Sadaasa

Hunda mannu sagale qishe mininsara wosincho adha rosaminoreeti. (Kal. 18:1-8; Eje. 13:15; Luq. 24:28-30) Sagale mitteenni ita hakko manni mereero jaaloomunna salaame noota leellishshanno. Roore wote wosinsa hasiissannonkeri ayeooti? Songote giddo noore ammanate roduuwankeeti. Qarru yannara mimmitinkera irko ikka hasiissannonke. Konnira, roduuwinkera ammanammoommo jaalla ikkanna baalunku ledo salaametenni heeꞌra hasiissannonke. Woradu aliidi laꞌꞌaanonna tiokiraasete rosi mine rossanno roduuwiranna gimbaatu looso loossannorira galtannowi hasiisannonsaha ikkara dandaanno. Mite yannara kalaqamu danonni kainohunni minensa hoogganno roduuwi heedhara dandiitanno; kuri roduuwi mine afidha geeshsha galtannowi hasiisannonsa. Togoo roduuwa kaaꞌla dandiitannori halaꞌlado mine afidhinore callaho yine heda dihasiissannonke; insa tenne assitanni keeshshitinoha ikkara dandaanno. Minikki shiima ikkirono, manna gashsha dandaatto? w18.03 15 guf. 6; 16 guf. 9

Uwinohu kaꞌꞌanno gede kaaꞌlannosiri maati? Umisi wolqa calla dikaaꞌlitannosi, hatteentenni Maganu ayyaani kaaꞌlannosi. (2 Qor. 4:7) Maganu ayyaani laalanno gumi giddo mitte meessaneeto qeeꞌlate; kuni akati meessaneeto seejjiꞌrate ledo xaado afiꞌrinoho. Giddosinni huuccatto assiꞌra, Qullaawa Maxaafa xiinxallanna hiincano kaaꞌlitannosi. Maganu Qaale xiinxalla qarra ikkitinohehalla ikki? Qullaawa Maxaafa xiinxalla baxisannohekkiha ikkara dandaanno. Ikkollana, maahoyye yiittoro Yihowa kaaꞌlannoheta deꞌooti. Isi ‘Qaalesi halchatto’ gede kaaꞌlahera dandaanno. (1 Phe. 2:2) Umihunni, ateneeto qeeꞌlite Qaalesi xiinxallatto gede kaaꞌlahera Yihowa huucciꞌri. Hakkiinni huuccattokki ledo sumuu yaannore assi; shiima yanna xiinxalla dandaatto. Sunu sununni Qullaawa Maxaafa xiinxalla shota ikkitannohe, hattono baxissannohe! Qoleno muxxe ikkitinota Yihowa hedo hiincitanni sayisatto yanna hagiirsiissannohe.—1 Xim. 4:15. w18.03 29 guf. 5-6

Mittu Qullaawu Maxaafi rosaanchi cuuamara albaanni, Maganu daafira, Isi mannu oosora hedinorenna Yihowa manna gatisate qixxeessino qixxaawo rose ammanasi kaajjishiꞌra hasiissannosi. (1 Xim. 2:3-6) Tini ammana Qullaawu Maxaafi rosaano Magano dadillisanno assoote agurtannonna Yihowahu xalalu seeri ledo sumuu yaanno garinni heedhanno gede assitannonsa. (Soq. 3:19) Mittu manchi Maganu Mangiste ragiꞌrannokki gede assanno assoote agurikkinni cuuamiro cuuamasi Magano dihagiirsiissanno. (1 Qor. 6:9, 10) Konni daafira Yihowaha amanyootu seera agadhe heeꞌrano agurranna wolurino assa hasiissannori no. Keeraanchimma hasiꞌranno manchi songote gambooshshe duuchanka wote haꞌra, heeshsho gatisannoha sabbakate loosonna rosaano assate looso diinaggaawe loosa hasiissannosi. (Soq. 1:8) Mittu Qullaawu Maxaafi rosaanchi kuri coyibba assihu gedensaanni heeshshosi Yihowara sayise uyinota huuccattotenni kulanno; hakkiinni heeshshosi sayise uyinota mannaho leellishate cuuamanno. w18.03 6 guf. 12

Yihowa Maariyaami Yesuusi ama ikkitanno gede doorinohu mayiraati? Ise Maganu ayyaaninni massagantannota woy Yihowa baxxannota ikkitinohuraati. Maariyaami fiixise Zakkaariyaasinna Elsaabeexiwa martu wote Magano guwisidhanni coyidhinori ise Maganu ayyaaninni massagantannota leellishanno. (Luq. 1:46-55) Maariyaami coyidhinori, Maganu Qaale lowo geeshsha baxxannotanna Ibiraawootu Afiita Qullaawa Borro seekkite affinota leellishanno. (Kal. 30:13; 1 Sam. 2:1-10; Mil. 3:12) Qoleno isenna Yooseefi haarote adhaminore ikkirono, Yesuusi ilama geeshsha siimu xaadooshshe diassino. Tini insa roore illachishannohu uminsa hasatto ikkikkinni Maganu fajjo ikkinota leellishshanno. (Mat. 1:25) Yannate gedensaanni, Maariyaami Yesuusi heeshsho giddo woꞌminore seekkite huwattino, hattono isi coyiꞌrino hayyo hiincitino. Maganu Mesihichu daafira coyiꞌrinori woꞌmanno gara afate quqquxantino. Maariyaami lawishshi heeshshonke giddo Maganu fajjo balaxisiinseemmo gara afate kaaꞌlannonke yiniro sumuu diyaatto? w18.02 21 guf. 11

