonge qarrissankera dandiitanno; woy ‘goofimarchu barrite qarrissanno yanna’ giddo heeꞌra qarra ikkitinonkeha ikkara dandaanno. (2 Xim. 3:1) Woy qooxeessinkera heeꞌranno manni gara ikkitinokki lao noonsare ikkansa, hexxo mudhineemmo gede assitankera dandiitanno. Ninkera qarra ikkinonke coyi ikkiha ikkirono, hundi yannara Yihowara ammaname soqqamino mannino ninke xaꞌmineemmo gedee xaꞌmo xaꞌminotanna tennera Yihowa boroorinonsakkita afa jawaachishshannote. Fonqolu iillannonke wote kaaꞌlannonkeri maati? Tenne xaꞌmora Rosaanchu Yaiqoobi techohu barru qummeeshshi aana dawaro qolino. w17.08 3-4 guf. 1-3

Yesuusi harunsaanosi “bunshete woxinni” iima jaalla kalaqidhanno gede jawaachishinonsa. Jajjanke horoonsiꞌneemmo wote Maganoho ammanammeemmota leellisha dandiineemmo doogga giddo mitte, Yesuusi masaalotenni kulinoha alame woꞌmate loonsanniha wongeelu looso woxunni kaaꞌlate. (Mat. 24:14) Hindete gobbara mitte shiima qaaqqo baankoonete woxe codha hanaffino; ise togo assate yite ashangulliite nafa hidha agurtino. Woxu baankoone woꞌmita wongeelu loosira horoonsiꞌnanni gede uyitino. Tenne gobbara heeꞌrannohu kokonaate yinanni laalo loosiꞌrannohu wolu rodii no. Isi Malayalami yinannite tirote biirora tenne laalo haaꞌre massino; isi hatto assinohu tini tirote biiro tenne laalo hidhitannohura woxe fushshantenni laalo massummoro woyyanno yee hedinohuraati. Togo assasi hayyote. Giriikete heedhanno roduuwino gobbansara heedhannote Beeteelete maatera zayite, burbuxxonna wole sagale ganyite massitanno. w17.07 8 guf. 7-8

Baabiloonete qafadame noohu Israeelete manni faarsiꞌra dibaxino. Insara jawaante hasiissinonsa. Ikkollana, Maganu masaalotenni kulino garinni, Faarisi moote Qiroosi qafadotenni fushshinonsa. Isi Baabiloone qeele togo yee lallawino: “Kaaliiqi . . . Yerusaalamete Qullaawa mine minammora annimma uyinoe. Kunnira Maganu manni baalunku Yerusaalame hadhe! Maganiꞌne Kaaliiqi ledoꞌne heeꞌro!” (2 Dud. 36:23) Tini, Baabiloonete qafadame nooha Israeelete manna jawaachishshinonsati dihuluullissannote! Yihowa Israeelete gaꞌre xaphoomunni sheshifachishinoha calla ikkikkinni, Israeelenniha mitto mittonka mancho sheshifachishino. Yannankerano isi hatto assanno. Maganu “Wodana hiiqqantinore dhaawannonsa; madansarano gaga gananno.” (Far. 147:3) Ee, Yihowa dhiwammeemmo woy yaandeemmo wote towaatannonke. Yihowa sheshifachishannonke, hattono yaandeemmo wote jawaachishannonke. (Far. 34:18; Isa. 57:15) Isi iillannonke qarra baala dandiine saꞌneemmo gede hayyonna jawaante aannonke.—Yai. 1:5. w17.07 18 guf. 4-5

Yihowa Kalqete alame aana baalunkunni roore dureessaati. (1 Dud. 29:11, 12) Isi shaqqado Anna ikkino daafira, ayyaanaame jiro naaddannorira baalaho mararikkinni aanno. Yihowa lowota ayyaanaamittete jiro uyinonkehura galanteemmosi; tenne ayyaanaamittete jiro giddo gama: (1) Maganu Mangiste, (2) heeshsho gatissanno soqqanshonna (3) Qullaawu Maxaafiho muxxe halaaleeti. Qoropha hoogummoro kayinni tenne muxxe jiro hunne agurreemmoha yaano naada hoongeemmoha ikkara dandaanno. Tenne muxxe jiro seekkine cuꞌmiꞌrate, garunni horoonsiꞌranna isera noonke baxilli yannate kiiro haarooꞌmanno gede assiꞌra hasiissannonke. Ninke giddo batinyu Maganu Mangistera yine heeshshonke giddo lowo coye biddi assiꞌnoommoti egennantinote. (Rom. 12:2) Ikkirono xaano biddi assiꞌra hasiisannonkeri heeꞌrara dandaanno. Maganu Mangistera noonke baxilli baꞌꞌanno gede assannore, lawishshaho maalaamittete coye banxeemmokkinna gara ikkitinokkiti siimu xaadooshshi hasatto heedhannonkekki gede qoropha hasiissannonke.—Law. 4:23; Mat. 5:27-29. w17.06 9 guf. 1; 10 guf. 7