Ammanatenninna hajajamatenni Iyyoobi lawishsha harunsa dandiineemmohu hiittoonniiti? Heeꞌnoommo gari baxihano ikkiro, heeshshonke giddo woꞌmanka wote Yihowa balaxisiisa, woꞌmunni woꞌma iso addaxxanna woꞌmu wodaninni isira hajajama hasiissannonke. Qoleno Iyyoobinni roore togo assineemmo gede kakkayisannonke korkaati noonke. Hanni hedi: Ninke Sheexaanunna xagarrosi daafira lowore anfoommo. (2 Qor. 2:11) Qullaawa Maxaafa uyinke Magani galatamona, Qaalisi, roorenkanni Iyyoobi maxaafi Isi mannu oosora qarru iillara fajjinohu mayiraatiro anfeemmo gede kaaꞌlinonke. Daanieeli masaalino masaalonni, Maganu Mangiste Yesuusi Kiristoosi moohino gashshoote ikkitinota huwantoommo. (Dan. 7:13, 14) Qoleno tini Mangiste muli yanna giddo qarra baala hegerera huntannota anfoommo. Iyyoobi lawishshi buutote qarra cince heeꞌranni no roduuwanke marara hasiissannonketa leellishano. Iyyoobinte gede, togoo roduuwi giddo mitu gara ikkinokkire coyidhanno woti heeꞌrara dandaanno. (Ros. 7:7) Ikkollana tennera insa bushiisha agurre mararro leellishanna qarransa wodanchate woꞌnaala hasiissannonke. Hatto assineemmoha ikkiro, baxillaanchunna maaranno Anninke Yihowa lawishsha harunsineemmo.—Far. 103:8. w18.02 6 guf. 16; 7 guf. 19-20

Mitu manni naaxxannohu xumanna maccaha ikkino daafira, muuziiqa dandaannohura, wolqa afiꞌrinohura woy silxaane noonsahura ikkara dandaanno. Daawitira kuri coyibba baala noosiha ikkirono, isi heeshshosi diro woꞌma umosi heeshshi asse heeꞌrino. Isi Goliyaadi shiino daafira Moote Saaooli beetto uyinisita Daawiti togo yiino: “Mootete beetto adheemmohu ani ayeti?” (1 Sam. 18:18) Yannankerano Yihowa soqqamaano Daawiti gede umonsa heeshshi assitanno. Yihowa kalqete alame giddo baalunkunni Rooriidiha ikkirono, umosi heeshshi assannota afanke dhagge ikkitannonke. Qullaawu Maxaafi togo yee amaalannonke: “Mararro, joongille, shaqqille, shooshanqenna cinca, uddanote gede assitine uddidhe.” (Qol. 3:12) Qoleno “baxillu dinaaxxanno,” hattono “dibooꞌnanno.” (1 Qor. 13:4) Umonke heeshshi assineemmoha ikkiro, mannu Yihowawa shiqara dandaanno. w18.01 28 guf. 6-7

Maganu soqqamaano mito coye loonsanni gede fushsho fushsha dandiitanno. (Soq. 4:34, 35; 1 Qor. 16:2) Lawishshaho, songoꞌne horoonsidhannota haaro Gambooshshu Addaraashe minate hendoonni? Jajjabba gambooshshe assiꞌnanni Addaraashe gatamarate woy kalaqamu dano iillitinonsa roduuwa kaaꞌlate woxu hasiisannota kullankera dandiinanni. Yihowa Farciꞌraasinete qara biiroranna alamete doyichora noote sinu biirora loossanno roduuwa kaaꞌlateno woxe fushshineemmo. Fushshineemmo woxi, misiyoone, baxxitino suwisaanonna woradu looso loossannore irkisate kaaꞌlanno. Ninke baalunku Yihowa tenne goofimarchu barruwara dirijjitesi widoonni loosiisanni no looso kaaꞌla dandiineemmo. Duucha wote fushsho fushshino manchi tenne mannu afara dihasiꞌranno. Gambooshshu Addaraashera noo saaxinera woxe worreemmo woy jw.org widoonni fushsho fushshineemmo wote mageeshshi woxe uyinoommoro wolu manni afara dihasiꞌneemmo. Ninke fushshineemmohu shiimu woxi tirannori nookkiha lawankera dandaanno. Ikkirono, roore wote dirijjitenke Maganu looso loossanno gede kaaꞌlannohu lowo manni aannohu shiimu woxi corameeti. w18.01 19 guf. 10-11

Mittu manchi Kiristaancho ikkatenna gato afiꞌrate cuuama hasiissannosi. (Mat. 28:19, 20) Cuuamakki heeshshokki Yihowara sayisse oottota leellishshanno. Qoleno Yihowa baxatenna baalunkurinni roorsite fajjosi wonshate qaale eootto. Heeshshokki Yihowara sayisse aakki garankolla. Hanni Yihowa magansiꞌra hoogoottoro mayi ikkannoro hedi! Mittu manchi Yihowa magansiꞌrannokkiha ikkiro, Sheexaanu alame wido ikkanno. Daawuloosi ati gato afiꞌrattora dihasiꞌranno. Isinni, Sheexaanu hegere heeshsho afiꞌrittokki gatittoronna isira haꞌlite Yihowa aliidimma irkisa giwittoro lowo geeshsha hagiidhanno. Hanni Sheexaanu wido ikka gibbe heeshshokki Yihowara sayisse uyite Kiristaancho ikkakkinni afiꞌrootto atoote hedi. Xa ateneeto Yihowara sayisse ootto daafira mitte giddonni “Kaaliiqi [“Yihowa,” NW] ledoꞌya heeꞌre kaaꞌlannoe daafira diwaajjeemmo; mannu assannoeri dino” yite coyiꞌra dandaatto. (Far. 118:6) Maganu jaala ikkanna iso hagiirsiisa roorino ayirrinyi dino! w17.12 23-24 guf. 1-3

Roduuwinke mereero coyi kawa kaꞌaanni higannonke wote, tini Yihowara ammanammoommotanna teꞌee leellishate kaaꞌlitannonke. Hiittoonni? Roduuwinke guuntete xeꞌne noonsare ikkiturono Yihowa baxannonsa; ninkeno roduuwanke banxenna insa ledo sumuu yine loonse Yihowara ammanammoommota leellisha dandiineemmo. Yooseefi xagge Yihowa soqqamaanosira fonqolu iillannonsata hoolannokkita leellishshanno. Yooseefi wedellichu heeꞌreenna roduuwisi hinaassinosi daafira borojjicho assite hirtinosi; hakkunni gedensaanni Gibitse haaꞌne haꞌnoonnisi. (Kal. 37:28) Yihowa jaalasinna keeraancho soqqamaasinchosi Yooseefi assinoonnita lainotinna iillitinosi gawajjo daafira dadillinoti dihuluullissannote. Ikkollana Yihowa togoori iillannosikki gede diassino. Gedensaanni, Yooseefi Phoxifaari galte seyaatara woꞌnaalino yine usuru minira eessinoonnisi; tenne yannarano Yihowa Yooseefi usuru minira eeessinannita dihoolino. Kayinni Maganu Yooseefi jeefote geeshsha sammi yee lainoni? Dilaino; hatteentenni Yihowa “ledosi noo daafira, [Yooseefira] assannori baalu qiniisi.”—Kal. 39:21-23. w18.01 9-10 guf. 12-14

Mittu manchi ‘Ammanakkihu qaru rosi maati?’ yee xaꞌmihero mayite qolatto? Yihowa Kalaqaanchonna Heeshsho Uyinonkeha ikkinota ammanattota kulattositi egennantinote. Wodo ikke reyinonkeha Yesuusi Kiristoosi ammanattota kulattora dandaatto. Qoleno albillitte uulla gannate ikkitannotanna hakkiicho Maganu manni hegerera heeꞌrannota hagiirrunni kulattosira dandaatto. Kayinni kaote hexxo ammanankehu qaru rosi wido ikkitinota kulatto? Bayira qarra lubbotenni heeꞌne saꞌne hegerera heeꞌrate hexxineemmoha ikkirono, kaote hexxo ammanankehu qaru rosi wido ikkitinota ammanneemmo gede assannonkeri no. Kaote hexxo ammanankera qara coyeeti. Yesuusi reyotenni kainokkiha ikkiro, isi xa iima Maganu Mangiste Moote ikke gashsha didandaanno; hatto ikkiro qole Yesuusi gashshooti daafira rosiinseemmo rosi waaga diafiꞌranno. (1 Qor. 15:12-19) Ninke kayinni Yesuusi reyotenni kainota anfoommo, hattono Maganu reyitinore kayisannota ammana diagurreemmo.—Maq. 12:18; Soq. 4:2, 3; 17:32; 23:6-8. w17.12 8 guf. 1-2

Farisootu cubbo loosino manchi ayimma aana illachisha agurte, isi loosino soꞌro aana calla illachishshanno. Mitte hige Farisootu Yesuusi Maatewoosi mine hurbaate itanna laꞌe rosaanosi “Rosiisaanchiꞌne qaraxaanotenna cubbaataammu ledo mayira itanno?” yite xaꞌmitino. Hakkiinni Yesuusi togo yiinonsa: “Dhiwantinorira ikkinnina fayyaaleeyyete xagisaanchu dihasiisannonsa. Hadhine, ‘Ani kakkalotenni roore maaro hasiꞌreemmo’ yine borreessinoonnihu mayyaatero seekkitine buuxxe! Ani cubbaataamma ikkinnina, keeraano woshshammora didayommo.” (Mat. 9:9-13) Togo yaa Yesuusi shota ikkinokki cubbo ajishe laꞌꞌanno yaateni? Hatto yaa diꞌꞌikkino. Isinni Yesuusi cubbo loosino manni maaro eanno gede koyisino. (Mat. 4:17) Ikkirono, Yesuusi kuri ‘qaraxaanonna cubbaataammu’ giddo mitu heeshshonsa soorrite biddi assiꞌra hasidhannota wodanchino. Insa Maatewoosi minira martinohu sagale itate calla diꞌꞌikkino. Insa hadhinohu Yesuusi ‘hoodeeti.’ (Maq. 2:15) Batinyu Farisooti kayinni Yesuusi wodanchino coye wodancha didandiitino. w17.11 13 guf. 2; 16 guf. 15