Maganu Iyyoobira qarru iillinosihu mayiraatiro bade kulino base dino. Yihowa isonooto keereensa hasiꞌrinoha lawise, Iyyoobira qarru iillannosihu mayiraatiro kula dihasiꞌrino. Hatteentenni Yihowa bayirreenyasi hendiro, Iyyoobi lowo geeshsha shiima ikkinota hedanno gede assino. Konni garinni Yihowa Iyyoobi roore dea hasiissannokki hajo noota huwatanno gede kaaꞌlinosi. (Iyo. 38:18-20) Tini, Iyyoobi gara ikkitino lao heedhanno gede assiꞌrate kaaꞌlitinosi. Yihowa, buutote qarra dandee sainoha Iyyoobi dhaawate seejjinohura isi kaajjadoho yaateni? Maganu kaajjado diꞌꞌikkino; Iyyoobino hatto asse dihedino. Iyyoobi qarru iillisirono Maganu seejjinosi seejjo adhinota coyiꞌrino. Isi togo yiino: “Coyiꞌroommo coyi baalu ane umoꞌya saalfachishinoe. Kunni daafira, buluulunna bukote aana ofolle aagintaaweemmo.” Yihowa xawise amaalinoti dancha amaale hedinore wonshitino. (Iyo. 42:1-6) Iyyoobi Yihowa seejjinosi seejjo adhe hedosi biddi assiꞌrino; hakkuyi gedensaanni Yihowa Iyyoobi qarru yannara ammaname heeꞌrinota mannaho kulino.—Iyo. 42:7, 8. w17.06 24-25 guf. 11, 12

Loonseemmo loosinna ayyaanaamittete coye assate giddo hiikkoye roorsiꞌneemmoro afate, ninkeneeto togo yine xaꞌma danchate: ‘Looseemmo loosi hagiirsiisannohu, ayyaanaamittete loosi kayinni hakkeeshshi geeshsha baxisannokkihu woy woga wonshate calla assinannihu gede asse hedeemmo?’ Tenne xaꞌmo seekkine hedankenna hiincanke hiikkonne coye roorsiꞌneemmoro afate kaaꞌlitannonke. Yesuusi heeshshonke giddo ayyaanaamittete looso balaxisiinseemmo gede dancha lawishsha ikkinonke. Mitto waro Yesuusi Maariyaaminna rodoose Maartaoo minira haꞌrino. Maarta sagale qixxeessitanni kabbi facci yitanni no; Maariyaami kayinni Yesuusi lekka hunda ofolte isi yaannore macciishshitanni no. Maarta Maariyaami looso kaaꞌla hoogginosehura coyiꞌrantuta Yesuusi techohu barru qummeeshshira noo hedo kulinose. (Luq. 10:38-42) Yesuusi Maartara lowo geeshsha hasiisanno roso roosiisinose. Loosu hedonke bebbeehannonkekki gede assiꞌratenna Kiristoosa banxeemmota leellishate ‘dancha coye doodha,’ yaano ayyaanaamittete coye balaxisiisa hasiissannonke. w17.05 24 guf. 9-10

Yihowa, ooso halaalu mine lophitanno gede rosiissara hajajinohu akaakkansa woy wole manna ikkikkinni annuwansanna amuuwansaati. (Law. 31:10, 27, 28) Ikkirono, heeꞌranno gobbara coyiꞌnanni afoo dandaannokki annuwinna amuuwi, oosonsa danchu garinni rosiisate kaaꞌlo hasiissannonsaha ikkara dandaanno. Wolu manni kaaꞌlanno gede assiꞌra, Maganu insara uyino looso lashshi assa diꞌꞌikkitino; isinni hatto assansa, oosonsa Yihowa ‘amaalenni seejje lossa’ hasiꞌrannota leellishshannote. (Efe. 6:4) Lawishshaho, annuwunna amuuwu maatete magansiꞌransa ma garinni assidhuro woy oosonsa ayeoo ledo jaalla ikkituro woyyannoro songote cimeeyye amaaꞌla dandiitanno. Qoleno maatete magansiꞌra assiꞌranno yannara, sae sae wole maate koyisa dandaanno. Batinyu wedelli ayyaanaamittete gikki yitinoriwa aaniro ayyaanaamittetenni lophanno; hakko daafira annuwunna amuuwu oosonsa togoo roduuwi ledo soqqantannonna boohaartanno gede assano danchate.—Law. 27:17. w17.05 11-12 guf. 17-18