Kiristaanu songo miila ikkanke lowo atooteeti. Gambooshshunniwa Maganu Qaale xiinxallankenna mimmito jawaachishanke, albillitte afiꞌneemmo baraarshi aana illachinsheemmo gede kaaꞌlitannonke. Ikkollana coyi kawa kaꞌaa higannonke wote, songote noo salaame baꞌara dandiitanno. Konne qarra ranke tira hoongummoro, roduuwinkera koma amandammora dandiineemmo. (1 Phe. 3:8, 9) Wolootaho koma amada baꞌraarsha afiꞌneemmokki gede guficho ikkitankera dandiitanno; ikkina togoori iillannonkekki gede gargadha dandiineemmohu hiittoonniiti? Phaawuloosi Qolasiyaasi Kiristaana togo yee amaalino: “Maganu doodhino manni gede qullaawootanna baxantinoonnire ikkitine mararro, joongille, shaqqille, shooshanqenna cinca uddanote gede assitine uddidhe. Kiꞌne kiꞌneneewa koffi yitinoonni coye baala cincatenni agurre.”—Qol. 3:12-14. w17.11 27 guf. 7-8

Mittu manchi hedeweelcho mannu lubbo shiiro, eeggote katamiwa mare “katama eꞌnanni waalchira nooriwa yoo yitanno geerriwa shiqe ikkino coye baala kuꞌla” hasiissannosi. Geerru iso anga fante haadhanno. Shiima yanna gedensaanni, hakkonne mancho lubbo shii katamira noo geerriwa sonkanni; hakkiinni insa yoo yitanno. (Kir. 35:24, 25) Kuni manchi eeggote katama higannohu, geerru isi lubbo shiinohu hedeweelcho ikkinota buuxxu gedensaanni callaati. Lubbo shii manchi tenne geerraho kula hasiissannosihu mayiraati? Israeelete songo qullaawa ikkitannonna hedeweelcho mannu lubbo shiino manchi Yihowa maaronni horo afiꞌranno gedeeti. Mittu Qullaawu Maxaafi fullahaanchi hedeweelcho mannu lubbo shiino manchi geerraho mare kula hoogiro mayi ikkara dandaannoro borreessanni togo yiino: “Maganu qixxeessinosi qixxaawo horoonsiꞌra giwino daafira, Kuni manchi hatto assa hoogiro shinasira dandiinanni.” Kuni manchi Yihowa qixxeessinote eeggote katamma giddo mittenniwa mare maaxama hoogiro, isi shiino manchira muli fiixa ikkannohu shiisirono dixaꞌmamanno. w17.11 9 guf. 6-7

Olantote mootichi Yihowa xaano mannasi agaratenna jawaachishate sokkaasinesi soyanno. (Mil. 3:6; Ibi. 1:7) Ayyaanaamittete Israeele 1919nni Bayira Baabiloone borojjimmanni fultu yannanni kayise, mannu giwannoha ikkirono halaalu magansiꞌra baasa halaꞌlitanni no. (Aju. 18:4) Sokkaasine Yihowa dirijjite agartanno daafira, wirro kaphu ammaꞌnora borojje ikkineemmo yine dimanseemmo. (Far. 34:7) Hatteentenni, alame woꞌmate Maganu soqqamaano ayyaanaamittetenni lophitannota addaxxa dandiineemmo. Ninke agarte noo olanto no. Bayiru qarri yannara, Yihowati sokkaasinete olanto Maganu daga agaratenna Yihowa aliidimma gibbannore hunate mitteenni dagganno. (2 Tes. 1:7, 8) Hakku baxxino barraati! w17.10 28 guf. 10-11

Maatekki miili songotenni bohamanno wote woy umisinni halaale aguranno wote bisetenni qansoonnihu gede xissiisirattora dandaatto. Tenne xisso dandee heeꞌrate mayi kaaꞌlannohe? Ayyaanaamittete coye agurrikkinni assa lowo geeshsha kaaꞌlitanno. Qullaawa Maxaafa ganyite nabbawa, Kiristaanu gambooshshe qixxaabbe haꞌra, soqqansho fulanna cincatto gede kaaꞌlahera Magano huucciꞌra ammanakki kaajjitanno gede kaaꞌlitannohe. (Yih. 21) Kayinni kuri coyibba assitanni heedheenna, macciishshantannohe xisso aguralla hoogguhe? Hexxo mudhite ayyaanaamittete coye assa agurtooti! Ayyaanaamitte coye assa agura hoogittoro, macciishshantannohe hedo qeeꞌla dandaatto. Hanni 73^ki Faarso borreessaanchi lawishsha hedi. Isi gara ikkinokkire hedino, hattono lowo geeshsha yaadino; ikkollana isi Magano magansiꞌnanni bayicho haꞌrasi hedosi biddi assiꞌranno gede kaaꞌlitinosi. (Far. 73:16, 17) Atino Yihowara ammanante soqqamakki hatto assate kaaꞌlitannohe. w17.10 16 guf. 17-18

Sheexaanu, Edenete kaashshu basera Heewani coyishiishi wote isera qarraminoha lawanno; ikkollana isi assinori isiniitira roorsiꞌrannohanna dogaancho ikkinota leellishanno. (Kal. 3:4, 5) Akixofeeli Moote Daawitira addu jaala diꞌꞌikkino. Akixoofeeli umisi horora yee Daawitira ammanamikki gatino. (2 Sam. 15:31) Xaa yannarano kaadaasinenna wolootu songote mereero babbadooshshe kalaqa hasidhannori “owaatunna awishshu qaalinni” manna baxxannoha labbanno; ikkollana insa umonsa baxxannoreeti. (Rom. 16:17, 18) Goowi ali baxille leellishshannori, Maganu baxannohu meessi horo agurate baxilli noonsare lawate woꞌnaalansa saalsiissannote. Togoo manni manna dogara dandaanno; ikkollana Yihowa doga didandaanno. Isinni, Yesuusi goowi alinni lawisiissannore woy goowi alinni baxxannore ‘qorichinshannita’ coyiꞌrino. (Mat. 24:51) Konni daafira ninkeneeto togo yine xaꞌma hasiissannonke: ‘Duuchanka wote umiꞌya horo agure wolootaho addu baxille leellisheemmo?’ w17.10 8 guf. 6-8

Soqqammeemmo wote Maganu Qaale fanne nabbambeemmoha ikkiro, hasaawinseemmo mancho Yihowa hasaawisanno gede assinanni heeꞌnoommo yaate. Seekkine hende doorroonni qummeeshshi ninke coyiꞌneemmote aye hedonnino rooranno. (1 Tes. 2:13) Konnira ateneeto togo yite xaꞌmi: ‘Dancha duduwo mannaho kuleemmo wote Qullaawa Maxaafa nabbaweemmo faro hasiꞌreemmo?’ Hasaawinseemmo manchira Qullaawa Maxaafa nabbawa calla diguddanno. Mayira? Korkaatuno batinyu mannira gariti Qullaawu Maxaafi egenno dinonsa. Umi xibbi dirono ikko yannankera noo manni hattooho. Konni daafira qummeeshsha nabbamboommo daafira calla mittu manchi sokka huwatanno yine heda dihasiissannonke. Qara qara qaalla lende nabbambenna tironsa xawinse, qummeeshshunnita qara hedo bande fushsha hasiissannonke. Togo assinummoro, Maganu Qaali sokka rosiinseemmo manni wodaniranna surrera qaꞌmidhanno gede assineemmo.—Luq. 24:32. w17.09 25 guf. 7-8

Maganu olliichinkeranna ammanate roduuwinkera mararro leellinshammora hasiꞌranno. (Yoh. 13:34, 35) Mararro yaanno qaali afiꞌrino tiro giddo mitte “ledo qarrama” yitannote. Mararanno manchi wole manna qarru giddonni fushshate kaꞌꞌanno. Konni daafira, manna kaaꞌlitinanni faro hasidhe! Batinyu manni dano iillitinonsa manna laꞌꞌanno wote mararannonsa. Yihowa manni kaaꞌlo hasiissinonsahu togoo mannira dode iillanno. (1 Phe. 2:17) Lawishshaho hanni Jaappaanete gobbara heedhanno rodoo woꞌnaalsha laꞌno. Ise heedhanno qooxeessira 2011nni baattote huxanonna hambabalatte kaꞌino. Ise roduuwu uminsa fajjonni wolewiinni dagge kaaꞌlitannansanna bushinore biddi assitanna laꞌꞌase “lowo geeshsha jawaachishshinosetanna sheshifachishshinoseta” coyidhino. Ise togo yite borreessitino: “Roduuwu kaaꞌlitinonke kaaꞌlo, Yihowa ninke daafira hedannota wodancheemma gede assitinoe. Qoleno, Yihowa Farciꞌraasine mimmitoho mararro leellishshannoreeti. Alame woꞌmate noohu batinyu roduuwi huuccatto assannonke.” w17.09 11 guf. 12-13

Ninkeneeto qeeꞌla hasiissannonkehu mayiraati? Hanni tenne assa hasiissannonkeha lame korkaata laꞌno. Umihunni, umonsa qeeꞌlanno manni, togo assansanni qarransa ajisha dandaannota huwantoonni. Togoo mannira wolootu ledo dancha aante heedhannonsa; qoleno insa hasattonsa qeeꞌlannokki manni geeshsha dihanqitanno, hattono quwa saꞌe diyaaddanno. Layinkihunni, Magano hagiirsiisate fonqolo qeele saꞌꞌanna gara ikkitinokki yorto qeeꞌla hasiissanno. Addaaminna Heewani yortonsa diqeeꞌlitino. (Kal. 3:6) Hatte yannanni kayise, mannu ooso umonsa qeeꞌla hoogansanni lowo qarri iillanni noonsa. Mannu oosora guuntete xeꞌne noonsa daafira, woꞌmunni woꞌma insaneeto qeeꞌla didandiitanno. Yihowa soqqamaanosira insaneeto qeeꞌla shota ikkitannonsakkita afino; qoleno isi gara ikkitinokki yorto qeeltanno gede kaaꞌlannonsa.—1 Mot. 8:46-50. w17.09 3-4 guf. 3-4