Yihowa sokkaasinchi Moote Heeroodisi Yesuusa shaate hedinota Yooseefira kulisi yannara, Yesuusi annisinna amasi ledo Gibitsete gobba haꞌre heeꞌrino. Insa Heeroodisi reya geeshsha hakko heeꞌrino. (Mat. 2:14, 19-21) Lowo diri gedensaanni, hundite Yesuusi rosaanora dartu iillinonsa daafira, ‘Yihudunna Samaariyu [gobbara] billaallitino.’ (Soq. 8:1) Yesuusi harunsaanosi qaensanni darantanno gede assinanninsata balaxe coyiꞌrino. Togo yiino: “Mittu katamira qarrissuꞌnero, wole katama xooqqe.” (Mat. 10:23) Lowo kume ikkitannote Yihowa Farciꞌraasinerano dartu iillinonsa. Konninni kainohunni fiixansa shiidhino, hattono jajjansa baala hooggino. Darame wole gobba haꞌre heeꞌranno manni haꞌranna doogote woy kaampete giddo addi addi qarri iillinonsa. Hakko heeꞌranno manni, ago aganno, qumaare gaꞌnanno, mooranno hattono amanyoote bainore assanno. Ikkollana insa biꞌre Isiraeele halalla hadhino haꞌrinsho gumulantunte gede, kaampete heedhanno yannano gumulantanno yite heddinohura dicaaccaabbino.—2 Qor. 4:18. w17.05 3-4 guf. 2-5

Mito wote mannu songote giddo atera woy wolu mannira taashsho xeinoha lawannore assanno woti heeꞌrara dandaanno. Ikkirono, tini guficho ikkitahera wodhitooti. Hatteentenni, Yihowara ammanamattota leellishi; kaaꞌlahera huuccatto assiꞌri; hattono iso addaxxi. Qoleno, mitte hajo daafira buunxoommokkiri heeꞌrara dandaannota deꞌooti. Hakkiinni saeno guuntete xeꞌne noonke daafira, mitto coye gara ikkitinokki doogonni huwantammora dandiineemmo. Konnira coye haaꞌne gobba tuqisa dihasiꞌneemmo; togo assa coye huntanno ikkinnina woyyeessitannori dino. Qoleno, ninkera lawinonkere assantenni, Yihowara ammanamme isi coye biddi assa geeshsha cincine agarate murciꞌno. Togo assanke Yihowa hagiirsiisatenna Isi atoote afiꞌrate kaaꞌlitannonke. Ee, “uulla woꞌmate Daanyi” Yihowa, “doogosi baala suwashsho” yaano taashsho noota ikkitino daafira, isi ayewoteno gara ikkinore assannota dihuluullammeemmo.—Kal. 18:25; Mar. 32:4. w17.04 22 guf. 17

Busha coye agure higa giwanno manni yaano bayiru qarri daa geeshsha tenne busha alame irkisanno manni hiikkanno? Yihowa busha manna uullate aaninni hegerera hunannota coyiꞌrino. (Far. 37:10) Bushu manni togoo coyi iillannonsakkihu gede asse hedara dandaanno. Yannankera lowo manni assannore maaxanna qorichishamikkinni saꞌꞌa roso assiꞌrino. (Iyo. 21:7, 9) Ikkollana, Qullaawu Maxaafi togo yaanno: “Maganu mannu haꞌranno doogo baala illaallisanno; qaafosi baala laꞌꞌanno. Bunshe loossannori Maganuwiinni maaxama didandiitanno; dhiꞌmote tunsichi giddo nafa maaxante diaffanno.” (Iyo. 34:21, 22) Magano Yihowa maaxamme gata didandiinanni. Awaawuranno manni iso balalsa didandaanno; qoleno gawalo nookkita afate dandoosinni coye qonqolche afannokki gede assanno tunsichi woy diime horo dino. Armagedooni gedensaanni biꞌreera bushu manni heeꞌrannowa laꞌneemmoha ikkara dandaanno, kayinni insa hakko diheedhanno. Insa hegerera baꞌanno!—Far. 37:12-15. w17.04 10 guf. 5