Wodiidi Afirikira heedhannoti addi addi sircho afidhinoti Yihowa Farciꞌraasine waajjishannori noonsakkiha gamba yaa dandiitinokki yanna no. Ikkollana, Sadaasa 18, 2011nni Sambatu barra Wodiidi Afirikinna qooxeessaho noo gobbuwanni 78,000 saꞌannori addi addi sircho afidhino roduuwi, ayyaanaamittete sagale sagaꞌlate Johaanisibergi katamira noote jawa istaadiyeemera gamba yitino. Istaadiyeemete sooreeyye giddo mittu togo yiino: “Xaa geeshsha tenne istaadiyeemera gamba yiino manni giddo togooha dancha amanyoote afiꞌrino manna afe diegennoommo. Baalunku danchu garinni uddiꞌrino. Qoleno, tenne istaadiyeeme dancha gede assitine fiitinoonni. Baalunku coyinni roore dhagge ikkinoeri kiꞌne babbaxxino sirchinni gamba yitinoonnire ikkaꞌneeti.” Yihowa Farciꞌraasine ikkinokki manni ninke daafira coyiꞌrannori, alamete doyichora noo roduuwinke addinta baxxinoha ikkinota leellishanno. (1 Phe. 5:9) Ikkina, wole dirijjituwa baalantenni baxxinoommore ikkineemmo gede assinonkeri maati? Maganu Qaalinna qullaawu ayyaanisi kaaꞌlonni ‘akkala mannimma mulqine tugankeetinna’ “haaro mannimma” uddiꞌrankeeti.—Qol. 3:9. w17.08 17-18 guf. 2-3

Qullaawu Maxaafi cinca qullaawu ayyaaninni afiꞌnanni akata ikkinota kulanno; guuntete xeꞌne noonsa manni Maganu kaaꞌlo nookkiha woꞌmunni woꞌma cinca didandaanno. Cinca Maganu aanno eltooti; iso banxeemmota leellinsheemmote qara qara doogga giddo mitte cincate. Cinca manna banxeemmota leellishateno kaaꞌlitannonke. Cinca hooga kuni baxilli baꞌꞌanno gede assitanno; cinca kayinni jawaachishshanno. (1 Qor. 13:4; Gal. 5:22) Cinca wole Maganu baxanno akatta ledono xaado afidhino. Lawishshaho, cinca qarru yannara danchare hendanni gede assannohu kaajje heeꞌrate akatiwiinni bande laꞌnannire diafidhino. (Qol. 1:11; Yai. 1:3, 4) Qoleno, cinca gawajjannori iillannonke yannara bado qola agurre dandiine heeꞌratenna baxi qarri iillinkerono ammanamme heeꞌrate ledo xaado afidhino. Qullaawu Maxaafi mito coye agadha hasiissannonketa ammanne adha hasiissannonketa xawisanno. Yaiqoobi 5:7, 8te konni garinni cinca hasiissannota xawinsooni. w17.08 4 guf. 4

Wedella, doogo haꞌra hanaffinara albaanni hiikka haꞌra hasidhinanniro balaxxine afa hasiissannoꞌne yiniro sumuu diyitinanni? Heeshsho doogo haꞌrate gedeeti; qoleno albillittete maa assa hasidhinanniro mixo fushshira hasiissannoꞌnehu anje heedhineeti. Hige mixo fushshira shota ikka hooggara dandiitanno. Ikkirono waajjitinoonte. Yihowa dagasira techohu barru qummeeshshira noo hedo coyiꞌrino. Yihowa dancha mixo fushshidhinara jawaachishinoꞌne. (Ros. 12:1; Mat. 6:20) Isi kiꞌne hagiirraamma ikkitinara hasiꞌranno. Isi kalaqinohu laꞌꞌate, macciishshatenna qamasate baxisannori tenne leellishanno. Qoleno isi towaatannonke, hattono dancha heeshsho heeꞌneemmo gara rosiisannonke. Yihowa amaalesi macciishsha giwino mannira togo yiino: “Bunshe doodhitinoonni. . . . Soqqamaanoꞌya hagiidhitanna kiꞌne kayinni saalfattinanni. Soqqamaanoꞌya wodanunni hagiidhite faarsitanno.” (Isa. 65:12-14) Yihowa manni heeshshonsa giddo dancha doorsha doodhansa isira ayirrinye abbitanno.—Law. 27:11. w17.07 22 guf. 1-2

Mitte mittenta beeddakko noo bayicho bade afino Magani, ati mama noottoro, wodanikkira noori maatironna mayi hasiissannohero seekke afino! Yihowa heeshshonke giddo iillinonke qarra afannoha calla ikkikkinni, qarru giddonni fushsha dandaanno wolqa noosi; hattono mararannonke. (Far. 147:5) Iillinohe qarri wolqakkira aleenni ikkinohunna duhikki duqqa dandaattokkiha ikkinohu gede assite hedattora dandaatto. Ikkollana, Maganu dhukikki mageeshshihoro afino; isi ‘bushsha ikkakki dihawanno.’ (Far. 103:14) Guuntete xeꞌne noonke manna ikkinoommo daafira, mitte soꞌro marro marro hinge loonseemmo. Hendummokki koffi assannore coyiꞌne, maalu yortonni amadamme woy mannire hinaanse gedensaanni gaabbinoommo woti heeꞌrara dandaanno. Yihowa togoo soꞌro loosannokkiha ikkirono, wolqasi bayira ikkitinohura ninke gari leellannosi! (Isa. 40:28) Qarru iillinohe yannara Yihowa jawaata angasinni irkise kaaꞌlinoheha ikkara dandaanno.—Isa. 41:10, 13. w17.07 18-19 guf. 6-8

Xa wole gobbara heeꞌrannohu mittu Sirilaanku gobba rodii, qaesi songotenna jajjabba gambooshshe assiꞌnanni gede hattono woꞌma yanna soqqamaasine galtanno gede uyino. Isi togo assinohu afiꞌranno woxe agureeti; ikkirono hatto assasi qooxeessaho heedhannote anga ajjino halashshaanora lowore kaaꞌlitino. Wongeelu loosonke agamboonni gobbuwara roduuwinke minensa Gambooshshu Addaraashe gede assine horoonsiꞌnanni gede fajjino; tini lowo suwisaanonna angate anje amaddinonsa roduuwi woxe baaxxitukkinni gambooshshe assidhanno base afidhanno gede assitino. Maganu Mangiste loosira woxe ganyite fushshitannoti mitte rodoo afidhino atooti daafira togo yitino: “Maalaamittete coye shaqqillunni aaꞌya dhagge ikkanno coye laeemma gede assitinoe. Albinni roore shaqqillunni uumma kiiro, mannu ledo nooe aante albinni roore seekkino. Shaqqillunni gatona yuumma kiiro, albinni roore cinceemmata, koffi assanno coye dandee saeemmatanna amaale adha qarrissannoekkita ikkoomma.” w17.07 9 guf. 9-10

Iyyoobi qarru iillinosihu mayiraatiro jeefote afinoha ikkirono, Yihowa buutote qarri iillannoe gede fajjinohu mayiraati yee hedino woti heeꞌrara dandaanno. Isi hedinori baxiha ikkirono, Maganu seejjinosi seejjo hiinca dandaanno. Hatto assasi gara ikkitino lao heedhannosi gede, hattono shesho afiꞌranno gede kaaꞌlitannosi. (Far. 94:19) Iyyoobi xagge, ninkeno garu lao heedhannonkenna shesho afiꞌneemmo gede kaaꞌlitannonke. Qoleno Yihowa tenne xagge borreessinanni gede assinohu cincatenninna ‘Qullaawa Borro widoonni afiꞌneemmo jawaantenni hexxo heedhannonke gede rosiisankera’ yeeti. (Rom. 15:4) Iyyoobi xaggenni maa ronseemmo? Uminke dilgo calla hendanni lowo geeshsha hasiissanno hajo, yaano Yihowa aliidimma deꞌneemmokki gede qoropha hasiissannonke. Qoleno, Yihowa aliidimma irkisate Iyyoobi gede qarru yannara nafa ammanamme heeꞌra hasiissannonke. w17.06 24 guf. 9; 25 guf. 13-14

Yesuusi mito wote fooliishshira hasiissannota afino. Mitte hige Yesuusi rosaanosi ledo soqqamanni keeshshihu gedensaanni rosaanosira techohu barru qummeeshshira noo hedo coyiꞌrino. Boohaarshu fooliishshiꞌratenna wolqanke haaroonsiꞌrate lowo geeshsha kaaꞌlannonke. Ikkirono, heeshshonke giddo boohaarsha balaxisiinseemmokki gede qoropha hasiissannonke. Umi xibbi diro heeꞌrinohu batinyu mannira “Gaꞌa reyineemmo daafira, into ango” yitanno hedo noonsa. (1 Qor. 15:32) Hatteente gede yannankera alamete giddo noo mannirano togoo hedo noonsa. Ikkina, boohaarshaho quwa saꞌnoommotanna teꞌee afa dandiineemmohu hiittoonniiti? Lamalate giddo ayyaanaamittete loosira, mageeshshi saate sayinsoommoro borreessine amada dandiineemmo. Hakkiinni aanchine hatte lamalara boohaarranni yaano ispoorte loonsanni, baxisannonkere assinanni, televizhiine laꞌnanni woy viidiyote godoꞌle godoꞌlinanni sayinsoommo saate ledo heewisiinse laꞌꞌa dandiineemmo. Boohaarreemmo yanna roortannoha ikkiro mitore biddi assiꞌra hasiissannonke.—Efe. 5:15, 16. w17.05 24-25 guf. 11-13

Yesuusi ayirrado uduunnicho woy inqu hasiꞌranno daddalaanchire kulanno lawishsha coyiꞌrino. Ikkollana tenne inqu hidhate noosire baala hira hasiissinosi. Tini inqu isira mageeshshi geeshsha lowore ikkitinoro hanni hedi! Maganu Mangiste halaali lowo waaga afidhino inqu gedeeti. Maganu Mangiste daddalaanchu inqu baxi gede banxeemmoha ikkiro, tenne Mangiste qansoota ikkine heeꞌrate assa hasiissannonkere baala assineemmo. (Maq. 10:28-30) Lawishshaho, Zakkiwoosi manni woxe hanaaqe adhanni dureessa ikkino. (Luq. 19:1-9) Ikkollana, kuni cubbaataamu manchi Yesuusi Maganu Mangiste daafira sabbakanna macciishshi; isi macciishshinori lowo waaga afiꞌrinoha ikkinota huwatinohura hakka wontenni mittore assate kaino. Zakkiwoosi togo yiino: “Mootichaꞌya, afiꞌroommo jiro baalantenni taaloote buxanete eemmo. Mannuwiinni hanaaqe adhoommo woxi heeꞌrirono, shoole anga asse qoleemmo.” Isi hanaaqe adhino jiro baala hagiirrunni uyino; hattono maalaamittete coyira hafuura agurino. w17.06 10 guf. 3-5

Annuwunna amuuwu oosonsa kaaꞌlara wodhitino roduuwi, ooso annansanna amansa ayirrissanno gede assa hasiissannonsati egennantinote; tenne assate annuwansanna amuuwansa ayirrissanno gede assanno garinni coyiꞌra hasiissannonsa; qoleno anna woy ama ikkitinoha dilawissanno. Qoleno ooso kaaꞌlitannori, songote giddo noori woy wolu manni wolere hedanno gede assannore assitannokki gede qorophitanno. (1 Phe. 2:12) Annuwunna amuuwu oosonsa wolu manni rosiisanno gede assiturono facci assite agura dihasiissannonsa. Insano kaaꞌlannonsa Kiristaani rosiisinore assitanno gede assanna insa uminsa rosiisa hasiissannonsa. Annuwanna amuuwa, Yihowa kaaꞌlaꞌnera huuccidhe; qoleno assa dandiitinannire baala asse. (2 Dud. 15:7) Umiꞌne hasattonni roore qaaqqiꞌne Yihowa jaala ikkanno gede asse. Maganu Qaali qaaqqiꞌne wodanira qaꞌmiꞌranno gede dandiitinannire baala asse. Qaaqqiꞌne Yihowara soqqamannoha dancha Kiristaancho ikkanno yitine hexxa agurtinoonte. w17.05 12 guf. 19-20

Hanni konne coye hedi. Mitto mancho, buutote cubbo loosootto yine beebba worroonnisi. Isira yoo yinoonnisihu yawaawulootu mannooti nookkire coyidhinore haaꞌneeti; tini minisi manniranna jaallasira yitannori baꞌꞌannonsa gede, hattono dadillitanno gede assitukki digattino. Taashsho baxanno manni beebbaataamo manchonna oososi shinanna laꞌꞌansa lowo geeshsha dadillanno gede assitino. Tini xagge qalote borro diꞌꞌikkitino. Tini, Yihowara ammaname soqqaminohunna Moote Akiaabi Israeelete moohe noo yannara heeꞌrinohu Naabute xaggeeti. (1 Mot. 21:11-13; 2 Mot. 9:26) Moote Akiaabi Naabuteha woyinete kaashshi bayicho woxunni hidha woy hakkiinni roorino bayicho oyesi soorriꞌra hasiꞌrannota kulisi yannara, Naabute sumuu yaa giwino. Mayira? Yihowa Israeele ragidhino baatto wole gaꞌrera hirtannokki gede higge uyino; Naabute woyinete bayichosi hira giwinohu tenne higge ayirrisannohuraati. (Lew. 25:23; Kir. 36:7) Isi coye laꞌꞌannohu Yihowa laꞌꞌanno garinniiti. w17.04 23 guf. 1; 24 guf. 4

Bushu manni baꞌꞌanno wote hiittoo manni gatanno? Yihowa togo yitannota hagiirsiissanno hexxo uyinonke: “Shaqqaddu kayinni baatto ragidhanno; atootenna keere afidhe hagiidhitanno.” Tenne faarsoranni togo yitanno hedo no: “Keeraano baatto ragidhanno; ise aanano hegererano heedhanno.” (Far. 37:11, 29) “Shaqqaddu” woy jooguullunna “keeraano” yiniri hiittoo mannaati? Jooguullu Yihowa rosiisannorenna aanno biddishsha maahoyye yite adhitannoreeti; keeraano kayinni Yihowa albaanni gara ikkino coye assa baxxannoreeti. Yannankera alamete aana keeraanchu manninni bushu manni rooranno. Ikkollana, daggannote haaro alamera, keeraanchu manni bushu manninni diegemmamanno woy keeraanchu manni rooreenna bushu manni giddonsa diheeꞌranno; korkaatuno hattee yannara heeꞌrannohu keeraancho manna callaho. Ee, togoo dagoomi uulla gannate ikkitanno gede assanno! w17.04 10-11 guf. 5-6

“Maganu baxilli” mimmitinkera baxille leellinsheemmo gede assannonke; roorenkanni qarru yannara hatto assa hasiissannonke. (1 Yoh. 3:17, 18) Umi xibbi diro Yihudu Kiristaana hude amaddu yannara, ayyaanaamittete roduuwinsa kaaꞌlinonsa. (Soq. 11:28, 29) Soqqamaasine Phaawuloosinna Pheexiroosino, Kiristaanu mimmitonsa wosinsanno gede amaaltino. (Rom. 12:13; 1 Phe. 4:9) Kiristaanu dartu iillinonsakki roduuwansa wosinsa hasiissannonsaha ikkiro, qarru iillinonsaha woy ammanansanni kainohunni daraminoha ayyaanaamittete roduuwansa isinni roore kaaꞌla hasiissannonsati egennantinote! Muli yannara Yukireenete soojjaatoonni olu kai yannara, haammata kume ikkitannori Yihowa Farciꞌraasinera dartu iillinonsa. Insa giddo mitu reyino; tini dadillissannote. Ikkollana, insa giddo batinye Yukireenete gobbankura wolewa heeꞌranno roduuwinna Ruusiyaho heeꞌranno roduuwi haaꞌrinonsa. Insa lamente gobbara heedhu yannara poletiku hajora anga wodha gibbe alamete wido ikkitinokkita leellishshino; qoleno ‘Maganu qaaliha’ dancha duduwo diinaggaabbe dudubbino.—Yoh. 15:19; Soq. 8:4. w17.05 4 guf. 6-7